लुका 23
23
पिलातुसोन येसुक सावाल
(मत्ती 27:1-2,11-14; मरकुस 15:1-5; योहान 18:28-38)
1तेत्यार आखी सभा उठीन तीनाक पिलातोन चा लीगोया. 2चे यो कोयीन तीना पोर गुणू लागाळने बाज गोया, “आमु इना माणसो काजे भनकावातु, एने केसरोन फावू आपने मोना कोरतेलू, एने खुदो काजे, मसिह, एने राजा कोयतलू सोमवला छे.” 3पिलात तीनु काजे पुछु, “काय तू यहुदिन राजा छे?” येसु तीनाक जवाब आप्यू, “तू खुद कोयने बाज रोयू.” 4तेत्यार पिलात प्रधान पुजारा काजे एने माणसो काजे कोयू, “मेसेक इना माणसोम काहीन गुणू नि देखायतू.” 5बाकीन चे बी वातळा होईन कोयने बाज गोया, “यु गलीलमा गोथू या तोक आखा यहुदियामा प्रचार आपीन-आपीन माणसो काजे भडकावातलु.” 6यो सोमवीन पिलात पुछु, “काय यु माणूस गलीली छे?” 7एने जो सोमजीन कि चू हेरोदोन हदमा छे, तिनाक हेरोदोन चा मुकली देदु, काहाकि तीनु दाहळामा चू बी यरुशलेममा होतु.
येसुक हेरोद राजानचा लीजानो
8हेरोद येसु काजे देखीन घोनु खुश होय गोयू, काहाकि चू घोणा दाहळान तीनाक देखणे कोरतू होतु; इनान कोरता कि तेरा बारामा सोमवलू होतु, एने तिना जुव काहीन चिन्ह देखनेन आस कोरतु होतु. 9चू तीनाक लोकेत वाते पुछतु रोयू, बाकीन चू तीनाक काहीन जोवाब नि आप्यू. 10प्रधान पुजारू एने शास्त्री उभरोहीण आखा ताकतसी तीना पोर गुणू लागाळता होता. 11तेत्यार हेरोद तेरा सिपायळा साते तेरी बेइज्जत कोरीन मोजाक कोरता होता, एने चोमोकने वावा छिंदरा पेहेरावीन तीनाक पिलातुसोनचा पोछु मुकल्या. 12तिने दाहळे पिलातूस एने हेरोद दुस्तीदार बोन गोया; इनान पेहेले चे एक दिसरा पोर रीस कोरता होता.
पिलातुसोन लारे येसुक मोतन दंड
(मत्ती 27:15-26; मरकुस 15:6-15; योहान 18:39)
13पिलात एने प्रधान पुजारू एने सरदारे एने माणसो काजे बुलावीन तीनु काजे कोयू, 14“तुमु इना माणसो काजे भनकावने वावु ठेरावीन मारेंचा लाव रोया, एने देखू, मे तुमरे सामने तेरी चौकसी कोऱ्यु, बाकीन जिना वातोन तुमु तीना पोर गुणू लागाळ रोया इनी वातोन बारामा मेसेक काहीन गुणू नि जोळतू; 15नि हेरोद काहाकि चू तीना काजे मारेंचा पोछु मुकली देदलु एने देखू, तीना काजे ओसो काय नि होयो कि चू मोरनोन दोंडोन लायक ठेराये. 16इनान कोरता मे तीनाक ठुकाळीन छुळ देयो.” 17पिलातोन पेहेले टेमे एक बंदीवान छुळनेन रिती होती. 18तेत्यार आखा मिवीन आयळने बाज गोया, “एरू काम तमाम कोरु, एने आमरेन कोरता बरब्बा काजे छुळ देवू.” 19चू एक दोंगान वजेसी जे सोहोरोमा रोयलु होतु, एने खुन कोरनेन वजेसी बंदी वाळामा नाखायलु होतु. 20बाकीन पिलात येसु काजे छुळनेन मोर्जीसी माणसो काजे एने समजाळू, 21बाकीन चे आयळीन कोया, “इनाक ख्रुस पोर चोळावू, ख्रुस पोर.” 22चे तीन कावार तीनाक कोया, काहा, चू कहानी बुराई कोरलु छे? मे इनामा मोतन दोंडोन लायक कहाणीत नि देख्यू इनान कोरता मे इनाक ठूकाळीन छुळ दोम. 23बाकीन चे आयळीन-आयळीन पोछोव पोळ गोया कि इनाक ख्रुस पोर चोळावू, एने तिंदरो आयळनो वातळो होयो. 24आखरी पिलातोन आग्या आवी कि तिंदरी विनतान अनसारे कोऱ्यु. 25चू तिना माणसो काजे जू दंगान एने खुनोन वोजेसी बंदी वाळामा नाखाय गोयलु होतु, एने जिनाक चे मांगता होता, छुळ देदू; एने येसु काजे तिंदरा मोर्जीन अनसारे सोप देदू.
येसुक ख्रुस पोर चोळावनो
(मत्ती 27:32-44; मरकुस 15:21-32; योहान 19:17-19)
26जेतार चे तीनाक लीन जाता होता, ती चे शिमोन नावोन एक कुरेनीकोरक जू गाव गोथु आवतू होतु धोरीन तीना पोर ख्रुस मेक देदा कि तीनाक येसुन पोछोव-पोछोव लीन चाले. 27माणसोन मोटीत भीळ तेरे पोछोव चाल पोळी एने तिंदरेमा लोकेत बायराबी होता जे तेरेन कोरीन छाती-ठूकता एने दुख कोरता होता. 28येसु तिंदरे भूनी वोवीन कोयू, “हे यरुशलेमोन पुरायटा, मारेन कोरीन मा रोडू; बाकीन खुदोन कोरीन एने तुमरा पुऱ्यान कोरीन रोडू.” 29काहाकि देख, चे दाहळा आवसे, जीनामा माणसे कोयसे, “सोयावा छे जे वांझ्या छे एने चे कुखा जे नि पोयदा कोऱ्या एने चे छात्या जे दूध नि पाव्या;
30तिनी टेमे”
जे बोयडा काजे कोयने बाजसे कि आमरेपोर पोड,
एने टेकळा काजे कि आमुक टूप ले.
31काहाकि जेतार चे निव्वा झाडोन साते ओसो कोरतेला, ती सुकलान साते काय-काय नि कोराय जाय? 32चे दिसरा दुय माणसो काजे बी जे भुंडला काम कोरण्या होता तिना पुठी मारने कोरीन लीन गोया. 33जेतार चे तिना जागा पोर जीनाक खोपडी कोयतेला पुग्या, ती चे चा येसु काजे एने भुंडला कामे कोरण्या काजे बी, एक जेवळे एने एक दिसरा काजे डाखरे धोळे ख्रुस पोर चोळाव्या. 34तेत्यार येसु कोयू, “हे बासो, इनुक माफ कोर, काहाकि जे जानता नि कि काय कोर रोया,” एने चे चिठ्या नाखीन तेरा छिंदरा वाट लेदा.
35माणसे उभा-उभा देखता होता, एने सरदार बी मजाक कोर कोरीन कोयता होता यु दुसरा काजे वाचाळ्यु, “ओगर यु परमेश्वरोन मसिह छे, एने तेरु नेवाळलु छे, ती खुदो काजे बी वाचाड.” 36सिपायळाबी साते आवीन एने मुनको हालवीन आंब आपीन तिनान मोजाक कोरीन कोयता होता, 37“अगर तू यहुदिन राजा छे, ती खुदो काजे वाचाड.” 38एने तेरे उपर एक गुणान-चिट्ठी बी लागाळलो होतो “यु यहुदिन राजा छे.”
ख्रुस पोर मोन फिरावने वावु चुटू
39जे गुणावा चा टांगला होता, तिंदरे मायला एक येसुन बुराई कोरीन कोयू, “काय तू मसिह नि होय? ती खुदो काजे एने आमुक वाचाड.” 40इनापोरसी दिसरू तीनाक लोळीन कोयू, “काय तू परमेश्वर काजे बि नी बिहतु? तू बी ते चू दोंड भुक्ती रोयू, 41एने आपनु ते नियावोन नुसार दोंड भुक्ती रोया, काहाकि आपु आपना कामोन ठीक फोव भुक्ती रोया; बाकीन काहनोत भुंडलो काम नि कोऱ्यु.” 42तेत्यार चू कोयु, “हे येसु जेतार तू आपना राजमा आवीस, ती मारी फोम कोरजी.” 43ती चु तीनाक कोयू, “मी तुसेक छाचलीन कोयो कि तू आजुत तू मारे पुठी सोरग लोकमा रोयीस.”
येसुन जीव निकवनो
(मत्ती 27:45-56; मरकुस 15:33-41; योहान 19:28-30)
44कम से कम दुय पोहोर गोथो तिसरे पोहोर तोक आखा देसोमा आंदारो ढूप होय गोयो, 45एने दाहळान विजावो जात रोयो, एने मंदीरोन पोडदु इचमा गोथू फाट गोयू, 46एने येसु मोटात बुलोमा आयळीन कोयू, “हे बासो, मी मारू आत्मा तारा हातोमा सोपो” एने जो कोयीन जीव छुळ देदू. 47सुभेदार, जो काहीन होयलो होतो देखीन परमेश्वरोन बोढाई कोऱ्यु, एने कोयू, “छाचलीन यु माणूस धोरमी होतु.” 48एने भिळ जी यो देखने एखठी होय गोयली होती, इनी होकिगत काजे छाती ठूकता जायीन पोछा जात रोया. 49बाकीन येसुन आखा उवखान वावा, एने जे बायरा गलीलमा गोथा तेरे पुठी आवला होता, नांबेत उभरोहीण यो आखो देखता होता.
अरीमतीयान युसुफन लारे येसुक गाळनो
(मत्ती 27:57-61; मरकुस 15:42-47; योहान 19:38-42)
50चा युसूफ नावोन एक मोटली सभान एक मेंबर होतु चू वारलु एने धोरमी माणूस होतु. 51एने इंदरी विचारोन एने इंदरा कामो पोर खुश नि होतु चू यहुदिन सोहोरोन अरिमतियाह रोयने वावू एने परमेश्वरोन राजोन वाट जुवने वावू होतु. 52चू पिलातोन चा जायीन येसुन धोळ मांग्यू; 53एने तीनाक उतारीन मखमलोन चादरामा गुडाव्यू, एने एक मोळवाट्यामा मेक्यू, यो चाफऱ्याम खुंदलो होतो; एने तीनामा कुदु नि मेकायलु होतु. 54चू तीयारीन दाहळू होतु, एने दितवारोन दाहळू आवनेमा होतु. 55चे बायरा जे तेरे पुठी गलीलमा गोथा आवला होता, पोछोव-पोछोव जायीन तिना मोळवाट्या काजे देख्या, एने यो बी कि तेरो धोळ काहना रितीसी मेकायलो छे. 56तेत्यार चे पोछा जायीन वारला सुगंधवावा चीजे इत्तर तीयार कोऱ्या; एने दितवारोन दाहळे आग्यान अनसारे आराम कोऱ्या.
ទើបបានជ្រើសរើសហើយ៖
लुका 23: BFBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.