Saaŋ 3
3
Yeesu na Nikodem
1Raakeen ƴaar teeku Nikodem, a ɓaahee ŋ Farisen ca te a nikee kilifa Yawuut. 2A hayya ŋ Yeesu na wek a woosa ɗe ne : « Jangɗohohi, ɓoo inhiɗ ne a Kooh woos ɗa ne fu jangiɗ ɓoo ; laam ali ɓo' minɗi haɓiɗ firndeeci fu na haɓɗe ne Kooh hunɗi na ɗe ɗah. »
3Yeesu loffa ɗe ne : « Ñam na woyee ɗa wa, te amba ne wa keeh : Ɓo' nu rimkisɗi ɗah, a minɗi ɓaah ŋ Nguuriŋ-Kooh. »
4Nikodem meekissa ɗe ne : « Ɓoyi kaɗ po yaɓko'iɗ, a min na rimkohis ? A miniɗ aasis ŋ rookiŋ yaayiŋ ɗe, a rimkis e ? »
5Yeesu loffa ne : « Ñam na woyee ɗa wa te amba ne wa keeh, ɓo' nu rimukɗi rimki puloh ŋ masuɓ na Fuuɗsiŋ Kooh ɗah, a minanɗi aas ŋ Nguuriŋ-Kooh. 6In nu rimkoh ŋ ɓo' ɗah, wa ɓay kipes ɓo', in nu rimkoh ŋ Fuuɗsi Hoolohngaani ɗah, wa ɓay kipes kiŋ Fuuɗsi Hoolohngaani. 7Kina feyu ŋ ini ŋ woo ɗa ne : “ Ɗu joyiɗ rimkis. ” 8Puuɗsi na laɓe ŋ ɗisik nu wa waaɗ ɗah. Fu kerhee wa waaye fu inhuu ɗiski wa puloh na ɗiski wa na kee. Wa mand ɗaa ŋ ɓo' nu rimkoh ŋ Fuuɗsi Hoolohngaani ɗah. »
9Nikodem meeksissa ɗe ne : « Ineem min na nikoh ? »
10Yeesu loffa ɗe ne : « Jangɗohoh hend na ɗa ŋ ɗooƴ Israayel po fu inahɗi ineem e ? 11Ñam woo ɗa wa te amba ne wa keeh, ɓoo na woye ini ɓoo inah, ɓoo seede'ee ini ɓoo hot, te ɗu na teyɗukeeɗi seedeeniŋ ɓoo. 12Ŋ woyee ɗu in ciŋ kehƴi, ɗu kosɗi so ɗah, ɗu kosohan ndo na, ne ŋ woo ɗu in caŋ ɗafka ɗah ?
13Ali ɓo' rapɗi ŋ ɗafka, ɗal Kuɓkiŋ ɓoyi, yi ruhsoh nga. 14Te findi Musaa meeɓohee iiña moosa#Kind ci 21:8-9 ŋ kehƴa hulanga ne ɓooɓa hot ɗe, Kuɓkiŋ ɓoyi joyiɗ meeɓohu ɗaa, 15ne ɓo' nu kos ɗe ɗah, raak kipes ki heyɗi reehe. »
16Kooh waaɗiɗ adinaani po a eɗohha Kuɓkiŋ ɗe yino-kongi ne ɓo' nu kos Kuɓki ɗah, fu sooƴuu, waaye fu raak kipes ki heyɗi reehe. 17Laam Kooh woosɗi Kuɓkiŋ ɗe ŋ Adina ne a atte ɓi Adina, waaye ne Adina min mucɗu taamboh nga ɗe. 18Yaa nu kos ɗe ɗah, atte'sanɗi. Waaye yaa nu kosɗi ɗe ɗah, a atte'uuɗ po ƴutiɗ ŋ kosaaɗiiki a kosaaɗi Kuɓkiŋ Kooh yino-kongi.
19Atteeni weɗɗi : Siñaari hayiɗ Adina, waaye ɓooɓi, a ñuusi ngisohiɗ ɓa siñaari sagu ne tumohaaɗ ciŋ ɓa moɗɗi. 20Tumoh moɗaaɗiici jen, sangiɗ siñaari, te ɓa hayanɗi nga, ɓa neƴƴoh ne in ci ɓa na tume hotu noh cong. 21Waaye ɓi na pese ŋ keeh ki na haye ŋ siñaari, ne ɓooɓi min hot ne ini ɓa na haɓɗe, kurkoh ŋ Kooh.
Yeesu na Yahya Ɓoktohi
22Wa in ceem coot, Yeesu kaɗta kur caŋ Yudee na taalubeeciŋ ɗe ; a nikka na ɓa nga neeh caam, a ɓoktoheeɗa. 23Yahya nameeɗa ɓoktoh ŋ Enon ŋ sero Salim, ndaam nikee ɗisik laayiɗ masuɓ ; ɓooɓa kaɗeeɗa ne ɓa ɓoktuk. 24Waam raak Yahya taƴuuɗi ŋ kaso paaɗ.
25Wa raakka mbeh taalubeeciŋ ɗe taastiɗoheeɗa na ƴaar ŋ Yawuut ca ŋ ini kaɗ ŋ findi ɓa na farsukohe. 26Ɓa hayya ŋ Yahya ɓa woosa ɗe ne : « Jangɗohohi, ƴaari nikee na ɗa ŋ ɓaka faahaŋ Yurdan, te fu seedeesa ɗe, ɗiski wa nik, a yaa ɓoktoheeɗa te ɓooɓi jen ɓaa kaɗ nga ɗe de'. »
27Yahya loffa ɓa ne : « Ɓo' minɗi raak ali in ne Kooh eɗɗi ɗe wa ɗah. 28Ɗu, ɗu miniɗ to seede ne ŋ woyiɗ ne : Ñam Mucɗohi Gapohse haa, waaye ŋ woosu ne ŋ adug ɗe. 29Kilooki, wuu heɗ kilooki ; waaye nawle heɗ kilooki, yi nik ŋ sero heɗ kilooki te a sikɗukee ɗe, na sume sum lool ne a kerah hoosooriŋ ɗe ɗah. Sumeem weɗ sumi ŋ sum woti te ɗiski wa nik, wa mitiɗ. 30A yi, a joy joy ɓaat yak a kaɗe, mi, ŋ uupee ƴissuut. »
Yi puloh ɗafki
31Yi puloh ɗafki, a yi uup ɗafuk ɓooɓi jen ; yi puloh kehƴi a wuu kehƴi, te a na woye in ciŋ kehƴi. Ee di', Yi puloh Asamaan, [a yi uup ɗafuk ɓooɓi jen.] 32A na woye ini a hot te a kerahhaa waaye ɓooɓi teyɗukɗi seedeeniŋ ɗe.
33Yi teyɗuk seedeeniŋ ɗe teeɓohiɗ ne a huniɗ ne in nu Kooh woo ɗah, wa keeh. 34Yi Kooh woos, a na onee ɗe on Fuuɗsi Hoolohngaani te Fuuɗsi a on ɗe na topeeɗi, tahha po in ci a na woye, ca woo ciŋ Kooh. 35Baabi waaɗiɗ Kuɓki te a degiɗ jen ŋ yaah ce. 36Yi kos Kuɓki, a raakiɗ kipes ki heyɗi reehe. Yi sang kerhiɗ Kuɓki, a raakanɗi kipes ki keeh-keehi te ayrukiŋ Kooh genan na ɗe.
ទើបបានជ្រើសរើសហើយ៖
Saaŋ 3: YM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc