Teē Ngán Israel gə̄ 11
11
Nə́ɓā tāā najə̄ yá̰á̰ kə́ tōr̄ kə́ yā tɔ̄ləń ta madə̄ gə̄
1Kɔ́ɔ̄ɓē əda Moijə na n-a n-rāā kadə̄ yá̰á̰ kə́ tōr̄ kə́ yā tɔ̄ləń ta madə̄ gə̄ rāā *Parao̰ ō, de kə́ Ejiptə tə́ gə̄ ō. Loo ń noō tə́ *Parao̰ na a əya̰də́ kadə̄ aw̄n̄. Na a əya̰də́ kadə̄ aw̄n̄ beé ngóy alé, na a tə̄ɓādə́ na i mbée kadə̄ aw̄n̄ kə́ njɔ́ḿ gə̄ tə́. 2Ní kə əda ngán *Israel gə̄ kadə̄ kə́ dəngam gə̄ kə gəden̄ madə̄ ɓēdə́ kə́ dəngam gə̄ yá̰a̰ ō, kə́ dəyá̰ gə̄ kə gəden̄ madə̄ ɓēdə́ kə́ dəyá̰ gə̄ yá̰a̰ ō, kə gəden̄də́ yá̰á̰ kə́ rāā kə gində̄ arjā̰a̰á̰ ō, kə lɔ́rɔ́ ō. 3Kɔ́ɔ̄ɓē rāā adə̄ de kə́ Ejiptə gə̄ rāān̄ kem majə kə ngán Israel gēé. Tá gō nang kə́ Ejiptə tə́ ní Moijə i de kə́ bo ta kum ngé kəla yā *Parao̰ gə̄ tə́ ō, ta kum gír deē yān gə̄ tə́ ō.
4Moijə əda *Parao̰ na Kɔ́ɔ̄ɓē əda na ré dan loo tɔȳ, anī n-a n-ənda kem ɓē kə́ Ejiptə yā gān̄g, 5adə̄ ngán hágə́ kə́ gō nang kə́ Ejiptə tə́ gə̄ na a oyn̄ malang. A əla gír na i dɔ hágə *Parao̰ ń kadə̄ ndi dɔ kōr̄ kāgə̄ mbang tə́ ní, bátə́ kadə̄ ugə̄ń dɔ hágə nge rāā kəla kə́ dəyá̰ ń ra ta mbal̄ riī yá̰á̰ tə́ ní ō, hágə́ yá̰a̰ kul̄ gə̄ tə́ malang ō. 6De gə̄ na a urən̄ sɔ̄ḿ ngá̰ý dɔ nang kə́ Ejiptə tə́ malang. Deē na oō sɔ̄ḿ kə́ tītə̄ ń noō kété aĺ ɓáý ō, deē na a oō kə́ rang kə́ tītə̄ ń noō gogə́ to̰ aĺ ō. 7Banī ɓē ngán *Israel gēé ní bísə na a ndōgə̄ deē aĺ ō, dā̰ aĺ ō, yā kadə̄ gerə̄n̄neé kadə̄ Kɔ́ɔ̄ɓē i nge kɔr̄ kam̄ de kə́ Ejiptə gə̄ ō, ngán Israel gə̄ ō naā tə́. 8Kum mbang ń noō tə́ ní ngé kəla yān gə̄ ń ran̄ noó ní, na a reēn̄ yā tétə̄ kejədə́ nang tə́ non ni Moijə tə́ malang ō, a ədanən̄ na kə n-teē kɔ̄ɔ́ kə gír deē yān gēé ō. Loo ń noō tə́ n-a n-teē. Wōn̄g rāā Moijə ngá̰ý adə̄ teē ta *Parao̰ tə́ kɔ̄ɔ́.
9Kɔ́ɔ̄ɓē əda Moijə na ré *Parao̰ ndigə koō najə̄ tadə́ tə́ aĺ anī, i yā kadə̄ n-əngeń ta róbə yā rāań yá̰á̰ kə́ to kɔr kum gə̄ kem ɓē yān tə́. 10Moijə nin̄ kə *Aaro̰ rāān̄ yá̰á̰ kə́ to kɔr kum gə̄ ń noō malang ta kum *Parao̰ tə́. Banī Kɔ́ɔ̄ɓē rāā adə̄ *Parao̰ rāā dɔ ngan̄g ɔgə̄ ngán *Israel gə̄ teē kem ɓē yān tə́ kɔ̄ɔ́.
Currently Selected:
Teē Ngán Israel gə̄ 11: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad