Yauhas 3
3
Yexus Thiab Nikaudemaus
1Cov Yudais muaj ib tug thawjcoj hu ua Nikaudemaus, nws yog ib tug hauv cov Falixais. 2Muaj ib hmos nws tuaj cuag Yexus thiab hais rau Yexus hais tias, “Lanpis, peb paub tias Koj yog tus xibhwb uas los ntawm Vajtswv los. Vim tsis muaj leejtwg yuav ua tau tej txujci tseemceeb uas Koj ua no, tsuas yog tus uas Vajtswv nrognraim xwb thiaj ua tau.”
3Yexus teb tias, “Kuv qhia tseeb rau koj hais tias: yog leejtwg tsis yug dua tshiab,#3:3: dua tshiab lossis los saum ntuj los. tus ntawd yuav tsis pom Vajtswv lub Tebchaws li.”
4Nikaudemaus nug Yexus hais tias, “Ib tug neeg uas twb laus lawm, yuav ua licas rov yug dua tshiab tau? Nws yeej yuav mus tsis tau rau hauv nws niam plab thiab rov yug dua zaum thib ob hlo li!”
5Yexus teb tias, “Kuv qhia tseeb rau koj hais tias, yog leejtwg tsis yug los ntawm dej thiab ntawm Vaj Ntsujplig, tus ntawd yuav mus tsis tau Vajtswv lub Tebchaws li. 6Tus uas yug los ntawm sab nqaijtawv yeej yog nqaijtawv, tiamsis tus uas yug los ntawm Vaj Ntsujplig yog ntsujplig. 7Koj tsis txhob nyuajsiab rau tej lus uas Kuv hais rau koj hais tias, nej yuavtsum yug dua tshiab.#3:7: dua tshiab lossis los saum ntuj los. 8Cua yuav ntsawj mus sab twg los yeej tau; koj hnov cov cua ntawd lub suab, tiamsis koj yeej tsis paub tias xyov cua tuaj qhovtwg tuaj thiab yuav mus rau qhovtwg. Txhua tus uas yug hauv Vaj Ntsujplig ces zoo ib yam nkaus li ntawd.”
9Nikaudemaus nug hais tias, “Yuav ua licas thiaj ua tau li ko?”
10Yexus teb tias, “Koj twb yog cov Yixalayees ib tug xibhwb, ua licas koj tseem tsis totaub tej no thiab? 11Kuv qhia tseeb rau koj hais tias: peb hais tej uas peb paub thiab tshabxo txog tej uas peb pom, txawm li ntawd los nej yeej tsis muaj ib tug ntseeg tej lus uas peb hais li. 12Kuv qhia txog tej uas nyob hauv lub ntiajteb no xwb, nej twb tsis ntseeg; yogli ntawd, nej yuav ua licas ntseeg Kuv yog Kuv qhia txog tej uas nyob saum ntuj ceebtsheej? 13Thiab yeej tsis tau muaj dua leejtwg mus txog saum ntuj ceebtsheej li, tsuas yog Neeg Leejtub xwb, thiaj yog tus uas nqis saum ntuj ceebtsheej los.”#3:13: cov lus uas Yexus hais no, hais mus txog rau nqe 21 los tau.
14Mauxes tsa tus nab tooj rau saum tus ncej tom tiaj suabpuam licas, Neeg Leejtub yuav raug muab tsa ib yam li ntawd, 15kom txhua tus uas ntseeg Nws thiaj yuav tau txojsia ntev dhawv mus ibtxhis. 16Rauqhov Vajtswv hlub neeg ntiajteb kawg li, Nws thiaj tau pub Nws tibleeg Tub, kom txhua tus uas ntseeg Nws Leejtub thiaj tsis tuag, tiamsis tau txojsia ntev dhawv mus ibtxhis. 17Qhov uas Vajtswv txib Nws Leejtub los rau hauv ntiajteb, tsis yog los txiavtxim rau ntiajteb, tiamsis los ua ntiajteb tus cawmseej.
18Cov uas ntseeg Leejtub yeej tsis raug txiavtxim; tiamsis cov uas tsis ntseeg twb raug txiavtxim lawm, rauqhov lawv tsis ntseeg Vajtswv tibleeg Tub. 19Qhov kev txiavtxim ntawd yogli no: qhov kaj twb los rau hauv lub ntiajteb lawm, tiamsis neeg xum nyiam qhov tsausntuj tshaj li nyiam qhov kaj, rauqhov lawv nyiam ua phem ua qias. 20Cov uas nyiam ua phem ua qias yeej ntxub qhov kaj thiab tsis kam los nyob rau ntawm qhov kaj, rauqhov lawv tsis xav kom lawv tej kev phem kev qias ntawd tshwm los. 21Tiamsis cov uas ua rawsli qhov tseeb yeej los nyob rau ntawm qhov kaj, kom qhov kaj thiaj ci qhia tau hais tias tej uas lawv ua yeej yog rawsli Vajtswv lub siab nyiam.
Yexus Thiab Yauhas
22Dhau ntawd, Yexus thiab Nws cov thwjtim mus rau ntawm lub xeev Yudas, Nws nrog lawv nyob ntawd tau ib ntus thiab muab neeg ua kevcai rausdej. 23Yauhas kuj tabtom muab neeg ua kevcai rausdej hauv lub zos Ainoos uas nyob tsis deb ntawm lub zos Xalimes, rauqhov nyob rau thaj chaw ntawd muaj dej ntau. Neeg niajhnub tuaj cuag Yauhas kom nws muab lawv ua kevcai rausdej. ( 24Lub sijhawm no yog uantej uas Yauhas raug coj mus kaw rau hauv tsev lojcuj.) #Math 14:3; Malak 6:17; Lukas 3:19-20
25Yauhas cov thwjtim qeeleej nrog ib tug neeg Yudais#3:25: ib tug neeg Yudais; tej phau ntawv qub uas xuas tes sau, muaj Yudais qeeleej. sibcav hais txog txoj kevcai ntxuav. 26Ces lawv thiaj mus cuag Yauhas thiab hais tias, “Xibhwb, koj puas nco tau tus txivneej uas nrog koj uake ntawm tus dej Yauladees sab hnubtuaj uas koj hais txog ntawd? Tamsim no Nws tabtom muab neeg ua kevcai rausdej, thiab sawvdaws tabtom mus cuag Nws!”
27Yauhas teb tias, “Txhua yam uas neeg muaj puavleej yog Vajtswv pub xwb. 28Nej yog kuv cov timkhawv uas hnov kuv hais tias, ‘Kuv tsis yog tus Mexiyas, tiamsis kuv yog tus uas Vajtswv txib ua Nws ntej los xwb.’ 29Tus nkaujnyab yog tus nraugvauv li pojniam; tiamsis tus phijlaj tsuas yog tus uas sawv ntawm ib sab thiab mloog xwb, thaum nws hnov tus nraugvauv tej lus, nws zoosiab heev. Qhov no yog qhov uas ua rau kuv txoj kev zoosiab tiavlog. 30Nws yuavtsum loj zujzus tuaj, tiamsis kuv yuavtsum yau zujzus mus.”
Tus Uas Los Saum Ntuj Los
31Tus uas los saum ntuj los, Nws yeej loj dua txhua yam. Tus uas los hauv ntiajteb los, nws yeej yog neeg ntiajteb thiab hais neeg ntiajteb zaj, tiamsis tus uas los saum ntuj los, Nws muaj hwjchim loj dua txhua yam. 32Nws ua timkhawv txog tej uas Nws pom thiab tej uas Nws hnov rau sawvdaws, tiamsis tsis muaj leejtwg lees yuav Nws tej lus. 33Tiamsis tus uas lees yuav Nws tej lus, tus ntawd yeej ua timkhawv tau hais tias Vajtswv yog tus ncajncees. 34Tus uas Vajtswv txib los, Nws yeej hais Vajtswv tej lus, rauqhov Vajtswv pub Vajtswv tus Ntsujplig puvnpo rau Nws. 35Leejtxiv hlub Nws tus Tub kawg li thiab muab ibpuas tsavyam tso rau Nws kav huv tibsi. 36Tus uas ntseeg Leejtub, tus ntawd tau txojsia ntev dhawv mus ibtxhis; tiamsis tus uas tsis mloog Leejtub tej lus, tus ntawd yuav tsis tau txojsia, Vajtswv txoj kev chim yuav nyob rau hauv tus ntawd mus li.
ទើបបានជ្រើសរើសហើយ៖
Yauhas 3: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.