Markus 14
14
M'ee mat m'um Jesu kihh mwoor'teghez
(Mat 26:1-5; Luk 22:1-2; Yoh 11:45-53)
1Kaarooh Ku'khur Mettkaah kihh Ku'khur Gutt-gaw mwopp dheeh t'eer vel, bhi prist wu'nan kihh Mhikamm-w'aar mwopp y'aa t'ang arr w'u tihh mwopp byaah y'aa Jesu diy lakham-lakham. 2Dhangg mwopp satt shag le, “Tapp mu y'aa nyi a sh'i Ku'khur mou, tapp'baa gurum mwopp yakhal kihh pwoobhangg.”
3Kaarooh Jesu Betani luh m'ee gurum w'u shumm nyi a Siman Gulokhom, bhi m'ee mat ji kihpee nyi diy kihh m'ee mwoor'teghez keera w'u khi-krhim, w'u mwopp dhakk a sh'i dhongg mw'oor mee'bii w'u mwopp kihh peet nard; dhighin m'ee laa'dleng w'u mwopp dhakk sh'i m'ee pangg'krhim, w'u mwopp kihh peet alabasta. Bhi tep tookk laa'dleng ni, bhi blihp mw'oor mhizeh lhisam kih kaah Jesu.
4Bii mihhseh shaan pakk gurum w'u mwopp nhighin, bhi mwopp kihh dyangg shag le, “Kai, a mihyeh l'e bhi mat mhize tu'kyillingg fw'aan mwoor'teghez mhize kr'ong ayeh? 5Ai dyinn mwopp p'ee mak seett kihh nyi kaah shaghal dinari dhaa kunn mwopp pihh shaghal ni mhipyaah mwopp ruh.” Bhi mwopp gwak-bhellepp mat ni bhall-bhall.
6Bhi Jesu satt mwopp le, “Wunn phi daam'pee nyi a p'ee mihyeh? Sh'in a bii wu'rett a'n pwetd. 7Ai wunn kihh mhipyaah kihshag kihh wunn kooh phiranggyeh; wunn p'ee mak bham mwopp kapp pee w'u wu kihh dh'om. Dhangg baah wu'an p'ee kwed kihshag kihh wunn kooh phiranggyeh mou. 8Mat mihhse sh'in a bii w'u bhall khinyi mak kad. Shep blihp mwoor'teghez mhize kih shoopsan, a tihh dhakk a'n diy p'ee w'um. 9Ih kihh satt a zeenn wunn, kapp pee w'u mwopp p'ee p'ar kihh satt Pwoo'wurett diy dhighin yill ni kihhdihng'dihng, bhi mwopp p'ee kihh satt bii w'u mat mhize sh'in p'ee p'an kihh nyi.”
Yahuda Iskaryoti dh'om p'ee seett kihh Jesu
(Mat 26:14-16; Luk 22:3-6)
10Bhi Yahuda Iskaryoti, w'u a kihmeh dhighin zheppkamm khi Jesu w'u Kaghapaad baa'vel seh, dum kihpee prist wu'nan mwopp tihh seett diy kihh nyi mwopp. 11Kaarooh mwopp klihng kihhsheh, bhi rettyit mwopp pwetd, bhi mwopp bwakhatbhellepp le runn p'ee pihh shaghal gw'ar. A nyi seh bhi Yahuda y'aa rengg arr w'u tihh pihh Jesu diy sarr mwopp.
Soh'teer Puus Mettkaah w'u kyess ni
(Mat 26:17-25; Luk 22:7-14,21-23; Yoh 13:21-30)
12P'ar puus wu'shee mhi Ku'khur Gutt-gaw ni, w'u a puus w'u mwopp kihh lokhot shan laa'tihm bii'zhukhum mhi Mettkaah diy, bhi zheppkamm ni mwopp ji nang phi Jesu le, “Gwoohyon, ghi kihh dh'om tihh mu dhakk pee w'u munn p'ee so Gutt-gaw ni diy a nihyeh?” 13Bhi Jesu lop vel dhighin zheppkamm keeniy ni mwopp, satt mwopp le, “Wu dum dhighin khishikhitt ni bhi m'ee gurum w'u kihh pyeel a'm p'ee ji kad wunn, bhi wu langdang nyi. 14Tuluh w'u dum dhel diy, bhi wu satt guluh ni wu le, ‘Gukamm kihh nang le: Luhmhizeb w'u a'n p'ee so Mettkaah kihshag kihh zheppkamm keena diy a nihyeh?’ 15Bhi nyi p'ee dum kammpee m'ee k'om luhdhengg w'u kaam-kaam a w'u dhih-dhakk dhen wunn. Wu dhakk shed ni munn nhighin.”
16Bhi zheppkamm ni mwopp y'aa arr, mwopp dum khishikhitt ni, bhi mwopp dum kad nyi a kihhsheh mwoorr kaarooh Jesu yakshiiy runn seh. Bhi mwopp dhakk shed Mettkaah nyi nhighin.
17Kaarooh pee wull kansihkhin, bhi Jesu mwopp jawull kihshag kihh zheppkamm keeniy w'u Kaghapaad baa'vel ni mwopp. 18Kaarooh mwopp pwoo tebul kaah soh, bhi Jesu satt le, “Ih kihh satt a zeenn wunn, kihmeh dhighin wunn p'ee seett kihh a'n, w'u a gwooh kaah so soh mwasseh kihhshe kihshag kihh a'n pwetd.” 19Kai, phitukhup mwopp tekhenn pwetd, bhi shi'kihmeh-shi'kihmeh mwopp kihh satt nyi le, “Fett kaa nah, gha phi satt a a'n mou shisihng?” 20Bhi Jesu pring mwopp le, “A kihmeh dhighin zheppkamm w'u kaghapaad baa'vel ni mwopp. Nyi a gwooh kaah soh dhighin dhaa wu'khimhi kihh a'n. 21L'aa khi Gurum p'ee mwan kaa nyi a w'u rih-ran kaah nyi se. Dhangg mak kihh gwooh seett kihh L'aa khi Gurum ni dihkhillihkk! Ai rettmett gwoh ni tihh dyinn gyet mwopp l'aa nyi mou.”
22Kaarooh mwopp kaah soh, bhi Jesu m'ang gihkhill gutt, bwoonrooh le'wurett kaah, bhi trep gihkhill gutt ni pihh zheppkamm keeniy ni mwopp, kihh satt le, “Wu lapp; mihhse a shoopsan.” 23Bhi m'ang l'aa zhangg ni, bwoonrooh pihh plangg Naan, bhi pihh mwopp weett, mwopp shwaa dhighin l'aa zhangg ni. Jesu satt mwopp le, 24“Mihhse a teghem nah w'u a mhi Gabshit; teghem nah w'u ih dheer p'ee gurum dhess. 25Ih kihh satt a zeenn wunn, baah a'n p'ee shwaa bii w'u a am'anab dyi mou, seeh p'ar w'u a'n p'ee shwaa nyi dyi a wu'pwooh dhighin dhenglong khi Daa.” 26Bwoonrooh mwopp sh'in koog, bhi mwopp pwat taah dum kih Bwumm Paatt.
Jesu shep satt rooh Bitrus p'ee shiihshig man riy
(Mat 26:31-35; Luk 22:31-34; Yoh 13:36-38)
27Bhi Jesu satt zheppkamm keeniy ni mwopp le, “Weett keewu p'ee p'al, p'ee nyi a rih-ran le,
“ ‘An p'ee t'u gutapp ni,
bhi tihm ni mwopp p'ee chiit b'uu.’#14:27 Zak 13:7
28“Dhangg bwoonrooh ih yakhal kih peemuutt, bhi a'n p'ee dum Galili ky'een wunn.”
29Bhi Bitrus satt le, “Kooh dyinn kakharr mwopp pal weett, bhi tapp a m'ee wu'an mou.”
30Jesu pring Bitrus le, “Ih kihh satt a zeenn gha, shishinn se, w'u a khipar w'u shinn, dhangg dool kihh peetpee yit vel, bhi gha p'ee shiihshig man a'n yit kunn.”
31Weett kihhsheh, bhi Bitrus dharr gakhatt-gakhatt le, “Ai kooh dyinn wull rooh a'n p'ee mih'muut kihshag kihh gha maah, bhi baah a'n p'ee cham shiihshig man gha mou.” Kakhar zheppkamm ni mwopp weett satt a kihhsheh zag.
Jesu dhangNaan Getsemane
(Mat 26:36-46; Luk 22:39-46)
32A nyi seh bhi Jesu kihh zheppkamm keeniy mwopp dum m'ee pee shi w'u mwopp kihh peett Getsemane. Kaarooh mwopp wull nhighin bhi satt mwopp le, “Wu kwangg se tihh ih dhangNaan diy.” 33Bhi yakhal kihh Bitrus mwopp kihh Yakub kihh Yohanna dang shin. Phitukhup nyi y'aa tekhenn yakhal bii mihhseh daam'pee nyi pwetd. 34Bhi satt mwopp le, “Kai, phitukhup na wad bis-bis harr kaa a'n a p'ee mih'muut se. Wu tong se, wu y'aa gonggpee.”
35Kaarooh wu'nyi pann shang dum diy lee kihkyeen, bhi sam saam kih bwut niy yill y'aa dhangNaan tihh mihh kihh mak sh'in, bhi dyinn bii w'u p'ee kad riy seh diy mett kaah niy. 36Bhi dhangNaan le, “Daa, Daa, baah mee'bii m'aa gha sh'in mou. Ghi m'ang zhangg zheell mhize lhi'baa kaah nah. Dhangg tapp diy dhen a bii w'u a'n ih kihh dh'om mou, ghi sh'in a bii w'u ghi kihh dh'om.”
37Bhi baa'taah kihpee zheppkamm keeniy ni mwopp diy, bhi taah kad mwopp chaat ruh s'aam. Bhi satt Bitrus le, “Hah, Siman, wunn wuh a s'aam a'ng? Baah wu mak tong gonggpee dang na p'ee gonggpee kihmeh kyekk mou aa'? 38Wu gonggpee yakhal wu dhangNaan tapp'baa wu pal dhighin zhwaan'pee. Riin kihh dh'om, dhangg shoopshik noott-bhall.”
39Waa dum dyi, bhi dhangNaan mwoorr kaa dyinn sh'in seh. 40Kaarooh b'aa ji dyi bhi kad zheppkamm ni mwopp a s'aam harr vitt, p'ee s'aam t'u mwopp pwetd. Baah mwopp man bii w'u runn p'ee satt nyi mou. 41Bhi b'aa ji kihpee zheppkamm keeniy ni mwopp dyi, dheeh a wu'kunn seh, bhi satt mwopp le, “Wunn wuh a s'aam kihh lapp shuk harr mwasseh -ng? Mak kihhsheh! Pee wull. Wu naah, baa mwopp seett kihh L'aa khi Gurum sarr mhi-shigbis mwopp. 42Wu yakhal munn mu reen! Wu naah, g'u seett kihh a'n ji wull!”
Mwopp y'aa Jesu
(Mat 26:47-56; Luk 22:47-53; Yoh 18:3-12)
43Kaarooh Jesu kaah kadpwoo, bhi Yahuda, w'u a kihmeh dhighin zheppkamm khinyi w'u kaghapaad baa'vel seh, ji putt. Nyi kihh dw'uu gurum w'u prist wu'nan mwopp, kihh Mhikamm-w'aar mwopp, kihh mwoohnan mwopp lop tu'ru'ru dang shin. Mwopp ja kihh v'ur g'oo kihh n'an dughul sarr ruh.
44Yahuda g'u seett kihh Jesu ni khi t'en satt reb bii'kattshiiy w'u riy p'ee dyingg Jesu dyishig mwopp le, “Gwooh a'n p'ee sh'in dwaaspwoo kihh nyi, a nyi a Jesu nyi; wu y'aa nyi wu pihh kwagtihb mwopp dhel kihh nyi.”
45A nyi seh bhi Yahuda taah dum kihpee Jesu diy abet, taah tog kihh nyi le, “Gukamm!” Yakhal sh'in dwaaspwoo kihh nyi a pin'shig gurum. 46Bhi mwopp dyeb kihh Jesu y'aa. 47Bhi kihmeh dhighin zheppkamm khi Jesu ni w'u mwopp kihh dyarrang kuss kihh nyi shang g'oo keeniy, bhi twed tall kom m'ee kromm khi Prist Wu'yon kihh g'oo ni ming yill.
48Bhi Jesu nang phi dw'uu gurum ni mwopp le, “A'n a m'ee g'u yakhal kihh pwoobhangg w'u dheeh wu pwat p'ee y'aa a'n kihh v'ur g'oo kihh dughul aa'? 49Kooh phirangg bhi a'n kihshag kihh wunn ih kihh sh'in kamm kihfur LuhNaan, dhangg baah wu y'aa a'n mou. Dhangg nyi a ching tihh Ran'Wubhangg gam.” 50Bhi kapp mwooh dang nyi mwopp shwa reen, mwopp yet nyi dheeh mhishin.
51M'ee l'aa wuhyaah shi lang'dang Jesu mwooll noott m'ee looh shin dhel kih biishupp w'u nyi kihh nyi shoopshin mou. Kaarooh mwooh mwopp y'aa Jesu seh kihh t'ang y'aa l'aa wuhyah ni zag, 52bhi toonn biishupp ni yet dheeh mwopp, bhi tee shu'shu dhel zlokk.
Mwopp dum kihh Jesu dyeell kihkyeen To'ng-Mhi'nan
(Mat 26:57-68; Luk 22:54-55,63-71; Yoh 18:13-14,19-24)
53Bhi mwopp dum kihh Jesu kihkyeen Prist Wu'yon, bhi prist wu'nan, kihh mwoohnan, kihh Mhikamm-w'aar kwellelleh mwopp ja kaat kihshag dullukk. 54Bitrus lang'dang Jesu pann zhong-zhong, harr dum dhel kihfur khi Prist Wu'yon ni. Kaarooh nyi nhighin bhi tong naar mhitapp luh khi Prist ni mwopp tihh w'ong shin diy phi wus.
55Prist wu'nan mwopp kihhsheh kihh kapp gurum w'u dhighin To'ng-Mhi'nan ni mwopp y'aa lyap shig kaah Jesu tihh mwopp kad arr t'u nyi diy, dhangg baah mwopp kad mou. 56Gurum dhess mwopp tupp'pwoo dwungg kaah nyi, dhangg baah pwoo mwopp dum kihshag mou.
57Kyess nyi bhi m'ee mhi-tupp'pwoo dwungg mwopp yakhal dyarrang bhi mwopp gabdong phi nyi le, 58“Mu cham klihng gwoh mhize ni satt le, ‘An p'ee shirrip LuhNaan w'u a zhepp gurum mwopp dyik se, bhi dhighin t'eer kunn, a'n p'ee shikhir dyik meeh w'u baah a zhepp gurum mwopp dyik mou.’ ” 59Weett kihhsheh bhi baah pwoo mwopp dum kihshag mou. 60Bhi Prist wu'yon yakhal dharr kihkyeen mwopp weett bhi nang phi Jesu le, “Baah gha kihh bii w'u p'ee satt aa'? Pwoo w'u mwopp phi satt nyi kaah gha seh a kihhsheh aa'?” 61Weett kihhsheh bhi Jesu tong niy dh'ok, baah pring mee'bii mou.
Bhi Prist Wu'yon ni waa nang dyi phi Jesu le, “A gha a Kristi L'aa khi Daah Naan W'u Mettweett mihngg?”
62Bhi Jesu pring nyi le, “Ee'h a a'n. Wunn p'ee p'ar naah L'aa khi Gurum kihh tong sarrsoh khi Naan w'u Bhall Mettweett, yakhal kihh tong sam kih liw w'u phikihtihngg.”
63Kaarooh Prist Wu'yon ni klihng kihhsheh, bhi tee bh'aar keeniy kw'a, sh'i tukhupwad. Bhi satt le, “Kakkrooh mu kihh dheeh lyap m'ee mhi-tupp'pwoo dyi a p'ee mihyeh, wunn'? 64Ai wu klihng kas Naan w'u sh'in! A mihyeh a p'an keewu?”
Bhi gurum ni mwopp lapp phishag bi'eem le mak rooh nw'aa tih'tu gw'ar fyaad. 65Pakk gurum ni mwopp kihh pwas zool kih nyi, mwopp kihh vughum yit nyi, mwopp kihh kwakhal sarr ruh mwopp gw'ool nyi dyishig, mwopp kihh satt nyi le, “Ghi sh'in wanggshiiy!” Bhi mhitapp LuhNaan mwopp lapp nyi mwopp dum nas.
Bitrus shiihshig le riy man Jesu mou
(Mat 26:69-75; Luk 22:56-62; Yoh 18:15-18,25-27)
66Kaarooh Bitrus wu'nyi bhakk yill kihfur, bhi m'ee laa'reep nhidhakk-luh khi Prist Wu'yon ni tong ji. 67Kaarooh naah Bitrus kihh tong w'ong shin phi wus, bhi le'yit ra naah nyi diy rih-rett, bhi satt nyi le, “Ai dyinn wu'gha zag kihshag kihh Jesu Gu-Nazaret ni.”
68Bhi Bitrus shiihshig le, “Baah ih man bii w'u yi phi satt nyi seh mou. Ih manshiiy orr wu'kihhsheh mou.” Bhi Bitrus yakhal mett put phi fokhol'pang.
69Kaarooh laa'reep nhidhakk-luh ni naah Bitrus dyi nhighin, bhi dyangg mwooh kihh dyarrang nhighin le, “Gwoh mhizeh ni a kihmeh dhighin gurum mihhseh ni mwopp.” 70Bhi Bitrus shiihshig dyi harr vitt.
Lang'lee dyi bhi mwooh kihh dyarrang nhighin satt Bitrus le, “Baah m'ee satt kihhshe, gha a kihmeh dhighin mwopp, p'ee gha a Gu-Galili.”
71Bhi Bitrus y'aa choor yitrab shenn kih shin; harr choorNaan satt gurum ni mwopp le, “Baah ih man gwooh wunn phi kadpwoo kaah nyi seh mou.”
72Abet bhi dool peetpee wu'vel. Bhi Bitrus kakkder pwoo wu'dyinn Jesu satt riy le, “Dhanggbhi dool kihh peetpee vel shinn, bhi gha p'ee shiihshig man a'n yit kunn.” Bhi Bitrus y'aa sam wall.
ទើបបានជ្រើសរើសហើយ៖
Markus 14: Chakfem
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2022 Luke Initiative for Scripture Translation