Lukasi 19
19
Jesusi naSageghusi
1Jesusi gha kumine muJeriko no gha tjinaghanine mbara. 2Omu mo gha karire murume ghodina dyoSageghusi nduna ghomuketethi no mutungi. 3Aye gha yerekire kumona Jesusi, ene pamurandu ghombunga mbadi gha konine, yoyishi gha karire mufupi. 4Ko kudhondoka kwendi kughutho gha ka dhine kuthitondo thoghukuyu, eshi gha ka mone Jesusi, yoyishi dhondhira sho gha pite. 5Apa gha kaverire Jesusi padyango di, gha kambukire no gha ningire kukwendi eshi: “Sageghusi, shuruke wangu, yoyishi na haka dyarero kukara mudighumbo dyoye.”
6Naye gha shurukire wangu no gha tamburire Jesusi ghushamberera. 7Apa ha yi monine wahe ko kuvunguta kwawo eshi: “Gha nengena mundhugho dhathiharuri!”
8Ene Sageghusi ghemanine no gha ningire kwaFumu eshi: “Fumu, mone kutapa na kutapa dihenda dyoghushwi wange kwawahepwe. No ngeshi po gha di yu na kungura thinu, na kuthimuhuthera parune.”
9Jesusi gha mu huthire eshi: “Dyarero gha neya maghamweno mundhugho dhino, yoyishi murume yu, naye mwanahoka waAbrahamu. 10Mwanamunu gheyire vene kukushana no kughamwena wa ha yongara.”
Maghanekero ghodinyinga dyomangondo
(Mat 25:14–30)
11Oku shime ha tegherera Jesusi hanu, ko kuvunga po kwendi karo maghanekero, oku ye pepi naJerusalema. No hanu ha ghayarire eshi tamba ghu hokoke ghufumu waNyambi. 12Ko kuninga kwendi eshi: “Murume ghumweya, oyu gha tundire mudira dyawanumwene, gha yendire kuditunga dyokayenda ha ka mu pake mughufumu ndani po mbo gha ka huka karo. 13Kughutho ghethire hapikendi dikumi no gha wa taperire kehe yu dinyinga dyongondo no gha wa tongwerire eshi: ‘Mu gha rughanithe kate pa mbo ni ka huka.’ 14Ene hakaditunga dyendi ha mu dhimbire thikuma. Kunyima dhendi ha tumine hayitumi ha ka tongore eshi: ‘Munu yu, mbadi tuna mu haka eshi gha kare fumu wetu.’ Ene ngambi kemo gha tamburire ghufumu.
15“Pakuhuka kwendi ko kutuma kwendi eshi ha mwithere hapika awa gha pire manyinga, no gha mone eshi yingatji hana wanena po. 16Mukakutanga gha henyine no gha ningire eshi: ‘Hekudyange, dinyinga dyoye, dina wanena po shosho dhodhikumi.’ 17Aye gha ghambire eshi: ‘Ghuhunga kemo, ghomupika ghomuhunga. Kenge di ghuna tjimapa muyinu yoyimbiru, wa kona kuraghura mambara dikumi.’ 18Ghoghuwadi gheyire no gha ningire eshi: ‘Hekudyange, dinyinga dyoye dina wanena po manyinga kwoko.’ 19Oyu gha mu tongwerire eshi: ‘Wa kona kuraghura mambara kwoko.’
20“Ghumweya naye gheyire no gha mu tongwerire eshi: ‘Hekudyange, tumbure dinyinga dyoye. Mutuku na di horekire. 21Na yapire yoyishi ghomukukutu thikuma we. Owe wa tumburanga eyi ya dhira kukara yoye no wa keshanga eyi wa dhira kukuna.’ 22Ko kumutongwera kwendi eshi: ‘Na kukupangwera popaman̂ando ghoye. Ghomupika ghomumango. Ngeshi ngo wa dimukire eshi ame ne nomunu ghomukukutu, na tumburanga eyi ya dhira kukara yange no na keshanga eyi na dhira kukuna ne, 23nye wa dhirire kupaka manyinga ghange kubanga? Pakuhuka kwange, ngo na na wana mawedherero.’
24“Ko kutongwera kwendi kwawa hemanine po eshi: ‘Mu mu kungure dinyinga dyo no mu ditape koyu gha di nomanyinga dikumi.’ 25Awo ha mu huthire eshi: ‘Hekudyetu, aye ne nomanyinga dikumi gha di nagho.’ 26Aye gha wa huthire eshi: ‘Ghushemwa na kumutongwera eshi: Kwakehe yu ghokuwana, mbana mu wedherera ko, oyu ghokudhira kuwana mbana mu kungura ngambi yi gha di nayo. 27Awa hanyathi wange awa ha shwenine eshi ame ne kadi wa kukara nofumu, mu wa rete kuno mu wa paghe kughutho wange.’ ”
Mwingeneno waJesusi muJerusalema
(Mat 21:1–11; Mark 11:1–11; Joh 12:12–19)
28Apa gha manine kughamba Jesusi yinu yi, ko kuyenda kwendi kuthitunumeho thawo kuJerusalema. 29Pakukuma pepi naBetifage naBetaniya padirundu dyondhwe, gha tumine hakathishongero wendi hawadi no gha wa tongwerire eshi: 30“Mu yende kudighumbo diya dina mu tamba. Apa sho mu kengene, muna ka wana thidongyana ethi thina pu kughangerera, ethi ha dhira kudhina norofotji temba. Mu ka thi shuture no mu ka thi rete kuno! 31Ngeshi gha ka mwipure ghumweya eshi: ‘Nye muna kuthishutwera?’ Mu ka mu huthe eshi: ‘Fumu ghana thi nyanda.’ ”
32Hawadi wa gha tumine ha yendire no ha ka wanine yoyiheya thika di gha yi ningire. 33Oku shime ha thi shutura, ko kuwepura thinda shatho eshi: “Nye muna kuthishutwera?”
34Ha mu hutha kwawo eshi: “Fumu ghana thi nyanda.” 35Munyima ha twarire thidongi kwaJesusi. Ko kuyara po kwawo myaye dhawo no ha mu dhinekire po Jesusi. 36No shime gha dhinena po, ha yara karo myaye dhawo dhimweya mundhira.
37Apa gha kumine pepi nombara, pakaghurumuko kodirundu dyondhwe, ko kutanga mbunga dhodhikuru edhi dha mu tatire kushamberera Nyambi thikuma, no kuyumbaghuka kuyitetu yoyitenda eyi ha monine. 38No hembire eshi:
“Gha fumane Fumu
Oyu ghana kwiya muDina dyaNyambi;
thiraro mudiwiru no difumanekero kwaNyambi mumawiru!”
39Hamweya hopaWafarasayi, ha ningire kwaJesusi eshi: “Muhongi, porerithe hayihongwana yoye!”
40Aye gha wa huthire eshi: “Kutongwera na kumutongwera mwe eshi, ngeshi ha porere wo, ngo n̂anyi gha shogherere mawe.”
41Apa gha kaverire pepi nombara no kudhikambekedha, gha dhi direrire, 42no gha ningire eshi: “Ngo ghu mone mudiyuwa dyodyarero yokukuretera thiraro! Apa no ne ghomukunga. 43Mbo gha neya mayuwa agha mbo ha kumbandukera han̂ore dhoye no kukudhingumwetwedha mitara dhodhiheya. 44Mbana kuhoghorora pamuve nawa ha tunga mo mbana pu kuhanyaghura. No mbadi mba thigha papoye diwe padiwe muyendhadyo. Yoyishi mbadi wa dimukire nako edhi gheyire Nyambi kukoye eshi gha kughamwene.”
Jesusi ghana kushinga hanu yokupetha tembeli
(Mat 21:12–17; Mark 11:15–19; Joh 2:13–22)
45Jesusi ghengenine mutembeli no gha tjidhire haghurithi. 46Ko kuwatongwera kwendi eshi: “Ya pwa kutjanga eshi: Ndhugho dhange ne dha kuraperera, amwe ne ho muna dhi tendi thitunguru thawashondoro.”
47Kehe diyuwa gha karire mutembeli kukuhonga hanu. Ko kumutungura hapristeri hohakuru nawakamarukwaro nawamayami hodiko eshi ha mu paghe. 48Ene mbadi ha konine kuwana eshi ngepi sha mu tende. Yoyishi hanu wahe ha teghererire noghughovamena kukwendi.
Attualmente Selezionati:
Lukasi 19: MHW1986
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mbunga dhoBayibili dhaNamibia (Bible Society of Namibia) 1986