Башталыш 19
19
Содомдун күнөөсү
1Кеч киргенде, эки периште#19:1 … эки периште … – Эвр. 13:2. Содомго келди. Лот шаар дарбазасынын жанында олтурган эле. Лот аларды көрүп, алдынан тосо чыгып, чөгөлөп, чекеси жерге тийгенче таазим этти.
2– Мырзалар, – деди ал, – кулуңуздардын үйүнө кириңиздер. Бутуңуздарды жууп, биздикине конуп кетиңиздер. Эртең эртелеп жолго чыксаңыздар болот.
Алар:
– Жок, рахмат, биз шаар аянтына түнөйбүз, – дешти.
3Бирок Лот жедеп кыстай бергенде, алар көнүп, Лоттукуна келишти. Лот тамак жасатып, калама жаптырды. Алар тамактанышты.
4Коноктор али жата электе, Содом шаарынын бүт тарабынан бардык эркектер, жаш-кары дебей келип, Лоттун үйүн тегеректеп алышты. 5Алар Лотту чакырып:
– Сага бул түнү келген кишилер кана? Аларды бизге чыгарып бер. Алар менен жатабыз, – дешти.
6Лот сыртка чыгып, аркасынан эшигин жапты да:
7– Туугандарым, мындай жаман иш кылбагыла! 8Менин эркек көрө элек эки кызым бар. Ошолорду чыгарып берейин, аларга билгениңерди кылгыла. Бул кишилерге тие көрбөгүлө, алар үйүмөн баш паана тапкан конокторум, – деди.
9Бирок тигилер:
– Эй, тур биякка! Сен, тентимиш, бизге акыл үйрөткүң барбы? Эми сени тигилерден жаман кылабыз! – деп, Лотту катуу түртүп келишип, эшикти сындырмак болушту.
10Ошондо ичкеридеги кишилер колдорун чыгарып, Лотту үйгө киргизип, эшикти жаап алышты. 11Ал эми эшик алдына чогулган улуу-кичүү кишилердин көзүн көрбөгөндөй кылып салышты. Ошондо алар эшикти таппай карайлашты.
Лоттун үй-бүлөсүндөгү тил албастык
12Андан соң жанагы кишилер Лотко:
– Бул жерде дагы кимиң бар? Күйөө балаң болобу, балдарыңбы, кыздарыңбы, кимиң болбосун, баарын бул жерден алып чык, 13анткени биз бул жерди жок кылабыз. Бул жердеги элдин зулумдугунун айынан боздогон үндөр Жараткан Эгеге жетти. Ал бизди бул жерди жок кылуу үчүн жиберди, – деди.
14Ошондо Лот болочок күйөө балдарына барып:
– Тезирээк бул жерден чыгып кеткиле! Жараткан Эге бул шаарды жок кылат, – деди.
Бирок Лоттун сөзү аларга тамашадай туюлду.
15Таң агарганда, периштелер Лотту шаштыра башташты.
– Бол! – дешти алар, – Аялың менен эки кызыңды ал да, тез бул жерден кет! Болбосо, шаарды жазалаганда, сен да кошо жок болосуң!
16Лот кыбылжып турганда, жанагы кишилер аны, аялын жана эки кызын колдорунан алып, шаардан жетелеп чыгышты. Себеби Жараткан Эге аларга ырайым кылды. 17Аларды сыртка чыгарган соң, тигилердин бири:
– Жаныңды куткар! Артыңды караба! Бул өрөөндүн эч бир жерине токтобо! Адырды көздөй кач, болбосо өлөсүң! – деди.
18Бирок Лот:
– Жок, мырзаларым, – деп өтүндү. – 19Мына, кулуңуздарга ырайым кылып, жанымды куткарып, чоң жакшылык жасадыңыздар. Бирок мен тоого жете албайм, артыман апат басып, өлүп калам. 20Тигине, тээтиги шаарча жакын экен, ошол жакка качып барайын. Ал кичине да экен, ошол жерден жанымды сактап калам.
21Ошондо алардын бири:
– Макул, мунуңду да аткарайын. Сен айткан шаарды кыйратпайм. 22Тезирээк, ошол жакка кач! Сен ошол жерге жеткиче мен эч нерсе кыла албайм, – деди.
Ошондуктан бул шаар Соор#19:22 … Соор … – Эврейче «кичине» дегенди билдирет. аталып калган.
23Лот Соорго жеткенде, күн көтөрүлүп калган эле. 24Анан Жараткан Эге Содом менен Гоморрага көктөн жалындаган күкүрт жаадырып, 25ошол шаарларды, бүт өрөөндү мүлдө эли, өсүмдүк-чөбү менен кошо жок кылды. 26Лоттун аялы болсо бурулуп артын карары менен туз мамыга айланып калды.
27Ыбрайым таң эртелеп, мурун Жараткан Эгенин алдында турган жерге келди. 28Төмөн жактагы Содом менен Гоморраны жана бүтүндөй өрөөндү карап, темир эриткен мештен чыккандай уюлгуган түтүндү көрдү.
29Кудай өрөөндөгү шаарларды кыйраткан кезде, Ыбрайымдын суранычын эске алды. Лот жашаган шаарларды тыптыйпыл кылганда, аны ошол апаттан аман алып чыкты.
Мааптар менен аммондордун келип чыгышы
30Лот Соордо тургандан коркуп, эки кызы менен тоого барып, үңкүрдө жашап калды.
31Бир күнү улуу кызы кичүүсүнө мындай деди:
– Атабыз карып калды. Бизге эр болгудай бул жерде бир да эркек жок. 32Кел, атабызды шарапка мас кылып, аны менен жаталы да, андан тукум улайлы.
33Ошол түнү алар атасына шарап берип мас кылышты. Анан улуусу атасы менен жатып чыкты. Атасы кызынын качан жатып, качан туруп кеткенин билген жок.
34Кийинки күнү улуусу кичүүсүнө айтты:
– Өткөн түнү мен атам менен жатып чыктым. Бул түнү да ага шарап ичирип, мас кылалы, анан сен жатып чык, ошентип атабыздан тукум улайлы.
35Ошол түнү да алар атасын мас кылышты. Анан кичүүсү атасы менен жатып чыкты. Атасы анын качан жатып, качан туруп кеткенин билген жок. 36Ушундайча Лоттун кыздары атасынан кош бойлуу болушту. 37Улуусу уул төрөп, атын Маап#19:37 … Маап … – Эврейче «атамдан» дегенди билдирет. койду. Ал бүгүнкү маап элинин түпкү атасы. 38Кичүүсү да уул төрөп, атын Бенамми#19:38 … Бенамми … – Эврейче «менин элимдин уулу» дегенди билдирет. койду. Ал бүгүнкү аммон элинин түпкү атасы.
Kyrgyz New Testament © Bible Society of Kyrgyzstan, 2018