Teē Ngán Israel gə̄ 4
4
Nə́ɓā ɔjə Moijə tɔ́gən
1Moijə tél əda Kɔ́ɔ̄ɓē na ngán *Israel gə̄ na a taān̄ kemən aĺ ō, a oōn̄ najə̄ yān aĺ ō, a ədanən̄ na Kɔ́ɔ̄ɓē na ndɔ̄bən aĺ ō. 2Kɔ́ɔ̄ɓē dəje Moijə na ké i rí n i jīn tə́ noō wa. Anī Moijə əda na i kāgə̄. 3Kɔ́ɔ̄ɓē əda na kə ənī nang tə́. Moijə ənī kāgə̄ ní nang tə́ anī kāgə̄ ní tél lī, adə̄ Moijə ɔtə a̰ȳ. 4Anī Kɔ́ɔ̄ɓē ədan na kə əla jīn kə əhɔń kə̄lán. Moijə əla jīn əhɔń kə̄lán anī, lī tél kāgə̄ kə̄ jīn tə́. 5Kɔ́ɔ̄ɓē əda na yá̰á̰ ń kadə̄ ngán *Israel gə̄ taān̄neé kem kadə̄ i ni Nə́ɓā yā kaadə́ gə̄, adə̄ i Nə́ɓā yā Abəraham ō, Nə́ɓā yā Isaak ō, Nə́ɓā yā Jakob ō, n ndɔ̄bə̄ Moijə ní n noó. 6Kɔ́ɔ̄ɓē əda Moijə na kə əndā jīn dɔ kemən tə́. Moijə əndā jīn dɔ kemən tə́. Dan ń un jīn anī, jīn i bānjə̄ malang, i bānjə̄ kə́ ndaa tītə̄ búy kūbə̄#4.6 Búy kūbə̄: Najə̄ ń ndangən̄ ní na i: Tītə̄ néjə. Néjə i man̄ kə́ to tītə̄ kɔ̄sə̄ ba ndaa túĺ túĺ tītə̄ búy kūbə̄ beé. Dan ń kūl̄ o̰o̰ ngá̰ý anī a ḭḭ dɔ rā̰ tə́ a dəse tun tun, ba gətóo dɔ nang yājí tə́ laā. beé. 7Kɔ́ɔ̄ɓē əda na kə tél kə əndā jīn dɔ kemən tə́ gogə́. Moijə əndā jīn dɔ kemən tə́ ba un anī, jīn tél to karī gogə́. 8Kɔ́ɔ̄ɓē ədan na ré ngán *Israel gə̄ taān̄ kemən ō, oōn̄ najə̄ yān ō, tām̄ yá̰á̰ kə́ yáā kə́ ta kəga dɔ tə́ aĺ anī, na a taān̄ kemən tām̄ yá̰á̰ kə́ yáā kə́ nge ko̰ jōó tə́. 9Ré taān̄ kemən tām̄ yá̰á̰ kə́ yáā kə́ jōó gə̄ ń noō tə́ aĺ ō, oōn̄ najə̄ yān aĺ ō anī, kə ɔdə man̄ bā kə ɓōkə́ nang tə́, na man̄ ní na a téĺ mósə.
Nə́ɓā ɔjə dɔ Aaro̰ kadə̄ rāā kəla kə Moijə
10Moijə əda Kɔ́ɔ̄ɓē na ni na i de kə́ n-ger̄ kɔr̄ najə̄ alé na i ɓatə, na i tagə́bēé laā aĺ ō, na i tagə́ ndɔ̄ tə́ aĺ ō, na i kum mbang ń na a ɔrə̄ń najə̄ seneé tə́ toō aĺ ō. Ni na i de kə́ tan ɔȳ ngá̰ý dɔ najə̄ tə́ na i jóo. 11Kɔ́ɔ̄ɓē tél əda Moijə na ké i náā n i nge kəɓā ta deē ní wa. Ké i náā n i nge rāā kadə̄ gír kəlā ndo̰ deē do̰ō̰ naā aláa kadə̄ deē téĺ mbíkī ní wa, kadə̄ kum deē a̰a̰ loo aláa kadə̄ deē tél mundō ní wa. Ké i ni Kɔ́ɔ̄ɓē aĺ wa. 12Ń toō ní kə ɔtə kə aw̄, na nəkɔ́ Kɔ́ɔ̄ɓē na i tan ō, na n-a n-ɔjən yá̰á̰ ń kadə̄ əda ní ō.
13Moijə rāā Kɔ́ɔ̄ɓē ɓɔ́ ba ədan na kə əla de kə́ rang. 14Anī wōn̄g rāā Kɔ́ɔ̄ɓē kə Moijə adə̄ ədan na ké ngōkó̰o̰n *Aaro̰ kə́ *ngōn̄ Lebi ní ké ndi noó aĺ wa. Na n-ger̄ kadə̄ kɔr̄ najə̄ na tōr̄ rɔ̄n alé, tá i Aaro̰ nəkɔ́ n na a reē kə̄ kəngen tə́ noō. Ré na a̰a̰n anī rɔ̄n na a nelə̄n ngá̰ý. 15Kə ɔr̄ najə̄ seneé, kə əndā najə̄ gə̄ ń kadə̄ əda ní tan tə́. Ba na nəkɔ́ Kɔ́ɔ̄ɓē na i naā tə́ sedə́ ō, na n-a n-ɔjədə́ yá̰á̰ ń kadə̄ rāān̄ ní ō. 16*Aaro̰ na a ɔr̄ najə̄ kə de gēé kum gotən ni Moijə. Aaro̰ na i ta Moijə ō, Moijə na i nə́ɓā yā Aaro̰ ō. 17Kə Moijə kə əhɔ kāgə̄ ń noō jīn tə́ kə rāań yá̰á̰ kə́ yáā gə̄.
Moijə tél aw̄ gogə́ rɔ̄ gír deē yān gə̄ tə́
18Moijə tél aw̄ rɔ̄ umən Jetəro tə́ ədan na n-a n-tél yā kaw̄ gō ngákó̰o̰n gə̄ tə́ Ejiptə yā kaw̄ ka̰a̰ ké ndin̄ noō kə kumdə́ ɓáý wa. Jetəro əda Moijə na kə aw̄ kə kem sɔlɔ́. 19Kɔ́ɔ̄ɓē ɔr̄ najə̄ kə Moijə dɔ nang kə́ Madian tə́, ədan na kə tél kə aw̄ gogə́ Ejiptə, na de gə̄ ń sāān̄ tɔ̄lən ní na oyn̄ kɔ̄ɔ́ malang. 20Moijə un nə̄yá̰n ō, ɔy ngánən gə̄ ō, tə́ndādə́ gidə kərō yān tə́, ba tél aw̄ gogə́ Ejiptə. Un kāgə̄ ń Nə́ɓā ədan najə̄n ní jīn tə́. 21Kɔ́ɔ̄ɓē əda Moijə na:
Yá̰á̰ kə́ to kɔr kum gə̄ ń m-ādə̄ ī-rāā malang ní, dan ń ī-tél āw̄ gogə́ Ejiptə anī, āw̄ ī-rāādə́ ta kum *Parao̰ tə́. Ba m-ā m̄-rāā kadə̄ *Parao̰ a rāā dɔ ngan̄g adə̄ a əya̰ ngán *Israel gə̄ kadə̄ aw̄n̄ alé. 22Ā ə́da *Parao̰ na najə̄ ń Kɔ́ɔ̄ɓē əda ní n toó: Israel i ngōn̄ hágə́ḿ mā Nə́ɓā. 23M-ə́daī na kə ə́ya̰n kadə̄ aw̄ rāā kəla adə̄m̄ anī ī-mbātə́ ní, m-ā m̄-tɔ̄l̄ ngōn̄ hágí.
24Dan ń nin̄ i róbó ɓáý á dəban̄ loo kə́rēý tə́ anī, Kɔ́ɔ̄ɓē reē rɔ̄ Moijə tə́ a sāā tɔ̄lən. 25Anī Sepora un mbal̄ kə́ ta katə *əjań mɔtə ngōnən, un ta mɔtə ngōn̄ ń əja ní ɔdəń mɔtə Moijə ba əda na Moijə na i ngaa mósə yān. 26Loo ń noō tə́ Kɔ́ɔ̄ɓē əya̰ Moijə. Sepora əda najə̄ yā ngaa mósə i tām̄ kəja ń ni *əja mɔtə ngōnən ní.
27Kɔ́ɔ̄ɓē əda *Aaro̰ na kə aw̄ kə tə́nī ta Moijə kem dəla loo tə́. Aaro̰ aw̄ ənge Moijə kadə mbal̄ yā Nə́ɓā tə́ anī əhɔn kə̄ rɔ̄n tə́. 28Moijə ədan kəla ń Kɔ́ɔ̄ɓē əndā tan tə́ kadə̄ aw̄ əda ní ō, ɔjən yá̰á̰ kə́ yáā gə̄ ń Kɔ́ɔ̄ɓē mērən rāā ní ō. 29Moijə nin̄ kə Aaro̰ ɓārə́n̄ *kum kɔɔ̄ yā ngán *Israel gə̄ malang. 30*Aaro̰ ədadə́ kəla ń Kɔ́ɔ̄ɓē əndā ta Moijə tə́ ní ō, ni-rāā yá̰á̰ kə́ yáā gə̄ ta kum ngán Israel gə̄ tə́ ō. 31Nin̄-taān̄ kem. Dan ń gerə̄n̄ kadə̄ Kɔ́ɔ̄ɓē a̰a̰ yá̰á̰ kə́ tōr̄ gə̄ ń a rāān̄ sedə́ ní ō, kadə̄ ni-reē i kajədə́ tə́ ō ní anī, tétə̄n̄ kejədə́ nang tə́ ō, ɔsən̄ nodə́ nang tə́ ō, rɔȳnəń Kɔ́ɔ̄ɓē.
Currently Selected:
Teē Ngán Israel gə̄ 4: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad