Teē Ngán Israel gə̄ 18
18
Moijə nin̄ kə umən Jetəro
1Jetəro ń i *nge tun̄ yá̰á̰ kə́ Madian ō, i um Moijə ō ní, oō kōō yá̰a̰ gə̄ ń Kɔ́ɔ̄ɓē Nə́ɓā rāā tām̄ yā Moijə tə́ ō, tām̄ yā ngán *Israel gə̄ ń i gír deē yān gə̄ tə́ ní ō malang. Ni-oō kōō teē ń Kɔ́ɔ̄ɓē teē sedə́ kem ɓē kə́ Ejiptə tə́ kɔ̄ɔ́ ní, 2-5adə̄ un ngōnən Sepora#18.2-5 Sepora: Najə̄ kə́ dɔn tə́ ō, dɔ ngánən tə́ ō ní, á̰a̰ī Teē 2.21, 4.20-26. Deē ger̄ ndɔ̄ ń Moijə ədań Sepora na kə tél kə aw̄ gogə́ rɔ̄ bɔbə̄n tə́ ní alé. kə́ nə̄yá̰ Moijə ń Moijə əya̰n ní ō, ɔy ngán Sepora kə́ dəngam kə́ jōó gə̄ ō, aw̄ sedə́ gō Moijə tə́ loo ń Moijə ndi tū tə́ mángá kadə mbal̄ yā Nə́ɓā#18.2-5 Mbal̄ yā Nə́ɓā: Á̰a̰ī Teē 3.1 tə́ ngɔr ní. Ngán gə̄ ní rī nge kə́ nga tɔ́gə na i Gersom, kumən na i nge nam̄, tɔdɔ̄ Moijə əda na n-tél nge nam̄ dɔ nang yā tə̄rā gə̄ tə́. Rī nge kə́ dūú na i Eliejer, kumən na Nə́ɓā yāḿ dḭḭ̄m̄, tɔdɔ̄ Moijə əda na Nə́ɓā yā bɔbə̄n na dḭḭ̄n ō, na ajən ta kaskar yā *Parao̰ tə́ ō.
6Jetəro əla əda Moijə na i ni umən Jetəro n n-a n-aw̄ kə̄ rɔ̄n tə́ toō, na nə̄yá̰n ni Moijə ō, ngánən kə́ dəngam kə́ jōó gə̄ ō, na i seneé. 7Moijə teē tə́nī ta umən, ɔsə non nang tə́ non tə́ ō, əhɔn kə̄ rɔ̄n tə́ ɓirə̄n dagə ō. Rāān̄ naā lápə́ya ba ɔtə aw̄n̄ kújə tandā yā Moijə tə́. 8Moijə ənī umən gotə yá̰a̰ gə̄ ń Kɔ́ɔ̄ɓē rāā kə *Parao̰ ō, kə de kə́ Ejiptə gə̄ ō, tām̄ yā ngán *Israel gə̄ tə́ ní malang ō, ənīn gotə yá̰á̰ kə́ tōr̄ gə̄ ń rāādə́ róbó á Kɔ́ɔ̄ɓē teē sedə́ kum tə́ kɔ̄ɔ́ ní ō. 9Rɔ̄ Jetəro nelə̄n tām̄ yá̰á̰ kə́ majə gə̄ malang ń Kɔ́ɔ̄ɓē rāā kə ngán Israel gēé tə́ ní, tɔdɔ̄ ni-ɔr̄də́ gíŕ tɔ́gə yā de kə́ Ejiptə gə̄ tə́ kɔ̄ɔ́.
10Adə̄ Jetəro əda na kadə̄ de gə̄ ɓōkə́n̄ Kɔ́ɔ̄ɓē ń ɔr̄də́ kɔ̄ɔ́ gír tɔ́gə yā *Parao̰ tə́ ō, gír tɔ́gə yā de kə́ Ejiptə gə̄ tə́ ō ní tɔ̄ȳ. 11Ká ré wōn̄g rāā ɓesə̄ gə̄ malang ngá̰ý kə de gə̄ yā Kɔ́ɔ̄ɓēé gə̄gē, anī na n-ger̄ kadə̄ Kɔ́ɔ̄ɓē i de kə́ bo tɔȳ ɓesə̄ gə̄ ń noō malang. 12Jetəro ndējə̄ Nə́ɓā *yá̰a̰ tun̄ kə́ róō horoó ō, *yá̰a̰ tun̄ kə́ rang gə̄ ō. Adə̄ *Aaro̰ ō, *kum kɔɔ̄ gə̄ yā ngán *Israel gə̄ malang ō, reē əsan̄ yá̰a̰ kə um Moijə ta kum Kɔ́ɔ̄ɓē tə́.
Moijə tə́ndā ngār sarya gə̄
13Teē kə ndɔ̄ kə́ noō anī Moijə aw̄ ndi loo sarya tə́ yā gān̄g sarya yā ngán *Israel gə̄. Adə̄ ngán Israel gə̄ ran̄ no Moijə tə́ dəloí bátə́ loo sɔl̄ dɔdə́ tə́ gíŕ ngóō kum mbang yādə́ kə́ yā kaw̄ń rɔ̄ Moijə tə́ tə́. 14Umən a̰a̰ yá̰a̰ gə̄ ń a rāā tām̄ yā ngán Israel gə̄ tə́ malang ní, anī dəjen na ké a rāā tītə̄ ń noō ké i tām̄ rí tə́ wa. Ké a rāā kəla ń noō kə kérneé ké i tām̄ rí tə́ wa. Ń toō ní na rāā adə̄ de gə̄ na ran̄ kə njadə́ kə́ dɔɔ́ dəloí bátə́ loo sɔl̄ dɔdə́ tə́ gíŕ ngóō kum mbang yādə́ kə́ yā kaw̄ń rɔ̄n tə́ tə́. 15Anī Moijə tél əda umən na ngán Israel gə̄ na reēn̄ rɔ̄n tə́ na i yā kadə Nə́ɓā kə gān̄g sarya yādə́. 16Dan ń najə̄ na i mbo̰ō̰də́ tə́ anī na a reēn̄ na i rɔ̄n tə́ yā kadə̄ n-gān̄g sarya yādə́ ō, na n-tə́da yá̰a̰ gə̄ ń n-ndang kadə̄ yā rāā ní ō, na n-adə̄də́ kɔjə̄ gə̄ yā Nə́ɓā ō. 17Umən tél ədan na loo rāā ń na a rāā noó na majə alé. 18Na nəkɔ́ Moijə gə̄gē, de gə̄ ń seneé ní gə̄gē, na a ɔrən̄ malang. Kəla ń noō na i kəla kə́ al̄ dɔ tɔ́gən, adə̄ na a asə rāā kə kérneé alé. 19Ní kə nēl̄ mbīn kə oōń kɔjə̄ yān, ba kə Nə́ɓā kə i seneé naā tə́. Kəla yān na i ra ta kum Nə́ɓā tə́ kum gotə ngán *Israel gə̄, yā kədań Nə́ɓā najə̄ yādə́ gə̄ ō, 20yā tə́dań yá̰a̰ gə̄ ń Nə́ɓā ndang kadə̄ yā rāā ní kadə̄ de gə̄ ō, ndū najə̄ gə̄ yā Nə́ɓā kadə̄ de gə̄ ō, na i ni n a ɔjədə́ róbə́ kə́ kadə̄ unən̄ ō, háĺ kə́ kadə̄ rāān̄ ō ní. 21Ní kə rāā ba kə gə̄rā de kə́ ngáā ngáā gə̄ dan ngán Israel gə̄ tə́ kə́ ɓōlə́n̄ ndíĺ Nə́ɓā ō, kə́ deē asə kənī kemən kadə̄də́ ō, kə́ a taān̄ yá̰a̰ jī deē tə́ yā nujəń sarya yā deē aĺ ō. Kə əndādə́ dɔ ngán Israel gə̄ tə́ kadə̄ nin̄ kə i ngār gə̄ dɔ de kə́ dūbú gə̄ tə́ ō, dɔ de kə́ ɓú gə̄ tə́ ō, dɔ de kə́ kutə mí gə̄ tə́ ō, dɔ de kə́ kutə kógə̄ḿ gə̄ tə́ ō, 22kadə̄ ndin̄ loo sarya tə́ kə dɔ ndɔ̄ gə̄ yā rāań sarya yā ngán *Israel gə̄. Najə̄ kə́ bo gə̄ ɓáa kadə̄ kə reēn̄neé non tə́, ba ré i ngán najə̄ gə̄ ɓáa kadə̄ nin̄ kɔ́ gə̄ kə gāngə̄n̄ sarya kə́ dɔ tə́. Na majə kadə̄ kə rāā i tītə̄ ń noō tá kəla na a hɔɔ́lɔ̄ dɔn tə́, tɔdɔ̄ na a əhɔnən̄ ta tə́. 23Ré na rāā tītə̄ ń noō ō, na i yá̰á̰ kə́ Nə́ɓā əndā dɔn tə́ kadə̄ rāā ō ní a, na a ɔr alé ō, de gə̄ ń noō malang na a télən̄ yā kaw̄ ɓēé gogə́ kə kem sɔlɔ́ ō.
24Moijə rāā yá̰á̰ ń umən ədan ní. 25Ni-gə̄rā de kə́ ngáā ngáā gə̄ dan ngán *Israel gə̄ tə́ əndādə́ dɔ de gə̄ tə́. Əndādə́ dɔ de kə́ dūbú gə̄ tə́ ō, dɔ de kə́ ɓú gə̄ tə́ ō, dɔ de kə́ kutə mí gə̄ tə́ ō, dɔ de kə́ kutə kógə̄ḿ gə̄ tə́ ō, 26kadə̄ ndin̄ loo sarya tə́ kə dɔ ndɔ̄ gə̄ yā gān̄g sarya yā ngán Israel gə̄. Najə̄ kə́ ngan̄g gə̄ ɓáa reēn̄neé rɔ̄ Moijə tə́, banī ré i ngán najə̄ gə̄ ɓáa, nin̄ kɔ́ gə̄ gāngə̄n̄ sarya kə́ dɔ tə́.
27Moijə əya̰ umən adə̄ tél aw̄ gogə́ ɓēé.
Currently Selected:
Teē Ngán Israel gə̄ 18: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad