Lukasi 20
20
Mepwero ghokungcamu dhaJesusi
(Mat 21:23–27; Mark 11:27–33)
1Diyuwa dimweya mumayuwa gha, oku Jesusi pakuhonga hanu mutembeli no kuwayuvitha mbudhi, ha mu henyenine hapristeri hohakuru nawakamarukwaro nawamayami, 2no ha mwipurire eshi: “Tu tongwere eshi nongcamu munye ghuna kutenda yinu yi? Endi yidye gha kupire ngcamu dhi?”
3Aye gha wa huthire eshi: “Name na kumwipura thinu, ene mu thi ni tongwere. 4Diyoghero dyaJohannesi ne dya tunda kwaNyambi endi kwawanu?”
5Awo ne ko kuvunguta eshi: “Ngeshi ngo tu ninge eshi: ‘KwaNyambi dya tunda,’ ngo gha ninge eshi: ‘Nye mwa dhirera kumutawa.’ 6Ngambi ngo tu ninge eshi: ‘Kwawanu’ ngo ha tu paghe hanu wahe nomawe. Yoyishi awo ha nongonona Johannesi eshi muporofeta.” 7Munyima ha dimbururire eshi mbadi ha dimuka ku dya tunda.
8Jesusi gha wa huthire eshi: “Name mbadi na kona kumutongwera eshi kupi dha tunda ngcamu edhi na kutenditha yinu yi.”
Maghanekero ghawandjimi nodipya
(Mat 21:33–46; Mark 12:1–12)
9Shime gha wa tongwerire Jesusi hanu maghanekero ghano eshi: “Pa karire murume oyu gha karire nodipya no gha pakire mo handjimi. Aye ko kufunguruka gha yende muruyendo. 10Munyima dhomayuwa ko ka tuma mupika gha ka mu shimbere ko yidya yomudipya. Handjimi, ha ka pumurire mupika yu no ka mu tjidha nyara‐nyara. 11Karo gha tumine mupika ghumweya kukwawo. Naye ha ka mu pumurire no ha ka mu pethire thikuma no ka mu tjidha nyara‐nyara. 12Shime ha ka tuma karo mupika ghoghuhatu, naye gha ka pwire kupumura kate kundendesha runyinga no kumuvukumena kununda dhodipya. 13Ko kuninga thinda shadipya eshi: ‘Nye sho ni tende? Na kutuma mwanange ghoyofotji, ngwa n̂anyi ha ka mu kutekere.’ 14Apa ha mu monine handjimi, ko kukutongwerathana kwawo eshi: ‘Yomukakupinga yu. Mwiye tu mu paghe, munyima ho twa kupinge yoyiheya.’ 15Shemwa ko kumuvukumena kununda dhodhipya no ha mu paghire. Nye ne keho sho gha tende thinda shadipya nawo? 16Aye mbo gha neya no kupagha hakadipya waheya no kutapa dipya kwahawo‐nawo.” Awa ha yi yuvire ha ningire eshi: “Mbadi ya kona kukara kemo!”
17Ene Jesusi gha wa rerururire no gha ningire eshi: “Nye ghana kuninga gha man̂andotjanga eshi:
‘Diwe di ha mwaghire hombi,
dyo dina kara dyodishonga!’
18“Kehe yu ghokuwera padiwe di, mbo ghana hoghoroka; karo oyu mbo di wera, mbo ghana shinyiha thikuma.”
19Hakamarukwaro nawapristeri hohakuru, ha ghayarire eshi maghanekero gha ghana ghanekera Jesusi ne, papawo ghana tamba. Ha shanine kumughomeka eshi ha mu kwate, ene ha yapire kwawanu.
Mepwero ghokudiketo
(Mat 22:15–22; Mark 12:13–17)
20Awo ha tatererire ruvedhe rwawo, no ha tumine hanatanyi ho kukara yira hahunga, eshi ha ka mu kwate Jesusi paman̂ando ghendi, no ha mu tware kwamuraghuri shokuru. 21Ko kumwipura kwawo eshi: “Muhongi, twa dimuka eshi muyiyaghura yoye nomuyihonga yoye ne ghuhunga. Karo mbadi wa kutekera munu. Wa tjimapa mughushemwa no wa honga hanu ndhira dhaNyambi. 22Kemo ne, ghuhunga kuketa diketo kwamuraghuri shokuru endi kadi ghuhunga?”
23Jesusi ne gha dimukire mandjwanda ghawo no gha wepurire eshi: 24“Mu ni neghedhe dinyinga. Dhadye dhi nungu no di dina di di po?” Awo ha mu huthire eshi: “Dyamuraghuri shokuru.”
25Ha ningi kukwawo eshi: “Ghuhunga, mu tape kwamuraghuri eyi ya kara yamuraghuri, no mu tape kwaNyambi eyi ya kara yaNyambi.”
26Ene mbadi ha konine kumuwitha kughutho wawanu kuyinu yi gha ghambire, no ha tetukure kumahuthero ghendi, ko kuporera kwawo vene.
Mepwero ghokumuvumbukero wawafu
(Mat 22:23–33; Mark 12:18–27)
27Hamweya hopaWasadusayi, awa ha kananine eshi mbadiko muvumbukero, ha henyine no hepurire Jesusi eshi: 28“Muhongi, Mosesi ne gha tu tjangerire eshi: Ngeshi hafu mukurwamunu ghokuyeka nohana temba, gha kona kumutumbura mina munu mudidhi yu gha pake po hana mudyango dyamukurwendi. 29Pa karire hatutughuru kwoko nohawadi hakadira dyofotji. Mbedi gha yekire no gha fire nohana temba. 30Thiranda mbedi naye karo kemo, 31mitakatji naye gha yekire mudidhi yu no gha fire nohana temba. Kemo dya yowire waheya kwoko nohawadi. 32Munyima ko kufa naye mukamadi. 33Wadye mbo gha kara keho pamuvumbukero yu mukamadi? Yoyishi waheya kwoko nohawadi ha mu yekire.”
34Ko kuwatongwera Jesusi eshi: “Hanu homukaye kano, kukuyekathana ngenyu. 35Ene wa mba fumana kukuyerana kukaye kokughutho no kumuvumbukero wawafu, mbadi mba kuyeka thana. 36Yoyishi mbadi mbo hafa karo, mbo hana kara yira haengeli. Awo ne hana Nyambi, yoyi hana vumbuka mwawafu. 37Yokuninga eshi hafu mbana vumbuka, Mosesi naye gha yi hokorire payighamba yopathipumbu thothingcinda apa gha toyire Fumu eshi: Nyambi waAbrahamu, noNyambi waIsaka, noNyambi waJakopu. 38Nyambi ne kadi Nyambi wawafu, ene wawayumi. Yoyishi mumwendi hana kupara wahe.”
39Munyima ko kuhutha hakamarukwaro hamweya eshi: “Muhongi, thiwana ghuna hutha.” 40Kutunda po nokumwipura temba karo.
Mepwero ghokwamwana Davita
(Mat 22:41–46; Mark 12:35–37)
41Jesusi ne gha wepurire eshi: “Ngepi di ha kona kughamba eshi Kristusi ne mwana Davita? 42Davita thinda gha ningire murukwaro romipisalemi eshi:
‘Fumu ghana ningi kwaHekudyange eshi:
Hungumane kurudyo rwange,
43kate na kukutendere han̂ore dhoye
kambaro kompapadhi ghoye.’
44“Davita thinda ghana kumutoya eshi Fumu, ngepi di sho gha kone kukara karo mwanendi?”
Jesusi ghana kukukurura hakamarukwaro
(Mat 23:1–36; Mark 12:38–40; Luk 11:37–54)
45Oku shime ha dhi tegherera mbunga dhodhihe kwaJesusi, ko kuninga kwendi kwawakathishongero wendi eshi: 46“Mu koneke kwawakamarukwaro, awa ha haka kuyendaghura noyivata yoyiwa, no ha haka marumeritho ghomakuto mumikara no kuhungumana mumasinagoge mumapuna ghokughutho, no mumango ghomakuto pamakuyarekero. 47Awo hana kwan̂itha mayugho ghawadidhi no kurapera mandapero ghomare. Yihumbithitha yawo ne mbo yina kara yikuru thikuma.”
Attualmente Selezionati:
Lukasi 20: MHW1986
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mbunga dhoBayibili dhaNamibia (Bible Society of Namibia) 1986