Matsayo 11
11
Abarume abarula khuYohana Omubatisii
(Lk. 7.18-35)
1Olwa Yesu yali namalile okhulachilisia abeechibe abo ekhumi nababili, yarulaho natsia okhwechesia niyeelwatsa mumataala kabwe.
2Haho olwa Yohana yahulia nali mumbohe akebikhole biaKristo oyol yaruma abeechibe 3okhumureeba, mbu Iwe niwe omwenoyo owitsa, nohomba khulindiilile oundi? 4Yesu nakalusia nababoolela mbu Mulatsia mumuboolele Yohan amakhuwa aka muhulilanga nende aka mulolanga; 5mbu ababofu banyalilungwa okhulola, abetsindieku bachendanga, abobuchele basiiyungwa, abeekala amarwi bahulilanga, abafu balamusibungwa, abamanani nabo beelwatsilungwa Amakhuwa Amalayi. 6Ne noweikhabi omundu yesi oureesichirasibwa khwisie ta.
7Abeenabo olwa bali nibatsiitsanga, Yesu yachaaka okhusunjila abemikanda khukaYohana, ari Nishiina eshia mwarula nimutsia mushitsiimi okhulola? Mbu olusi olureesibwa nomuyeka noho? 8Ne nishiina eshia mwarula nomutsia okhulola? Mbu omundu owifwalile tsingubo tsinndorotoro? Mbula, abeefwala tsindorotoro bali mutsinzu tsiabaruchi. 9Ne nishiina eshiachila nimurula nimutsia? Okhulola omunabii noho? Ee, khandi emuboolela mbu noushila omunabii muno. 10Uno nomwenoyo owa kahandiichilwakhwo, mbu
Lola, erumanga omurume wanje imbeliwo,
naye alakasia injilayo imbeliwo.
11Emuboolela toto, mbu mubeenabo aba abakhasi beebula, ashili okhubuukha oundi oushila Yohana Omubatisii; ne oyo ouli butswa omutuutu mubwami obwomwikulu amushila.
12Ne okhurula mundaalo tsiaYohana Omubatisii okhuula bulaano, obwami obwomwikulu bwinjilungwa namahababa, abandu bamahababa nibabwitsumbanga. 13Shichila abanabii bosi nende amalako bali nibalakulanga okhuula khuYohana. 14Ne nimuba nimwenya okhukafuchiilila, uno niye Eliya owali nali okhwitsa. 15Ouli; namarwi akokhuhulila, ahulile.
16Nenjelasie abolwibulo luno nende shiina? Bafwana shinga abaana abeekhaale haluyia, abalanjilisia abashiabwe, 17nibasunga bari Khumuupiile lilele, nimurashina ta; khwikhuulile, nimurakhupa tsimbungu ta. 18Shichila Yohana yeetsa naraliitsanga kata okhunywa ta, nibaboola bari Ali nende lidimoni. 19Omwana wOmundu naye yeetsa naliitsanga nende okhunywa, nibaboola bari Lole, nomulangu, khandi omumeesii, omwitsa wabasololi bobushuru nende aboonooni! Ne obuchesi bumanyikhanga shinga olwa buli habwene khulwa emilimo chiabwo.
Woowe khumatookho akareekalukhasia ta!
(Lk. 10.13-15)
20Mana nachaaka okhuhalabila amatookho ako aka yayinya okhukholelangamwo emilimochie chiamakana, shichila shikali nikeekalukhasiye ta; ari 21Wowe khwiwe, Korazini! Wowe khwiwe, Betsesaida! Shichila emilimo chiamakana echiakholelwa mwinywe chilaba nichiakholelwa muTiro nende Sidoni, khane bakheekalukhasiye khale nibeefwalile amakunia nibeepuuka likoshe. 22Nebutswa emuboolela mbu kalibakhwo amaangu khulwa Tiro nende Sidoni khunduukho yeshiina okhushila shinga olwa kalimubeela inywe. 23Nawe, Kaperinaumu, witsa okhuchinguulwa mwikulu? Mbula, witsa okhwishila okhuula eMakombe; shichila emilimo chiamakana echiakholelwa mwiwe chilaba nichiakholelwa muSodomu, khane liakhabeeleho okhuula olwa leelo. 24Nebutswa emuboolela mbu kalibakhwo amaangu khulwa eshialo shiaSodomu khunduukho yeshiina okhushila shinga olwa kalikhubeela iwe.
Mwitse khwisie, muhuluushe
(Lk. 10.21-22)
25Habwenaho Yesu yakalusia naboola mbu E Papa, Omwami welikulu nende eshibala, ekhuupila orio, shinga olwa wabisa abachesi nabarechelefu smakhuwa kano, nokabisulila abaana abahele; 26orio, Papa, okhuba nolwa kakaasa imbeliwo.
27Papa yambeelesia ebindu biosi; ne abulaho oumanyile Omwana, habula Samwana; khandi abulaho oumanyile Papa, habula Omwana, nende omundu yesi owa Omwana achama okhumubisulila.
28Mwitse khwisie, inywe mwesi abachoonyanga nimusitohelwa, nasi ndalamuhuluusia. 29Mwinjile mwikokolo lianje, nimweka khwisie; shichila endi omuholo omwongoli mumwoyo; kho mulanyoola obuhuluushi obwomumioyo chieenywe; 30shichila likokolo lianje nelilayi, omusiiko kwanje nakwo nomwangu.
Attualmente Selezionati:
Matsayo 11: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975