Jɔɔŋ 19
19
1Ŋɩɩ nɛ Paalɩt leŋ ba kɛŋ Yesu a vɩɩrʋ. 2Laalɩyuoroo kɛŋ sɔsʋŋ sʋa kuoru nyunchuulo a joŋo chuu, a joŋ gɛrɩ-fɩaŋ laalʋ, 3aŋ chʋɔlʋ a bʋl, “Juu tɩŋŋaa kuoro, laa chʋɔlʋŋ,” aŋ pɛ fallʋ.
4Ŋɩɩ nɛ Paalɩt bɩra mɩɩra lɩɩ nɩalɩŋ teeŋ a bʋla pɩba, “Má bee na, mɩ kɛnʋ kaa kʋʋ lɩɩ ma teeŋ nɛ dɩ ma jɩŋ arɩ mɩ-na bɩ wɩɩkala na ʋ sɩ ŋaa chei.” 5Ŋɩɩ nɛ Yesu kʋ lɩɩ a ha chu sɔsʋŋ kuoru nyunchuul-la arɩ gɛrɩ-fɩaŋ-la ba sɩ joŋo laalʋ. Ŋɩɩ nɛ Paalɩt bʋla pɩba, “Má na baal-la.”
6Wɩɩsʋllɩ sɩpaalaaraa kʋhɩasɩŋ arɩ nɩalɩŋ sɩɩ pɔ Wɩa dɩɩ-balɩŋ sɩ naʋ, ba kpɩa goŋ a bʋl, “Leŋ dɩ ba kpaasʋ daagɛsɛ nyuŋ, leŋ dɩ ba kpaasʋ daagɛsɛ nyuŋ.” Ŋɩɩ nɛ Paalɩt bʋla pɩba, “Má tɩtɩa kɛnʋ kpaasɛ daagɛsɛ nyuŋ. Mɩ-na bɩ wɩɩ-la ʋ sɩ cheye na.”
7Ŋɩɩ nɛ Juu tɩmma-la bɩra bʋl, “Ʋ kɛŋ ʋ tɩtɩa yɩrɛ Wɩa Bii nɛ. La wombiiŋ daga arɩ nʋʋkala nɛ ŋaa ŋɩɩ, ʋ maga dɩ ba kpʋʋ nɛ.”
8Fawʋllʋŋ fa paala kɛŋ Paalɩt nɛ. Ʋ sɩ nɩa arɩ ba bʋl ŋɩɩ, fawʋllʋŋ wasa kɛnʋ. 9Ŋɩɩ nɛ ʋ bɩra mɩɩra jʋʋ kuoru dɩa-la tʋɔŋ a pɩɛsɛ Yesu, “Nɩɩ nɛ ŋ lɩɩ?” Yesu bɩ wɩɩkala bʋla. 10Ŋɩɩ nɛ Paalɩt pɩɛsʋ, “Ŋ tɔrɛ ŋ niiŋ nɛɛ? Ŋ bɩ jɩŋ mɩ kɛŋ doluŋ dɩ mɩ joŋuŋ ta, a bɩra kɛŋ doluŋ dɩ mɩ leŋ dɩ ba kpaasɩŋ daagɛsɛ nyuŋ?”
11Ŋɩɩ nɛ Yesu bʋla pʋ, “Dɩ Wɩa nɛ fa bɩŋ doluŋ pa, ŋ fa bɩ jaŋ kɛŋ dol kala mɩ lɛ. Ama nɩɩ-la sɩ jommi hɛ ŋ nɩsɩŋ lɛ nɛ kɛŋ cheeriŋ a kɩɩŋ, ʋ wʋbɔmʋŋ nɛ bɩ magɩa kɛnɛ.”
12Paalɩt sɩ nɩɩ ŋɩɩ, ʋ fa cho dɩ ʋ joŋ Yesu ta. Ŋɩɩ nɛ Juu tɩŋŋaa faasa kpɩa goŋ a bʋl, “Dɩ ŋ nɛ joŋu ta, ŋ bɩra bɩ la tinteeŋ kuoru-balɩŋ ba sɩɩ yɩrɛ Siiza nandɔŋ ŋaa. Nɩɩ-la kala sɩ kɛŋ ʋ tɩtɩa yɩyɩrɛ kuoru, ʋ tɩɩna ŋaa kuoru-balɩŋ dʋndɔŋ nɛ.”
13Paalɩt sɩ nɩa dɩ ba bʋl wɩaa deemba, ʋ kɛŋ Yesu kaa kʋ lɩɩ, aŋ mʋ hɔŋ ʋ sarɩya diiri kpasa nyuŋ. Ba kɛŋ lee-la kaa yɩrɛ ‘Gabata’ nɛ Hiburu yikoro lɛ. Ʋ bʋbʋɔŋ nɛ: Lee-la tabɩaa ŋaa mʋla mʋla nɛ. 14Dɩ wɩa jɩl nyu-gbaŋa. Tapʋlɩɩ-la nɛ Juu tɩŋŋaa kɛŋ ba tɩtɩa hɛ dɔŋɔ dɩ taŋ nɛ pʋla dɩ ba gbieli dɩɩsɩŋ kiele bal gbiele-la. Ŋɩɩ nɛ Paalɩt bʋla pɩba, “Ma na ma kuoro.”
15Ŋɩɩ nɛ ba faasa kpɩa goŋ a bʋl, “Leŋ dɩ ba kɛnʋ kaa mʋ kpaasɛ daagɛsɛ nyuŋ.” Ŋɩɩ nɛ Paalɩt pɩɛsɛba, “Maa chɛ dɩ mɩ kpaasɛ ma kuoro daagɛsɛ nyuŋ nɛɛ?” Ŋɩɩ nɛ Wɩɩsʋllɩ sɩpaalaaraa kʋhɩasɩŋ bʋl, “La bɩ kuoru kala kɛnɛ a pɛ Siiza lɛ.”
16Ŋɩɩ nɛ ʋ joŋ Yesu pɩba dɩ ba kaa mʋ kpaasɛ daagɛsɛ nyuŋ.
Ba kpaasɛ Yesu daagɛsɛ nyuŋ
Mat. 27.32-44; Maak 15.21-32; Luuk 23.26-43
17Ŋɩɩ nɛ ba kɛŋ Yesu lɩɩ. Ʋ lɩɩ a baasɛ ʋ tɩtɩa daagɛsɛ a mʋ lee-la ba sɩɩ chɛ dɩ ba kpaasʋ. Lee-la yɩrɩŋ nɛ nyu-kuŋkogulo. Hiburu yikoro lɛ baa yɩrɛ lee-la Gɔlɩgɔta nɛ. 18Lee-la nɛ ba kpaasʋ daagɛsɛ nyuŋ. Ba fa kpaasɛ nɩaa balɩa ma nɛ daagɛsɛ nyuŋ a pɛ Yesu lɛ. Dɔŋɔ hɛ ʋ nadiiŋ, dɔŋɔ ma hɛ ʋ nagʋa. Ka Yesu hɛ tʋtʋɔbaanɩŋ.
19Ŋɩɩ nɛ Paalɩt ŋmʋnsa mɛrɛ daagɛsɛ-la lɛ a bʋl,
“JUU TƖŊŊAA KUORO YESU A LƖƖ NAZARƐT.”
20Lee-la kpagɛ Jerusalɛm nɛ, ŋɩɩ nɛ Juu tɩŋŋaa yʋgɛ a karɩmɛ wɩɩ-la Paalɩt sɩ ŋmʋnsa mɛrɛ daagɛsɛ-la lɛ. Ʋ ŋmʋnsɛ wɩɩ-la arɩ yikorusuŋ batori nɛ. Ʋ kɛŋ Hiburu tɩŋŋaa yikoro ŋmʋnsɛ, a kɛŋ Laatɩŋ yikoro ma ŋmʋnsɛ, a kɛŋ Giriisi tɩŋŋaa yikoro ma ŋmʋnsɛ. 21Ŋɩɩ nɛ Juu tɩŋŋaa Wɩɩsʋllɩ sɩpaalaaraa kʋhɩasɩŋ bʋla pɩ Paalɩt arɩ ʋ sɩ́ ŋmʋnsa bʋl, “Juu tɩŋŋaa kuoro nɛ,” ama dɩ ʋ ŋmʋnsɛ, “Baala deeŋ sɩ ʋ nɛ ŋaa Juu tɩŋŋaa kuoro.”
22Ŋɩɩ nɛ Paalɩt bʋl, “Wɩɩ-la mɩ sɩ ŋmʋnsa, mɩ ŋmʋnsa nɛ.”
23Laalɩyuoro-la sɩ kpaasɛ Yesu daagɛsɛ-la nyuŋ dɛrɛ, ba paa ʋ gɛnnɩŋ a kaa kpaa leree banɛsɛ. Laalɩyuoru kala kɛŋ dɔŋɔ. Gɛrɩ-bal kʋbala ma nɛ fa hɛ nɩmɛ, ba yie yuo ŋɩɩ nɛ, a chɩŋ nyuŋ a kaa tuu bʋbʋɔŋ.
24Ŋɩɩ nɛ laalɩyuoro-la bʋla pɩ dɔŋɔ a bʋl, “Má sɩ́ leŋe dɩ la kɛŋ gɛrɩ-la kɩɛsɛ, má leŋ dɩ la tɔnsɛ, a na nɩɩ-la sɩ jaŋ dii dɩ ʋ laa gɛrɩ-la.”
Wɩɩŋ deeŋ ŋaa dɩ wɩalɩŋ ba fa sɩ ŋmʋnsa Wɩa teniŋ tʋɔŋ kʋ ŋaa wʋtɩtɩɩ nɛ. Ba fa sɩ,
“Ba paa mɩ gɛnnɩŋ kpaa dɔŋɔ nɛ
aŋ tɩŋ mɩ gɛrɩŋ dɔŋɔ wɩaa a tɔnsɛ.”
Ŋ-la nɛ laalɩyuoro-la ŋaa.
25Nɩalɩŋ fa sɩ chɩna kpagɛ Yesu daagɛsɛ-la nɛ ŋ-la: Yesu naaŋ arɩ ʋ naaŋ ŋaana, arɩ Kilopas haala Mɛɛrɩ, arɩ Mɛɛrɩ Magɩdalɩŋ. 26Yesu sɩ na ʋ naaŋ arɩ ʋ harɩ-tooru-la ʋ fa sɩ cho, dɩ ba chɩŋ nɩmɛ, ŋɩɩ nɛ ʋ bʋl ʋ naaŋ lɛ, “Haal, bee na ŋ bie nɛ ŋ-la,” 27aŋ bɩra bʋla pɩ ʋ harɩ-tooru-la ma a bʋl, “Na ŋ naaŋ nɛ ŋ-la.” A chɩŋ bʋa-la lɛ ʋ harɩ-tooru-la kɛŋ Yesu naaŋ a kaa mʋ ʋ dɩa.
Yesu sʋba
Mat. 27.45-56; Maak 15.33-41; Luuk 23.44-49
28Yesu jɩma arɩ lɛɛlɛ wɩɩwɩɩ kala dɛrɛ nɛ, ka dɩ ʋ wuo leŋ dɩ wɩalɩŋ ba sɩ ŋmʋnsa Wɩa teniŋ tʋɔŋ, dɩ ba kʋ ŋaa wʋtɩtɩɩ. Ŋɩɩ nɛ ʋ bʋl, “Lɩɩ-nyʋasʋŋ nɛ kɛmmɛ.” 29Dɩ sɩnɩŋ sɩ nyala su gbaŋa chɩŋ nɩmɛ. Ba joŋ suosuo a yuu sɩŋ-la lɛ, a kɛŋ sekeliŋ lɩɩsɛ suosuo-la, a kaa jɩla hɛ Yesu niiŋ lɛ. 30Ŋɩɩ nɛ Yesu nyʋa sɩŋ-la aŋ bʋl, “Wɩɩkala dɛrɛ nɛ,” aŋ kɛŋ ʋ nyuŋ chugili a sʋʋ.
31Tapʋlɩɩ-la nɛ Juu tɩŋŋaa kɛŋ ba tɩtɩa hɩhɛ dɔŋɔ dɩ taŋ pʋl dɩ ba gbieli dɩɩsɩŋ kiele bal gbiele-la. Tapʋlɩɩ-la ma jaŋ ŋaa chɛ-wiesii-la chɛɛŋ. Ŋɩɩ nɛ tɩɩ ba bɩ chɛ dɩ nɩalɩŋ kʋsʋʋnʋŋ sagɛ daagɛsɛ-la nyuŋ chɛɛ-la. Ŋɩɩ nɛ ba mʋ sʋl Paalɩt dɩ ʋ leŋ dɩ laalɩyuoroo mʋ bori ba naasɩŋ aŋ soriba daagɛsɛ-la nyuŋ. Ʋ sɛɩ. 32Ŋɩɩ nɛ laalɩyuoro-la mʋ kɛŋ baala-la ba sɩ kpaasa pɛ Yesu lɛ naasɩŋ bori. 33Ba kɔ Yesu leriŋ dɩ ʋ sʋba. Ŋɩɩ wɩaa ba bɩ ʋ naasɩŋ boro. 34Ama laalɩyuoro-la dɔŋɔ joŋ ʋ timiŋ a tɔɔ Yesu sɛmɛ luri, ŋɩɩ nɛ chalɩŋ arɩ lɩɩŋ guu gbu lɩɩ. 35Mɩ-na Jɔɔŋ nɛ na wɩaa deemba arɩ mɩ sɩɩŋ aa bʋlba arɩ ba ŋaa wʋtɩtɩɩ nɛ. Mɩ bʋl wɩaa deemba pɩpɩma dɩ ma ma wuo laa dii. 36Wɩaa deemba kala ŋaa dɩ wɩalɩŋ ba sɩ ŋmʋnsa Wɩa teniŋ tʋɔŋ kʋ ŋaa wʋtɩtɩɩ nɛ. Ba ŋmʋnsa a bʋl,
“Ba bɩ jaŋ bori ʋ haŋgbel-bala ma.”
37Wɩa teniŋ sɛmɛ dɔŋɔ ba bɩra bʋla, “Ba jaŋ beŋ nɩɩ-la ba sɩ tɔbɔ arɩ timiŋ.”
Ba hugi Yesu
Mat. 27.57-61; Maak 15.42-47; Luuk 23.50-56
38Yesu sɩ sʋba, baal kʋbala ma fa hɛ nɩmɛ baa yɩrɛ Josɛf. Ʋ fa lɩɩ Arɩmatɩya tinteeŋ nɛ. Ʋ ma fa ŋaa Yesu harɩ-tooru nɛ. Ama ʋ-na faa lʋarʋ nɛ a tɩŋ ʋ sɩɩ fá Juu tɩŋŋaa wɩaa. Ŋɩɩ nɛ ʋ mʋ sʋl Paalɩt dɩ ʋ leŋ dɩ ʋ sori Yesu kʋsʋʋŋ. Paalɩt pʋ wombiiŋ. Ŋɩɩ nɛ ʋ mʋ sori. 39Nikodemɔs, nɩɩ-la fa sɩ laa sɩpaaŋ mʋ Yesu teeŋ tɩtaŋɩŋ, ʋ ma to Josɛf harɩŋ mʋ, a pɛ kɛŋ tɩɩ-kel-zɔŋ kʋbala baa yɩrɛ mɛɛ arɩ dɔŋɔ ma baa yɩrɛ alɔɩ. Ba yuŋuŋ ŋaa kilo mara arɩ fii nɛ. 40Ba balɩa nɛ mʋ joŋ Yesu kʋsʋʋŋ, a joŋ gɛrɩpɛ-pʋla, a joŋ kɩalɩŋ mɩsɛ gɛrɩpɛ-pʋla-la, a kaa bɛ Yesu. Juu tɩŋŋaa yie ŋaa ŋɩɩ nɛ a hugi ba sʋʋnʋŋ. 41Lee kʋbala nɛ kpagɛ lee-la ba fa sɩ kpaasɛ Yesu daagɛsɛ-la nyuŋ, ba chɔnsɛ tɩɩsɩŋ. Tɩɩsɩ-la tʋɔŋ, bʋ-bʋa kʋbala nɛ fa hɛ nɩmɛ ba ha bɩ nʋʋkala hugo nɩmɛ aŋ ka. 42A tɩŋ taŋ sɩ jaŋ pʋl dɩ ba gbieli dɩɩsɩŋ kiele bal gbiele ŋɩɩ, ka bʋa-la ma kpagɛ lee-la, ŋɩɩ nɛ ba joŋ Yesu hugi nɩmɛ.
©Ghana Institute of Linguistics Literacy and Bible Translation 1984, 2014