LUKA 10
10
Sawmsagihte A Kisawlna
1Tua khit ciangin Jesuh in ama pai nading khua le mun khempeuhah nih nihin a na pai dingin mi sawmsagih seh a, ama mai-ah a mapaisak hi. 2Amaute kiangah, “Anlak ding tam mahmah a, ahi zongin mi tawm bek in anlak na sem uh hi. Tua ahih manin an nei pa in a ante a la dingin mi hong sawl nadingin thu ngen un.#Mat 9:37-38. 3Note va kuan un. Ngiahon lakah tuuno khah bangin note ka hong sawl hi.#Mat 10:16. 4Sum ahi a, ip ahi a, khedap a val ahi zongin keng kei un. Lamkalah mi tawh kimawk hoho kei un. 5Inn khat peuhpeuhah na lut uh ciangin, ‘Hih inn-ah nopsakna hong tung ta hen,’ ci-in hopih masa un. 6Tua inn sungah nopsakna a ngahthei ding mi a om leh kip paisuak ding a, a om kei leh na hopihna thupha uh na dokkik ding uh hi. 7Nasemte in a thaman a ngah ding a kilawm ahih mah bangin na zintunna inn mah uhah omsuak unla, a hong piak peuhpeuh uh na ne un. Na zintunna inn uh kheel themthum kei un.#1Kor 9:14; 1Tim 5:18. 8Khua khat peuhpeuhah na lut uh ciangin note hong tunsak leh, amaute’ hong lui peuhpeuh ne unla, 9tua khuasunga cinate damsak un. A khuamite kiangah, ‘Pasian’ Uk nading hun note a dingin hong naita hi,’ ci-in gen un. 10Ahi zongin khua khat peuhpeuhah na lut uh ciangin note hong tunsaknop kei leh a khuasung kongzingah pai unla, 11‘Na khuasung uha leivui, ka khe tung uhah a hong bangte nangawn, note hilhkholhna-in ka nulkhia uh hi. Ahi zongin Pasian’ Uk nading hun a hong naina thu thei ta un,’ ci-in gen un.#Sawl 13:51. #Mat 10:7-14; Mrk 6:8-11; Luk 9:3-5. 12Ke’n kong cihin-ah, Thukhen Ni ciangin Sodom khuamite’ thuak ding sangin tua khuamite’ thuak ding haksazaw lai ding hi,” a ci hi.#Pian 19:24-28; Mat 10:15; 11:24.
A Kisik lo Khuapite’ Thuak Ding Gimnate
(Mat 11:20-24)
13Tua ciangin Jesuh in, “Khorazin khuapi mite le Bethsaida khuapi mite aw, gimna lianpi na thuak ding uh hi. Bang hang hiam cih leh note khua sungah a hong kilak na lamdangte, Taia le Sidon khua sungah kilak hileh amaute in kisikna limin sawtpekin puanhampi silhin vut kinuh ding uh hi.#Isa 23:1-18; Ezk 26:1-28:26; Joel 3:4-8; Amos 1:9-10; Zek 9:2-4. 14Tua ahih manin Thukhen Ni ciangin Taia le Sidon khuapi mite’ thuak ding sangin note’ thuak ding haksazaw lai ding hi. 15No Kapernaum khuapi mite aw, van a sangna munah hong kipahtawi ding sa na hi uh hiam? Hell khuk sungah hong kilawnsuk ding hi,” a ci hi.#Isa 14:13-15.
16Tua ciangin Jesuh in a nungzuite kiangah, “Note’ thu a hong zuite khempeuh, kei’ thu a hong zui hi a, note’ thu a hong zui lote khempeuh, kei’ thu a hong zui lo ahi uh hi. Kei’ thu a hong zui lote khempeuh pen kei a hong sawl pa’ thu a zui lo ahi uh hi,” a ci hi.#Mat 10:40; Mrk 9:37; Luk 9:48; Joh 13:20.
Sawmsagihte Hong Ciahkikna
17Sawmsagihte lungdam mahmahin hong ciahkik uh a, “Topa aw, nangma min tawh dawite nangawn ka hawlkhiazo uh hi,” a hong ci uh hi. 18Jesuh in amaute kiangah, “Vantung panin keekkia bangin Satan a kiatna ka mu hi. 19Tu-in thei un. Gulpi le momaite na sikgawp nading uh le na galte uh na zawh nadingun note tungah vangliatna ka hong piazo a, amaute in note bangmah hong cih zo lo ding uh hi.#La 91:13. 20Ahi zongin dawite in na thu uh hong manna hangin lungdam kei unla, vantungah na min uh a kigelh manin lungdamzaw un,” a ci hi.
Jesuh Lungdam
(Mat 11:25-27; 13:16-17)
21Tua laitakin Kha Siangtho in lungdamna tawh Jesuh kidimsak hi. Jesuh in, “Vantung le leitung Topa ahi ka Pa aw, mipilte le misiamte tungah na ip thute, bangmah a thei lo hih mite tungah lak na hih manin ka nuam hi. Bang hang hiam cih leh hih thu pen nangma deihna bang ahi hi,” a ci hi.
22Tua ciangin Jesuh in amaute kiangah, “Hih nate khempeuh ka Pa in kei tungah hong ap khinzo hi. Pasian simloh, Tapa a thei kuamah om lo hi. Tapa le Tapa in a theihsaknop mite simloh, Pa a thei kuamah om lo hi,” a ci hi.#Joh 3:35; 10:15.
23Tua ciangin nungzuite lamah kihei a, “Tu-a na muh uh nate na muh manun a hampha mahmah na hi uh hi. 24Ke’n kong cihin-ah, kamsang tampite le kumpi tampite in tu-a note’ muhte a muhnop uh hangin mu ngei lo uh a, a zaknop uh hangin za ngei lo uh hi,” ci-in a tuamin a gen hi.
Samaria Mihoih pa
25Jesuh a ze-et dingin Thukham hilh siate khat hong ding a, “Sia aw, nuntak tawntungna ka ngahtheih nadingin bang sem ding ka hi hiam?” ci-in a dong hi. 26Jesuh in, “Thukham sungah bang kigelh a, bang sim na hi hiam?” a ci hi. 27Amah in, “Na Topa Pasian na lungsim khempeuh, na nuntakna khempeuh, na hatna khempeuh, le na pilna khempeuh tawh na it inla, nangmah na ki-it bangin na vengte na it in,” ci-in kigelh hi, ci-in a dawng hi.#Thkna 6:5; Siam 19:18. 28Tua ciangin Jesuh in, “Na dawnna man mahmah hi. Tua bangin gamta lecin nuntak tawntungna na ngah ding hi,” a ci hi.#Siam 18:5. #Mat 22:35-40; Mrk 12:28-34.
29Ahi zongin Thukham hilh siapa amah kitangsak nuam ahih manin Jesuh kiangah, “Ka vengte i cih kuate ahi hiam?” ci-in a dong hi. 30Jesuh in dawng a, “Jerusalem panin Jerikho khua-ah mi khat paisuk a, lamkalah migilote in na suam a, a neih khempeuh laksakin a satgawp khit uh ciangin nusia uh a, a si dektaksa-in a paisan uh hi. 31Tua laitakin siampi khat tua lampi tawnin hong paisuk a, amah a muh ciangin lamnawl lam tawnin a paisan hi. 32Tua ciangin Levi mi khat zong tua mah bangin hong pai a, amah a muh ciangin lamnawl lam tawnin a paisan leuleu hi. 33Ahi zongin Samaria mi khualzin khat, tua lai mun hong tungin a liam pa a muh ciangin hehpihhuaisa a, 34a kiangah va pai-in a liammate sathau le leenggahzu a nuhsak khit ciangin a tunsak hi. Tua ciangin a la tungah tuangsak a, zintun inn khatah paipihin tua lai-ah a khoi hi.#2Khang 28:15. 35A zingsang ciangin zintun inn nei pa kiangah sum peek nih pia a, ‘Hih mipa limtakin na khoi in. Na beina dang khempeuh, kong paikik ciangin kong loh ding hi,’ ci hi. 36Hih mihing thumte sung panin, a kisuampa a dingin a koi pen a vengpa hi dingin na um hiam?” a ci hi. 37Amah in, “A hehpih pa hi ding hi,” a ci hi. Tua ciangin Jesuh in ama kiangah, “Nang zong pai inla, tua bangmahin gamta in,” a ci hi.
Martha le Mary kiangah Jesuh Hawh
38Amaute a pai laitakun khua khatah Jesuh bang a, Martha kici numei khat in a inn-ah na tungsak hi. 39Martha in Mary kici nau numei khat nei a, Topa’ thugente ngai-in Mary a om hi.#Joh 11:1. 40Martha bek in na semin manlah mahmah ahih manin a heh suak a, “Topa aw, ka naunu in kei bek na hong sepsak niloh phamawh sa lo na hi hiam? Kei hong huh nadingin hong sawl in,” a ci hi. 41Ahi zongin Topa in, “Martha, Martha aw, nang na lunghihmawhna tam hi. 42Ahi zongin a kisam taktak khat bek om a, Mary in tua a kisam na pen a semsem ahih manin, a nasep kikhawlsak lo ding hi,” ci-in a dawng hi.
ទើបបានជ្រើសរើសហើយ៖
LUKA 10: TDB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tedim (Chin) Bible © Bible Society of Myanmar, 2011.