Johannesi 6
6
Mavurithero ghomaghuroto
(Mat 14:13–21; Mark 6:30–44; Luk 9:10–17)
1Kutunda po ko kutjinaghana Jesusi dikuriviya dyaGalileya, edi ha toyire karo eshi dyaTiberiyasi. 2Ko kumukutha mbunga dhodhingi dhawanu, yoyi ha monine yitetukitho yi gha tendire kwawakakukorwa. 3Ha dhini Jesusi kudirundu no gha ka hungumanine ko nawakathishongero wendi. 4Difeste dyoPaska waWajuda, dya henyine pepi.
5Apa gha kambukire Jesusi, gha monine mbunga dhodhingi edhi dhina kumwiyera, gha ningire kwaFilipusi eshi: “Kupi sho tu ghure ghuroto ha kone kudya hanu?” 6Eyi gha mwipwerire kemo ne, kuyereka gha mu yerekire vene. Yoyi thinda gha dimukire eyi sho gha tende.
7Filipusi gha mu huthire eshi: “Maghuroto ghomarandi mathere mawadi, mbadi gha rikanya kukuwana kehe yu kamingwa.”
8Mukathishongero ghumweya Andreyasi ghomina Simon Petrusi, gha tongorire kwaJesusi eshi: 9“Po ka di pano kamughundju, aka ka di nomaghuroto kwoko ghotumbi, eyi ne yinye kwawanu hohengi kemo?”
10Ha ningi Jesusi eshi: “Mu hungumeke hanu.” Padyango di, pa karire muhonyi ghowingi no hanu ha hungumanine. Harume pithawo, ngwa mayovi makwoko. 11Ko kutumbura Jesusi ghuroto, ha tumera kwaNyambi no ha ghu taperire, kwawa ha hungumanine po, noithi nadho karo thika di ha himine. 12Munyima dhokwikuta hanu, gha tongwerire hakathishongero wendi eshi: “Mu kongwedhe yigonyo‐gonyo yi yina thighara ko eshi, kadi pa kuyongara nokamanana temba.” 13Nawo ha yi kogha‐koghire. Pa karire yikote dikumi noyiwadi, ho ya yarire kuyigonyo‐gonyo yomaghuroto kwoko ghotumbi, oku hanu ne hana mana kudya.
14Apa ha monine hanu thitetu thi gha tendire Jesusi, ha ningire eshi: “Oyu ne muporofeta shemwa, oyu gha kona kwiya mukaye.” 15Pa kuyidimuka Jesusi eshi, nomuthineneko hana kwiya, ha mu tende fumu wawo, ko kuvishuka po karo pithendi gha yende kudirundu.
Jesusi ghana kuyenda pameyu
(Mat 14:22–33; Mark 6:45–52)
16Parunguro, ko kuyenda hakathishongero waJesusi kudikuruviya. 17Ha perama kwawo muwato, ha tjinaghane thambodiya dhaKafarnaghumu. Oku ne kanguronguro, naJesusi oku mbadi ghana ka huka kukwawo. 18Diviya nadyo ne pakutjimbadhoka mangumbi, yoyi wa karire po mupepo ghushokuru. 19Oku shime ha karera mukuvugha thiko thomakilometeri kwoko endi kwoko noyofotji, ha mone ko ne Jesusi yu ghana kuyenda pameyu pepi nowato. Ko kuyapa kwawo. 20Aye ne gha wa tongwerire eshi: “Ye, aghu Yame, mwa yapa.” 21Nawo ha tokomenine kumupereka muwato no ha ka thekerire wato oku ha tambire.
Yidya yi ya shurukire mudiwiru
22Midiyuwa dyokuranda ko, ha monine hanu wa ha thigharire thambodiya dhodikuruviya eshi, wato ne ghofotji ghu di po. No ha dimukire eshi, Jesusi ne mbadi ghana perama nawakathishongero wendi muwato, pithawo vene ha kuvughire. 23Ho gheyire mato ghamweya agha gha tundire kuTiberiyasi, pepi nodyango edi ha dyererire hanu ghuroto, apa gha manine Fumu kutumera. 24Pakumona hanu eshi, Jesusi ne mbadipo nawakathishongero wendi temba, ko kuperama kwawo mumato ha yende kuKafarnaghumu, kukushana Jesusi. 25Apa ha ka mu wanine thambodiya dhodikuruviya, ha mwipurire eshi: “Muruti, ruvedhe munye ghuna kumu kuno?”
26Jesusi gha wa huthire eshi: “Shemwa na kumutongwera: Mbadi muna kunishanena payiperemeka yi mwa mona, ene yoyi mwa dire ghuroto no mwekutire. 27Mwa rughanena yidya yokupwa, ene mu rughanene yidya yokudhira kupwa no yokutapa moyo ghororuheya. Eyi ne mbo ghana yi mupa Mwanamunu, yoyi Nyambi Wihe yo gha mu pa ngcamu dhokuyinu yi.”
28Ha mwipura kwawo eshi: “Thinye sho tu rughanene Nyambi, ethi gha hima kukwetu?”
29Jesusi gha wa huthire eshi: “Ethi gha hima Nyambi kukwenu ne thino, kutawa mumwendi Yu gha tumine Ye.”
30Awo ha mu tongwerire eshi: “Thitetukitho munye sho ghu tende, tu thi mone ho tu tawe mumoye? Yinye sho ghu tende we? 31Hakererekandongo wetu ha dire mana mumamboreya, thika di ya pwa kutjanga eshi: ‘Gha wa pire ghuroto ghomudiwiru ha dye.’ ”
32Ha wa hutha Jesusi eshi: “Shemwa, kadi Mosesi gha mu pire ghuroto ghomudiwiru, ene Tate yo ghana kumupa ghuroto ghoshemwa ghomudiwiru. 33Yoyishi ghuroto ghu ghana kutapa Nyambi ne, yoYu gha shurukire mudiwiru no kutapa moyo mukaye.”
34Awo ha mu tongwerire eshi: “Hekudyetu ghutu pange roruhe ghuroto ghu.”
35Ha wa hutha Jesusi eshi: “Yame noghuroto ghokutapa moyo. Oyu ghokwiya kukwange mbadi mbo gha fa karo ndhara, noyu ghokutawa mumwange mbadi mbo gha fa shime dinota. 36Ene mwe, na manine kumutongwera kare: Kumona muna kunimona, ene kadi wa kutawa mumwange. 37Yomuhe yu ghana kunipa Tate, ghana kwiya kukwange, noyu ghana kwiya kukwange, mbadi mbo ni mu mwagha nokamanana temba. 38Yoyi mbadi na shurukire mudiwiru kukutenda mahimeno ghange, ene kutenda mahimeno gha Yu gha ni tumine. 39Mahimeno gha Yu gha ni tumine ne ghano: Pawahe wa gha ni pire, mbadi gha kona kuyongara po ghumweya, ene mudiyuwa dyoghuhura, mbo ha vumbuke wahe. 40Yoyishi ghomahimeno ghaTate eshi: Kehe yu ghokumona Mwana no kutawa mumwendi, mbo ghana wana moyo ghororuheya; no mbo na mu tumuna mwawafu mudiyuva dyoghuhura.”
Hajuda mbadi hana kutjwathana man̂ando ghaJesusi
41Ko kuvunguta Hajuda yoyi gha ghambire eshi: “Yame ghuroto ghu wa shurukire mudiwiru.” 42Gho ha ningire eshi: “Kadi yoJesusi ghomwana Josefu yu ndi? Atwe ne twa dimuka hawihe nanyina. Pashanye sho gha ghambere keho eshi: ‘Mudiwiru na tunda Me’?”
43Jesusi gha wa huthire eshi: “Mwa kuvungutera‐vungutera. 44Noyofotji temba gha kona kwiya kukwange, ngeshi mbadi ghana mu kokera kukwange Tate Yu gha ni tumine; Ame ne mbo na mu tumuna mwawafu mudiyuwa dyoghuhura. 45Kwamuporofeta ghumwe ya pwa kutjanga eshi: ‘Wahe ha pwa kuhonga kwaNyambi.’ Kehe yu gha teghererire kwaTate, no gha kuhongire kukwendi gheye kukwange. 46Mbadi yina kuninga eshi, ghumweya wayenaye gha monine Tate, shimengwa Yu gha tunda kwaNyambi, yo gha monine Tate.
47“Ghushemwa na kumutongwera: Oyu ghokutawa mumwange, ghana wana moyo ghororuheya. 48Yame ghuroto ghokutapa moyo. 49Hakerekandongo wenu, mana ha dire mumamboreya, ene ha fire. 50Ghuno ne ghoghuroto ghokushuruka mudiwiru, ngeshi ha ghu di munu, mbadi gha kona kufa. 51Yame ghuroto ghoghuyumi ghu wa shurukire mudiwiru. Ngeshi ha di ghumweya kughuroto ghuno, mbo ghana para kuroruheya. Ghuroto ghu ne, yirama yange eyi mbo ni tapa eshi, mbo ka pare kaye.”
52Ko kukukanana Hajuda eshi: “Ngepi di sho gha kone kututapera nyama dhendi kukudhidya twe?”
53Ha wa tongwera Jesusi eshi: “Kemo, yashemwa na kumutongwera: Ngeshi mbadi mbo mu dya yirama yaMwanamunu no kunwa manyinga ghendi, mwa pira moyo mumwenu. 54Oyu ghokudya yirama yange no kunwa manyinga ghange, ghana kuwana moyo ghororuheya, no mbo na mu tumuna mwawafu mudiyuwa dyoghuhura. 55Yoyishi yirama Yange ne yidya yoshemwa, nomanyinga Ghange ne yinwa yoshemwa. 56Oyu ghokudya yirama Yange no kunwa manyinga Ghange, ghana kukara mumwange, name mumwendi. 57Thika di gha ni tumine Tate ghomukamoyo, no thika di na kupara muMwendi, kemo dyo mbo gha para mukakunidya Me. 58Ghuroto ghuno wa shurukire mudiwiru, mbadi wa kara thika mana yu ha dire hakerekandongo wenu. Awo ha dire, ene ha fire. Oyu ghokudya ghuroto ghuno, mbo ghana para kuroruheya.”
59Eyi ne gha yi tongorire Jesusi, oku Ye pakuhonga hanu musinagoge muKafarnaghumu.
Yikutamangera yomatawero ghomwawakathishongero waJesusi
60Wingi wawo hakathishongero waJesusi, apa ha yi yuvire ha ningire eshi: “Eyi ghana kughamba n̂anyi‐n̂anyi ne yikukutu keho. Yidye ghokuyitegherera?”
61Jesusi gha yi dimukire eshi, hakathishongero yo hana kuvunguta yi ghana ghamba no gha ningire kukwawo eshi: “Amwe ne muna yi tutukwa yi? 62Ngepi keho mbo yi kara, ngeshi mbo mu mone Mwanamunu apa mbo gha huka ku gha tungire pakutanga? 63Mupepo ne yomukakuparitha, munu thinda vaye. Eyi na mu tongwera, mwaMupepo ya shwagha no gha tapa moyo. 64Ene pa di hamweya papenu, awa hana kudhira kutawa mumwange.” Ene Jesusi, gha dimukire kutunda kumutango eshi, yidye yu ghana kudhira kutawa, no yidye yu gha kumuhokora. 65Shime gha ghambire karo eshi: “Yo na yi mu tongwerire eshi mbadiko yu gha kona kwiya kukwange, oku mbadi gha yi mu pa Tate.”
66Kutunda pashakengeyo, wingi wawakathishongero wendi ha thighukire no ha hukire kudighumbo, no mbadi ha yendaghurire karo pofotji nendi. 67Ko kwipura Jesusi kwawashadikumi nohawadi eshi: “Mbadi muna haka namwe kuhuka ndi?”
68Ha mu hutha Simon Petrusi eshi: “Fumu, kwadye sho tu yende? Yowe wa kara noman̂ando ghokutapa moyo ghororuheya. 69Natwe twa tawa ne thikuma, no twa dimuka eshi Owe ne ghoMupongoki waNyambi.”
70Po gha wa tongwerire Jesusi eshi: “Kadi Yame nothinda na mu tororire mwe mwashadikumi nohawadi ndi? Noyofotji ghopapenu ne shatani!” 71Aye gha ningire kwaJudasi mwana Simon Iskariyoti, yoyishi yo gha kumuhokora, yofotji ghopawashadikumi nohawadi.
Attualmente Selezionati:
Johannesi 6: MHW1986
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mbunga dhoBayibili dhaNamibia (Bible Society of Namibia) 1986