Yohanes 17
17
Yesus bodoa sorinai Are tonawan
17:1-26
Yesus bodoa ina ome co angar tojadi ma-Are angar porahan bahawa Mohotara Tama tohormat
17:1-5
1Opah Yesus mantun kokon iyoh ma kawan murid-Eh, Are nongkara hia langit, paluh hie-Eh, “Tamang-Kuh, ocop dapot kotikaeh. Poleha ehboh ma kawan dulun bahawa Anak-Mu, tohormat. Nguan ehboh iyoh, ina Anak Mu lian porahan bahawa Iko tohormat. 2Iko ocop mihi kuasa indai-Eh ma kokon dulun. Iko mihi kuasa cioh ina-Eh lian mihi kobolum sumong kotahi indan kokon dulun co porocaya ma-Eh, iyohonon kokon dulun co ihim-Mu indai-Eh. 3Otuhboh kobolum co sumong kotahi yoh, iyohonon bahawa iroh nyono Iko, tikas ico leh Mohotara co bujur, hintang nyono Are, Yesus Kristus co ocop tonyoruhan-Mu. 4Akuh ocop ngumbot alogawi nyan dunia tuh co ihim-Mu ma-Akuh. Ma cara cioh, Akuh mohormat Iko. 5Makitu, yoh Tamang-Kuh, umpi boh Akuh jadi tohormat kole halo Iko nyan sorga samah isan batuh hiah waktu Aku tohormat halo-Iko sorinai dunia tuh tomoncipta.”
Yesus bodoa indan kawan murid-Eh
17:6-19
6Akuh ocop momposono Iko ma kawan dulun co ihim-Mu indang-Kuh ingkan dunia tuh. Iroh yoh Iko empui, hintang Iko ocop mihi iroh indang-Kuh. Iroh ocop nontumun luang antun-Mu 7Makitu iroh monau bahawa kokon co ihim-Mu ma-Akuh bujur-bujur borasar ingkan Iko.#17:7 Kokon co ihin Mohotara ma Yesus tomasuk ajaran-Eh, antun-Eh, kuasai-Eh, korojaan-Eh, dll. 8Iroh monau iyoh awi Akuh ocop porapot ma iroh kokon antun co ihim-Mu ma-Akuh. Paluh, iroh norima Antun-Mu yoh. Iroh monau bahawa Akuh bujur-bujur dombut ingkan Iko. Iroh porocaya bahawa Ikoleh co nyoruhan Akuh.
9Jadi, Akuh bodoa indan doh, aroko indan kawan dulun bokon nyan dunia tuh. Akuh bodoa indan doh co ocop ihim-Mu ma-Akuh. Akuh bodoa indan doh awi iroh iyohco Tiko. 10Kokon dulun Takuh iyohco Tiko ka. Kokon dulun Tiko iyohco Takuh ka. Iroh porahan bahawa Akuh korinah tohormat. 11Sonyulu oni Akuh angar dombut hopuli hia-Iko. Akuh aroko angar oko nyan dunia. Tapi iroh incah oko nyan dunia tuh. Oo Tamang-Kuh co somporaka, nyolindungboh iroh ma kuasa ingkan Iko, iyohonon kuasa co ocop ihim-Mu ma-Akuh. Nyolindungboh iroh ina doh jarin ico, samah isan Ito iyohco ico. 12Kotahin Akuh halo iroh, Akuh nyolindung iroh ma kuasa co ocop ihim-Mu ma-Akuh. Akuh ocop nyolindung iroh dapot iroh aroko niho. Baya oko ico co mula niho. Iyoh tojadi ina ome co tonulih nyan Surat Borasih jarin nyata.#17:12 Murid Yesus co angar lumat iyoh co Yudas Iskariot co nyarah Yesus ma kawan dulun co ngolawan Are. Noto buku Masmur 41:9-10; 55:12-15; 69:25; 109:4-13; Yesaya 57:12-13.
13Tapi makitu, Akuh angar dombut hia-Iko. Akuh mantun kokon otuh kotika Akuh incah oko nyan dunia ina kawan murid-Kuh tuh lian bujur-bujur jorih jerah samah isan Akuh. 14Akuh ocop porapot eh ma iroh kokon antun-Mu. Maka dunia dolee iroh awi iroh aroko tioh dunia sama isan Akuh ka bokon tioh dunia. 15Akuh aroko nyawot ina Iko monu iroh ingkan dunia tuh, tapi ina Iko nyolindung iroh ingkan Are co Jahat Lacan Setan. 16Iroh aroh tioh dunia, samah isan Akuh aroh tioh dunia. 17Umpiboh iroh jarin husus indan Tiko molalui ajaran-Mu co buah. Antun-Mu yoh iyohco ajaran co buah. 18Samah isan Iko ocop nyoruhan Akuh hia dunia, sanioh ka Akuh nyoruhan iroh hia dunia. 19Akuh nyarah arop-Kuh jarin husus indam-Mu leh, yoh Tamang-Kuh. Akuh nguan iyoh indan doh, ina iroh mahi boraoi jarin husus indam-Mu molalui ajaran-Mu co buah.
Yesus bodoa indan kokon dulun co angar porocaya ma-Are
17:20-26
20Akuh bodoa aroko baya indan murid-Kuh tapi ka indan kawan dulun co jarin porocaya poko tului pomboritaan doh tintun Akuh. 21Akuh bodoa ina kokon doh hokohico, samah isan Iko hokohico ma Akuh hintang Akuh hokohico ma Iko, yoh Tamang-Kuh. Ma isanioh iroh hokohico ma Ito ina kawan dulun nyan dunia porocaya bahawa Iko co ocop nyoruhan Akuh. 22Akuh ocop mihi kohormatan indan doh, iyohonon kohormatan co ihim-Mu ma-Akuh. Akuh mihi kohormatan cioh ina doh jarin ico, samah isan Ito iyohco ico. 23Iyohonon, Akuh hokohico ma iroh hintang Iko hokohico ma Akuh. Maka kohokohico cioh jarin somporaka. Ma sanioh, maka kawan dulun nyan dunia jarin monau bahawa Ikoboh co ocop nyoruhan Akuh. Kawan dulun nyan dunia mahi jarin monau bahawa Iko masi kawan dulun co porocaya ma-Akuh, samah isan Iko mongasihi Akuh.
24Oo Tamang-Kuh, tintun kokon murid co ocop ihim-Mu ma-Akuh, Akuh jere ina iroh halo Akuh, nyan ika Akuh oko daai. Ma sanioh, iroh lian noto bahawa Iko umpi Akuh jarin tohormat. Awi Iko mongasihi Akuh sorinai dunia tuh tomoncipta. 25Oo Tamang-Kuh co horoholuh nguan aang co buah. Mula kawan dulun bokon nyan dunia aroko nyono Iko. Tapi Akuh nyono Iko. Kawan murid-Kuh tuh monau bahawa Iko co ocop nyoruhan Akuh. 26Akuh ocop posono Iko ma iroh. Akuh angar horoholuh mara iroh tintun Iko ina doh mongasihi samah isan Iko mongasihi Akuh hintang Akuh tenden hokohico ma iroh.
ទើបបានជ្រើសរើសហើយ៖
Yohanes 17: TBSS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល