Lukasi 18
18
Maghanekero ghamudidhi namupanguri
1Jesusi gha wa ghanekerire karo maghanekero no kuwatjwathanitha thiwana eshi, munu mbadi gha kona kuvapa kurapera, gha pire ghuthighana. 2Gha ningire eshi: “Gha karire mupanguri mumbara dhimweya, oyu gha dhirire kukutekera Nyambi nomunu temba mbadi gha mu kudhekerire. 3Mumbara dhi mwa karire mudidhi, oyu gheyangire roruhe ghukuhema kukwendi eshi: ‘Tende ghuhunga nange, ghu ni ghamwene kwawan̂ore dhange.’ 4Mumayuwa ghomare mbadi gha himine mupanguri yu, ene munyima gha kwipudhurire thinda eshi: ‘Ngambi kenge na dhira kuyapa Nyambi, no kwamunu temba mbadi na kukudhekera. 5Ene yoyu mudidhi ghana kunipambeka, na kumughamwena kundhango dhendi, maghana mbo gheya munyima na gha ngcambure.’ ”
6Ko kuninga Fumu eshi: “Mu yuve eyi ghana kuninga mupanguri ghomuyi. 7Nyambi ne kutoperera wa gha torora awa hana kumukumbera mutenya noghuthiku, kukuwatendere ghuhunga ndi? Endi kuwathigha ha taterere rure? 8Na kumutongwera eshi, Aye mbo ghana wa ghamwena wangu. Ene pamwiyero waMwanamunu ne mbo ghana na wana shime matawero pamuve ndi?”
Maghanekero ghaMufarasayi namuketethi
9Ko kutongora karo Jesusi kwawamweya awa ha ghayarire eshi, hahunga muyinu yawo kwaNyambi, no ha nyathire hamweya, maghanekero gha eshi: 10“Hanu hawadi ha yendire kutembeli kukurapera. Ghumweya ne Mufarasayi naghumweya ne muketethi.
11“Mufarasayi ghengenine no gha kurapererire thinda munyima eshi: ‘Na kukutumera ghoNyambi, yoyishi ame mbadi na kara yira hanu hamweya, hedhi, hakambango, hakakutjora mayekero — no, karo, ame ne kadi yira yu muketethi. 12Ame, kudhirerekedha ruwadi muthivike, no na kutapa dikumi pakehe ghugavo wange.’
13“Muketethi ne ghemanine kokayenda, no mbadi gha kuremekire thinda eshi gha kambure meho ghendi kudiwiru. Gha kupumurire pamuyidi wendi ghutokota no gha ningire eshi: ‘GhoNyambi ghu ni fere n̂eke nothiharuri me.’ 14Na kumutongwera eshi: Murume yu, gha hukire kudighumbo dyendi yira munu yu ghana roghitha yinu yendi naNyambi. Ene, kadi ya ghumweya. Yoyishi kehe yu ghokukukutekera thinda, mbo ghana shwahuka; noyu ghokukushwahura thinda, mbo ghana pu kukutekera.”
Jesusi nawanuke
(Mat 19:13–15; Mark 10:13–16)
15Ko kureta karo hanu hanuke kwaJesusi eshi, gha kone kuwakundama. Apa ha yi monine hakathishongero, ha wa shingire nonyinya. 16Ene Jesusi gha wethire no gha wa tongwerire eshi: “Mu thighe hanuke heye kukwange mwa wa shinga, yoyi ghutungi waNyambi ne shemwa wawanu hokupitura hanuke wa. 17Eyi ne ghushemwa na kuyimutongwera. Oyu ghokudhira kutambura ghutungi waNyambi yira mwanuke, mbadi mbo gha kona kwingena mo.”
Mungaghu ghomutungi
(Mat 19:16–30; Mark 10:17–31)
18Murume ghomanongwaho, ghepurire Jesusi eshi: “Muhongi ghomunongo, nye sho ni tende kukuwana moyo ghororuheya?”
19Jesusi gha mu huthire eshi: “Nye ghuna kunitoyera eshi munongo? Mbadiko munongo, shimengwa Nyambi pithendi keho. 20Wa dimuka miragho: Mbadi wa kona kutjora mayekero, wa pagha, wa ghamba yishewe, fumaneke wiho nanyoko!”
21Aye ne gha huthire eshi: “Yinu yoyiheya yi, na yi kwata kutunda kuwanuke wange.”
22Apa gha yi yuvire Jesusi, gha mu tongwerire eshi: “Thinu thofotji thakupira po: Yende ghu ka ghurithe yoyiheya yi wa muna, no ghu ka tapere manyinga kwawahepwe. Ndani po mbo ka wana ghutungi mudiwiru. Wiye ne kuno no ghu ni kuthe.” 23Pakuyiyuva yi, gha tokotire thikuma yoyi gha karire mutungi thikuma.
24No apa gha mu monine Jesusi eshi ghana tokota, gha ningire eshi: “Ngepi ghukukutu kwawatungi kukwingena mughufumu waNyambi. 25Kwangameno ne ghuredhu kwingena mudiho dyothonga, kupiterera mutungi kukwingena mughufumu waNyambi.”
26Po ha ghamberire awa ha yi yuvire eshi: “Yidye ne mbo gha pwa kughamwena?”
27Ko kuhutha Jesusi eshi: “Eyi ya kara ghukukutu kwawanu, kwaNyambi ne yiredhu.”
28Petrusi gha ningire eshi: “Mone, atwe ne twa thigha ghushwi wetu no twa kukutha.”
29Jesusi gha huthire eshi: “Ghushemwa na kumutongwera: Yomuhe ghokuthigha ndhugho dhendi, ngambi mukamadi, ngambi naminendi, ngambi hawihe, ngambi hana, kumahimeno ghoghufumu waNyambi, 30mbo ghana tambura rwingi ghushwi mumayuwa ghano, nomoyo ghororuheya mumayuwa ghokughutho.”
Jesusi ghana kuyuvitha paruhatu yifa yendi no muvumbukero wendi
(Mat 20:17–19; Mark 10:32–34)
31Jesusi gha henyithire hashadikumi nohawadi paghunyonga no gha wa tongwerire eshi: “Mu mone, kuJerusalema tuna kuyenda, no yoyihe eyi ha tjangire haporofeta yokwaMwanamunu, ko mbo yi ka rikanyena kuya. 32Mbo hana yandja kwawahayidena, mbana mu sherera no mbana mu pethi, no mbana mu thipera mate. 33Mbana mu mwashura no mbo hana mu pagha. Ene mudiyuwa dyoghuhatu mbo ghana vumbuka mwawafu.”
34Ene mbadi ha yi kwatire yinu yi nokamanana temba. N̂ando dhi dha karire kukwawo makokore no mbadi ha tjwathanine eyi gha ghambire.
Murume ghomukunga ghomuJeriko
(Mat 20:29–34; Mark 10:46–52)
35Jesusi gha kokerire kuJeriko. Mukunga ne gha hungumanine kumbadi dhondhira ghukumbera. 36Apa gha yuvire mbunga dhina kukongosha, ghepurire eshi: “Yinye yi di ko?”
37Awo ha mu tongwerire eshi: “Jesusi ghomukaNasareti ghana kupita.”
38Ko kukugherera kwendi eshi: “Jesusi ghoMwana Davita, ghu ni fere n̂eke.”
39Awa ha yendire kughutho, ha mu shingire eshi gha porere. Aye ne mbokapwe, shime ha ka twa ndundu eshi: “Mwana Davita ghu ni fere n̂eke.”
40Ko kwimana Jesusi no gha wa rawerire eshi ha mu rete kukwendi. Apa gha henyine pepi, gha mwipurire Jesusi eshi: 41“Nye yi ghuna haka eyi sho ni kutende?” Aye gha huthire eshi: “Fumu, ngo ni monithe karo, Hekudyange.”
42Ha mu tongwera Jesusi eshi: “Ghuhunga, wa kona kumona karo! Matawero ghoye ghana kughamwena.”
43Popo vene ko kumona, ho gha kuthire Jesusi no gha kughire Nyambi. Hanu wahe awa ha yi monine nawo ha tapire difumanekero kwaNyambi!
Attualmente Selezionati:
Lukasi 18: MHW1986
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mbunga dhoBayibili dhaNamibia (Bible Society of Namibia) 1986