JUAN 13
13
Yachachisqankunaq chakinta Jesuspa mayllisqan
1Pascua Fiesta ñawpaqtaraqmi Jesusqa kay pachamanta Yayanman kutipunanpaq hora chayamusqanta yacharqan. Kay pachapi paypa kaqkunata imaynatachus munakurqan, chay hinallatapunin paykunataqa tukukuykamapas munakurqan.
2Jesusqa yachachisqankunawan manaraq cenashaqtinkun, saqraqa Simonpa churin Judas Iscarioteta sonqonpi yuyaykachirqanña Jesusta hap'ichinanpaq. 3Jesusqa yacharqanmi lliw atiyta Yayaq payman qosqanta, Diosmanta hamusqantapas, Diosman kutipunantapas. 4Cenasqanmanta hatarispanmi pata p'achanta ch'utikuspa toallawan cinturanta wataykukurqan. 5Hinaspan puruñaman unuta hich'aykuspa yachachisqakunaq chakin maylliyta qallarirqan, watakusqan toallawantaq ch'akichirqan.
6Simón Pedroman qayllaykuqtintaq Pedroqa nirqan:
–Señorníy, ¿imaynataq qanri chakiykunata maylliwankiman? nispa.
7Jesustaq nirqan:
–Kunanqa manan entiendenkichu kay ruwasqayta, qhepamanñan entiendenki, nispa.
8Chaymi Pedroqa nirqan:
–Manapunin chakiykunataqa maylliwankimanchu, nispa.
Jesustaq payta nirqan:
–Mana maylliqtiyqa manan ñoqawanñachu kawaq, nispa.
9Hinan Simón Pedroqa nirqan:
–Señorníy, ama chakiykunallatachu maylliway, aswanpas makiykunatawan umaytawan, nispa.
10Jesustaq payta nirqan:
–Bañasqa kaqqa limpioñan, chakinkunallatañan mayllikunan. Qankunaqa limpioñan kashankichis, ichaqa manan llapaykichischu, nispa. 11(Jesusqa yacharqanmi pichus payta hap'ichinanta, chaymi nirqan: –Manan llapaykichischu limpioqa kashankichis, nispa).
12Chakinkuta maylliyta tukuspataq pata p'achanwan churaykukuspa wakmanta tiyaykurqan, hinaspan paykunata nirqan:
–¿Entiendenkichischu imatachus ruwarqaykichis chayta? 13Qankunan niwankichis: Yachachikuq, Señor, nispa. Chaytaqa allintan ninkichis, chaypunin kani. 14Ñoqa Señorpas, Yachachikuqpas kashaspa, chakiykichista maylliykichis chayqa, qankunapas chakiykichista mayllinakunaykichismi. 15Yachaqakunaykichispaqmi rikuchiykichis, imaynan ñoqa ruwani ahinata qankunapas ruwanaykichispaq. 16Cheqaqtapunin niykichis, kamachiqa manan patronninmanta aswan kurakchu, manallataq kachasqapas kachaqninmanta aswan kurakchu. 17Kaykunata entiendespachus ruwankichis chayqa, kusisamiyoqmi kankichis.
18Manan llapaykichismantachu rimani, ñoqan yachani pikunatachus akllasqayta, ichaqa kayta nini “T'anta mikhuqmasiymi ñoqa contra sayarirqan” niq Qelqa hunt'akunanpaqmi. 19Kunanmantapachan kayta nishaykichis, manaraq chaykuna sucedeshaqtin, chaykuna sucedeqtinñataqmi pichus Ñoqa kasqayta creenkichis. 20Cheqaqtapunin niykichis, pipas ñoqaq kachasqayta chaskiqqa, ñoqatan chaskiwan, ñoqata chaskiwaqtaq kachamuwaqniyta chaskin, nispa.
Hap'ichisqa kananmanta Jesuspa willakusqan
(Mt 26.20-25; Mc 14.17-21; Lc 22.21-23)
21Jesusqa chayta nispanmi sonqonpi llakikurqan, hinaspan sut'inta nirqan:
–Cheqaqtapunin niykichis, hukniykichismi hap'ichiwanqa, nispa.
22Chaymi yachachisqakunaqa qhawanakurqanku pimantachus nisqanta mana yachaspa. 23Jesuspa munakusqan huknin yachachisqantaq Jesusman k'iraykurisqa kasharqan. 24Paytan Simón Pedroqa ch'illmirirqan, pimantachus Jesusqa nishan chayta tapunanpaq.
25Chaymi payqa Jesusman k'iraykurisqa kaspa tapuykurqan:
–Señorníy, ¿pitaq chayri? nispa.
26Hinan Jesusqa nirqan:
–Chay runaqa pimanchus t'antata challpuykuspa qosaq chaymi, nispa. T'antata challpuykuspataq Simonpa churin Judas Iscarioteman qorqan. 27Chaymi t'antata mikhuykuqtin hina Satanasqa payman haykurqan, hinan Jesusqa Judasta nirqan:
–Imachus ruwanaykitaqa usqhaylla ruway, nispa.
28Ichaqa manan mayqenninkupas entienderqankuchu, imanaqtinchus chayta nisqanta. 29Wakintaq yuyarqanku Judasqa qolqe hap'iq kaqtin Jesuspa: Fiestapaq munasqanchista rantimuy, otaq wakchakunaman qomuy, nispa payta nishasqanta. 30Judasqa t'antata mikhuykuspan lloqsirqanpacha. Tutañataq karqan.
Mosoq kamachikuymanta
31Judas lloqsiqtin hinan Jesusqa nirqan:
–Kunanmi Runaq Churinqa hatunchasqa, paywantaq Diospas hatunchasqa kashan. 32Dioschus Churiwan hatunchasqa kashan chayqa, kikin Diosmi Churita hatunchanqa, kunanmantapachataqmi hatunchanqa. 33Wawallaykuna, pisillatañan qankunawan kasaq. Maskhawankichismi, ichaqa, imaynan judío runakunatapas nirqani: Ñoqaq risqaymanqa manan hamuyta atiwaqchischu, nispa, ahinatan qankunatapas kunanqa niykichis. 34Mosoq kamachikuytan churapuykichis: Qankunapura munanakuychis. Imaynan ñoqapas munakuykichis, ahinata qankunapas munanakuychis. 35Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis, nispa.
Pedroq negananmanta
(Mt 26.31-35; Mc 14.27-31; Lc 22.31-34)
36Simón Pedron Jesusta nirqan: –Señorníy, ¿maytataq rinkiri? nispa.
Jesustaq payta nirqan:
–Ñoqaq risqaymanqa manaraqmi kunan hamuyta atiwaqchischu, qhepatañan ichaqa hamuyta atinkichis, nispa.
37Pedrotaq nirqan:
–Señorníy, ¿imaraykun kunanqa qhepayki hamuyta mana atiymanchu? Qanraykun wañusaqpas, nispa.
38Chaymi Jesusqa payta nirqan:
–¿Ñoqaraykuchu wañunki? Cheqaqtapunin niyki: Manaraq gallo waqashaqtinmi reqsiwasqaykita kinsa kutita negawanki, nispa.
ទើបបានជ្រើសរើសហើយ៖
JUAN 13: QUECUZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Revised Quechua Cuzco Bible © Peruvian Bible Society, 2004.