LUCAS 13
13
Diosman kutirikunapaq Jesuspa anyasqan
1Chay tiempon wakin runakuna Jesusman rispa willarqanku:
–Galilea provincia runakunan sacrificio haywanankupaq animalkunata wañuchishaqtinku, Pilatoqa paykunata wañuchirqan, hinan yawarninkuqa animalkunaq yawarninwan chhaqrukurqan, nispa.
2Chaymi Jesusqa paykunata nirqan:
–¿Yuyankichischu chay runakunaqa Galilea provinciapi tiyaq runakunamanta aswan huchasapa kaspanku wañuchisqa kasqankuta? 3Manapunin, aswanqa qankunapas manachus Diosman kutirikunkichis chayqa, llapallaykichismi wañunkichispuni. 4Chunka pusaqniyoq runakunatan Siloé qochana qayllapi torre thunikuspa wañuchirqan, ¿yuyankichischu chay runakunaqa Jerusalén llaqtapi llapallan tiyaqkunamanta aswan huchasapa kaspanku wañusqankuta? 5Manapunin, aswanqa qankunapas manachus Diosman kutirikunkichis chayqa, llapaykichismi wañunkichispuni, nispa.
Mana ruruq higos sach'amanta
6Kay rikch'anachiy simitan Jesusqa nirqan: –Huk runaq uvas chakranpin higos sach'a mallkisqa karqan. Chakrayoqqa higosta pallaq rispataq mana ima rurutapas tarirqanchu, 7chaymi uvas chakra llank'aqta nirqan:
–Qhawariy, kaywanqa kinsa watañan kay higos sach'aq rurun pallaq hamusqay, manataqmi tarinichu. Wit'upuy, ¿imapaqñataq hallp'atapas usuchinqa? nispa.
8Chaymi payqa nirqan: –Wiraqocháy, saqeykuyraq kay watatawan, muyuriqninta hasp'ispay wanuwan churasaq. 9Rurunqataqchus chayqa allinmi kanqa, mana ruruqtintaq wit'upunki, nispa.
Samana p'unchaypi warmita Jesuspa qhaliyachisqan
10Sinagogapin Jesusqa samana p'unchaypi yachachisharqan. 11Chaypin kasharqan chunka pusaqniyoq wataña supaypa onqochisqan warmi, paymi k'umuykuspallaña puriq, manataq imaynamantapas cheqan sayayta atiqchu. 12Hinan Jesusqa payta waqyaspa nirqan:
–Warmi, onqoyniykin kacharipusunki, nispa. 13Hinaspan payta llamiykuqtin hina cheqanta sayarispa Diosta hatuncharqan.
14Sinagogapi kamachikuqtaq samana p'unchaypi Jesuspa qhaliyachisqanmanta phiñakuspa runakunata nirqan:
–Llank'anapaqqa soqta p'unchaymi kan, chay p'unchaykunapi qhaliyachisqa kanaykichispaqqa hamuychis, amataq samana p'unchaypichu, nispa.
15Chaymi Señor Jesusqa payta nirqan:
–Iskay uyakuna, ¿manachu samana p'unchaypi sapankaykichis wakaykichistapas asnoykichistapas uywa kanchamanta kacharispa unu ukyaqta qatinkichis? 16Kay warmiqa Abrahampa ususinmi, paymi chunka pusaqniyoq wataña Satanaspa watasqan kasharqan, ¿chaychu mana samana p'unchaypi kacharichiyman karqan? nispa.
17Chaykunata niqtinmi lliw awqankunaqa p'enqasqa karqanku. Llapan runataq ichaqa paypa musphana ruwasqankunamanta kusikurqanku.
Mostaza muhumanta
(Mt 13.31-33; Mc 4.30-32)
18Jesusmi nillarqantaq: –¿Imamanmi Diospa qhapaqsuyunqa rikch'akun? ¿Imamantaq rikch'achisaq? 19Mostaza muhumanmi rikch'akun, chaytan huk runaqa huertanpi tarpurqan, wiñaspanmi hatun sach'a kapurqan, phalaq animalkunataq k'allmankunapi q'esachakurqanku, nispa.
Qonchumanta
(Mt 13.33)
20Jesusqa nillarqantaqmi: –¿Imamantaq Diospa qhapaqsuyunta rikch'achisaq? 21Qonchumanmi rikch'akun, chaytan huk warmi kinsa tupu hak'upi tuparqachispa poqonankama saqeykun, nispa.
K'illku punkumanta
(Mt 7.13-14, 21-23)
22Jesusmi Jerusalén llaqtaman rishaspa, llapa llaqtakunapi huch'uy llaqtakunapiwan yachachirqan. 23Chay purisqanpin huk runa payta tapurqan:
–Señor, ¿pisillachu qespikunqaku? nispa.
Jesustaq paykunata nirqan:
24–K'illku punkunta haykunaykichispaq kallpachakuychis. Niykichismi, askhan haykuyta munanqaku, manataq atinqakuchu. 25Punkuta wasiyoq wisq'amuqtinmi hawamanta punku takayta qallarinkichis: ¡Señor, kicharimuwayku! nispa.
Paytaq nimusunkichis: Manan reqsiykichischu, manataqmi yachanichu maymantachus kasqaykichistapas, nispa.
26Hinaqtinmi qankunaqa ninkichis: Kuskan mikhurqanchis ukyarqanchis, plazaykupitaqmi yachachirqankipas, nispa.
27Hinan nimusunkichis: Manapunin reqsiykichischu, manataqmi yachanichu maymantachus kasqaykichistapas. Ñoqamanta anchhuriychis, llapa mana chanin ruwaqkuna, nispa.
28Chaypachan Abrahamta, Isaacta, Jacobta, llapa profetakunatawan Diospa qhapaqsuyunpi rikunkichis, qankunataq ichaqa wikch'usqa kankichis, chaypin waqaypas kiru k'achachachaypas kanqa. 29Runakunan inti lloqsimuymanta, inti haykuymanta, wichaymanta, uraymanta hamuspanku Diospa qhapaqsuyunpi hatun mikhuy mikhuq tiyaykunqaku. 30Qhepa kaqkunan ñawpaq kanqaku, ñawpaq kaqkunataq qhepa kanqaku, nispa.
Jerusalén llaqtamanta Jesuspa waqasqan
(Mt 23.37-39)
31Chay raton wakin fariseokuna payman hamuspa nirqanku:
–Herodesmi wañuchiyta munashasunki, kaymanta ripuy, nispanku.
32Jesustaq paykunata nirqan:
–Rispaykichis chay atoqta nimuychis: Kunanta paqarintawanmi supaykunata qarqosaq, onqosqakunatapas qhaliyachisaq, minchhatataq ruwanayta tukusaq, nispa. 33Chaywanpas kunan, paqarin, minchhatawanqa Jerusalenman chayanaypuniraqmi. Manan profetaqa wak llaqtapiqa wañunmanchu aswanpas Jerusalén llaqtallapipunin.
34¡Jerusalén, Jerusalén! Qanmi kanki profetakunata wañuchiq, Diospa qanman kachamusqankunatapas ch'aqeq. ¡Askha kutitan munarqani wawaykikuna huñuykuyta imaynan wallpapas raphran ukhupi chiwchinkunata oqllaykun hinata, manataq munarqankichu! 35Chay hinaqa, wasiykichismi purunyapunqa. Niykichismi, manan rikuwankichisñachu: ¡Saminchasqa kachun Señor Diospa sutinpi hamuqqa! nispa, ninaykichis tiempo chayamunankama, nispa.
ទើបបានជ្រើសរើសហើយ៖
LUCAS 13: QUECUZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Revised Quechua Cuzco Bible © Peruvian Bible Society, 2004.