Johannesi 5
5
Merukitho ghamurume ghomuBetesta mudiyuwa dyoSabata
1Munyima dhokenge yo, dya karire karo difeste dyaWajuda. Ko kukanduka Jesusi gha yende kuJerusalema. 2MuJerusalema pepi nodikorogho dyondjwi, dya karire diviya edi ha toyire muThiheburayi eshi, Betesta. Kumbadi dhadyo kwa karire maghundhi ghomikara kwoko. 3Omu ne mwa karire hakakukorwa hohengi, hakunga, hayihwere nawakakughara, awa ha tatererire makupinganeno ghomeyu. 4Yoyi muengeli waFumu gha shurukire munako kunako mudiviya di, no gha kupinganithire meyu. Yomuhe oyu gha tangire kukuma kumanyiwe ghomeyu, gherukire kukehe thikorwa thi gha karire natho. 5Mukatji kawo gha karire murume, oyu gha korwire myaka makumi mahatu nokwoko nodhihatu. 6Apa gha mu monine Jesusi ghana rara, oku ye ghana yi dimuka eshi, munu yu ghana dhighama noyikorwa. Ha ghamba kwendi kwamukakukorwa eshi: “Ghuna haka kwiruka ndi?”
7Mukakukorwa gha huthire eshi: “Fumu, na piri munu ghokunitura mudiviya, ngeshi ku ghana kukupingana meyu, oku shime na karera mukuyenda, kare nga ni piterera po ghumweya.”
8Jesusi gha mu rawerire eshi: “Wimane, tumbure murongerero ghoye ghu ka yende.” 9Popo vene heruka, ha tumbura murongerero wendi gha ka yende.
Diyuwa di ne dyaSabata. 10Ko kuninga Hajuda koyu gherukire eshi: “Dyarero ne Sabata, mbadi wa kona kushimba murongerero ghoye.”
11Aye ha wa hutha eshi: “Yoyu ghana nirukitha, yo ghana ni tongwera eshi: ‘Tumbure murongerero ghoye ghu ka yende.’ ”
12Ha mwipura kwawo eshi: “Munu munye yu ghana kutongwera eshi: ‘Tumbure murongerero ghoye ghu ka yende’?”
13Oyu gherukire, mbadi gha dimukire eshi yidye ghana mwirukitha. Yoyishi Jesusi ne gha verukire wangu gha tunde po, pamurandu ghombunga dhawanu dhi dha karire padyango di.
14Munyima gha mu wanine Jesusi murume yu mutembeli, no gha mu tongwerire eshi: “Mone, ndjewa‐ndjewa ghu di keho. Perere‐poye eshi wa kuharure karo, maghana ya kukuwana yokupiterera.”
15Murume yu, gha yendire kwaWajuda no gha ka wa thimwetwedherire eshi, Jesusi yo gha mwirukithire. 16Muyinu yi, Hajuda ha mu kuthakuthire Jesusi nonyinya, yoyishi muSabata gha yi tendire. 17Ene Jesusi gha wa dimbururire eshi: “Tate, shime ha rughana kate nodyarero, Name kemo na kurughana.”
Mwana ne yomuparithi
18Payinu yi po ha shanenine Hajuda kumupagha Jesusi. Kadi ghushinyi ghokuSabata pithagho keho, ene yoyi gha toyire Nyambi eshi Wihe. No gha kurikanyithire thinda kwaNyambi.
19Munyima gha wa dimbururire no kuwatongwera eshi: “Na kumumanithera, Mwana ne mbadiko thokukutendera thinda. Ghana kutenda vene ethi ghana kutenda Wihe. Yoyishi ethi gha tenda Wihe, naye Mwana ghana kuthitenda kemo. 20Yoyi Wihe gha haka Mwana no ghana kumuneghedha yoyiheya eyi ghana kutenda. No yitenda yimweya yokupiterera yi mbo ghana yi mu neghedha, kate mbo mu tetuke mwahe. 21Thika di gha tumuna Wihe hafu no kuwaparitha, kemo ghana kuparitha naye Mwana oyu ghana himi. 22Karo Wihe mbadi gha tetera ndhango noyofotji temba, kutetera ndhango ne gha mana kutapa kwaMwana. 23Yodigho, wahe ha kutekere Mwana thika di ha kutekera Wihe. Oyu ghukudhira kukutekera Mwana, mbadi ghana kukutekera karo Wihe yu gha mu tumine.
24“Ghushemwa na kumutongwera. Oyu ghokutegherera koyi na kughamba, no kutawa kwa yu gha ni tumine, ghana kuwana moyo ghororuheya. Mbadi ghana kupwa kutetera ndhango, yoyishi kare gha shwagha mukufa no ghengena kumoyo. 25Ghuhunga na kumutongwera: Mbo dhi neya nako, adho ne dhodino. Edhi mba yuva hafu diywi dyaMwana Nyambi, awa mba di yuva mbana para. 26Yoyishi thika di gha kara Wihe nomoyo mumwendi, kemo dyo gha tapire karo kwaMwana eshi gha kare naye nomoyo mumwendi thinda. 27Gha mu pire karo ngcamu dhokutetera ndhango, yoyishi aye ne Mwanamunu. 28Mwa tetuka kuyinu yino. Mbo dhi neya nako edhi mba yuva diywi dyendi awa mba kara muyipiro, 29no mbana vumbuka. Awa ha tendire yoyihunga, mbana vumbuka no mbana para. Ene awa ha tendire ghuyi, mbana vumbuka no mbana pu kutetera ndhango.
Ghunongononi ghokwaJesusi thinda
30“Mbadiko thi na kukuhimena kutenda nothinda. Na kutetera ndhango thika di na kuyuva kukwendi, no ndhango dhange ne dhaghuhunga. Yoyishi mbadi na kutenda yi kumahimeno ghange, ene kumahimeno gha yu gha ni tumine.
31“Ngo ni kunongonone nothinda, manongweneno ghange ne ngo gha nyara‐nyara. 32Poghadi yu ghana kuninongonona, ho na dimuka shemwa eshi, manongweneno ghendi ghaghushemwa.
33“Amwe ne mwa tumine hayitumi kwaJohannesi, no yi gha ka nongononine, yaghushemwa. 34Ame ne mbadi na kudhimangedha ghushupi wamunu, eyi na kuyighambera yi ne mu pwe kughamwena. 35Aye gha karire munyenge ghokutumbuka no kwekeshera. Namwe mwa himine kukara kamanana ghunyanyuka muthishe thendi.
36“Ene me, na kara nomanongweneno ghomakuru kupiterera ghaJohannesi. Yirughana yi gha ni pire Tate eshi ni yi yarithe, yirughana yoyi na kurughana, yo yina kuninongonona no kutanaritha eshi Tate, yo gha ni tumine Me. 37NaTate yu gha ni tumine Me, naye gha ni nongonona. Shimwe mushemwa mwe eshi ko kuyuva diywi dyendi, no kumona nungu dhendi temba. 38No mbadi mwa tungitha n̂ando dhendi mumwenu, yoyishi mbadi mwa tawa kwayofotji yu gha tumine ye. 39Mwa rondononanga Yitjanga, yoyi mwa ghayara eshi mo sho mu wane moyo ghororuheya. Ene shemwa noYitjanga yi ya ni nongonona. 40Amwe ne mwa shwena kwiya kukwange eshi na mu wane moyo.
41“Ame ne mbadi ha ni pakera po, kudikuto edi hana kuneghedha hanu. 42Ene na mu dimuka eshi, mbadi mwa kara noruhakitho rokwaNyambi mumwenu. 43MuDina dya Tate neyire Me, amwe ne mbadi muna kunitambura. Ngeshi heya ghumweya wayenaye mudina dyendi thinda, muna kumutambura mwe. 44Ngo ngepi di sho mu tawe muMwange, oku mwathinda pakukukutekera‐kutekera, dikuto dyowaNyambi ghopithendi ne kadi dya kushana? 45Mwa ghayara eshi mbo na ka mu heta kwaTate, Mosesi yu mwa kurupera, yo mbo gha ka mu heta. 46Yoyishi ngo mwa mu tawire Mosisie, Name ngo mwa ni tawa, yoyi aye gha tjangire yokukwange. 47No ngeshi mbadi muna kutawa yitjanga yendi, ngepi keho sho mu tawe man̂ando ghange?”
Attualmente Selezionati:
Johannesi 5: MHW1986
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mbunga dhoBayibili dhaNamibia (Bible Society of Namibia) 1986