Luk 18
18
Abu ta jas moglmara pidre, ege mere ka dugwa ka ebrie
1Ana Jisas ere mogl, yoba oglka erekrisre, ege ege kamage eramga pamedi praiglkwa pre ka ebrie ta dugwa, 2Dumo swara ta jas ta moglkwa. Jas i, ye God kuduglmo goglkre, yoba pere ama pre i mitna edekrukwa. 3Ana dumo swara i, abu werai ta ama moglkwa. Abu werai i, ege mere jas i moglmara pidre, ye yegl di togwa, Na kudana ikne ta moglkwa i, na ere kide ere naragledi erumiwa. Ene na kotna prisre, ake ple di naratnedi priwe di, yegl di moglkwa. 4Abu i yegl di moglkwa ba jas i, ye ake ple di tenagledi prikrukwa. Ake ple di tenagledi prikrukwa ba okuo ye ta prukwa i, Na God kuduglmo goglkre, yoba pere we di prikre, erika 5ba abu werai i, ye nigade u didre, yubun narukwa pre ye ake ple di tenagliwa. Ta manan, ye ege ege u pai moran, na oglka eraglka pamiwe di, yegl dume dugwa.
6Yagl Kade ama yegl dugwa, Jas kide ka dumara nomane io. 7Ye abu kamo pre mogl, mogl, okuo ake ple di togwa pre God kere yugwa yoba ta etne eduer God agle di pre meglkwa i, God mabuno du ersre, tabre ake ple dinabo mo dikrabe? Mo, kanige ere pai morabedi primo? 8Na ene kaima di teiga, ye tabre mabuno du ersre, yobama ake ple di tenabuka. Ba na Yoba Wam ede ikne unaglka igne i yoba mere na pre medigl meglbi, na u kanaglo mo kankragle? di, yegl dugwa.
Farisi yagl ya taks yugwa yagl kamage eribrere Jisas ka ebrie dugwa
9 Ana yoba tau ye yene mabuno erimara yoba du munedi pre, yoba tau mudu kide meglmedi prikwa i, Jisas ere mogl, ka ebrie ta yegl di togwa, 10Aglke ta yagl suo ere mogl, God kamage ere tenabugledi ede tawa teigwa yugu yomara ebre dugwa. Ta Farisi yoba moglko, ta taks yugwa yagle moglkwa. 11Ana ye ede suna ebriko, Farisi yoba i nomane mina kamage yegl erukwa, God yo, na yoba kide meglmere yegl ta moglkrika pre na ene di wakai yei teiwa. Yoba tau yoba pere bakagl tedre, mabuno kide bogl, abu kunogl nedre, erimere yegl na ta erekrika. Te, taks yugwa yagle magigl moglkwa i moglmere ama moglkrika pre diwa. 12Na wakan swara swarade ege suo mina kaya mokna mawagl ersre, taragl mudu iga i br 10-pela boglsre, ene swara ta teiwe di, Farisi yoba yegl dugwa. 13Yegl dugwa ba taks yugwa yagle i we, ye kuri ta mogl eglke ido edidre, Na kan heven ibo edenaglka i, kuno ta erekrumedi kan atne edidre, na yoba kide moledi prukwa i, i nogugl edenagledi yene pirie wagle sidre, yegl dugwa, God yo, na tadaglme yoba moliwa. Ene na mitna goglo! di, yegl dume dugwa.
14Na ene di teiga, God taks yugwa yagle i yagl du moglmedi kanugo, ye ede ikne yugomugl ogwa. Ba Farisi yagl i, God ye yagl du moglmedi kankrukwa. I siragl pre yoba ta yene pre i mitna edenabuka i, God ye i atne edenabuka. Ba yoba ta yene pre i atne edenabuka i, God ye i mitna edenabiwe di, Jisas yegl dugwa.
Jisas gak kebra na moglmara unaiglmedi kanige erio dugwa
(Matyu 19.13-15, Mak 10.13-16)
15Ana yoba tau gak kebra ya gak kuglabu pra, Jisas akenabedi auro yuigwa. Auro yuigo, Jisas duglo beglkwa yagl kandre, mane di, ka teigwa. 16Ba Jisas ye gak wio di tedre, ye duglo beglkwa yagl yegl di togwa, Gak kebra na moglmara unaiglkwa i, ene mane dikre, kanige erio. I siragl pre yoba ta gak meglmere yegl ta moraiglkwa i, God yoba kingno mogl, ye suglno morabara yoba i pre yenabuka. 17Na ene ka kaima di teiga. Yoba ta ye gak kebra meglmere yegl ta moglsre, God na kingna mogl, na suglna morabedi prabuka i keme God yoba suglno morabara ede suna enabuka. Ba yoba nomane yegl ta paikrabuka i, ye suna ta pikrabiwe di, yegl dugwa.
Yagl mige moni mere kan nogwa ta Jisas bogl ka dibrika
(Matyu 19.16-30, Mak 10.17-31)
18Ana yagl kade ta Jisas moglmara udre, yegl dugwa, Tisa, yagl wakai, na mabuno siragl mere ersre, aimadi kamin kor moraiglkwa ikra kaima inagle? dugwa. 19Yegl dugo, Jisas ye yegl di prukwa, Ene siragl pre na yagl wakai we dine? Yoba wakai ta moglkrikwa ba God swara wakai moglkwa. 20Ana God lomo siragl mere paugwa i, enene pitnga, Ene yagl abu ta bogl kunogl nekre, yoba ta si goglkre, taragl ta kunogl nekre, kot mina ka kibi dikre, nen ya man pre i mitna edidre, kano prio#18.20 Isip Kide Kodigwa 20.12-16, Lo 5.16-20 di, God lomo yegl dumiwe dugwa. 21Jisas yegl dugo, yagl i di ikne ede, yegl dugwa, Na gak mogl ede u erme wiga i pra, lo mudu i, na duglo boluwe dugwa. 22Yegl dugo, Jisas prisre, yegl dugwa, Ene taragl swara ta erekitnga pai moglkwa i, ene taraglnen mudu i pi topo boglsre, mige i pi goduglme yoba yubu si to. Ene yegl etn, ene heven ibo taragl wakai wakai inatnga. Te, ene yegl ersre, u na duglo boglo di, Jisas yegl dugwa. 23Jisas yegl dugo, yagl i prisre, kide pre, ede ogwa. I siragl pre ye taragl mere kaima kan nogwa yagl ta moglkwa.
24Ana yagl i kide prisre, ede ogo, Jisas kandre, yegl dugwa, Yoba taragl podo ere neigwa i, ye God yoba kingno mogl, suglno morabara ede suna enaiglkwa i, waragne paugwa. 25Bugla kamel ta kar nil kwie yomara ede suna enabuka i, yuaglke paugwa ba yoba ta taragl podo kan neigwa i, God yoba kingno moglmara ede suna enaiglkwa i, waragne kaima pamiwe dugwa. 26Yegl dugo, yoba pre meglkwa i, yegl digwa, Yegl eran, God yoba ira ere inan, kuno erabe? digwa. 27Yegl digo, Jisas di ikne ede, yegl dugwa, Yoba taragl tau eribi, kuno erekrabuka i, God erabuka keme pamiwe di, Jisas yegl dugwa.
28Ana Jisas yegl dugo, Pita ye yegl di prukwa, Kano. No taraglno mudu kide kodidre, ene duglo buniwe dugwa. 29Yegl dugo, Jisas ye duglo beglkwa yoba yegl di togwa, Na ene kaima di teiga, yoba swara ta God yoba kingno morabuka ka i di tenagledi ye yugumo toglmo kide kodinabuka mo ye ebie nagiglema kide kodinabuka mo ye agiglema mo nem mam kide kodinabuka i, 30ye erme magigl i taragl mere kide kaima ikne edidre, ege okuo ta unabuka i, aimadi kamin wakai kaima morabiwe di, Jisas yegl dugwa.
Jisas goglsre, adigl u kor enabuka pre aglke kor dugwa
(Matyu 20.17-19, Mak 10.32-34)
31Ana Jisas duglo beglkwa yagl 12-pela di i bina edidre, yegl di togwa, Ene kanio. Nono ede ido Jerusalem enauniwa. Omun, God kamo kep yoba taragl kane kane na Yoba Wam moglmara plau dinabedi ka beglkwa i, kaima plau dinabuka. 32Yoba na i pi yugobuno pere, Juda yoba moglkrikwa i ogono mina yebi, ye na agai goratnedi ersre, na ere kide ere nare, eur si naraiglkwa. 33Ye yegl ersre, ama na duglnai sidre, na si goraiglkwa paugwa. Si geglbi, na ege suota mogl, adigl u kor enaluwe dugwa. 34Jisas yegl dugwa ba ye ka dugwa i, ye duglo beglkwa yagl kaima pre pogl sikrikwa. Ka i ye meglmara teke paugwa mere yegl paugwa pre ye pre pogl sinaiglkwa i, kuno ta erekrukwa.
Yagl gumuglo kin yogwa ta Jisas ere wakai ere togwa
(Matyu 20.29-34, Mak 10.46-52)
35Ana Jisas konbauna wan ede pi dumo Jeriko yomara ede magigl ogo, yagl gumuglo kin yogwa ta konbo bina ame di mogl, ogo kugl, mige pre yana di moglkwa. 36Ana yagl i ame di moglsre, yoba tau mere konbauna wo pi dimiwedi prisre, siragl taragl plau dugwa i pragledi kira pogl prukwa. 37Kira pogl pruko, yoba tau wigwa i ye di ikne ede te, Jisas, dumo Nasaret nem ikra, umiwe digo, prukwa. 38Ye Jisas umedi prisre, ka podo di, yegl dugwa, Jisas yo, Devit Gawamo motnga i, na mitna goglo dugwa. 39Yagl i yegl dugo, yoba tau Jisas unabara ede okna wigwa i ye ka tedre, Ka kodo! digwa. Yegl digwa ba ye kano prikre, ka podo kaima di, Devit Gawamo motnga i, na mitna goglo! dugwa. 40Ana Jisas u adigl moglsre, yoba tau yagl i auro yu wio dugo, ye auro yuigwa. Auro yuigo, ye ede magigl ugwa igne, Jisas ye di pre, yegl dugwa, 41Ene siragl ere tenaglka pre dine? dugwa. Yegl dugo, yagl i di ikne ede, Yagl Kade yo, na aglke kor kanagledi priwe dugwa. 42Yegl dugo, Jisas di ikne ede, yegl dugwa, Kanatniwa. Ene na pre mediglnara i pre ene gumugln u wakai omiwe dugwa. 43Jisas yegl dugo, yagl i gumuglo tabre kaima u wakai ogo, ye aglke kor kandre, Jisas omara duglo bogl, God kagie kade te moglkwa. Te, yoba kan meglkwa i mudu ama God kagie kade teigwa.
Attualmente Selezionati:
Luk 18: KB
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright 2015 New Tribes Mission