Matsayo 12
12
Abeechi bakhuunuula ingano khuSabato
(Mk. 2.23-28; Lk. 6.1-5)
1Mundaalo etsio Yesu yarula khunyanga yaSabato nabira mundalo tsieingano; inzala niyiluma abeechibe, nibachaaka okhukhuunuula ingano nibahululila. 2Nolwa abaFarisayo balola, bamusunjila bari Lola, abeechibo bakhola akali omusilo okhukhola khusabato. 3Naye nakalusia ari Shimwasooma aka Daudi yakhola, olwa yali nali inzala halala naba yali ninabo? 4Mbu yeenjila munzu yaNyasaye nalia Emikaate chiOkhubaho echili omusilo ye okhuchiliakhwo, kata aba yali ninabo, habula abakuhani bonyene? 5Kata shimwasoomakhwo mumalako mbu khunyanga yaSabato abakuhani abali muhekalu boonooninjia isabato, nibarabakhwo neshikha ta? 6Nasi emuboolela mbu aliho hano oushila ihekalu. 7Ne mulaba nimwakhamanyile eshisina shielikhuwa lino, mbu Enzenyanga tsimbabasi, emisango ta, shimwakhabakhalachiile eshiina ababula eshikha tawe. 8Okhuba Omwana wOmundu niye Omwami waSabato.
Omundu owomukhono okwanyela
(Mk. 3.1-6; Lk. 6.6-11)
9Narulayo, niyeenjila musinagogi yabwe; 10ne lola, yalimwo omundu owomukhono okwanyela. Nibamureeba bari Kafuchiililwa okhuhonia khuSabato, noho? Mbu kho bamwinjilile itookho. 11Mana nabareeba ari Ali heena omundu khwinywe ouba nali nelikondi elala, nalio nilikwile mubuko khunyanga yaSabato, ne naralitiilakhwo waliyiniamwo! 12Ne omundu shiashila likondi muno! Kho kafuchiililwa okhukhola amalayi khuSabato. 13Mana nasunjila omundu oyo mbu Kololosia omukhonokwo. Nakukololosia; nikukalukha habwene omulamba, shinga okundi.
Omusumba omulobole
14AbaFarisayo nibarula, nibamusanjila okhukhaaba shinga olwa nabanyale okhumwira. 15Nolwa Yesu yalola ario yarulaho, abandu abanji nibalondana ninaye, nabahonia bosi, 16nabachesiyia mbu baleshe okhumubuula; 17mbu mana akaboolwa mumunwa kwaIsaya omunabii koosibwe; mbu
18Lole, omusumba wanje ngwowuno, owa ndaloboole;
omuheelwa wanje, owa omwoyo kwanje kuchamisilibungwa muno muye;
ndalara Roho wanje muye,
naye alaboolela Abamahanga ebulafu obukhalachi bwatoto.
19Shialayingana, kata okhulanjilisia,
kata omundu yesi shialahulila omwoyokwe khumuhanda ta.
20Shiyakhafunache litundu elifwoneeshe,
kata okhusimia olutambi olutuuma omwosi tawe;
okhuula olwa alaba naleerile obukhalachi bwahabwene mbu buhulenje.
21Ne eliiralie nilio elia Abamahanga balasuubililanga.
Yesu nende Beelezebuli
(Mk. 3.19-30; Lk. 11.14-23)
22Mana yaleerelwa oundi owali nelidimoni, nali omubofu khandi omusilu; naye namuhonia, okhuula olwa omusilu yaboola nalola. 23Abemikanda bosi nibang'ang'aala, nibaboola bari Uno yakhaba omwana waDaudi noho? 24Ne olwa aibaFarisayo bahulilakhwo basunga mbu Omundu uno shiarusinjia amadimoni butswa ta, habula khulwa obunyali bwaBeelezebuli, omwami wamadimoni. 25Ne yamanya amapaaro kabwe, nabasunjila ari Buli buruchi obubeetsanga nibwahukhaane obwene khubwene, bukwitsanga amakunda; khandi buli litaala kata buli inzu ebibee-tsanga nibiahukhaane ebiene khubiene, shibilasinjila ta. 26Kata Setani naba narusia Setani, abeetsanga niyaahukhaane e-mwene khumwene; kho oburuchibwe bulanyala burie okhusinjila? 27Ne isie nimba nirusinjia amadimoni khulwa obunyali bwaBeelezebuli, kho abaana beenywe bakarusinjia khulwa obunyali bwawina? Khulwako bo balamukabukhasilia amakhuwa. 28Ne isie nimba nirusinjia amadimoni khulwa Roho waNyasaye, kho obwami bwaNyasaye bumuuliilekhwo.
29Kata omundu anyala arie okhwinjila munzu yomundu wamaani, ayaaye emianduchie, habula naranjiliile okhumuboha omundu oyo wamaani; nilwo olwa ayaaya inzuye. 30Ouraba ninasi halala ta, yafukulanga; nourakhung'aasia ninasi ta, asalaasinjia. 31Niko akachila nimuboolela, mbu abandu balaleshelungwa buli shionoono nende buli linyeko eliokhunyeka Nyasaye; ne okhunyeka Roho, shikhulaleshelwa ta. 32Omundu yesi ouboola likhuwa nafukula Omwana wOmundu, alaleshelwa; ne ouboola likhuwa nafukula Roho Omutakatifu, shialaleshelwa ta, kata mushise shino, kata mushilia eshiitsanga.
Omusaala nebiamo biakwo
(Lk. 6.43-45)
33Bukule omusaala okuli omulayi, ebiamo biakwo bilaba ebilayi; kata mbu mubukule omusaala okuli omubii, nende ebiamo biakwo nabio bilaba ebibii; shichila omusaala kumanyishilanga khubiamo biakwo. 34Inywe olwibulo Iwetsinzokha, olwa muli ababii murio, munyala murie okhuboola amakhuwa amalayi? Okhuba khulwa obunji obwomumwoyo omunwa kuboolanga. 35Omundu omulayi okhurula mwibiikholie lilayi arusinjiamwo ebindu ebilayi; noyo omundu omubii okhurula mwibiikholie libii arusinjiamwo ebindu ebibii.
36Nasi emusunjila mbu buli likhuwa likhaya liosi elia abandu balaboolanga, balikalusia khunduukho yeshiina. 37Shichila khulwa amakhuwa aka oboola olabasilibwakhwo obulunjishi, khandi khulwa amakhuwa aka oboola olakhalachilwa eshiina.
Olwibulo olumayaanu olwenya eshilolelo
(Mk. 8.12; Lk. 11.29-32)
38Mana abandi khubahandiichi nabaFarisayo nibakalusia nibamusunjila bari Omwechesia, khwenya okhulola eshilolelo khwiwe. 39Ne yakalusia, nababoolela mbu Olwibulo olumayaanu olubula obwisiikwa Iwenyanga eshilolelo; ne shilulaheebwakhwo eshilolelo shiosi ta, habula eshilolelo shiaYona omunabii. 40Okhuba shinga Yona olwa yali munda yokunyeeni tsindaalo tsitaru eshiteere neshilo, nolwa Omwana wOmundu alaba munda yeliloba tsindaalo tsitaru, eshiteere neshilo. 41Aba Ninewe balisinjila mumuse halala nende abolwibulo luno, nibalukhalachila eshiina; shichila bo beekalukhasilia obwilwatsii bwaYona; ne lole, oushila Yona ali hano. 42Omuruchi omukhasi oyo owesautsi alibuukha mumuse halala nende abolwibulo luno, nalukhalachila eshiina; shichila ye yarula khundulo weshibala okhuhulila obuchesi bwaSulemani; ne lole, oushila Sulemani ali hano.
Okhukalukha khwaroho weshifwabwi
43Ne roho weshifwabwi olwa aba narulile mumundu, abiranga aha amatsi kabula, nakhaaba aha ahuluushila, naranyoola ta. 44Mana amala aboole ari Lekha engalushe munzu yanje omwa ndarula; nolwa yoolamwo, anyoola niyili ikhaya, niyelilwe niying'oonilwe. 45Mana atsia yeenda abaroho bandi musaafu abamushila obubii; beenjila bamenyamwo; mana obumaliilishi bwomundu oyo buba obubii okhushila shinga olwa yabeelenje; nolwa kaliba kario khulwibulo luno olumayaanu.
Nyina Yesu, nende abaana babwe.
(Mk. 3.31-35; Lk. 8.19-21)
46Olwa yali nashisunjilanga abemikanda amakhuwa, lola, nyina nende abaana babwe bali nibasinjiile elwanyi, nibeenya okhusungana ninaye. 47Oundi namuboolela ari Lola, mawo nende abaana beenywe basinjiile elwanyi; beenyanga okhusungana ninawe. 48Ne yakalusia nasunjila owamuboolela ari Mama niwina? Kata abaana beefwe nibeena? 49Nanyiila omukhono, namanyia ewa abeechibe bali, nasunga mbu Mama nende abaana beefwe mbabano! 50Omundu yesi oukhola aka Papa ouli mwikulu yeenya, omwenoyo niye omusiani weefwe, khandi omukhaana weefwe, khandi mama.
Attualmente Selezionati:
Matsayo 12: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975