LUKA 6
6
Nungzuite in Sabbath ni-in Mangbuhvui Zut
(Mat 12:1-8; Mrk 2:23-28)
1Sabbath ni khatin mangbuh lo nawkin Jesuh le a nungzuite a pai uh hi. A nungzuite in mangbuhvuite zut uh a, a khutsung uhah nuai-in a ne uh hi.#Thkna 23:25. 2Amaute lakah a om Farisi mite pawlkhat in, “Sabbath ni-in i hih dingin a kilawm lo gamtatna bang hangin gamta na hi uh hiam?” a ci uh hi.
3Tua ciangin Jesuh in amaute kiangah, “David le a kikholhpihte a gilkial laitakun David’ gamtatna thu sim ngei lo na hi uh hiam? 4Pasian’ inn sungah amah lut a, siampite lobuang midangte’ nek ding ahi lo Ompihna Anlum la-in ne a, ama kikholhpihte zong a nesak hi,” ci-in a dawng hi.#Siam 24:9. #Siam 21:1-6. 5Tua ciangin Jesuh in, “Mihing Tapa pen Sabbath ni a Ukpa ahi hi,” ci-in a thugen a khum hi.
Khut Langkhat Zaw Mipa
(Mat 12:9-14; Mrk 3:1-6)
6Sabbath a ni dang khatin kikhopna inn khatah Jesuh pai-in thu a hilh hi. A khut taklam a zaw mi khat tua lai-ah na om hi. 7Thukham hilh siate le Farisi mite pawlkhat in Jesuh a mawhsak theih nading uh thu zong nuam uh ahih manin, Sabbath ni-in hih mipa a damsak hiam, ci-in na encik gige uh hi. 8Ahi zongin Jesuh in amau’ ngaihsutna thei ahih manin a khutzaw mipa kiangah, “Ding inla, mihonte mai hih lai munah hong pai in,” a ci hi. A mipa zong hong pai-in mihon mai-ah a hong ding hi. 9Tua ciangin Jesuh in amaute kiangah, “Note tungah thu khat kong dong nuam hi. Sabbath ni-in a pha bawl ding le a sia bawl ding koi kilawmzaw a, mi khat’ nuntakna suahtaksak ding le siatsak ding koi hoihzaw ahi hiam?” a ci hi. 10Amaute khempeuh a et kawikawi khit ciangin a mipa kiangah, “Na khut zan in,” a ci hi. Amah in zong a khut zan a, a ngeina bangin a khut hong damkik hi. 11Ahi zongin amaute heh mahmah uh a, Jesuh a suktheih nading uh khatlekhat a kikumpah uh hi.
Jesuh in Sawm le nihte Teel
(Mat 10:1-4; Mrk 3:13-19)
12Ni khat, thungen dingin mualtungah Jesuh pai a, zan tawntung Pasian kiangah thu ngenin a om hi. 13Khua a vak ciangin a nungzuite sam a, amaute sung panin sawm le nih teelkhia-in sawltakte ci-in min a phuak hi. 14Tuate in: Simon (Peter ci-in min a phuah pa) le a naupa Andru, James le a nau Johan, Filip, Bartholomew, 15Matthai, Thomas, Alfeas’ tapa James, Simon (gam khual pa), 16James’ tapa Judas, le Jesuh a lehhek pa Iskariot’ tapa Judas ahi uh hi.
Jesuh in Mihonpi tungah Na Sem
(Mat 4:23-25)
17Tua mualtung panin Jesuh le a nungzui teelte paisuk uh a, a nung a zui midang tampite tawh mun zang khatah a ding hi. Jerusalem khua le Judea gam khempeuh le tuipi gei-a om Taia khua le Sidon khuapite panin a hong pai mihon tampi zong hong om uh hi. 18Tua mite pen ama thuhilhna a ngai ding le a natna uh panin damna a ngahnop manun a hong pai uh ahi hi. Dawi a vei mite zong hong pai uh a, damna a ngah uh hi. 19Jesuh’ tung panin vangliatna paikhia-in mi khempeuh damsak ahih manin mi khempeuh in amah lawn’ ding a hanciam uh hi.
Thuphate le Gimnate
(Mat 5:1-12)
20Tua ciangin Jesuh in a nungzuite en a,
“No mizawngte
Pasian’ Ukna sungah
om na hih manun
thupha ngah mi na hi uh hi.
21Tuhunin a gilkial note
nidang ciangin na gil uh a vah ding hi.
Tuhunin a dah note
nidang ciangin na nuam ding uh hi.
22“Mihing Tapa’ hangin mite in hong mudahin hong tuamkoih a, hong simmawhin migiloin hong seh ciangin thupha ngah na hi uh hi.#1Pe 4:14. 23Vantungah na thaman ding uh lian mahmah ahih manin tua bang na tuah uh ciangin nuamin lungdamin na diang un. Bang hang hiam cih leh a pu a pate un zong tua bangmahin kamsangte tungah a bawl uh hi.#2Khang 36:16; Sawl 7:52.
24“Ahi zongin tuhunin a hau note in
nopsakna ngahkhin na hih manun gimna na thuak ding uh hi.
25Tuhunin a gilvah note in
gilkial gimna na thuak ding uh hi.
Tuhunin a lungdam note
dahin na kap ding uh hi.
26“Mi khempeuh in note hong pahtakbawl ciangin gimna a thuak ding na hi uh hi. Bang hang hiam cih leh a pu a pate un zong tua bangmahin kamsang zuaute a pahtakbawl uh hi.
Galte Itna
(Mat 5:38-48; 7:12a)
27“Ahi zongin ka thugen a za note kiangah kong cihin-ah: Na galte uh na it unla, no hong mudah mite tungah a pha na bawl un. 28No hong phuisamte thupha na pia unla, no hong bawlsiate a’ ding thu na ngetsak un. 29Na paang langkhat a hong bengte, a langkhat zong na dawhlai un. Na puantungsilh uh a hong sutte tungah, na puansungsilh uh zong na piathuah lai un. 30A hong ngente peuhmah na pia unla, na na uh a hong laksakte tung panin lakik kei un. 31Note tungah a hong kibawl ding na deih uh bangin midangte tungah na bawl un.#Mat 7:12.
32“No hong itte bek it le-uhcin bang hangin thupha ngah ding na hi uh hiam? Mawhnei mite nangawn in amau a itte a it uh hi. 33No tungah a hoihin a hong gamtate tung bekah a hoihin gamta le-uh cin bang hangin thupha ngah ding na hi uh hiam? Mawhneite nangawn tua bangmahin gamta uh hi. 34Ngahkik ding na lametna uh mite tung bekah leitawi na piak uhleh bang hangin thupha ngah ding na hi uh hiam? Mawhneite nangawn in zong a piakzah mah uh a ngahkik dingin khatlekhat kileitawi uh hi. 35Tua bang lelin note na gamta kei ding uh hi. Na galte uh itin amaute tungah thupha bawl unla, lohkik ding lamen loin leitawi pia un. Tua hileh na thaman uh lian ding a, a Lianpen Pasian’ tate na hi ding uh hi. Bang hang hiam cih leh lungdamna mel a theithei lo mite le a huaiham mite tungah amah migi hi. 36Tua ahih manin na Pa un hehpihna a neih bangin note in zong hehpihna lungsim nei ta un.
Midangte’ Thu Khenna
(Mat 7:1-5)
37“Midangte’ thu khen kei un. Tua hileh no tungah zong Pasian in thu hong khen lo ding hi. Midangte mawhsak kei un. Tua hileh Pasian in note zong hong mawhsak lo ding hi. Midangte’ mawhna maisak un. Tua hi leh Pasian in note’ mawhna zong hong maisak ding hi. 38Midangte tungah pia un. Tua hileh Pasian in note tungah zong hong pia ding hi. Bang hang hiam cih leh midangte na piakna uh tawh kizui-in a henhen, a tahtah, a dimletin Pasian in note tungah hong pia ding hi,” a ci hi.
39Tua ciangin Jesuh in amaute kiangah thugentehna khat zong gen a, “Mittaw khat in mittaw dang khat lam paipih thei lo hi. Paipih zenzen leh a nih tuakun hawkguamah kiakhawm ding uh hi.#Mat 15:14. 40Sang naupang khat a siapa sangin lianzaw ngei lo hi; a sin ding khempeuh a theihkhit ciangin a siapa tawh kikim pan bek ding hi.”#Mat 10:24-25; Joh 13:16; 15:20.
41“Bang hangin na mit sungah singluang a tang phawkkha loin na lawmte’ mit sunga ninthem tang etsak na hi hiam? 42Na mit sunga singluang hong tang nangawn mu lo napi-in, ‘Lawm aw, na mit sunga ninthem tang hong lakkhiatsak ning,’ ci-in na lawmte kiangah bangci gentheih ding na hi hiam? No a kineihkhemte aw, na mit sung uha singluang tang lakhia masa le-uhcin, na lawmte uh mit sunga ninthem tang mu-in na lakhia thei pan ding uh hi.”
Singkung A Gahin Kithei
(Mat 7:16-20; 12:33-35)
43“A cidam singkung in gah ginalo gah ngei lo a, a ginalo singkung in gah limci gah ngei lo hi. 44Singkung khempeuh a gah tawh kithei thei hi. Sialtalling kung panin theigah kilo ngei lo a, lingvom kung panin leenggah kilo ngei lo hi.#Mat 12:33. 45Mihoih pa in a lungsim sunga thuhoih omteng hong suahkhia a, migilo pa in a lungsim sunga a gitlohna teng hong suahkhia hi. Bang hang hiam cih leh mite pen amau’ lungsim sunga a om bangbang a hong paukhia uh ahi hi.#Mat 12:34.
Bulpi Nam Nihte
(Mat 7:24-27)
46“Bang hangin, ‘Topa aw, Topa aw,’ hong ci napi-in ka hong gente zui lo na hi uh hiam? 47Ka kiangah hong pai a, ka thuhilhna za-in a zuite khempeuh pen kua tawh kibang hiam cih leh, 48suang tungah inn lamin, a khuamkua ding suangsung thukpi tak to-in a phut pa tawh kibang hi. Tui a khan ciangin tui in tua inn a nawk hangin limtakin kilam ahih manin susia zo lo hi. 49Ahi zongin ka thuhilhna za napi-in a zui lote pen bulkip a nei lo, leilak mawkmawkah inn a lam pa tawh kibang hi. Tuikhang in tua inn a nawk ciangin thakhat thu-in siagawppah a, tua inn pen naksiat mahmah hi,” a ci hi.
ទើបបានជ្រើសរើសហើយ៖
LUKA 6: TDB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tedim (Chin) Bible © Bible Society of Myanmar, 2011.