Ebikhole 16
16
Paulo naSila batsia nende Timotseo
1Kho niyoola eDerube nende Lisitera; ne lola, yaliho omwechi undi owalangwa mbu Timotseo, nomwana womukhasi omuYahudi omusuubili; ne samwana yali omuYunani. 2Omwenoyo yali oweifuma indayi mubaana beefwe abali eLisitera nende Ikonio. 3Omundu tsana, Paulo yeenya mbu batsie ninaye; namubukula namusheba, khulwa abaYahudi abali mumbali tsienetsio; okhuba bosi bamanya shinga samwana olwa yali omuYunani. 4Ne olwa batsiililila bario khuluchendo lwabwe nibabira mumataala, babaheelesia ameebaalo akali nikareebwaho nende abarume nabakofu abali eYerusalemu, mbu bakalinde. 5Kho tsikanisa nitsitinyilisibwa mubusuubili nitsimeetekha obunii khatsotselo.
Libisulo liaPaulo, eliomundu weMakedonia
6Nabo nibabira mumbali tsieFirigia naGalatia, nibakaaniibwe nende Roho Omutakatifu oburaboola likhuwa tsana muAsia ta; 7ne olwa bali niboolile ahahengaane nende Misia, bateema okhutsia eBitsinia; ne Roho waYesu shiyabafuchiilila ta; 8kho nibabira Misia bubira, nibakholomokha niboola eTeroa. 9Mana libisulo nilimuloleshela Paulo mushilo; mbu yaliho omundu weMakedonia, nasinjiile, namusaaya, nasunga ari Yambukha, witse eno eMakedonia, okhukhoonye. 10Ne olwa yali naluutsi libisulo elo, habwene nahabwene nikhukhaaba okhurula khutsie eMakedonia; okhuba khwalola mbu Nyasaye yali nakhulanjile okhubeelwatsila injiili.
Okhwikalukhasia khwaLudia
11Kho nikhurula eTeroa muliaro nikhutsia eSamotsarake khunjila inunji, ne mukamba nikhuula eNeapoli; 12nokhurula yaho nikhutsia eFilipi, litookho lindi lieMakedonia, nelikhulundu eliomumbali etsio, ewa Abaroma barumanga abandu babwe okhumenyayo; nikhuba mwitookho elo nikhwikhalayo tsindaalokhwo.
13Mana khunyanga yaSabato khwarula elwanyi weshilibwa khulukuku Iwomwalo, aha khwapaara mbu nelilaamilo; nikhwikhala, nikhusungana nabakhasi abali nibakhung'aanileho. 14Nomukhasi undi oulangwa mbu Ludia, nomukusii wetsingubo tsieisambarau, owelitookho liaTsiatira, omundu owamwinamilanga Nyasaye, yakhuhulila; Omwami niyeekula omwoyokwe okhurechelesia amakhuwa aka Paulo yaboola. 15Ne olwa yali nabatisiibwe, nende abomunzuye, yakhusaaya, ari Nimuba nimunduutsi nindi omwisiikwa wOmwami, mwinjile munzu yanje, mumenyemwo. Nakhunichilisia ario.
Babohwa mumbohe eFilipi
16Ne olwa khwali nikhutsia heelaamilo, omukhaana undi owali naroho weshitsoyelo yakhwakaanila; ne yali nabaleerelanga abaamibe inganga inyinji khulwa okhulakulakhwe. 17Omwenoyo yalonda inyuma waPaulo nineefwe, nalanjilisinjia ari Abandu bano nabasumba baNyasaye Ouli Ikulu Muno, abamurumbulilanga injila yobuhonia. 18Yakholanga ario tsindaalo tsinyinji. Naye Paulo nanyakhana muno mumwoyo, nashiukhana nasunjila roho oyo ari Ekhulaka muliira liaYesu Kristo, omurulemwo. Naye namurulamwo khushise shieneshio.
19Ne olwa abaamibe balola mbu obunaayi bwabwe bweinganga bwali nibwakaame, babakwakhwo Paulo nende Sila, nibabakhwesa haluyia imbeli wabaami; 20ne olwa bali nibabayilile ewabakhulundu beshiina, basunga bari Abandu bano banyasinjia litookho lieefwe okhushila; ne nAbayahudi; 21khandi beelwatsanga ebiima ebili biomusilo khwifwe mbu khubifuchiilile kata okhubilonda, nikhuli abaRoma. 22Abomukanda nibababuushila bosi halala; abakhulundu beshiina nabo nibabanaabula tsingubo shinga abatsirandula burandula, nibalaka mbu banywekhwe tsisaala. 23Ne olwa bali nibabakhupile amakhupache amanji, bababoha mumbohe, nibalachilisia omulindi weicheela mbu abalinde bulayi; 24naye, namalile okhulakwa ario, yabara mushisika eshiomukari, niyeenjisia ebilenje biabwe mumakokolo.
25Ne mushilo hakari Paulo nende Sila bali nibasaayanga, nibeembela Nyasaye tsinyimbo, nabo ababohe bali nibarechelesinjia; 26mana beetsukhana eshialo nishirenga butinyu, okhuula olwa omuse kweinzu yeicheela kwatechela; habwene nahabwene emiliango chiosi nichiikukha; ebibohelo biabosi nibitendeya. 27Naye omulindi weicheela nasisimukha mundoolo, nalola emiliango chieicheela nichiikuushe, natsomola olukangalwe niyeenya okhwiyira; okhuba yakaala mbu ababohe bali nibeeluushe. 28Ne Paulo yalanga nomwoyo omukhongo, ari Oreekhola obubii ta; khuli hano fwesi. 29Naye nalaka mbu tsitaha tsileerwe, niyeenjila tsimbilo, natechela khulwa oburii, niyeekhupa hasi mumakulu kaPaulo nende Sila, 30nabarusiamwo, nasunga mbu Abaami banje, ekhole endie mbu ehone? 31Nabo nibakalusia mbu Suubilila Omwami Yesu, kho olahonibwa, iwe omwene nende abeinzuyo bosi. 32Nibamuboolela likhuwa liOmwami, halala nabosi abali munzuye. 33Naye nababukula, khusaa eyo eyomushilo, niyoosia amakhupache kabwe; mana nabatisibwa, ye nende abebe bosi, habwene nahabwene. 34Nabatikulusia nabaleera munzuye, nabarenjeshela ebiliibwa, niyeekhoya muno, halala nende abeinzuye bosi, olwa bali nibasuubiliile Nyasaye.
35Ne olwa bwashia mutsuli abakhulundu beshiina baruma abasikari, bari Lekhuula abandu abo. 36Omulindi weicheela naboolela Paulo amakhuwa ako, ari Abakhulundu beshiina barumile abandu mbu mulekhuulwe; kho murule, mutsie nomulembe. 37Ne Paulo nabasunjila ari Bakhunyweshile habulafu, eshiina nishirakhufwiliile ta, ifwe abali abaRoma, nibakhusindikha mumbohe; ne bulaano beenya okhukhurusia mabiswi? 'A, tawe; ne abeene beetse bakhurusie. 38Abasikari nibaboolela abakhulundu beshiina amakhuwa ako; nabo nibaria, olwa bahulila shinga olwa bali abaRoma; 39nibatsiayo, nibabasaaya; ne olwa bali nibabarusiyemwo, babasaaya mbu barule mwitookho. 40Nabo nibarula mucheela, nibeenjila munzu yaLudia; ne olwa bali nibalolaane nabaana babwe, nibabeebaalilakhwo, nibeenyokha.
Attualmente Selezionati:
Ebikhole 16: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975
