ទំនុកតម្កើង 52

ការជំនុំជម្រះមកលើមនុស្សទុច្ចរិត

ទំនុករបស់ស្តេចដាវីឌ សម្រាប់មេភ្លេង នៅគ្រាដែលដូអេក ជាសាសន៍អេដុម មកទូលស្តេចសូលថា ដាវីឌបានចូលទៅក្នុងផ្ទះអ័ហ៊ី‌ម៉ាឡេក។

1ឱមនុស្សខ្លាំងពូកែអើយ

ហេតុអ្វីបានជាអួតខ្លួនពីអំពើអាក្រក់ដូច្នេះ?

ព្រះ‌ហឫ‌ទ័យសប្បុរសរបស់ព្រះ

ស្ថិត‌ស្ថេរអស់កល្បជានិច្ច។

2អណ្ដាតអ្នកបង្កើតជាសេចក្ដីវិនាស

អ្នកប្រសប់ខាងបោកបញ្ឆោត

ប្រៀបដូចជាកាំបិតកោរយ៉ាងមុត។

3អ្នកស្រឡាញ់ការអាក្រក់ ជាងការល្អ

ហើយចូលចិត្តភូត‌ភរ

ជាងនិយាយការពិត។ –បង្អង់

4៙ ឱអណ្ដាតបោកបញ្ឆោតអើយ

អ្នកស្រឡាញ់អស់ទាំងពាក្យដែលនាំឲ្យវិនាស។

5ប៉ុន្តែ ព្រះនឹងបំផ្លាញអ្នករហូតតទៅ

ព្រះ‌អង្គនឹងចាប់យកអ្នកទៅ

ហើយកន្ត្រាក់អ្នកចេញពីជំរំ

ព្រះ‌អង្គនឹងដកអ្នកចេញពីទឹកដី

របស់មនុស្សរស់នេះ។

–បង្អង់

6៙ មនុស្សសុចរិតនឹងឃើញ ហើយកោតខ្លាច

គេនឹងសើចចំអកអ្នកប្រព្រឹត្តអំពើអាក្រក់នោះ

ដោយពាក្យថា

7«មើល៍ នេះនែ៎អ្នកដែលមិនបានយកព្រះជាទីពឹង

គឺបានទុកចិត្តនឹងទ្រព្យសម្បត្តិ

ដ៏ស្ដុកស្ដមរបស់ខ្លួន

ហើយស្មានថាខ្លួនខ្លាំងពូកែ

ដោយអំពើអាក្រក់!»។

8ឯខ្ញុំវិញ ខ្ញុំដូចជាដើមអូលីវខៀវខ្ចី

នៅក្នុងដំណាក់របស់ព្រះ

ខ្ញុំទុកចិត្តនឹងព្រះ‌ហឫ‌ទ័យសប្បុរស

របស់ព្រះជារៀងរហូតតទៅ។

9ទូល‌បង្គំនឹងសរសើរតម្កើងព្រះ‌អង្គជានិច្ច

ដោយព្រោះកិច្ចការដែលព្រះ‌អង្គបានធ្វើ

ទូល‌បង្គំនឹងសង្ឃឹមដល់ព្រះ‌នាមព្រះ‌អង្គ

ដ្បិតព្រះ‌នាមព្រះ‌អង្គល្អវិសេស

នៅចំពោះអស់អ្នកដែលកោតខ្លាចព្រះ‌អង្គ។

ទើបបានជ្រើសរើសហើយ៖

ទំនុកតម្កើង 52: គកស១៦

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី ព្រះគម្ពីរបរិសុទ្ធកែសម្រួល ២០១៦