Pi zi tiki 23
23
Abraham a wura waŋ n'e piti Sara woni
1Sara te za buza miya gai caaɓa pi muguzak. 2Te mra midini afti na Kanaan, war Kiryat-Arba, na yikiɗi zamai ɓa: Hebron, Abraham a za fet na wiini mriɗi, a tûwiti lai. 3Asakal par a faka amai, a hina ka kopoŋɗi munini waŋ, a hala aŋ muɗa gaiɗi alini Hek. 4A miɗiɗi maini nɵa: “Mu na gaiki na ɗa maini ɗif zi jak, mai morkoyki nɵa. Ki siŋa hlai zi pi agwi arbaki, kapai mu piti muniya na te mra warni tiɓ kai ɗi. 5Alini Hek e wiyini seŋ wiini Abraham maini nɵa: 6“Zibra seŋyi ɗa agwi epingezayi, Alaw a zuku aŋ ɗif n'abai arbaɗi ta. Nɵa hala piti muniku na te mra war waŋ na zuf gara a suwa marni paŋ ɗa. Ktai n'arbaɗi n'aga a ɗuluku sini hlaini par buri ku piti muniku na te mra warni kai aŋ kai”. 7Abraham a faka amai a goɓa azumai wuzaɗi ɗai na midini afti ni ɗa, a dara muɗa, wuzaɗi alini Hek. 8Asakal par a miɗiɗi maini nɵa: “Na ɓa ki yimi tuwiŋa li, na ɓa ki firyi ɓa muniya na te mra, na te hina li hanɗa te sumna arbaki war yeɵ ɗa, ɵini seŋŋa ɗa, ki hili sini Efron n'ahini Sohar, ki siiwiŋ buriya, 9Kapai a hinaŋa waŋ na wiini na siɗi huwuŋ na Makpela, n'edi merfeŋni vowaini ɗa. Aga a saŋa miɗini wûrini na wura gaini arzaŋ ta ɗa, kapai waŋ hanɗa a hina aŋ wiya arbaki. 10Efron a na fu azumai arbaɗi alini Hek dam. A wiyini seŋ wiini Abraham wuzaɗi alini Hek paŋ a dara muɗa wuzaɗi nagai paŋ n'e hilisi war faada min magalani fuŋ n'abai a muɗa: 11Zaw kai, epin-geza, za barka, yima seŋŋa na mu dara mu muɗuŋku ɗa: Vowai ɗa, mu suŋku, waŋ n'aŋ siɗi huwuŋ n'aŋ woni ɗa, mu suŋku lai, wuzaɗi aliɗi ɗaiŋa, mu suŋku kadai, piti muniku na te mra woni. 12Abraham a goɓa azumai wuzaɗi ɗai na midini afti ni ɗa. 13Asakal par a miɗini wiini Efron gaini wulani amai wuzaɗi ɗai na midini afti paŋ maini nɵa: “Tuku Efron, na ɓa ku ɵina fu ma ɗa, mu suku faraini vowai ɗa ca. Yimaŋ ta par yaw, kapai mu piti muniya woni. 14Efron a wiyini seŋ wiini Abraham a miɗini: 15Epin-geza, za barka, yima seŋŋa wiiku, afti na wûrini sulai zi arzaŋ miya puɗu kaadai ɗa arba ta gaiku tuku ɗa a ma ktai ɗa? Piti muniku na te mra ɗa azumai. 16Abraham gaini Efron e kitiŋ arbaɗi marɗi. Abraham a sini farai n'alini Hek e ɵiniŋ war mini par ɗa: Sulai zi arzaŋ miya puɗu, a farai n'a ɗai e ɗa cikili gaini yaw yaw ɗa.
17Vowai na wiini Efron na war Makpela, wuzaɗi Mamre vowai gaini waŋ na warni paŋ luwaŋai na warni vowai ɗa gai hlaini lai gaini n'amlai war hagani paŋ kafa,
18a bunda aŋ gal na wiini Abraham, wuzaɗi alini Hek paŋ gaiɗi nagai paŋ n'e hilisi war faada min magalani fuŋ n'abai, buri e ɗi zaida.
19Asakal hanɗa Abraham a piti Sara na munini war waŋ na siɗi huwuŋ na war vowai na Makpela wuzaɗi Mamre a dara muɗa a Hebron, midini afti na Kanaan.
20Alini Hek e sini vowai gaini waŋ na warni wiini Abraham marwai, kapai a hina aŋ hlai na wiini zi piɗi ɗaini n'a wuraŋ tiɗi par.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964