ទំនុកតម្កើង 54

ពាក្យអធិស្ឋានសូមយុត្តិ‌ធម៌

ទំនុកជាសេចក្ដីបង្រៀនរបស់ស្តេចដាវីឌ ក្នុងគ្រាដែលពួកស៊ីភបានមកទូលស្តេចសូលថា ដាវីឌពួននៅជាមួយយើងខ្ញុំ សម្រាប់ឲ្យមេភ្លេងលេងដោយប្រដាប់មានខ្សែ។

1ឱព្រះអើយ សូមសង្គ្រោះទូល‌បង្គំ

ដោយ‌សារព្រះ‌នាមព្រះ‌អង្គ

ហើយវិនិច្ឆ័យទូល‌បង្គំ

ដោយឥទ្ធិ‌ឫទ្ធិរបស់ព្រះ‌អង្គ។

2ឱព្រះអើយ

សូមស្តាប់ពាក្យដែលទូល‌បង្គំអធិស្ឋាន

សូមផ្ទៀងព្រះ‌កាណ៌ស្តាប់វាចា

របស់ទូល‌បង្គំផង។

3ដ្បិតមានមនុស្សប្រហើនលើកគ្នាឡើង

ទាស់នឹងទូល‌បង្គំ

ហើយមនុស្សច្រឡោតស្វែងរកជីវិតទូល‌បង្គំ

គេមិនបានតាំងព្រះនៅមុខគេឡើយ។ –បង្អង់

4៙ មើល៍ ព្រះជាជំនួយរបស់ទូល‌បង្គំ

ព្រះ‌អម្ចាស់ជាអ្នកទ្រទ្រង់ ជីវិតទូល‌បង្គំ។

5ព្រះ‌អង្គនឹងសងទៅខ្មាំងសត្រូវរបស់ទូល‌បង្គំ

តាមអំពើអាក្រក់របស់គេ

ដោយយល់ដល់ព្រះ‌ហឫ‌ទ័យស្មោះ‌ត្រង់

របស់ព្រះ‌អង្គ

សូមបំផ្លាញគេឲ្យវិនាសសូន្យទៅ។

6ទូល‌បង្គំនឹងថ្វាយយញ្ញបូជាដល់ព្រះ‌អង្គ

ដោយតង្វាយស្ម័គ្រពីចិត្ត

ឱព្រះ‌យេហូវ៉ាអើយ

ទូល‌បង្គំនឹងអរព្រះគុណដល់ព្រះ‌នាមព្រះ‌អង្គ

ដ្បិតព្រះ‌នាមព្រះ‌អង្គល្អវិសេស។

7ដ្បិតព្រះ‌អង្គបានរំដោះទូល‌បង្គំ

ឲ្យរួចពីគ្រប់សេចក្ដីវេទនា

ហើយភ្នែកទូល‌បង្គំបានឃើញខ្មាំងសត្រូវ

របស់ទូល‌បង្គំត្រូវបរាជ័យ។

ទើបបានជ្រើសរើសហើយ៖

ទំនុកតម្កើង 54: គកស១៦

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី ព្រះគម្ពីរបរិសុទ្ធកែសម្រួល ២០១៦