Ebikhole 15
15
Eshiina shieYerusalemu
1Ne abandu bandi bakholomokha okhurula ebuYahudi, nibeechesia abaana beefwe, bari Nimurashebwa eshimma shiaMusa shinga olwa shili, shimunyala okhuhona tawe. 2Ne olwa Paulo nende Baranaba bali nibayingaane nokhureebana ninabo muno, abaana beefwe balaka mbu Paulo nende Baranaba nende abandi khubo batikulushe batsie eYerusalemu ewa abarume nende abakofu bali khumakhuwa kano.
3Kho abeenabo, nibakoobilwe nende ikanisa, babira muFoinike naSamaria biosi, nibarumbuIanga akokhushiukhana khwAbamahanga; nibasangaasia abaana beefwe bosi muno.
4Ne olwa bali niboolile eYerusalemu, beenjisibwa nende ikanisa nabarume nende abakofu, nibabatoonyela amakhuwa kosi aka Nyasaye yali nakholile ninabo. 5Ne abandi abomwahukho kwabaFarisayo abasuubila babuukha nibasunga bari Okhuula bashebwe, nokhulachilisibwa okhulinda amalako kaMusa.
6Mana abarume nende abakofu bali nibakhung'aaniile halala okhuyililisia khwikhuwa lienelo. 7Ne olwa bali nibakhupile imbakha inyinji, Petero yabuukha nabasunjila ari Baana beefwe, mumanyile mbu okhurula mundaalo tsiambeli Nyasaye yandobola mwinywe, mbu mumunwa kwanje Abamahanga bahulile likhuwa lieinjiili, nibasuubila. 8Ne Nyasaye, oumanyile emioyo chiabandu, yabarumbulila obuloli bwatoto, nabaheelesia Roho Omutakatifu shinga olwa yakhuheelesia ifwe; 9kata shiyakhola obwahuli bwosi hakari weefwe ninabo ta, nabasiiya emioyo chiabwe khulwa obusuubili. 10Kho bulaano nishiina eshichila nimuteema Nyasaye, nimurakhwo likokolo khwikosi liabeechi eliakhaya abakuuka beefwe nende ifwe abeene okhulichinga? 11Ne khusuubila mbu ifwe khulahonibwa khulwa obukoosia bwOmwami Yesu, shingana bo.
12Abomukanda bosi nibaholeela tsi; nibarechelesia aka Baranaba nende Paulo babatoonyela akebilolelo nende amangaliimwa ebia Nyasaye yakhola muBamahanga namakhono kabwe.
13Ne olwa bali nibaholeelile, Yakobo yakalusia nasunga mbu Baana beefwe, mumbulilekhwo. 14Simeoni akhutoonyeele shinga Nyasaye olwa yaranjilila okhukoonya Abamahanga okhwilobolela mubo abandu khulwa eliiralie. 15Kata amakhuwa kabanabii kawinjana nende kano; shinga olwa kahandiikwa, mbu
16Olunyuma lwamakhuwa kano ndalachelela,
ninyumbakha khandi eshimenyo shiaDaudi, eshikwile;
ninyumbakha khandi obulikushi bwashio,
nishisinjisia;
17mbu abandu abasikaale bamukhaabe Omwami,
nende Abamahanga bosi, abakulishilwa muliira lianje;
18nolwa Omwami aboola, ouchilanga amakhuwa kano nikamanyikha okhurula khumusuule.
19Khulwako, obukhalachi bwanje mbwobuno; mbu khuleshe okhubanyasia abo abomuBamahanga abamushiukhanila Nyasaye; 20nebutswa khubahandiichile, mbu basile ebindu ebifwabwiibwe khulwa okhuhaanilwa ebifwanani ebiinamilungwa, nende obuheyi, nende ebindu ebimichilwe, nende amalasile. 21Okhuba okhurula khubisoni nebisoni, Musa abeetsanga nende abo abeelwatsa amakhuwake mubuli taala, nikasoomwa mutsisinagogi buli Sabato.
Likalusio liabeshiina
22Mana abarume nabakofu, halala neikanisa yosi, balola mbu nobulayi okhulobola abandu mubo abeene mbu babarume eAndiokia halala nende Paulo nende Baranaba; mbabano, mbu Yuda oulangwa mbu Barisaba, nende Sila, abali abakhulundu mubaana beefwe; 23nibahandiika amakhuwa kari nanwa, nibakakoobela mumakhono kabwe; mbu Akarula khubarume nende abaana beenywe abakhulundu koole khubaana beefwe abomuBamahanga abali muAndiokia naSiria naKilikia; amashiesii khwinywe. 24Okhuba khwahuliile shinga abandi abarula mwifwe olwa bamunyasiye namakhuwa, nibakoyaasia emioyo chieenywe; habula ifwe shikhwabalaka likhuwa liosi ta; 25olwa khubeele nikhufuchilisaniye halala, khuluutsi mbu nobulayi okhulobola abandu nikhubaruma khwinywe halala nende abaheelwa beefwe Baranaba nende Paulo; 26nabandu abalubiililanga nibarateeba akobulamu bwabwe ta khulwa eliira liOmwami weefwe Yesu Kristo. 27Kho mbabo, khumurumiile Yuda nende Sila, abalamuboolela amakhuwa malala kano nomunwa. 28Okhuba Roho Omutakatifu yachama, kata nende ifwe, oburamutuukhakhwo omusiiko okushila amakhuwa kano akakhoyeele ta; 29mbu musile ebindu biemisango echimaliilwe ebifwanani, nende amalasile, nende ebindu ebimichilwe, nende obuheyi; ne nimuba nimwilinda khumakhuwa ako, mulaba bulayi. Mulindwe.
30Nabo olwa bali nibaseebuulwe, bakholomokha niboola eAndiokia; ne olwa bali mbakhung'aasiye omukanda kwosi halala, babaheelesia ibarwa tsana. 31Ne olwa bachisooma, beekhoyela muno akobulemia obwo. 32Nabo Yuda nende Sila, okhuba abeene bali abanabii, babeebaalila abaana babwe amakhuwa amanji nibabatinyilisia. 33Ne olwa bali nibamenyileyo eshise, abaana babwe babaseebula nende omulembe, mbu bakalushile abo abali nibabarumile. 34[Habula Sila yalola mbu nobulayi okhumenyakhwoyo.] 35Ne Paulo nende Baranaba basikala eAndiokia, nibeechesinjia nende okhwilwatsa likhuwa liOmwami, halala nabandi abanji.
Paulo yaahukhana nende Baranaba.
36Ne olunyuma lwetsindaalo tsindi Paulo yasunjila Baranaba ari Chenda khukalushe bulaano khubakoonye abaana beefwe mubuli taala omwa khwarumbula likhuwa liOmwami, khulole shinga olwa bali. 37Ne Baranaba yali nareelekhwo omwoyo okhubukula Yohana owalangwa mbu Mariko, atsie ninabo. 38Ne Paulo shiyalola mbu nobulayi okhutsia nende omundu oyo owabarulakhwo nibali ePamufilia, oburatsia ninabo khumilimo ta. 39Mana obuyingani nibwikhola hakari wabwe, okhuula olwa baahukhana; Baranaba namubukula Mariko natsia ninaye muliaro okhuula eKipiro; 40naye Paulo nalobola Sila, narula, olwa abaana beefwe bali nibamalile okhubahaana khubukoosia bwOmwami. 41Nabira muSiria nende Kilikia, natinyilisinjia tsikanisa.
Attualmente Selezionati:
Ebikhole 15: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975
