Teē Ngán Israel gə̄ 8
8
1Kɔ́ɔ̄ɓē əda Moijə na kə əda *Aaro̰ kadə̄ əla kāgə̄ kə́ jīn tə́ kum kə̄ dɔ mbō gə̄ tə́ ō, dɔ kə̄lá man̄ gə̄ tə́ ō, dɔ dang gə̄ tə́ ō, kadə̄ ka̰rā̰ gə̄ kə teē kə taān̄ kem ɓē kə́ Ejiptə. 2Aaro̰ əla jīn kum kə̄ dɔ man̄ gə̄ kə́ Ejiptə tə́, anī ka̰rā̰ gə̄ teē taān̄ kem ɓē kə́ Ejiptə malang. 3Anī ngé rāā kəga kə́ Ejiptə gə̄ rāān̄ adə̄ ka̰rā̰ gə̄ teēn̄ kem ɓēé kə kəga yādə́ gēé ō.
4*Parao̰ ɓāŕ Moijə nin̄ kə Aaro̰ ədadə́ na kə ndɔ̄ȳn̄ Kɔ́ɔ̄ɓē kadə̄ kə tə̄ɓā ka̰rā̰ gə̄ kɔ̄ɔ́ dɔn tə́ ō, dɔ gír deē yān gə̄ tə́ ō, ɓáa n-a n-əya̰ ngán *Israel gə̄ kadə̄ aw̄ tunə̄n̄ yá̰a̰ adə̄n̄ Kɔ́ɔ̄ɓē. 5Moijə tél əda *Parao̰ na kə nəkɔ́ kə ɔjə kum mbang ń kadə̄ n-ndɔ̄yń Nə́ɓā tām̄ yān tə́ ō, tām̄ yā ngé kəla yān gə̄ tə́ ō, gír deē yān gə̄ tə́ ō ní. Na n-a n-dəjen kadə̄ tɔ̄l̄ ka̰rā̰ gə̄ kə́ kem kújə yān gə̄ tə́ ba kadə̄ na̰y i ngé kə́ kum bā tə́ gə̄ tá ngóy. 6-7*Parao̰ əda na i bírí. Anī Moijə əda na majə, ka̰rā̰ gə̄ na a gətóon̄ kɔ̄ɔ́ kem kújə yān gə̄ tə́ ō, ɓē ngé kəla yān gēé ō, ɓē gír deē yān gə̄ tə́ ō, ba na a na̰yn̄ na i kum bā tə́ tá ngóy, kadə̄ *Parao̰ gerə̄ń kadə̄ de kə́ tītə̄ Kɔ́ɔ̄ɓē Nə́ɓā yādə́ na gətóo. 8Moijə nin̄ kə *Aaro̰ əya̰n̄ *Parao̰ ba teēn̄. Moijə nōō kə̄ dɔ Kɔ́ɔ̄ɓē tə́ tām̄ yā ka̰rā̰ gə̄ ń bə̄gādə́ dɔ *Parao̰ tə́ ní. 9Kɔ́ɔ̄ɓē rāā yá̰á̰ ń Moijə dəjen ní adə̄ ka̰rā̰ gə̄ oyn̄. Ka̰rā̰ gə̄ gətóon̄ kɔ̄ɔ́ kem kújə gə̄ tə́ ō, ndágə loo gə̄ tə́ ō, kem ndɔr̄ gə̄ tə́ ō. 10Kánə̄n̄ nīńdə́ kə̄ dɔ naā tə́ kə̄ dɔ naā tə́, adə̄ kem ɓē otə ndum rḭḭ. 11Dan ń *Parao̰ a̰a̰ kadə̄ loo tóon néĺ sḛ́ý anī, rāā dɔ ngan̄g ba mbātə́ koō najə̄ yā Moijə nin̄ kə Aaro̰ tītə̄ ń Kɔ́ɔ̄ɓē ədań ní.
Yá̰á̰ kə́ tōr̄ kə́ nge ko̰ mətá: Yḭ́l̄ gə̄
12Kɔ́ɔ̄ɓē əda Moijə na kə əda *Aaro̰ kadə̄ əla kāgə̄ kə́ jīn tə́ kə əndań bumbə́rú kə́ dɔ nang tə́ kadə̄ téĺ yḭ́l̄ kem ɓē kə́ Ejiptə tə́ malang. 13Moijə nin̄ kə Aaro̰ rāān̄ tītə̄ ń Kɔ́ɔ̄ɓē ədań ní. Aaro̰ əla kāgə̄ kə́ jīn tə́ əndań bumbə́rú kə́ dɔ nang tə́, anī bumbə́rú téĺ yḭ́l̄ gə̄ kə́ əhɔn̄ loo kə̄ dɔ de gə̄ tə́ ō, kə̄ dɔ dā̰ gə̄ tə́ ō. Bumbə́rú kə́ dɔ nang tə́ malang téĺ yḭ́l̄, adə̄ yḭ́l̄ gə̄ taān̄ kem ɓē kə́ Ejiptə malang. 14Ngé kəga kə́ Ejiptə gə̄ nāān̄ rāā yḭ́l̄ gə̄ kə kəga yādə́ gēé ō, banī asən̄ alé. Yḭ́l̄ gə̄ əsan̄ de gə̄ ō, dā̰ gə̄ ō. 15Ngé kəga gə̄ ədan̄ *Parao̰ na yá̰á̰ ní na i Nə́ɓā n a rāā yá̰a̰. Banī tītə̄ ń Kɔ́ɔ̄ɓē ədań ní, *Parao̰ rāā dɔ ngan̄g adə̄ oō najə̄ yā Moijə nin̄ kə *Aaro̰ alé.
Yá̰á̰ kə́ tōr̄ kə́ nge ko̰ sɔ́: Kón̄g mba gə̄
16Kɔ́ɔ̄ɓē əda Moijə na kə teē dəloí ɓatə, kə aw̄ kə ənge *Parao̰ kə kum mbang ń a aw̄ń kə̄ ta bā tə́ ní, kə ədan na Kɔ́ɔ̄ɓē əda na kə əya̰ gír deē yān gə̄ kadə̄ aw̄ rāān̄ kəla adə̄nən̄. 17Ré na əya̰də́ aĺ anī, n-a n-əla kə kón̄g mba gēé dɔn tə́ ō, dɔ ngé kəla yān gə̄ tə́ ō, dɔ gír deē yān gə̄ tə́ ō, dɔ kújə yān gə̄ tə́ ō, na a taān̄ loo kem kújə gə̄ kə́ Ejiptə tə́ ō, dɔ nang kə́ Ejiptə tə́ ō. 18Banī dɔ nang kə́ Gosen#8.18 Gosen i dɔ nang ń Jəjep adə̄ bɔbə̄n nin̄ kə ngákó̰o̰n gēé dan ń reē ndin̄neé Ejiptə ní. Á̰a̰ī Tkg 45.10. ń gír deē yān gə̄ ndin̄ tū tə́ ní tá kón̄g mba gə̄ na a gətóon̄ tū tə́, kadə̄ gerə̄ń na Kɔ́ɔ̄ɓē i kem ɓē yān tə́. 19Yá̰á̰ kə́ tōr̄ ń a reē dɔ gír deē yān gə̄ tə́ ní na a reē dɔ gír deē yān ni Kɔ́ɔ̄ɓē tə́ alé. Yá̰á̰ kə́ yáā ń noō na a rāā yá̰a̰ na i bírí. 20Kɔ́ɔ̄ɓē rāā tītə̄ ń ədań ní, adə̄ kón̄g mba kə́ ngá̰ý gə̄ udən̄ kem kújə yā *Parao̰ tə́ ō, kem kújə yā ngé kəla yān gə̄ tə́ ō, kem ɓē kə́ Ejiptə tə́ malang ō. Kem ɓē i kón̄g mba malang.
21*Parao̰ ɓāŕ Moijə nin̄ kə *Aaro̰ ba ədadə́ na kə aw̄ kə tunə̄n̄ yá̰a̰ kə adə̄n̄ Nə́ɓā yādə́, ba kə tunə̄n̄ i kem ɓē ń noō tə́. 22Moijə tél əda *Parao̰ na ré na n-rāān̄ beé anī i gōtə́ alé, tɔdɔ̄ yá̰á̰ ń n-a n-tunə̄n̄ yā kadə̄ Kɔ́ɔ̄ɓē Nə́ɓā yādə́ ní na i yá̰á̰ kə́ majaĺ ngá̰ý ta kum de kə́ Ejiptə gə̄ tə́#8.22 K. 22: Ta kum de kə́ Ejiptə gə̄ tə́ ní man̄g kə́ bəra ō, bal batə̄ ō, bal bə̄yā̰ ō, i dā̰ gə̄ kə́ yā ɓōĺ gidədə́, adə̄ deē a tɔ̄l̄də́ yā tun̄ alé.. Ré na a̰a̰n̄də́ *loo tun̄ yá̰a̰ kadə̄ Nə́ɓā tə́ anī ké a a̰a̰n̄də́ karī kanjə̄ tə́nīdə́ kə mbalá wa. 23Na loo ń na n-sāān̄ kaw̄ *tun̄ yá̰a̰ tū tə́ yā kadə̄ Kɔ́ɔ̄ɓē Nə́ɓā yādə́ ní, na n-a n-njə̄rān̄ kem dəla loo tə́ ndɔ̄ mətá pá tá n-a n-ugə̄n̄ tū tə́ ɓáý. Ba na i *yá̰a̰ tun̄ ń Kɔ́ɔ̄ɓē yādə́ na a ɔjədə́ ní n n-a n-tunə̄n̄ yā kadə̄n ní. 24*Parao̰ əda na majə, n-a n-əya̰də́ kadə̄ aw̄ tunə̄n̄ yá̰a̰ adə̄n̄ Kɔ́ɔ̄ɓē Nə́ɓā yādə́ kem dəla loo tə́, ba kə lōōn̄ kaw̄ sa̰y. Kə ndɔ̄ȳn̄ tām̄ yān tə́ ō. 25Moijə tél əda *Parao̰ na n-a n-ɔtə rɔ̄n tə́ noō a n-a n-aw̄ yā ndɔ̄ȳ Kɔ́ɔ̄ɓē, adə̄ bírí nəkɔ́ ń toō kón̄g mba gə̄ na a gətóon̄ kɔ̄ɔ́ looneé ō, ɓē ngé kəla yān gə̄ tə́ ō, ɓē gír deē yān gə̄ tə́ ō kɔ̄ɔ́. Ba kə lōō mbóo sedə́, kə lōō kɔgə̄ ngán *Israel gə̄ kaw̄ tun̄ yá̰á̰ kadə̄ Kɔ́ɔ̄ɓē. 26Moijə əya̰ *Parao̰ ba teē aw̄ ndɔ̄ȳ Kɔ́ɔ̄ɓē 27Anī Kɔ́ɔ̄ɓē rāā yá̰á̰ ń Moijə dəjen ní: Ni-tə̄ɓā kón̄g mbā gə̄ kɔ̄ɔ́ dɔ *Parao̰ tə́ ō, dɔ ngé kəla yān gə̄ tə́ ō, dɔ gír deē yān gə̄ tə́ ō. Kón̄g mbā kógə̄ḿ gə̄gē na̰y alé. 28Banī *Parao̰ rāā dɔ ngan̄g ɓáý, ɔdə kəya̰ ngán *Israel gə̄ kadə̄ aw̄n̄ alé.
Currently Selected:
Teē Ngán Israel gə̄ 8: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad