ទំនុកដំកើង 54
54
ទំនុកជាសេចក្ដីបង្រៀនរបស់ស្តេចដាវីឌ ដែលទ្រង់លើកនៅវេលាដែលពួកស៊ីភបានមកទូលស្តេចសូលថា ដាវីឌពួននៅជាមួយនឹងយើងខ្ញុំ សំរាប់ឲ្យមេភ្លេងលេងដោយប្រដាប់មានខ្សែ។
1ឱព្រះអង្គអើយ សូមជួយសង្គ្រោះទូលបង្គំ
ដោយសារព្រះនាមទ្រង់
ហើយវិនិច្ឆ័យទូលបង្គំ ដោយឥទ្ធិឫទ្ធិរបស់ទ្រង់
2ឱព្រះអង្គអើយ
សូមស្តាប់សេចក្ដីដែលទូលបង្គំអធិស្ឋាន
សូមផ្ទៀងព្រះកាណ៌ស្តាប់វាចារបស់ទូលបង្គំផង
3ដ្បិតមានមនុស្សដទៃលើកគ្នាឡើងទាស់នឹងទូលបង្គំ
ហើយពួកមនុស្សច្រឡោតស្វែងរកជីវិតទូលបង្គំ
គេមិនបានតាំងព្រះនៅមុខគេឡើយ។ –បង្អង់
4៙ មើល ព្រះទ្រង់ជាជំនួយនៃទូលបង្គំ
ព្រះអម្ចាស់ទ្រង់គង់ជាមួយនឹងពួកអ្នកដែលទប់ទល់
ព្រលឹងនៃទូលបង្គំ
5ទ្រង់នឹងសងសេចក្ដីអាក្រក់របស់ពួកខ្មាំងសត្រូវ
ទូលបង្គំទៅលើគេវិញ
សូមបំផ្លាញគេដោយនូវសេចក្ដីស្មោះត្រង់របស់ទ្រង់
6ទូលបង្គំនឹងយកដង្វាយស្ម័គ្រពីចិត្ត
មកបូជាថ្វាយដល់ទ្រង់
ឱព្រះយេហូវ៉ាអើយ
ទូលបង្គំនឹងសរសើរដល់ព្រះនាមទ្រង់
ដ្បិតព្រះនាមទ្រង់ល្អវិសេស
7ពីព្រោះទ្រង់បានជួយទូលបង្គំឲ្យរួចពីគ្រប់សេចក្ដីវេទនា
ភ្នែកទូលបង្គំបានឃើញបំណងចិត្តកើតដល់ពួកខ្មាំង
សត្រូវរបស់ទូលបង្គំហើយ។
ទើបបានជ្រើសរើសហើយ៖
ទំនុកដំកើង 54: ពគប
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© BFBS/UBS 1954, 1962. All Rights Reserved.