Teē Ngán Israel gə̄ 19
19
Nə́ɓā əhɔ madə̄ naā kə ngán Israel gēé
(19-24)
Nə́ɓā əda ngán Israel gə̄ najə̄ kəhɔ madə̄ naā sedə́
1Ngán Israel gə̄ ḭḭn̄ Repidim kə ndɔ̄ kə́ ta kəga dɔ yā nāā kə́ nge ko̰ mətá gō teēdə́ Ejiptə tə́, anī aw̄ ugə̄n̄ kem dəla loo kə́ *Sinai tə́. 2Aw̄ ndin̄ sɔɔ̄ no mbal̄ *Sinai kem dəla loo tə́. 3Moijə al̄ dɔ mbal̄ *Sinai tə́ yā kaw̄ kənge Nə́ɓā. Kɔ́ɔ̄ɓē ndi dɔ mbal̄ tə́ dɔɔ́ ɓāŕ Moijə ədan na:
Najə̄ ń kadə̄ ə́dá kojə yā Jakob gə̄ ń i ngán *Israel gə̄ ní n toó: 4Sḭḭ̄ kɔ́ gə̄ á̰a̰ī yá̰á̰ ń m̄-rāā kə de kə́ Ejiptə gēé ní ō, á̰a̰ī loo reē ń m̄-reē sesí rɔ̄ḿ tə́ laā ngɔr tītə̄ kə̄rō kə́ ɔy ngánən gə̄ dɔ bɔ̄gə̄n tə́ ní ō. 5Adə̄ ń toō ré ōōī najə̄ ń m-ə́dásí ní majə ō, ī-ngɔ̄mī *madə̄ naā yāḿ ō anī, ā ī-téliī gír deē yāḿ gə̄ kə́ gātə̄sí i ngá̰ý dan gír de gə̄ tə́ malang, tɔdɔ̄ dɔ nang malang i yāḿ mā, 6adə̄ sḭḭ̄ ā ī-téliī ɓē ko̰o̰ yā *ngé tun̄ yá̰a̰ gə̄ ō, gír de gə̄ kə́ *táĺ gə̄ ō. Yá̰á̰ ń kadə̄ ə́dá ngán *Israel gə̄ ní n noó.
7Moijə reē ɓāŕ *kum kɔɔ̄ gə̄ yā ngán *Israel gə̄, ədadə́ najə̄ gə̄ ń Kɔ́ɔ̄ɓē ɔr̄ seneé ní malang. 8Ngán Israel gə̄ tél ədan̄ gidə kógə̄ḿ naā tə́ malang na n-a n-rāān̄ yá̰a̰ gə̄ ń Kɔ́ɔ̄ɓē əda ní malang.
Moijə aw̄ əda Kɔ́ɔ̄ɓē najə̄ ń ngán Israel gə̄ ədan̄ ní. 9Anī Kɔ́ɔ̄ɓē əda Moijə na n-a n-ɓɔ̄ɔ̄ rɔ̄n dan kil̄ man̄ kə́ risə til nding tə́ yā kaw̄ kugə̄ń rɔ̄n tə́, kadə̄ ngán *Israel gə̄ oōn̄ ndūn loo kɔr̄ najə̄ tə́ seneé ɓáa kə ənīn̄neé kemdə́ mámák kə adə̄n̄ Moijə. Moijə əda Kɔ́ɔ̄ɓē najə̄ ń ngán Israel gə̄ ədan̄ ní.
Nə́ɓā nin̄ kə Moijə əngen̄ naā dɔ mbal̄ *Sinai tə́
10Kɔ́ɔ̄ɓē əda Moijə na:
Āw̄ ə́dá ngán Israel gə̄ ādə̄ ɔrə̄n̄ kam̄də́ kɔ̄ɔ́ tū yá̰á̰ kə́ yḛr tə́ ɓōólaā ō, bírí ō, ādə̄ tə́gon̄ kūbə̄ yādə́ gə̄ ō. 11Ādə̄ ndin̄ dɔ rɔ̄də́ tə́ tām̄ yā ndɔ̄ kə́ nge ko̰ mətá tə́, tɔdɔ̄ ndɔ̄ ń noō tə́ ní m-ā m̄-risə dɔ mbal̄ *Sinai tə́ ta kum de gə̄ tə́ malang. 12Ɔ́jə́də́ dɔ nin̄ loo kə gō gidə mbalá ba ə́dádə́ na kə lōōn̄ kal̄ dɔ mbalá ō, kə lōōn̄ kɔdə kadə mbal̄ ō. Deē ń a ɔdə kadə anī a tɔ̄l̄nən̄ kɔ̄ɔ́. 13Deē a ɔdə rɔ̄ deē ní kə jīneé alé, ba a tə́nīnən̄ i kə mbalá yā tə́nī tɔ̄lən, aĺ ɓáa a túr̄nən̄ i kə gərá yā túr̄ tɔ̄lən. Ká i deē aáā i dā̰ aáā deē a əya̰n kadə̄ ndi kə kumneé alé. I dan ń tōw̄ a ɓār̄ ní tə́ ngóy n ngé kə́rēý gə̄ a alə̄n̄ dɔ mbalá ní#19.13 K. 13: Ngé gə̄ ń a alə̄n̄ dɔ mbalá ní á̰a̰ī najə̄ yādə́ kem makətūbə̄ Teē 24.1 tə́ 24.9-11 tə́ ō.
14Moijə risə kɔ̄ɔ́ dɔ mbalá ba aw̄ rɔ̄ de gə̄ tə́. Aw̄ ədadə́ adə̄ ɔrə̄n̄ kam̄də́ tū yá̰á̰ kə́ yḛr tə́ kɔ̄ɔ́ ō, tə́gon̄ kūbə̄ yādə́ gə̄ ō. 15Gō tə́ anī ədadə́ na kə ndin̄ dɔ rɔ̄də́ tə́ tām̄ yā ndɔ̄ kə́ nge ko̰ mətá tə́. Kə lōōn̄ ɓīī kə nə̄yá̰də́ gēé. 16Teē kə́ gír looí ɓatə kə ndɔ̄ kə́ nge ko̰ mətá anī, man̄ ndang ō, tel̄ ō, kil̄ man̄ risə til nding dɔ mbalá ō, tōw̄ ɓār̄ ngá̰ý ō, adə̄ de gə̄ ndewn̄ yakə yakə kem gérger ń ndin̄ tū tə́ ní tə́. 17Moijə teē kə de gēé ndágá kadə̄ aw̄n̄ rɔ̄ Nə́ɓā tə́ ngɔr. Aw̄ dəba ran̄ nja mbal̄ tə́. 18Dɔ mbal̄ *Sinai i sa hor malang, tɔdɔ̄ Kɔ́ɔ̄ɓē risə reē dɔ tə́ kum hor tə́. Sa hor ní əɓa luk luk tītə̄ sa hor nə́ngā katə̄ beé ō, mbal̄ ndebə ngin ngin ō. 19Tōw̄ ní ɓār̄ tɔȳ kə́ kété ɓáý. Moijə ɔr̄ najə̄ anī Nə́ɓā tél ədan najə̄ i kə ndū man̄ kə́ ndangaá.
20Kɔ́ɔ̄ɓē risə dɔ mbal̄ *Sinai tə́. Ni-ɓāŕ Moijə dɔ mbalá dɔɔ́ anī Moijə al̄ dɔ mbalá. 21Kɔ́ɔ̄ɓē əda Moijə na kə tél kə aw̄ kə tāā de gə̄ kadə̄ bə̄gān̄ naā reēn̄ ka̰a̰n tə́ alé, na sōgə́ de gə̄ oyn̄ ngá̰ý dɔ dáńdə́ tə́. 22Kadə̄ *ngé tun̄ yá̰a̰ gə̄ ń asən̄ ndɔ́tə̄ kə̄ rɔ̄n tə́ ní gə̄gē kə ɔrə̄n̄ kam̄də́ kɔ̄ɔ́ tū yá̰á̰ kə́ yḛr tə́, na sōgə́ n-əndadə́. 23Moijə tél əda Kɔ́ɔ̄ɓē na ngán *Israel gə̄ na asən̄ kal̄ dɔ mbal̄ *Sinai tə́ alé, tɔdɔ̄ nəkɔ́ Kɔ́ɔ̄ɓē ədadə́ na kə n-ɔjən̄ dɔ nin̄ loo kə gō gidə mbalá kadə̄ kə i loo kə́ yā ɓōĺ gidə tām̄ yān tə́. 24Anī Kɔ́ɔ̄ɓē əda Moijə na kə risə kə aw̄, ba kə tél kə reē gogə́ kə *Aaro̰ó̰ dɔ mbalá. Ba kadə̄ *ngé tun̄ yá̰a̰ gə̄ ō, ngán *Israel gə̄ ō, kə bə̄gān̄ naā kə alə̄n̄ dɔ mbalá kum kə̄ rɔ̄n tə́ alé, na sōgə́ n-əndadə́.
25Anī Moijə risə aw̄ rɔ̄ ngán Israel gə̄ tə́, ɔr̄ najə̄ sedə́.
Currently Selected:
Teē Ngán Israel gə̄ 19: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad