Luka 1
1
Upuku beleng
1Achakura Tiyofilos Ano chebete nga matana nga darse to gogorro togeme se ama woze azate akado. 2Nga ma darse epegeme se nga ma kuna a tonu to ana geme se nga ma nǝri neng a ji aka nye tuni asuru a bibura, nze nga ze nga bi beme. 3Baka nane meze, mina nǝri ina rreze in darsei eme e vevento, baka se emma kone in kuri in sangarre dede. 4Baka a ngo ru magangan maze epegeme se, ama buka ngo.
Ama buki oyo Yohana ono Obaptisima
5Ocha ogome se Hiridus maze a togomo to Yahudiya, oye Opiris maze anu o tuYahudi se amagusan me Zakariya, owulu tupiris to atitǝu Abija. Rreji ye owai okome a gosan me Alisabatu, me maka suru abirroza be Haruna ze. 6Nye nga repo me zal, nga wuza ochǝkǝnǝ orreze a ji owa Ogomo Asharri, nga ma tarse makirri neng marraku mo Ogomo Asharri zal nane se ma go awuze. 7Nga meng abiya ne, baka se Alisabatu mata yosone, Zakariya neng owai me zal nga na ngona.
8Oye dara, Zakariya apusu to gogorro ayimi Atitǝu Ogomo Asharri, baka se berroza be Abija ze neng etoma a tumuru tome. 9Ama zaka me ana ne se azai tupiris baka maka pusi otorrarre o onya olo Atitǝu Ogomo Asharri. 10Ocha ogeme se Zakariya ma pete ayimi atitǝu awo Ogomo Asharri, akuti otorrarre, ano chebete nga binja akǝi, nga ya beroromo.
11Do kuna odara ne, nze otoma owo Ogomo Asharri orawa a Zakariya, ma tore owulu oware belei ara geme se maya kuti otorrarre ne. 12Neng oni otoma owo Ogomo Asharri ogomme, nze Zakariya kerkene, nze beye be me eme dede. 13Nze otoma owo Ogomo Asharri ogomme, “Tego kuna beye ne, Zakariya! Ogomo Asharri na ka beroromo aboi, owai okoi Alisabatu maya yowa kai vana. Ngo ya nya me rriji Yohana. 14Apuru ya runta kai neng ezalla, ano chebete gaze nga ya kuna lome, baka oyo ome. 15Vano ogonme maya chǝkǝnǝ ono saru a ji Ogomo Asharri. Mazema shinǝ obere ne, ne epegeme se eneng ngona me bammu ne, uRuhu Usansang oya chǝkǝnǝ neng me ama da ayima puru a yimi. 16Maze maya kursu ano Isaraila chebete nga ra nga tarse beleng be Ogomo Asharri oko nye. 17Maya ra ma mamarra oruna a bate Yeso ra, baka Ogomo Asharri ya nya kame a gata neng uRuhu okome, sakama o ono bezeze taye to Ogomo Asharri Iliya. Maya ngona ana shong Abija nga chǝkǝnǝ shamo neng abiya nye. Maya kuri ma we anagemese nga ta kuna beleng be Ogomo Asharri ne a nga kone. Maya ngona ano agorro baka a nga tarse Ogomo Asharri.”
18Nze Zakariya sangarra otoma owo Ogomo Asharri, “Mi neng ngona inizi in ru epegeme se ngona buku iya chǝkǝnǝ na neng me? Min gina se mina ngona, owai okon gina gaze mana ngona.”
19Otoma owo Ogomo Asharri magarra ma go, “Mi zi Jibirailu se min turse a ji Ogomo Asharri. Ogomo Asharri na toman in ra in bi beleng neng ngo enbizei beleng be lo begina. 20Ama ngona nyamine garra neng beleng abon, ozema bi beleng ne se a ngame a dara ogome se a ya yo vana me. Baka beleng abon biya binja ocha ogome se Ogomo Asharri na ngona.”
21Ano ageme se nga ya chǝkǝnǝ akǝi a denta osuru Zakariya, nga ya adodonzo, yaya zena ngona se mana dakano lantan, ayimi Atitǝu Ogomo Asharri. 22Ni se maka suru mata ru bi beleng ne, nze nga ru se mana ni eye eyabo ayimi Atitǝu Ogomo Asharri. Nze ma bezeze nye beleng neng oware, mana chǝkǝnǝ ono ta ru bi beleng ne anu ne.
23Ni se ocha itoma keme na maso Atitǝu Ogomo Asharri, nze ma kuru atitǝu akame. 24Amarro tumuru tumi bate, nze ayakura kome Alisabatu ma ngona apuru nze ma gorkuza apana me a ngame a tubarma shibi. 25Baka Alisabatu, “Segina, Ogomo Asharri na kuna ugwegwe ne okon, mana zuzun emme ayima ano.”
Ama buki nane se a ya yo Yeso
26Alisabatu a tubarma tatse neng o ngona puru, nze Ogomo Asharri ka toma neng otoma owo Ogomo Asharri Jibirailu a ngame oye gweri ayimi in nyanga ma Galili, se a gosan no Nazarat. 27Ogomo Asharri ma tome me, a oye ogalla se madawa murun vanorrome ne, ogalla ogome se Yusufu vana Dauda ze a wuza a nya a me. Rreji rrome Maryamu. 28Ni se otoma owo Ogomo Asharri me ra ogalla me, nze ma ogomme, “A ya biyaye oko! Ogomo Asharri ze neng ngo, mana vatui taye.”
29Ni se Maryamu kuna oko me, nze biruwa bita tetemene, maya dodonzo, yo okoze gene nane. 30Nze otoma owo Ogomo Asharri me gon me, “Tego kuna beye ne, Maryamu. Ngona morra eyabo e ngoma a suru Ogomo Asharri. 31Ngo gina ngo ya ngona apuru, ngo ya yo vana, ngo ya nya kame rreji Yeso. 32Maya chǝkǝnǝ ono saru, a ya gosan me Vana Ogomo Asharri se ma Kera Kǝvi. Ogomo Asharri maya ngona a me ogomo sakama onongono me Dauda. 33Maya wuza togomo to titǝu Yakubu togeme se tuzemen bimasone, togomo tome toma maso ne.”
34Nze Maryamu sangarra otoma owo Ogomo Asharri, “Eya ngunan innize e chǝkǝnǝ nane, min gina min ta ru vana orrome ne?”
35Nze otoma owo Ogomo Asharri me garre ogong me, “URuhu Usansang oya tonu atara kai, a gata Ogomo Asharri ya pata a kai. Baka nane ze vana ogome se ngoya yo me, ogome se oze meng masharra ne, a ya gosan me Vana Ogomo Asharri.” 36“Egina Alisabatu birruza aboi, ano ya gusa mama yo ne, ayimi tungona tome seginna, ma zen apuru tubarma tase. 37Baka eyabo ta kirka Ogomo Asharri o wuza ne.”
38Nze Maryamu go, “Mi orere Ogomo Asharri ze, ichǝkǝnǝ na neng me imi, nane se ngona buku.” Nze otoma owo Ogomo Asharri me nga na ma deke me.
Maryamu ma ngame a Alisabatu
39A tumuru togonme Maryamu ma gorro maa chonno a ngame a oye ogweri ayimi in nyanga ma Yahudiya. Ogweri mi oya ayimi towo. 40Se Maryamu ma denye ogweri mi, ma pete atitǝu Zakariya, nze ma bi Alisabatu oko. 41Se Alisabatu kone oko Maryamu, vana ogome se oya me ayima puru uzuku. URuhu Usansang oma pete me. 42Alisabatu ma nyiza emelo asharri, nze ma go, “Ngo ono ngoma ze ayima wai, vano ogome se oya yimi apuru a kai gaze Ogomo Asharri na vati mi taye! 43A we innizi Ogomo Asharri deke ayun Asharri akan ze ma rai imi? 44Igena, neng okona oko okoi, nze vana ogome se oya yima apuru akan na cokomo dede baka ezalla. 45Ngo ono ngoma ze baka ngona garra, beleng begina se Ogomo Asharri na buki a ngo biya binja nane se ma buki.”
Maryamu ma tonngarre Ogomo Asharri
46Maryamu go,
“Ya tonngarre Ogomo Asharri abiruwa bon.
47Min ye ezalla baka Ogomo Asharri ono buza aka.
48Baka mana kuna ogwengwene okong
mi orere okome.
A suru kane, ono masano magina zal, nga ya gosan mi ano sana,
49baka Ogomo Asharri o na a gata ze mana wuzang to gogorro to sasaru.
Maze ono sansang se mazemeng masharra ne.
50Ma kone ogwengwene owa ana geme se nga kuna beye bome asuru ayimiza angame ayimiza
ana geme se nga kuna biye abome.
51Neng oware okome owa gata mana wuza togogoro to sasaru!
Mana sarma ano nyi zaza topana, in eme geme se nga zen no a nyi ruwa.
52Ma duzu agomo a togoma tonye,
nze ma nyiza ana geme se nga zemeng eyabo ne.
53Ma nya ano toyang to gogorro to ngoma,
nze ma deke ano morra neng tare tu uwǝ.
54Ma benke arere akame Isaraila
ma kuri ma donza makona ogwengwene okonye,
55sakama nane se ma bi beleng neng ana showado, neng ogona,
maya kuna ogwengwene ono ngono okodo Ibirahim neng birruza bome angame a bimaso.”
56Maryamu ma chǝkǝnǝ neng Alisabatu a ngame tubarma tutaro, a bate ma kuru a me ape.
Ama yo Yohana one Obaptisima
57Ni se tumuru togeme se Alisabatu ya yo to binja, nze mayo vana orrome. 58Ano chǝkǝnǝ ara venton meneng berroza bome nga kuna ogona Ogomo Asharri na kuna ogwengwene okome mana yo vana nze ngawoze ezalla dede.
59Ni se vana me binja tumuru urru, nze ano rai atuzu vana me. Nga maze a barasa guna ata nya me rreji ye a shome, Zakariya, 60nze ayun vana me go, “Aye, a ya nya kame rreji Yohana.”
61Nze nga go Alisabatu, “Woi ze ma birruza bonyi se atisaza meneng rreji ye geme ne.”
62Nze nga sangara ashon vana meneng oware, ama buku rreji ye vana me se a ya tisiza kame neng no. 63Nze ma go a ran emo darsa ewere, nze ma dara, “Rreji ye vana me Yohana.” Ni si nga ni nane nze emo damara me nye. 64Ayem me Zakariya ma morra anu bi beleng, nze ma bura o tongarra Ogomo Asharri. 65Beye ba me ano chǝkǝnǝ voto neng nye zal. Beleng beme ba sezarro zal owulu towo tan in nyanga ma Yahudiya. 66Zal anagemese nga kuna emegem me se ama bi, nze nga wuza adodonzo, agusa, “Vano gina ya chǝkǝnǝ in ni zi?” Baka se ana ru ogona oware Ogomo Asharri oze neng me.
Zakariya ma tonngarra Ogomo Asharri
67Nze uRuhu Usansang utu a Zakariya a shon Yohana me, nze ma bi eleng ma Ogomo Asharri ma go,
68“A tongarra Asharri Ogomo Asharri, Asharri o Isaraila!
Ma rai ma mala ana kame, ma buza nye.
69Ma wereseza ono kasa kado ono a gata
a sura a bi rroze be orere okome Dauda
70(mana binja egemese ma guna maya ngona me tunin embabasa a tonu to to annabi ta tome to sansang).
71Maya buza akado a tare ta ano nya me ne akado,
neng ana geme se nga ma barasa uniya kado ne.
72Ana neng meze ma kuna ogwengwene owa ana showado,
ma donza neng eme geme se ma go maya ngona akanye.
73Tutono togeme se ma we onongono okodo Ibirahim.
74Ma go maya kasa akado a tare to ano nya me ne akado,
baka woro morra orona wuza me etoma da beye ne.
75A woro chǝkǝnǝ da masharra ne, ewuza to gogorro togeme se Ogomo Asharri ya barasa me, zal tumuru todo a masano ma ginna.
76“Ngo gaze vano gina, a ya gosan ngo annabi osaru.
Ngoya ware Achakura ara, baka ngo mamarra me orona.
77Ngo ze amasa ano awo Ogomo Asharri,
ogo Ogomo Asharri ya visiki akanye masharra ma nye ma kuri ma buza nye.
78Baka Ogomo Asharri ma kuna ejai ewa no chebete, maya Toma neng ono gome se maya buza akado.
Maya yankǝnǝng onyana odara asuru,
79oya ngona ara sangsang,
ano chǝkǝnǝ a mari neng ano ageme se nga ya adodonzo owǝnǝ.”
80Nze vana mina bare, mana ngona a gata ayimi uRuhu, Ma chǝkǝnǝ a yija a ngame odara ogome se ma suru baka ma bi beleng be lo be Ogomo Asharri ano Isaraila.
ទើបបានជ្រើសរើសហើយ៖
Luka 1: JER
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2022 Luke Initiative for Scripture Translation