Luk 19
19
Jisas ede Sakius kipamara ogwa
1 Ana Jisas ede Jeriko suna pidre, konbo wan ede pi taun meda enabara ede ogwa. 2Ye ede ogo, yagl swara ta konbo bage moglkwa, kagie Sakius we digwa. Yagl i, ye taks igwa yoba bitno ta moglsre, mige moni podo ere nogwa yagl ta moglkwa. 3Ana Jisas konbo wan ede ogo, Sakius ye Jisas siragl mere moglkwa i kanagledi eruko, manugwa. I siragl pre yoba mere kide mogl kegl digo, Sakius ama yagl sugunagle ta moglkwa pre ye Jisas kankrukwa. 4Yegl pre Jisas okuo unabedi ye muku di ede okna pidre, ede fik ta mogo ede mitna pidre, Jisas unan, kanagledi sugl moglkwa. 5Sugl moglko, Jisas ede magigl udre, kan mitna ede Sakius kandre, ye di te, yegl dugwa, Sakius yo, ene tabre ede atne wo. Siragl pre na erme ene kipanara moraglka pamiwe dugwa. 6Yegl dugo, Sakius tabre ede atne udre, gun yei, Jisas auro i pi ye kipamara ede ogwa. 7Ana Jisas Sakius kipamara ede yugugl ogo, yoba mudu kandre, ka kane kane di, yegl digwa, Ye tadaglme yagl ta kipamara moragledi ede yugugl ogwa i, kuno ta erekrumiwe digwa.
8Ana Jisas ye Sakius kana moglko, Sakius adiglsre, Yagl Kade yegl di togwa, Yagl Kade yo, ene kano, na taragl ta kan neiga i, ikne i pi goduglme yoba tenaglka. Te, na yoba tau bakagl tedre, migeno iga i, na mige swara ta imara, mige 4-pela te ikne edinaluwe dugwa. 9Sakius yegl dugo, Jisas ye di te, yegl dugwa, Abraham okna pre meduglmere yegl, ene ama pre mediglnga pre God erme ene ebin gagiglnma bogl ere yugwa. 10Na Yoba Wam moglka i, na yoba ta wau beglkwa i doko kandre, ere inagledi wiwe dugwa.
Kogon yagl 10-pela mige imere ka ebrie
(Matyu 25.14-30)
11Ana yoba Jisas kamo prikwa meglkwa i, ye yegl di prikwa, Jisas ede Jerusalem magigl ugwa pre God yoba kingno morabuka igne i magigl kaima erumedi prikwa pre 12Jisas ka ebrie ta yegl dugwa, Yoba dumo eglke ta moglsre, yagl kade ta di te, Ene dumonen kide kodo ede un, no ene King moratnedi edumun, King moglsre, aglke ede ikne yugunmugl pidre, yobanen sugl moratniwe digwa. 13Ana ye ede enagledi ere, ye nigl kogonmo yoba 10-pela agle dugo, wigwa. Wigo, ye swara swarade mige gol podo ta tedre, yegl dugwa, Ene mige i idre, na bisnis ere nare meglbi, na ikne unaluwe didre, ede ome dugwa.
14Ye ede ogo, yene yugomugl i, ye kide kanigwa pre yoba ta dedidre, yagl i no kingno moglkrabedi prumniwe dio digo, ye ede eigwa. 15Ye okuo eigwa ba yagl kade i kwade king mogl kodo, ede ikne yugomugl ugwa. Ye ede ikne udre, nigl kogon yoba 10-pela mige teiga i, ikra wio dugwa. Ye udre, bisnis siragl mere erikwa i dibi, pragledi wio dugwa.
16Ana nigl kogon yoba swara ta komono kana udre, yegl dugwa, Yagl Kade yo, ene mige swara ta natnga i mina na kogon ersre, mige 10-pela mere kia i tebe ede padigl, i wiwe dugwa. 17Yegl dugo, yagl kade i ye yegl di togwa, Ene nigl kogon yoba wakai moglsre, wakai etniwe dugwa. Na taragl kebra ta ene teigo, ene sugl wakai motnga pre erme ene taun 10-pela sugl moratniwe di, yegl dume dugwa.
18Ana nigl kogon yoba namba 2 udre, yegl dugwa, Ene mige ta natnga i mina na mige 5-pela mere kia i tebe ede padigl, i wiwe dugwa. 19Yegl dugo, yagl kade i ye yegl di togwa, Ene ama taun 5-pela sugl moratniwe di, yegl dume dugwa.
20Ana nigl kogon yoba suo udre, ede ebriko, ta okuo udre, yegl dugwa, Yagl Kade yo, ene mige ta natnga ikra, na lap mina were teke yeiga, yoma kano. 21I siragl pre na ene kudugln goglka. Ene yagl gigledi moglsre, yoba taraglno kwi idre, yoba pere toglno mina ene kaya mokna ama singa pre na kudugl gogl, migenen i kogon ta erekre, teke yeiwe di, yegl dume dugwa.
22Nigl kogon yagl i yegl dugo, yagl kade di ikne ede, yegl dugwa, Ene nigl kogon yoba kide motniwe dugwa. Enene ka dinara i mina na prisre, ene yubu sinaglka. Ene pitnga i, na yagl gigledi ta moglsre, yoba pere taragl tau yeigwa i, na idre, yoba pere kaya mokna ere yaiglkwa i, na si yumedi pitnga paugwa. 23Na yegl moglmedi pitna, ene na migena i pi beng edingo. Ene yegl etna, na migena kia bogl igo we dugwa. 24Yegl didre, yoba tau magigl adigl meglkwa i yegl di togwa, Yagl i mige swara ta ake moglkwa i, ene idre, yagl ta 10-pela yugwa i teo dugwa. 25Yegl dugo, yoba i di ikne ede, yegl digwa, Ba yagl i, mige 10-pela i kodugwa pre i kuno ta erekrumiwe di, yegl dime dugwa.
26Ana yoba i yegl digo, yagl kade i yegl dugwa, Na ene di teiga, yoba taragl tau mere kan nogwa i, na taragl tau ama i tebe ede tenaglka. Ba yoba taragl tau mere kan nekrukwa i, ye taragl kebra ta ake morabuka i ama ake i eglke edenaglka. 27Ba yoba tau na kudana ikne moglsre, na ye kingno mogl dinabedi prikwa i, auro yudre, na gumuglnamugl magigl i ye si golo di, yagl kade i yegl dumedi, Jisas yegl dugwa.
28Ana Jisas ka yegl di kodidre, konbauna ta ede egli Jerusalem ogwa i, aglke kor duglo bogl ede ogwa.
Jisas king mere yegl mogl, ede Jerusalem suna ugwa
(Matyu 21.1-11, Mak 11.1-11, Jon 12.12-19)
29Ana Jisas duglo beglkwa yagl bogl ede taun Betfage ya Betani muglo Oliv ibo yebrara ede magigl wigo, Jisas ye duglo biurka yoba suo dedidre, 30ye yegl di togwa, Ene dumo ta yomara iro suna pidre, donki ta kane kogl padiglbi, kanabrika. Donki i, yoba ege swara ta au sikrikwa. Ene donki i kandre, kane poko ede, yunabrika. 31Te, yoba ta ene di pre, ene siragl pre donki i kane poko edibre? dibi, ene yegl diro, Yagl Kade kogonmo ta paugwa pre yuiro dume di, ene yegl diro dugwa.
32Ana Jisas yegl dugo, ye duglo biurka yagl suo ede ebriko, Jisas dumere mere plau dugo, kanibrika. 33Ye donki kandre, kane poko ede miurko, donki nem yagl meglkwa i ye di pre, Ene siragl pre donki nagigle i kane poko edibre? digo, 34Ye di ikne ede, Donki kogonmo ta paugwa pre Yagl Kade yuiro dumiwe dibrika.
35Ana yagl suo i, ye donki yu Jisas moglmara edidre, ir gaglno gugl, donki moko bolamugl kuglsre, Jisas donki au sinabedi ake ple di tebrika. 36Ake ple di tebriko, Jisas donki au sidre ede ogo, yoba tau mere ama ir gaglno guglsre, konbauna enabara kugl yeigwa.
37Ana Jisas muglo Oliv konbauna ta yei ede atne umara i, ugo, ye duglo beglkwa yoba mere kide ye ede atne ugwa i, kandre, kimagl erukwa i, poglo di prisre, ka podo di, aglage kaglkane ere, God kagie kade teigwa. 38Ye yegl digwa, King i Yagl Kade dedugo, ugwa pre God ye ere wakai ere tenabuka.#19.38 Giglage 118.26 Te, God, mogl mitna kaima edugwa i, nono kagie kade tenamga paugwa. Ye ama deno muduno wida di norumiwe di, yegl digwa.
39Ana yoba mere meglmara suna i, Farisi yoba tau moglsre, Jisas yegl di teigwa, Tisa yo, ene duglo beglkwa yoba i, ka yegl di dinaiglmedi ka to! digwa. 40Yegl digo, Jisas di ikne ede, yegl dugwa, Na ene di teiga, yoba i drano si kegl dibi, kobuglo magigl paigwa i drano a di, agle didre, God kagie kade tenaiglmiwe dugwa.
Jisas Jerusalem pre kai erukwa
41Ana Jisas ede dumo Jerusalem magigl udre, ye dumo i kaimo erukwa. 42Ye kai ersre, yegl dugwa, Kamun erme tagugwa i, ene siragl mere deno muduno wida di inaiglkwa i ta prima, wakai kaima paugo. Ba konbauna i erme teke paugwa, ene ta kankraiglkwa mere yegl paugwa. 43-44God ene ake ple dinagledi erme ugwa i, ene ta kankrikwa pre okuo ene yubun inaiglkwa. Ene kudano ikne bage bage mogl udre, ene tauno yomara mogl winabo di, kobuglo togl yomara ede kuglo enamnedi makan gaba si yu edenaiglkwa. Makan si yu edidre, taun si atne ede, yoba suna moraiglkwa i ere kide ere tedre, kobuglo swara ta kobuglo pere ta yenabara tebe yenabedi kanige erekraiglkwa. Ye mudu si deduagle ere kodinaiglmiwe dugwa.
Tawa teigwa yugu yomara yoba taragl tau topo beglkwa i, Jisas si meda edugwa
(Matyu 21.12-17, Mak 11.15-19, Jon 2.13-22)
45 Ana Jisas ye ede Jerusalem suna udre, tawa teigwa yugu yomara ede togl suna ogwa. Ye togl suna pidre, yoba taragl tau i pi topo bogl meglkwa i, si meda edidre, 46ye yegl di togwa, God kamo mina dugwa i, yegl dugwa, Na yuguna i, yoba kamage eraiglkwa dumo ta yenabiwe#19.46 Aisaia 56.7 dugwa. Ba ene dumo i, ere i kunogl gogl yoba teke paigwa dumo mere yegl edimiwe#19.46 Jeremaia 7.11 dugwa.
47Ana Jisas ege swara swarade tawa teigwa yugu yomara togl suna pidre, yoba ka beke te moglkwa. Ka beke te moglko, tawa teigwa yoba bitno meglkwa i yeigo, God lomo beke teigwa yoba i yeigo, ye Juda yoba yobano kade bogl Jisas si goramnedi konbauna dokigwa 48ba ye konbauna ta kankrikwa. I siragl pre yoba yoko meglkwa i, ye mudu Jisas kamo prisre, wakai prikwa pre yoba kade kanigwa i, no Jisas ta si gun, yoba kide praiglkwa mere yegl pamedi kanigwa.
Attualmente Selezionati:
Luk 19: KB
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright 2015 New Tribes Mission