Luk 19
19
Sase taambɗiɗ Yeesu
1Wa Yeesu ree Yeriko, a lahha ŋ ɗooƴ kur ka, a kaɗeeɗa. 2Wa raakeen ƴaar teeku Sase, a yi nikee kilifaanaŋ juuti'oh ca, te a raakeen lool. 3A markeeɗa ne a hot ya ɓa Yeesu, waaye a mineeɗi wa sagu rohƴa a rohƴee na mboolnda. 4A nuppa ŋ fikiira, a rappa ŋ ɗafuk ndun ŋ waasa ne a hot Yeesu, ne yeem taambee ɗah.
5Wa Yeesu hay po a reesa ndaam, a taaknukka, a woosa ɗe ne : « Sase ara ruhus, woti ŋ joy dal ŋ kahan fu. » 6A arra ruhus, a daliɗta Yeesu ŋ kahan ce, a neɓuusa nga lool. 7Wa ɓooɓa hot ineem, ɓa jen ɓa lahtukeeɗa ne : « Markaat ƴaari, a dal ŋ kahan bakaaɗoh. » 8Raak Sase tufkiɗ, woyeeɗa Yeesu ne : « Kilifaani, ŋ hey eɗe ñakiɗ ci ɓaki winooriŋ raak-raakiŋ ngo. Te ɓo' nu nik ne ŋ kooɗiɗ in uupiɗ nga ɗe ɗah, ŋ hey ɗe wa dokne waas nikiis. » 9Yeesu woosa ne : « Muci reyiɗ ŋ kahnii woti. Ƴaarii nam ɓaah keeh-keeh ŋ ɓi rimkoh ŋ Ibrahiima. 10Te Kuɓkiŋ ɓoyi hayiɗ ne a waak muuƴiɗ ci, a hirip ɓa. »
Hanjar ca ndaŋkiyaah ca urus ca
11Ɓooɓa nikee sikɗukeeɗa Yeesu. Raak ɗe ŋ ɓak Yerusalem te ɓooɓi liiɓee ne Nguuriŋ-Kooh na hee hotke win-win. 12Ŋ ineem Yeesu woosa ɓa ŋ andiin ne : « A nikee garmi, a joyya kaɗ kur usiɗ ne a ɓekohsa buur nga, ƴut ɗah, a dokuk kur ce. 13Bala a kaɗan ɗah, a ɓeeɗukka ñaam ndaŋkiyaah ŋ ɓaŋ ɗe, a eɗta yaa nu nga ɗah hanjar urus, a woosa ɓa ne : “ Toontukaat po ŋ hay. ” 14Wa a na kaɗe jen, ɓi kur ce waaɗeeɗi ɗe, ɓa tuuƴca ɓi ɓo' ŋ finhooce ne ɓa ree ɗah, ɓa woo ne ɓa waaɗɗi ne a nik buuriŋ ɓa.
15Hondohɗi, a tumuusa buur. A hayissa, a ɓeeɗukka ñaam ca a eɗe kopora ne a marak ini ɓa ɓaat nga. 16Ya koc hayya woosa ɗe ne : “ Kilifaani, ursiŋ ɗa fu eɗee so eɗohiɗ hanjar urus ndaŋkiyaah. ” 17Buura loffa ɗe ne : “ Corka ! Fu ñaam baahiɗ, findi fu ndengɗukoh ŋ in ci ƴin ci, tahiɗ po adgoha kur ndaŋkiyaah. ” 18Ya kanakɗoh hayya woosa ɗe ne : “ Kilifaani, ursiŋ ɗa fu eɗee so eɗohiɗ hanjar urus yatuus. ” 19Buura woosa ɗe ne : “ Nama adgoh kur yatuus. ”
20-21Ñaam wiiriis hayya, woosa ɗe ne : “ Kilifaani, fu ɓo' miskiɗ ; fu na kooɗe ini fu raakɗi te fu na nguɗe ini fu sokɗi. Ineem weɗ tah po ŋ neƴƴoha ɗa, ŋ loƴca ursiŋ ɗa, ŋ ɗaakkaa. ” 22Buura loffa ɗe ne : “ Ñaami baahaaɗiini, ŋ atte'an ɗa ngaŋ in ci fu woo. Fu inheen ne ŋ ɓo' miskiɗ, mi na kooɗe ini ŋ raakɗi, ŋ nguɗe ini ŋ sokɗi. 23Wa ye tah fu ɗaakɗi koporiŋ ngo ŋ ɗiska na ɗaakohse kopor, ne ŋ hay ɗah, ŋ raaka rimɗiɗ to in ? ”
24Ƴutta, a woosa ƴaaɓa nikee nga ne : “ Ɓayaat ursi nik na ɗe, ɗu eɗa yi raak hanjar urus ndaŋkiyaah. ” 25Ɓa woosa ɗe ne : “ Moo Kilifaani, ƴaareem raakiɗ hanjar ndaŋkiyaah ! ” 26A loffa ɓa ne : “ Ñam na woyee ɗu wa, ɓoyi raak hey ɓaatse, waaye ɓoyi raakɗi, ini ƴissuuti a amb sah hey naafse nga ɗe. 27Ŋ ini kaɗ ŋ ɓi sang ngo, ɓi waaɗeeɗi ne ŋ nik buuriŋ ɓa, hayaat na ɓa ndii, ɗu ap ɓa ŋ fikiiso. ” »
28Wa Yeesu ƴut ŋ woo ceem, a adgiɗta ɓa ne ɓa kaɗ Yerusalem.
Aasaŋ Yeesu ŋ Yerusalem
29Wa Yeesu kaɗ po a heeɗa ree Betfase na Betani ŋ sero tangoora na woyse Tangooraŋ-Oliiw-ca, a woossa taalube kanak. 30A woosa ɓa ne : « Kaɗaat ŋ kur ki ŋ fikiiɗu wii, ɗu ree ɗah, ɗu hey raake cumbur mbaam tokuuɗ nga, yi ali ɓo' moosɗi rapoh. Toksaat ɗe, ɗu hay na ɗe ndii. 31Ɓo' meekis ɗu wa ye tah ɗu toksee ɗe ɗah, woyaat ɗe ne a kilifaani etoh ɗe. »
32Wa ɓooɓa woossee kaɗ, ɓa raakohha in ceem ɗaa, findi Yeesu woyohee ɓa. 33Ɓa tokseeɗa cumbra, ɓooɓa raak ɗe woosa ɓa ne : « Wa ye tah ɗu tokse cumbri ? » 34Ɓa loffa ɓa ne : « A kilifaani etoh ɗe. » 35Ɓa kommba Yeesu ɗe, ɓa raɗta kulɓaacaŋ ɓa ŋ ɗafuk cumbra, ɓa rapiɗta Yeesu nga ɗe. 36A kaɗeeɗa, ɓooɓa raɗɗeeɗa ɗe kulɓaacaŋ ɓa ŋ waasa.
37Wa a hay po a heeɗa ruhse Tangooraŋ-Oliiw-ca ŋ ɓak Yerusalem, taalubeeciŋ ɗe findi ɓa hend jen, ɓa neɓuusa, ɓa cammba ƴeek Kooh ŋ ɗafka sagu keemaan ca laayiɗ ca fu inah ne ɓa hoteen ca. 38Ɓa woyeeɗa ne :
« Buuri na haye ŋ tiikiŋ Heɗi,
a raakaat barke,
jam raakaat ŋ Eel ci,
ndami nikaat nik na Kooh yi ŋ ɗafka ɗafka. »
39Ɓi Farisen nikeen ŋ ɗooƴ mboolnda, ɓa woosa Yeesu ne : « Jangɗohohi, woytoha taalubeeciŋ ɗa. » 40Yeesu woosa ɓa ne : « Ñam na woyee ɗu wa, ɓa ɗek ɗah, e atoh ci ƴeekan. »
Yeesu fuɗiɗ Yerusalem
41Wa Yeesu kaɗ po a yurhiɗkohha na Yerusalem, wa misikka ɗe, a fuɗtaa. 42An : « Na ɗa, fu inheen woti in ci min ɗa kom jam ɗah ! Waaye, ɗiski wa nik ndii fu minɗi ca hot. 43Jamano miskiɗ hey haye nga ɗa, ɓi sang ɗa hey tufkiɗe miir wiiriis wa wil wiŋ ɗa, ɓa ndeer ɗa, ɓa keen ɗa ŋ ɓak ci jen, 44ɓa ɗumb ɗa na ɓooɓiŋ ɗa. Ɓa heyɗi ɗa faɗɗe ali atoh kanak degsukohiɗ. Laam fu inhisohɗi jamanooni Kooh hayoh ɗa hirpe. »
Yeesu ŋ Kahan Kooh
45Wa Yeesu ree Yerusalem, a aassa Kahan Kooh, a aañeeɗa toonoh ca. 46A woyeeɗa ɓa ne : « Kooh woyiɗ ŋ Fiis ci Hooliɗ ci ne : “ Kahan ndo nikaat kahan kiimohaa so ”, waaye ɗu tumiɗa ɗembohaaniŋ rokoh ci. »
47Mbeh nu nik a meeɗta jangɗoh ŋ Kahan Kooh. Kilifaacaŋ seeƴkiɗoh caŋ waasiŋ Musaa, na jangɗohoh caŋ wa, na yakak ca waakeeɗa findi ɓa apohan ɗe. 48Waaye ɓa inahɗi findi ɓa tuman laam ɓooɓa jen nikee ñaakiɗ nga ɗe, ɓa sikɗukeeɗa ɗe.
ទើបបានជ្រើសរើសហើយ៖
Luk 19: YM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc