Teē Ngán Israel gə̄ 17
17
Man̄ kə́ Masa ō, Meriba ō
(Á̰a̰ī Tə́da 20.2-13)
1Ngán Israel gə̄ malang ḭḭn̄ dəla loo kə́ Sin tə́ kə gō ndū Kɔ́ɔ̄ɓēé. Nin̄-dəban̄ kə gō róbə gēé bátə́ ugə̄n̄neé Repidim. Ndin̄ loo ngeé ń noō tə́, banī əngen̄ man̄ kə́ yā ka̰ȳ alé, 2adə̄ sāān̄ ta Moijə, ədanən̄ na kə adə̄də́ man̄ kadə̄ n-a̰ȳn̄. Moijə tél ədadə́ na ké a sāān̄ tan i najə̄ rí tə́ wa. Ké a nāān̄ Kɔ́ɔ̄ɓē i tām̄ yā rí tə́ wa.
3Kəndā man̄ rāā ngán *Israel gə̄ ngá̰ý adə̄ tə́dan̄ najə̄ dɔ Moijə tə́ ədan̄ na ké teē sedə́ kem ɓē kə́ Ejiptə tə́ kɔ̄ɔ́ i tām̄ yā rí tə́ wa. Ké i yā reē sedə́ loo ń toō tə́ kadə̄ kəndā man̄ kə tɔ̄l̄də́ kə ngáńdə́ gə̄ ō, yá̰a̰ kul̄ yādə́ gə̄ ō wa. 4Moijə nōō kə̄ dɔ Kɔ́ɔ̄ɓē tə́ ədan na ké i rí n kə n-rāā tām̄ yā gír de gə̄ ń noō tə́ wa, na sḛ́ý to̰ a na a tə́nīnən̄ kə kūbə̄rū mbalá. 5Kɔ́ɔ̄ɓē əda Moijə na kə mān̄ kété no gír de gə̄ tə́, kə ɔy *kum kɔɔ̄ yā ngán Israel kə́rēý gə̄ seneé ō, kə un kāgə̄ jī yān ń na əndań bā#17.5 Bā ní i bā Nil. I gō nang kə́ Ejiptə tə́. Á̰a̰ī Teē 7.20 ní ō, ba kə aw̄. 6Na n-a n-ra kété non tə́ loo ń noō tə́ dɔ mbal̄ kə́ *Horeb tə́, na a ənda mbal̄ ní kadə̄ man̄ teē tū tə́ kadə̄ de gə̄ a̰ȳn̄. Moijə rāā tītə̄ ń noō ta kum *kum kɔɔ̄ gə̄ yā ngán Israel gə̄ tə́.
7Əndān̄ rī loo ní na i Masa ō, Meriba ō. Kumən na i yá̰a̰ nāā ō, sāā tām̄ ō. Tɔdɔ̄ ngán *Israel gə̄ sāān̄ ta Moijə ō, nāān̄ Kɔ́ɔ̄ɓē ō, tɔdɔ̄ nin̄ dəjen̄ na ké Kɔ́ɔ̄ɓē i dandə́ tə́ aké gətóo dandə́ tə́ wa.
Amalek gə̄ ənīn̄ ngán Israel gə̄ rɔ̄ɔ̄
8Amalek gə̄ reē ənīn̄ ngán *Israel gə̄ rɔ̄ɔ̄ Repidim. 9Anī Moijə əda Jojue na kə ɔy de kə́ asən̄ rɔ̄ɔ̄ dɔdə́ tə́ gə̄, kə aw̄ kə rɔ̄ɔń Amalek gə̄. Na bírí na n-a n-ra dɔ ngōn̄ mbalá dɔɔ́ kə kāgə̄ yā Nə́ɓāá jīn tə́. 10Jojue aw̄ rɔ̄ɔ̄ Amalek gə̄ tə́ tītə̄ ń Moijə ədanneé ní. Moijə ō, Aaro̰ ō, Hur ō, al̄ aw̄ ran̄ dɔ ngōn̄ mbalá dɔɔ́. 11Loo ń Moijə əla jīn kə̄ dɔɔ́ anī, i Israel gə̄ n tɔ́gə́də́ i ngá̰ý ní, ba ré tél kə jīneé kə̄ nang tə́ anī, i Amalek gə̄ n tɔ́gə́də́ i ngá̰ý ní. 12Dan ń kɔr rāā Moijə adə̄ jīn oy yélélé anī, Aaro̰ nin̄ kə Hur unən̄ kūbə̄rū mbal̄ kógə̄ḿ əlan̄ gírən tə́ adə̄ ndi dɔ tə́. Aaro̰ ra dām̄ kógə̄ḿ tə́ ō, Hur ra dām̄ kə́rēý tə́ ō, əhɔn̄neé jī Moijə kə̄ dɔɔ́, adə̄ jīn rań dɔɔ́ bátə́ mbang udəń. 13Jojue tetə Amalek gə̄ rɔ̄ɔ̄ kə kaskaraá.
14Kɔ́ɔ̄ɓē əda Moijə na kə ndang yá̰a̰ gə̄ ń noō malang na sōgə́ dɔ de gə̄ ndígə̄nal. Kə əda Jojue na n-a n-rāā kadə̄ Amalek gə̄ gətóon̄ kɔ̄ɔ́ malang, adə̄ na a əga kem deē dɔdə́ tə́ dɔ nang tə́ to̰ alé.
15Moijə rāā *loo tun̄ yá̰a̰, əndā rī dɔ tə́ na Kɔ́ɔ̄ɓē i dərapóo rɔ̄ɔ̄ yāḿ, 16ba əda na dan ń Amalek gə̄ unən̄ jīdə́ dɔɔ́ rɔ̄ɔ̄n̄neé Kɔ́ɔ̄ɓē ń i mban̄g yā Israel gə̄ ní, Kɔ́ɔ̄ɓē na a rɔ̄ɔ̄də́ i ngándáńg.
Currently Selected:
Teē Ngán Israel gə̄ 17: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad