Maak 11
11
Yesu jʋʋ Jerusalɛm
Mat. 21.1-11; Luuk 19.28-40; Jɔɔŋ 12.12-19
1Ŋɩɩ nɛ Yesu arɩ ʋ harɩ-tooroo sii mʋmʋ Jerusalɛm. Ba kʋ yi Bɛtɩfagɩ arɩ Bɛtanɩ dɩɩrɩŋ, a kʋ yi peel kʋbala baa yɩrɛ Olif. 2Yesu tɩŋ ʋ harɩ-tooroo balɩa a bʋla pɩba, “Má mʋ taŋ-la sɩ hɛ ma sɩpaaŋ. Dɩ ma nɛ mʋa, ma jaŋ na kaku-bie dɩ ba vɔɔ kɩɩ. Nʋʋkala ha bɩ ʋ jɩla. Má puri a kaa kɔ. 3Dɩ ma nɩɩ puru, dɩ nʋʋkala nɛ pɩɛsɛma, ‘Bɛɛ nɛ tɩɩ maa puri?’ Má bʋl, ‘La Tɩɩna nɩɩ chɛ. Ʋ nɛ sɩ la puro kaa kɔ. La jaŋ mɩɩra kɛnʋ kaa kɔ lɛɛlɛ.’ ”
4Ba to wombiiŋ bɩbal dɩ ba vɔɔ kaku-bie a kɩɩ dɩa kʋbala boiŋ niiŋ. Ba mʋ dɩ ba puri. 5Ba sɩɩ puri kaku-bie-la, dɩ nɩaa dɔnsʋŋ chɩŋ nɩmɛ a pɩɛsɛba, “Bɛɛ nɛ tɩɩ maa puri kaku-bie-la?” 6Ŋɩɩ nɛ ba bʋl wɩalɩŋ kala Yesu sɩ sɩ ba bʋl. Ba sɩ bʋl ŋɩɩ, ba leŋ ba puro mʋ. 7Ba kɛŋ kaku-bie-la kaa mʋ pɩ Yesu a wuri ba gɛnnɩŋ a daŋ kaku-bie-la nyuŋ. Yesu jɩla hɔŋ. 8Nɩ-daŋ joŋ ba gɛnnɩŋ jɛrɛ wombiiŋ lɛ. Dɔnsʋŋ ma keri pɩpaarɩŋ a ma kaa lɩɩ jɛrɛ wombiiŋ lɛ ʋ vɩvɛŋ. 9Nɩaa dɔnsʋŋ hɛ ʋ sɩpaaŋ, dɔnsʋŋ maa to ʋ harɩŋ. Ba kala faasa ŋaa goŋ a bʋl,
“Tabarɩkala! Wɩa jaŋ pɛ Nɩɩ-la sɩɩ kɔ La Tɩɩna Wɩa yɩrɩŋ lɛ.
10La naabalɩma Devit kuorii-la sɩɩ kɔ,
Wɩa jaŋ pɛ ʋ lɛ dɩ ʋ kɔ.
Má leŋ dɩ la dɛnnɛ Wɩa.”
11Ŋɩɩ nɛ Yesu mʋ Jerusalɛm a mʋ jʋʋ Wɩa dɩɩ-balɩŋ a beŋ kɩalɩŋ kala sɩ hɛ nɩmɛ. Ʋ bene dɛrɛ dɩ taŋ bire. Ŋɩɩ nɛ ba dɩ ʋ harɩ-tooro-la fii arɩ balɩa mɩɩra mʋ Bɛtanɩ a mʋ chʋa nɩmɛ.
Yesu kalɩba hɛ tutogo lɛ
Mat. 21.18-19
12Taŋ sɩ pʋla, ba sii lɩɩ Bɛtanɩ a joŋ wombiiŋ mʋmʋ, losuŋ kɛŋ Yesu. 13Ʋ na tutogo dɩ ʋ mʋ chɩŋ sɩpaaŋ a kɛŋ pɩpaarɩŋ. Ʋ mʋ yi ʋ bʋbʋɔŋ a bɩɩnɛ arɩ nɛnɛɛ hɛ nɩmɛ nɛ. Ʋ mʋ wʋla beŋ, dɩ nɛnɛɛ tuo see pɩpaarɩŋ, bɛɛ wɩaa ba nɛnɩŋ ha bɩ yie. 14Ŋɩɩ nɛ Yesu bʋl tɩa-la lɛ, “A lɩɩ jɩnɩŋ a kaa mʋ, nʋʋkala bɩra bɩ jaŋ dii ŋ nɛnɛɛ.” Ʋ harɩ-tooroo nɩɩ wɩɩ-la Yesu sɩ bʋla.
Yesu kiri nɩalɩŋ sɩɩ yallɛ kɩaa Wɩa dɩɩ-balɩŋ lɛ
Mat. 21.12-17; Luuk 19.45-48; Jɔɔŋ 2.13-22
15Ŋɩɩ nɛ ba mʋ yi Jerusalɛm, Yesu jʋʋ Wɩa dɩɩ-balɩŋ. Nɩalɩŋ dɔnsʋŋ hɛ nɩmɛ a yɩyallɛ kɩaa, dɔnsʋŋ ma yʋyɔɔ kɩaa. Yesu kiri ba kala ta ba lɩɩ. Baalaa ma hɛ nɩmɛ a yɩyɛrɛ moribiee. Yesu ŋmoo ba teebʋlba lo. Baalaa dɔnsʋŋ ma yɩyallɛ kokosuŋ, ʋ ŋmoo ba ma kpasɩnɩŋ a lo. 16Ʋ bɩ sɛyɛ dɩ nʋʋkala kɛŋ bayal kʋŋkala kʋ to Wɩa dɩɩ-balɩŋ kaalɩsɩŋ tʋɔŋ. 17Ŋɩɩ nɛ Yesu dagɛba a bʋl, “Ba ŋmʋnsɛ Wɩa teniŋ tʋɔŋ arɩ Wɩa sɩ,
‘Mɩ dɩa jaŋ ŋaa lee tinteyee nɩaa kala sɩ jaŋ chʋchʋɔlɛmɛ,
aŋ ka ma-na mɩɩra kaa bɩrɩmɛ gaarɩ-dɩa.’ ”
18Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba, ba kala nɩɩ wɩɩ-la ʋ sɩ bʋla. Ŋɩɩ nɛ baa chɛ wombiiŋ dɩ ba to kpʋʋ, aŋ fɩfáʋ, bɛɛ wɩaa wɩalɩŋ Yesu sɩ daga, nɩ-daŋ nɛ nɩa, ʋ ŋaaba wʋkpuŋkpere.
19Dɩdaanɩŋ sɩ yie, Yesu arɩ ʋ harɩ-tooroo lɩɩ tabal-la lɛ.
Yesu dagɛ tutogo-la sʋʋŋ bʋbʋɔŋ
Mat. 21.20-22
20Chʋchʋɔŋ ba joŋ wombiiŋ a mʋmʋ, a na tutogo-la dɩ ʋ kala sʋba a tuu kɛŋ ʋ naapoloo pɛ. 21Ŋɩɩ nɛ Pɩɩta liisi wɩɩ-la Yesu sɩ bʋla tɩa-la lɛ a bʋla pɩ Yesu, “La kʋhɩaŋ, bee na tɩa-la lɛ ŋ sɩ kalɩba hɛ, ʋ sʋba nɛ.”
22Yesu bʋla pɩba, “Má laa Wɩa dii. 23Wʋtɩtɩɩ nɛ mɩ bʋlaa pɩma, dɩ ma nɛ laa Wɩa dii a bɩ tʋɔsaa balɩa kɛnɛ, a bʋla pɩ peeliŋ dɩ ʋ sii mʋ tel mʋga tʋɔŋ, aŋ laa dii arɩ wɩɩ-la ma sɩ bʋla jaŋ ŋaa, ŋɩɩ sɛnɛ jaŋ ŋaa. 24Ŋɩɩ wɩaa mɩ bʋlaa pɩma, kʋŋ na-kala ma sɩ sʋla chɩchɛ, má laa dii arɩ ma na kʋ-la nɛ, ʋ sɛnɛ jaŋ ŋaa ma kʋŋ. 25Bʋa na-kala dɩ ma nɛ kɛŋ ma tɩtɩa hɛ dɔŋɔ dɩ ma chʋɔlɛ Wɩa, má bɩɩna na dɩ ma dɩ nʋʋ kɛŋ wɩɩ, ʋ cho dɩ ʋ nagɛ ŋɩɩ ma kala, má joŋo chɛʋ. Ma nɛ ŋaa ŋɩɩ, ma Nyɩmma Wɩa sɩ hɛ ʋ jaŋ lɛ, ma jaŋ joŋ ma wʋbɔŋŋɔɔ a chɛma. [ 26Ama dɩ ma nɛ bɩ wɩaa joŋo chɛ ma dɔnsʋŋ tɩŋŋaa, ma Nyɩmma Wɩa sɩ hɛ ʋ jaŋ lɛ, ʋ ma bɩ jaŋ joŋ ma wʋbɔŋŋɔɔ chɛma.]”
Nɩaa pɩɛsɛ Yesu ʋ doluŋ wɩaa
Mat. 21.23-27; Luuk 20.1-8
27Ba bɩra kɔ Jerusalɛm a mʋ jʋʋ Wɩa dɩɩ-bal-la kaalɩsɩŋ. Yesu sɩɩ gɔllɛ kaalɩsɩ-la tʋɔŋ ŋɩɩ, Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba arɩ Juu tɩŋŋaa kʋhɩasɩŋ, ba kala sii kɔ ʋ teeŋ 28a pɩɛsʋ, “Dol bɛɛ nɛ ŋ kɛŋ a ŋɩŋaa wɩaa deemba? Kʋbɛɛ nɛ pɩŋ doluŋ ŋ ŋɩŋaa ŋɩɩ?”
29Ŋɩɩ nɛ Yesu bʋla pɩba, “Mɩ ma jaŋ pɩɛsɛma wʋbala. Dɩ ma nɛ dagɛmɛ ʋ bʋbʋɔŋ, mɩ ma jaŋ dagɛma dol-la mɩ sɩ kɛnɛ a ŋɩŋaa wɩaa deemba bʋbʋɔŋ.” 30Ŋɩɩ nɛ ʋ pɩɛsɛba, “Jɔɔŋ, Wɩa lɩɩ-fooru-la doluŋ, ʋ lɩɩ Wɩa teeŋ nɛ koo ʋ lɩɩ nuhuobiine teeŋ nɛ? Má dagɛmɛ.”
31Ba suomo kɛŋ wɩɩ-la chʋchɔgɩsɛ ba tɩtɩa lɛ aa bʋl, “Wʋbɛɛ nɛ laa chɛ dɩ la bʋl? Dɩ la nɛ bʋla pʋ arɩ Wɩa teeŋ nɛ ʋ lɩɩ, ʋ jaŋ pɩɛsɛla, ‘Bɛɛ nɛ saa tɩɩ ma bɩ wɩalɩŋ ʋ sɩ bʋla laa dii?’ 32La saa jaŋ wuo bʋl ʋ lɩɩ nuhuobiinee teeŋ nɛɛ? Aɩ.” Fawʋllʋŋ kɛmba a tɩŋ nɩalɩŋ sɩ chɩŋ nɩmɛ wɩaa. Nɩaa bʋla arɩ Jɔɔŋ fa sɛnɛ ŋaa Wɩa wʋlaabʋllʋ nɛ.
33Ŋɩɩ nɛ ba bʋla pɩ Yesu, “La bɩ jɩŋ.” Yesu ma bʋla pɩba, “Tɔɔ, mɩ ma bɩ jaŋ dagɛma dol-la mɩ sɩ kɛnɛ a ŋɩŋaa wɩaa deemba bʋbʋɔŋ.”
©Ghana Institute of Linguistics Literacy and Bible Translation 1984, 2014