مَتّایِ انجیل 1
1
عیسی مسیح شجره نامه
1عیسی مسیحِ شجره نامه
داوودِ پسر، ابراهیمِ پسر:
2ابراهیم اسحاقِ پئر بو،
اسحاق یعقوبِ پئر بو،
و یعقوب، یهودا و اونِ برارانِ پئر بو.
3یهودا، فِرِص و زِراحِ پئر بو کی اوشانِ مار تولیر بو،
فِرِص، حِصرونِ پئر،
و حِصْرون، رامِ پئر بو.
4رام، عَمّینادابِ پئر،
عَمّیناداب، نَحشونِ پئر
و نَحشون، سَلمونِ پئر بو.
5سَلمون، بوعَزِ پئر بو، اونِ مار راحاب بو،
بوعَز، عوبیدِ پئر بو، اونِ مار روت بو،
و عوبید یَسا پئر بو،
6و یَسا، داوودِ پادشا پئر بو.
داوود، سلیمانِ پئر بو، اونِ مار پیشتر اوریا زن بو.
7سلیمان، رِحُبعامِ پئر، و
رِحُبعام اَبیّا پئر،
و اَبیّا آسا پئر بو.
8آسا، یِهوشافاطِ پئر،
یِهوشافاط یورامِ پئر،
و یورام، عُزّیا پئر بو.
9عُزّیا، یوتامِ پئر،
یوتام، آحازِ پئر
و آحاز، حِزِقیا پئر بو.
10حِزِقیا، مَنَسِی پئر،
مَنَسِی، آمونِ پئر،
و آمون، یوشیا پئر بو.
11یوشیا، یِکُنیا و اونِ برارانِ پئر بو کی
اَ زماتِ درون یهودیان بابِل سو تبعید بُبوستید.
12بعدِ یهودیانِ تبعید بابلِ سو:
یِکُنیا، شِئَلتیئیلِ پئر
و شِئَلتیئیل، زروبابِلِ پئر بو.
13زروبابِل، اَبیهودِ پئر،
اَبیهود، اِلیاقیمِ پئر
و اِلیاقیم، عازورِ پئر بو.
14عازور، صادوقِ پئر،
صادوق، اَخیمِ پئر،
و اَخیم، اِلیودِ پئر بو.
15اِلیود، اِلعازارِ پئر و
اِلعازار، مَتّانِ پئر
و مَتّان، یعقوبِ پئر بو.
16یعقوب، یوسفِ پئر بو، و یوسف مریمِ مرد بو،
کی عیسی شناس به مسیح، مریمِ جا بزا بُبوست.
17پس تمانِ نسلان، ابراهیمِ جا تا داوود، سر جمع چارده نَسل، و داوودِ جا تا یهودیانِ تبعیدِ زمات بابلِ سو، چارده نسل و تبعیدِ زماتِ جا تا مسیح، چارده نسل بید.
عیسی مسیحِ زا روج
18عیسی مسیحِ زا روج اَطو بو: وقتی مریم عیسی مار، یوسفِ نامزد بو، پیش جه اونکی همدیگرِ مرا بیبید، معلوم ببوستِ کی مریم روح القدسِ جا شکم اوساده. 19جه اویا کی اونِ مرد یوسف ایتا صالح مردای بو و نخواستی مریم سر اِسم بَدنامی بنِه، بخواسته کی خلوتی، اونِ جا سیوا ببه. 20ولی وقتی یوسف اَ فیکرانِ درون بو، ناخبر ایتا جه خُداوندِ فیریشته ئان خوابِ درون اونِ ره ظاهیرَ بوست و بُگفت: «اَی یوسف، داوود پسر، جه اَنکی تی زنانه مریمَ بیگیری ترسِئن نوا، چون اونچی کی اونِ شکمِ درون نئَه، جه روح‌القدّسه. 21مریم پسری زائه و تو اونَ ”عیسی“ نام نیئی، چونکی اون خُو مردومَ اوشان گُنائانِ جا نیجات خوائه دَئن.» 22اَشان همه ایتفاق دکفته تا اونچیَ کی خُداوند، اِشعیایِ پیغمبرِ زوانِ مرا بگفته بو، به حئیقت فارسه کی:
23«باکره شکم دارَ بوسته، پسری زائه
و اونِ نامَ عِمانوئیل نئِه،»
کی اونِ معنی ’خُدا اَمی اَمرا‘ ئه. 24هَطو کی یوسف خوابِ جا ویریشت، اونچی کی خُداوندِ فیریشته اونَ دستور بدَه بو، انجام بدَه و خو زن، مریمَ بیگیفت. 25ولی مریمِ اَمرا نُخوفت تا اُ زمات کی خو پسرَ بدُنیا باورِه؛ و یوسف اونِ نامَ عیسی بنه.
ទើបបានជ្រើសរើសហើយ៖
مَتّایِ انجیل 1: GIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company