Teē Ngán Israel gə̄ 5
5
Moijə nin̄ kə Aaro̰ aw̄n̄ ɓē Parao̰ó̰
1Gō tə́ anī Moijə nin̄ kə *Aaro̰ aw̄ ədan̄ *Parao̰ na Kɔ́ɔ̄ɓē Nə́ɓā yā *Israel əda na kə əya̰ gír deē yān gə̄ kadə̄ kə aw̄ kə rāān̄ nāā kem dəla loo tə́ kə ɔsən̄neé gɔnən. 2*Parao̰ tél ədadə́ na ké Kɔ́ɔ̄ɓē i náā á kadə̄ n-oō tan ba kə n-əya̰ń ngán *Israel gə̄ kadə̄ aw̄n̄ wa. Na n-ger̄ Kɔ́ɔ̄ɓē aĺ ō, n-ndigə kəya̰ ngán Israel gə̄ kadə̄ aw̄n̄ aĺ ō. 3Moijə nin̄ kə Aaro̰ tél ədan̄ na Nə́ɓā yā Hebəro gə̄ na ndɔ̄bə̄də́. Ní kə adə̄də́ ndɔ̄ mətá kadə̄ kə n-njə̄rā n-aw̄n̄ kem dəla loo tə́, kə n-aw̄ n-tunə̄n̄ yá̰a̰ kə n-adə̄nən̄, na sōgə́ tɔ̄l̄də́ kə mo̰y ngāl̄bɔ̄gīí aláa kə kaskaraá. 4Mban̄g kə́ Ejiptə tél ədadə́ na:
Moijə ō, Aaro̰ ō, ī-sāāī kɔr̄ ngán Israel gə̄ kɔ̄ɔ́ ta kəla yādə́ gə̄ tə́ i tām̄ rí tə́? Ī-tél āwī gogə́ ta kəla yāsí gə̄ tə́. 5Ń toō ā ī-sāāī i kadə̄ de kə́ ngá̰ý gə̄ ń noō kə əya̰n̄ ta kəla yādə́ gə̄ kɔ̄ɔ́ a?
Parao̰ adə̄ ngán Israel gə̄ kəla kə́ rang dɔ madə̄ tə́ ɓáý
6Ndɔ̄ nəkɔ́ ń noō tə́ *Parao̰ əda ngāgəra dɔ ngé kəla gə̄ ō, ngé ndóō de gə̄ ndū najə̄ gə̄ yā ngán *Israel gə̄ ō, na 7kə lōōn̄ kadə̄ ngán Israel gə̄ mu kadə̄ ɔrə̄n̄neé bəríkə tītə̄ kə́ kété gə̄, ba kadə̄ nin̄ kɔ́ gə̄ kə aw̄n̄ sāá. 8Kə ran̄ sedə́ ta kɔr̄ bəríkə kadə̄ asə kə gō kutən ń a ɔrə̄n̄neé kété gə̄ ní, ba kə lōōn̄ kadə̄ dūú gō tə́, nin̄ na i de kə́ yay gə̄. Na i tām̄ najə̄ ń noō tə́ n na a sāān̄neé ta róbə kaw̄ tun̄ yá̰á̰ tə́ kadə̄ Nə́ɓā yādə́ ní. 9Ní ré kəla na i ngá̰ý dɔdə́ tə́ anī na a gírə̄n̄ dɔ najə̄ kə́ sor̄ gə̄ ń noō tə́ alé. 10Ngāgəra dɔ ngé kəla gə̄ ō, ngé ndóō de gə̄ ndū najə̄ gə̄#5.6 ō 5.10 ō K. 6: Ngāgəra dɔ ngé kəla gə̄ i de kə́ Ejiptə tə́ gə̄ ba ngé ndóō de gə̄ ndū najə̄ gə̄ i ngán Israel gə̄. ō, teēn̄ ndogó mbangāá aw̄ ədan̄ ngán *Israel gə̄ na *Parao̰ əda na n-a n-adə̄də́ mu to̰ alé, 11kə nin̄ kɔ́ gə̄ kə aw̄n̄ sāá, na kutə bəríkə́ ń gāngə̄n̄ dɔdə́ tə́ ní na a to gotoó, na deē na a ɔr̄ ta alé. 12Ngán Israel gə̄ tḭ̄ḭ̄n̄ naā kə̄ loo gə̄ tə́ dɔ nang kə́ Ejiptə tə́ aw̄n̄ sāā muú. 13Ngāgəra dɔ ngé kəla gə̄ ɔsən̄ sedə́ ədan̄də́ na kə tɔ̄lə̄n̄ ta kəla yādə́, kə adə̄n̄ kutə bəríkə́ ń gāngə̄n̄ dɔdə́ tə́ kə dɔ ndɔ̄ gə̄ tītə̄ ń kété mu na toń ní. 14Tə̄ndān̄ ngé ndóō de gə̄ ndū najə̄ gə̄ yā ngán *Israel gə̄ ń ngāgəra dɔ ngé kəla gə̄ tə́ndān̄ dɔdə́ tə́ ní, ba ədan̄də́ na tagə́bēé ō, ɓōólaā ō, ní ké ɔrə̄n̄ kutə bəríkə́ ń gāngə̄n̄ dɔdə́ tə́ ní tītə̄ kə́ kété aĺ ké i tām̄ rí tə́ wa.
15Ngé ndóō de gə̄ ndū najə̄ gə̄ aw̄ nōōn̄ rɔ̄də́ rɔ̄ *Parao̰ tə́ ədan̄ na Kɔ́ɔ̄ɓē gə̄, ké adə̄ rāān̄ yá̰á̰ kə́ beē sedə́ nin̄ ngé kəla yān gēé ké i tām̄ rí tə́ wa. 16Na adə̄n̄də́ nin̄ mu to̰ alé ba na ran̄ sedə́ ta kɔr̄ bəríkə ō, na a tə̄ndān̄də́ ō. Na i gír deē yān nəkɔ́ gə̄ n na rāān̄ yá̰a̰ gōtə́ alé. 17*Parao̰ tél ədadə́ na nin̄ na i de kə́ yay gə̄, de kə́ yay gə̄, na i tām̄ najə̄ ń noō tə́ n na a sāān̄ kaw̄ *tun̄ yá̰a̰ kadə̄ Kɔ́ɔ̄ɓē ní. 18Kə ɔtə kə aw̄n̄ ta kəla yādə́ tə́. Deē na a adə̄də́ mu to̰ alé ba na a adə̄n̄ bəríkə́ ń gāngə̄n̄ kutən dɔdə́ tə́ ní. 19Kəda ń ədan na kutə bəríkə́ ń gāngə̄n̄ ní deē na a ɔr̄ ta alé, kutən kə́ ndɔ̄ kógə̄ḿ ń gāngə̄n̄ ní na a ɔrə̄n̄ kadə̄ na a asə kə dɔ ndɔ̄ gə̄ ní, tōr̄ rɔ̄ ngé ndóō de gə̄ ndū najə̄ gə̄ yā ngán *Israel gə̄ ngá̰ý. 20Dan ń teēn̄ ɓē *Parao̰ ní, aw̄n̄ kə nāgá rɔ̄ Moijə nin̄ kə *Aaro̰ ń ra a ngóōn̄də́ ní tə́, 21aw̄ ədan̄də́ na kadə̄ Kɔ́ɔ̄ɓē kə əndā ma̰ȳ ba kə gān̄g sarya, na nel̄ *Parao̰ ō, ngé kəla yān gə̄ ō, sedə́ to̰ alé i tām̄ yā Moijə nin̄ kə Aaro̰ tə́, nin̄ na əlan̄ na i kaskar jī *Parao̰ nin̄ kə ngé kəla yān gēé tə́ kadə̄ tɔ̄lə̄n̄neédə́.
22Moijə tél aw̄ ɔr̄ najə̄ kə Kɔ́ɔ̄ɓēé, ədan na ké rāā yá̰á̰ kə́ tōr̄ kə gír de gə̄ ń noō ké i tām̄ rí tə́ wa. Ké əlan i tām̄ rí tə́ wa. 23Əla gír ndɔ̄ ń na n-ədań *Parao̰ kəla yān tə́ noō na a rāā kum ngán *Israel gə̄ na i ndoō tə́ kə́ njɔ́ḿ gə̄ tə́ ō, ni Kɔ́ɔ̄ɓē na rāā yá̰á̰ kə́rēý sḛ́ý yā kajəń gír deē yān gə̄ aĺ ō ní ké i ba̰ý wa.
Currently Selected:
Teē Ngán Israel gə̄ 5: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad