ယောဟန် 10
10
သွိုꩻတီသားဥပမာႏ
1ဗွေႏယေသျုမိန်း၊ “ခွေဒေါ့ꩻဖေႏသီ အမွေးအမဲဉ်ႏ၊ ပါꩻတနွို့သော့ꩻတဝ်း သွိုꩻဖေါင်ꩻ တခါꩻတန်ဖဲ့ꩻတွော့ꩻ တကြဲမ်ထင်ႏနေး အလင်ဖဲ့ꩻနဝ်ꩻ ထွာတခွန်စွဉ်ႏ စွန်သားတဖြာꩻသွူ။ 2ပါꩻကနွို့လွေꩻသော့ꩻဒါႏ တခါꩻတန်ဖဲ့ꩻနဝ်ꩻ ထွာဒျာႏ ကောတီသွိုꩻသားသွူ။ 3တခါꩻတန် ပွေါးသားနဝ်ꩻ အီႏဗွောင်ဖေႏ ဝွေꩻတာႏတခါꩻသွူ။ နုဲင်းဝွေꩻကဟဲ့ꩻ ဝွေꩻအသွိုꩻပဲင်ႏ တဗာႏစီႏ မဉ်ꩻအတွိုင်ꩻ သွိုꩻဖုံႏ ဟွိုန်ဝွေꩻငဝ်းတဲင် ဝွေꩻအွဉ်ထန်ႏစွဉ်ႏ သွိုꩻဖုံႏနဝ်ꩻသွူ။ 4ဝွေꩻကဟဲ့ꩻထန်ႏ သွိုꩻဖုံႏချိန်ႏနဝ်ꩻ ဝွေꩻလွေꩻရီး သွိုꩻဖုံႏဆꩻငါတဲင် ပွိုးတွော့ꩻ သွိုꩻဖုံႏအဝ်ႏသေ ဝွေꩻငဝ်းနဝ်ꩻမꩻ သွိုꩻဖုံႏ လွေꩻလွဉ်ꩻဒျာႏ ဝွေꩻဆꩻချာသွူ။ 5သွိုꩻဖုံႏနဝ်ꩻ အီႏတလွေꩻလွဉ်ꩻတဝ်း လိုꩻလင် တဖြာꩻဖြာꩻ ဆꩻချာသွူ။ ပွိုးသွိုꩻဖုံႏ တသေတဝ်း ဝွေꩻငဝ်းနဝ်ꩻမꩻ အဝ်ႏလိုꩻစားနဝ်ꩻ တဖြာꩻထျꩻ သွိုꩻဖုံႏ ဖင်းညာꩻထိုꩻထဲင်းဒျာႏ” နုဲင်းနဝ်ꩻသွူ။ 6ဗွေႏယေသျု ဒေါ့ꩻနယ်ဖေႏ ငဝ်းဥပမာႏ နုဲင်းယိုစွဉ်ႏတဲ့ နုဲင်းဝွေꩻဗွေႏ ကဒေါ့ꩻဒါႏ အဓိပ္ပါယ်ႏနဝ်ꩻ ဝွေꩻသီး တသေနာႏတဝ်းသွူ။
သွိုꩻတီသားဟဝ်ဗွေႏယေသျု
7နဝ်ꩻမꩻ ဗွေႏယေသျု မိန်းဖေႏဖျင်တလဲင်ႏ၊ “ခွေဒေါ့ꩻဖေႏသီ အမွေးအမဲဉ်ႏ။ ခွေနဝ်ꩻထွာ သွိုꩻဖုံႏတာႏ တခါꩻတန်ငွါသွူ။ 8လိုꩻအလင် ကလွဉ်ရီးဒါႏ ခွေသားဖုံႏ ကားကအဝ်ႏနဝ်ꩻ ထွာဒျာႏတခွန်ꩻတွမ်ႏ စွန်ဖုံႏ။ ကွဲႏတွော့ꩻ သွိုꩻဖုံႏ တနာႏတဝ်း ဝွေꩻသီးငဝ်းသွူ။ 9ခွေနဝ်ꩻထွာ တခါꩻတန်ငွါသွူ။ လိုꩻကလွဉ်ဒါႏ စွဉ်ႏခွေဖဲ့ꩻနဝ်ꩻ အီႏလꩻ ထာꩻလုမ်းဗဉ်ႏသွူ။ ဝွေꩻသီးအီႏ နွို့ထန်ႏသော့ꩻတဲင် မော့ꩻအဆာႏတကြက်ꩻသွူ။ 10တခွန်ꩻကလွဉ်နဝ်ꩻ အဝ်ႏဒျာႏ အီႏတခွန်ꩻ အီႏမာꩻသီတဲင် ယားကုဲင်ထာꩻလွုမ်ꩻသွူ။ ဖေႏနေး သီကလꩻဗာႏ အသက်မွန်လွုမ်ꩻ တကာႏတဝ်း အသက်ဖေႏကဗွေ စွုံႏလင်ႏလို့ဗာႏနဝ်ꩻ ခွေကျွꩻလွဉ်နဝ်ꩻသွူ။
11ခွေနဝ်ꩻထွာ သွိုꩻတီသားဟဝ်၊ မဉ်ခံႏသီဖေႏဒျာႏ သွိုꩻဖုံႏအတာႏသွူ။ 12လိုꩻစင်းဖုံႏနဝ်ꩻ ထွာသွိုꩻတီသားတဖြာꩻ တမွေးတဝ်းတဲင် သွိုꩻအဗွေႏ တမွေးတဝ်းနဝ်ꩻမꩻ ထီႏထွီႏမီꩻ အဝ်ႏလွဉ်နဝ်ꩻ ဝွေꩻအွဉ်ႏကုဲင်ထိုꩻ သွိုꩻဖုံႏတွော့ꩻ ဖင်းညာꩻထိုꩻဒျာႏသွူ။ နဝ်ꩻမꩻ ထွီႏမီꩻနဝ်ꩻ အဲင်ႏအံႏထိုꩻ သွိုꩻတဲင် မာꩻလီလာထိုꩻ သွိုꩻဖုံႏသွူ။ 13လိုꩻစင်းနဝ်ꩻ ကွပ်ပွိုး ဝွေꩻထွာဒျာႏ လိုꩻစင်းတဖြာꩻလွုမ်ꩻ နဝ်ꩻမꩻ တထွားဟဝ်တဝ်း သွိုꩻတဲင် ဖင်းညာꩻထိုꩻဒျာႏနဝ်ꩻသွူ။ 14-15#မ ၁၁:၂၇၊ လု ၁၀:၂၂။ ခွေနဝ်ꩻထွာ သွိုꩻတီသားဟဝ်သွူ။ နုဲင်းဖါတောႏ ကသေခွေအတွိုင်ꩻ ခွေတဲ့ သေဖါတောႏ၊ ဗွိုန်နုဲင်းနဝ်ꩻ နေနေ ခွေသေ ခွေသွိုꩻဖုံႏတွော့ꩻ သွိုꩻဖုံႏနဝ်ꩻတဲ့ အဝ်ႏသေငါꩻခွေသွူ။ နဝ်ꩻမꩻ ခွေနဝ်ꩻ မဉ်ခံႏသီဖေႏဒျာႏ သွိုꩻဖုံႏတာႏသွူ။ 16နဝ်ꩻကို သွိုꩻအလင်ဖုံႏ တအဝ်ႏသော့ꩻတဝ်း သွိုꩻဖောင်ꩻကိုယိုဖုံႏ နဝ်ꩻတဲ့ ခွေအဝ်ႏပဲင်ႏဒျာႏသွူ။ သွိုꩻနဝ်ꩻဖုံႏတဲ့ ခွေအီႏဟဲ့ꩻလွဉ်ပါက နေနေသွူ။ ဝွေꩻသီးနဝ်ꩻ အီႏနာႏခွေငဝ်းတဲင် အီႏထွာလွဉ် သွိုꩻတဖုံႏချင်ႏစွဉ်ႏ သွိုꩻတီသား တဖြာꩻချင်ႏသွူ။ 17“ကွပ်ပွိုး ခွေမဉ်ဖေႏ ခွေအသက် နဝ်ꩻမꩻ ဖါတောႏနဝ်ꩻ ရက်ခွေ၊ ဖေႏနေး ခွေကလꩻချာယင်း အသက်တလဲင်ႏနဝ်ꩻသွူ။ 18ခွေအသက်နဝ်ꩻ ပါꩻမုဲင်ꩻတဖြာꩻတဲ့ အဝ်ႏခွေထျꩻ ထူႏညာꩻထိုꩻ တလꩻတဝ်းသွူ။ ခွေစွဉ်ႏခွေ စွဉ်ꩻဒျာႏ။ ခွေစွဉ်ꩻထိုꩻ ခွေအသက်ခွင်ꩻ အဝ်ႏတဲင် ခွေထူႏချာခွေ အသက်ခွင်ꩻတဲ့ အဝ်ႏသွူ။ နုဲင်းခွေဖါတောႏ ကမိန်းဖေႏဒါႏခွေ ဖေႏကမာꩻနဝ်ꩻ နုဲင်းယို” နုဲင်းနဝ်ꩻသွူ။
19ကွပ်ပွိုး ငဝ်းယိုဖုံႏနဝ်ꩻမꩻ လိုꩻဖုံႏနဝ်ꩻ အချင်ꩻချင်ꩻ သဘော်ꩻကွယ်ꩻဖျင်လို့ဝင်ꩻ တလဲင်ႏနဝ်ꩻသွူ။ 20ဝွေꩻသီးကို ကဉ်းအာအာနဝ်ꩻ ရိုꩻဒျာႏ၊ “ဝွေꩻနဝ်ꩻ လူꩻကုဲင်တဗာႏ အဝ်ႏစောင်ꩻသော့ꩻလဲဉ်း၊ ဝွေꩻနဝ်ꩻ ဗားထိုꩻလဲဉ်း၊ ပွိုးတမုဲင်ꩻ သီနာႏဗာႏတွိုႏ ဝွေꩻငဝ်း နုဲင်းမုဲင်ꩻဟောင်း” နုဲင်းနဝ်ꩻသွူ။
21ကွဲႏတွော့ꩻ လိုꩻအလင်ဖုံႏနဝ်ꩻရိုꩻ၊ “လူꩻကုဲင်တဗာႏ မဉ်ႏစောင်ꩻသော့ꩻ လိုꩻတဖြာꩻကိုနဝ်ꩻ ဒေါ့ꩻနုဲင်းယို တလꩻတဝ်း၊ လူꩻကုဲင်တဗာႏနဝ်ꩻ မာꩻဟဝ်ဖေႏနွောင်ꩻ လိုꩻမဲ့ခေ့ꩻ နုဲင်းမုဲင်ꩻဟောင်း” နုဲင်းနဝ်ꩻသွူ။
ပယ်ႏထိုꩻဗွေႏယေသျု
22အချိန်ႏနဝ်ꩻနဝ်ꩻ ထွာထာꩻခွꩻလာတဲင် ဝေင်ꩻယေရုသလမ်ႏကိုနဝ်ꩻ အီႏမာꩻစ ပွယ်ꩻဆယ်ꩻကပ် ဗိမာန်ႏတောႏကျောင်ꩻသွူ။ 23ဗွေႏယေသျုနဝ်ꩻ အဝ်ႏထောင်လွေꩻသော့ꩻ သောလမုန် တခါꩻတန်မုတ်ငွါ ဗိမာန်ႏတောႏ ကျောင်ꩻကိုသွူ။ 24လိုꩻဖုံႏ အဝ်ႏအုံစုဗူႏခူ ဝွေꩻဗွေႏတဲင်ရီ၊ “နီဗွေႏ အဝ်ႏမာꩻယွိုန်းထွို့ꩻ ညနေဒွိုန်းကနီ ခွိုင်းကားမုဲင်ꩻဟောင်း။ နီဗွေႏနဝ်ꩻထွာ မေသျိယ မွေးနေဟောင်း၊ ဒေါ့ꩻဖေႏစဲင်းစဲင်းနီ အမဲဉ်ႏမွိုင်” နုဲင်းနဝ်ꩻသွူ။
25ဗွေႏယေသျုလဝ်းချာ၊ “ခွေဒေါ့ꩻနယ် ဖေႏထွူလဲဉ်းသီ ကွဲႏတွော့ꩻ သီတယွုမ်းတဝ်းခွေ၊ ထာꩻမာꩻ ခွေကမာꩻဖုံႏနဝ်ꩻ တွမ်ႏခွေဖါတောႏ အခွင်ꩻအာႏဏာႏဒျာႏနဝ်ꩻ ခွေနမ်းတင် ဒေါ့ꩻနယ်ဖေႏလဲဉ်းသီသွူ။ 26ကွဲႏတွော့ꩻ ပွိုးသီနဝ်ꩻ ခွေသွိုꩻ တမွေးတဝ်း နဝ်ꩻမꩻ သီအီႏတယွုမ်းတဝ်းသွူ။ 27ခွေသွိုꩻနဝ်ꩻ နာႏဒျာႏ ခွေငဝ်းသွူ။ ခွေသေငါꩻဝွေꩻသီးတဲင် ဝွေꩻသီးတဲ့ လွေꩻလွဉ်ꩻဒျာႏခွေသွူ။ 28ခွေဖေႏဝွေꩻသီး ထာဝရအသက်တဲင် ဝွေꩻသီးနဝ် မုဲင်ꩻခါတဲ့ အီႏတသီဗာႏတဝ်းသွူ။ အဝ်ႏခွေထျꩻနဝ်ꩻ ပါꩻမုဲင်ꩻတဖြာꩻတဲ့ ထူႏညာꩻထိုꩻ ဝွေꩻသီး တလꩻနွောင်ꩻတဝ်းသွူ။ 29ဖါတောႏ ကဖေႏဒါႏ ခွေနဝ်ꩻ တန်ကယ်ꩻလဲဉ်းက ထာꩻကားကအဝ်ႏတဲင် အဝ်ႏဖါတောႏ ကထိန်ꩻထွားဒါႏထျꩻနဝ်ꩻ ပါꩻမုဲင်ꩻတဖြာꩻတဲ့ ထူႏညာꩻထိုꩻ ဝွေꩻသီး တလꩻနွောင်ꩻတဝ်းသွူ။ 30ဖါတောႏတွမ်ႏ ခွေနဝ်ꩻထွာဒျာႏ တဖြာꩻချင်ႏ” နုဲင်းနဝ်ꩻသွူ။
31တွိုႏနဝ်ꩻ အီႏနုဲင်ႏနို ဝွေꩻဗွေႏနဝ်ꩻ လိုꩻဖုံႏတွမ်ထူႏဖျင် လုံးတူႏဖုံႏ တလဲင်ႏသွူ။ 32ဗွေႏယေသျု ဒေါ့ꩻဖေႏဝွေꩻသီး၊ “နုဲင်းဖါတောႏ ကဖေႏဒါႏ ခွေထာꩻမာꩻ ခွေကမာꩻလဲဉ်း ထာꩻမာꩻဟဝ်ဖုံႏ သီဆꩻငါနဝ်ꩻ အာငါႏသွူ။ ထာꩻမာꩻယိုဖုံႏ အစွိုးမုဲင်ꩻတာႏ သီမဉ်နုဲင်ႏခွေ တွမ်ႏလုံးတူႏဟောင်း” နုဲင်းနဝ်ꩻသွူ။
33 #
ဝိ ၂၄:၁၆။ ဝွေꩻသီးလဝ်းချာ၊ “ကွပ်ပွိုး ထာꩻမာꩻဟဝ် တစွိုးစွိုးတွော့ꩻ တွမ်ႏလုံးတူႏ နီမဉ်နုဲင်ႏနိုနာꩻ တမွေးတဝ်း၊ ကွဲႏတွော့ꩻ ကွပ်ပွိုး နာꩻအဝ်ႏပဲစ်မာႏ ဗွေႏဘုရာꩻအတွက်တဲင် နာꩻနဝ်ꩻထွာ လိုꩻတဖြာꩻလွုမ်ꩻ စွဉ်ႏတဲ့ နာꩻအဝ်ႏကျိုꩻစာꩻ မာꩻချာနာꩻနမ်း ဗွေႏဘုရာꩻနဝ်ꩻမꩻ နီမဉ်နုဲင်ႏနာꩻ တွမ်ႏလုံးတူႏ” နုဲင်းနဝ်ꩻသွူ။
34 #
သာ ၈၂:၆။ ဗွေႏယေသျုလဝ်းချာ၊ “သီပညတ်ကျမ်ꩻကိုနဝ်ꩻ တဲမ်းသေꩻခါꩻ ဗွေႏဘုရာꩻမိန်း၊ ‘သီနဝ်ꩻထွာ ဘုရာꩻဖုံႏ’ နုဲင်းနဝ်ꩻသွူ။ 35နုဲင်းလိတ်ကျမ်ꩻ ကရိုꩻနဝ်ꩻ အဝ်ႏမဲဉ်ႏသေႏသေႏဒျာႏကျောင်ꩻ နီအဝ်ႏသေတဲင် လိုꩻဝွေꩻဗွေႏ ကအဝ်ႏဖေႏ ငဝ်းသတင်ꩻသား၊ လိုꩻစားနဝ်ꩻဖုံႏနဝ်ꩻ ဗွေႏဘုရာꩻဟဲ့ꩻ ဘုရာꩻဖုံႏသွူ။ 36နုဲင်းခွေအတာႏ ဖါတောႏနဝ်ꩻ လွိုက်ထူႏခွေတဲင် အွဉ်ႏစွꩻသော့ꩻခွေ ကမ္ဘာႏလောကကိုသွူ။ တွိုႏနဝ်ꩻ ကွပ်ပွိုး ခွေဒေါ့ꩻခွေထွာ ဗွေႏဘုရာꩻ ပိုခိုအတွက် သီရိုꩻနွောင်ꩻ ခွေပဲစ်မာႏ ဗွေႏဘုရာꩻ နုဲင်းမုဲင်ꩻဟောင်း။ 37နဝ်ꩻထွူ ခွေဖါတောႏ ကမဉ်အွဉ်ႏခွေမာꩻ ထာꩻမာꩻဖုံႏ ခွေမဉ်ႏတမာꩻတဝ်း ထာꩻမာꩻ နဝ်ꩻဖုံႏနဝ်ꩻ တွမ်ႏယွုမ်းမွိုန်းခွေဟုဲင်း။ 38ကွဲႏတွော့ꩻ ခွေမဉ်ႏမာꩻထာꩻမာꩻ နဝ်ꩻဖုံႏနဝ်ꩻ သီလဲင်ꩻတယွုမ်းတဝ်းခွေ စွဉ်ႏတဲ့ အဆေ့ꩻသွတ်ꩻနဝ်ꩻ သီဟဝ်ယွုမ်းဒျာႏ ခွေထာꩻမာꩻဖုံႏ၊ နုဲင်းနဝ်ꩻမꩻ ဖါတောႏနဝ်ꩻ အဝ်ႏသော့ꩻ ခွေအကိုတဲင် ခွေနဝ်ꩻ အဝ်ႏသော့ꩻ ဖါတောႏကိုကျောင်ꩻ တလဲင်ႏချင်ႏ သီအီႏသေဗာႏ” နုဲင်းနဝ်ꩻသွူ။
39ဝွေꩻသီးကျံႏဆွမ်ꩻဖျင် ဗွေႏယေသျုတလဲင်ႏ၊ ကွဲႏတွော့ꩻ အဝ်ႏဝွေꩻသီးစူကိုနဝ်ꩻ ဝွေꩻဗွေႏ သျောင်ႏလဲ့ထန်ႏထိုꩻသွူ။
40 #
ယော ၁:၂၈။ နဝ်ꩻထွူ ဗွေႏယေသျု ဖျတ်ကာႏသဲင်ꩻချာ ယော်ဒန် ထီခြောင်တန် တလဲင်ႏတဲင် လွေꩻသော့ꩻစွဉ်ႏ ရီးခါဆရာႏယောဟန် ကအဝ်ႏဖေႏဒါႏ ဗတ္တိဇံႏ ထီမင်္ဂလာႏ ခင်ႏလမ်းတဲင် ဝွေꩻဗွေႏ အုံနဝ်ꩻကိုသွူ။ 41လိုꩻအာဖုံႏနဝ်ꩻ လွဉ်ထေ့ ဗွေႏယေသျုထျꩻသွူ။ ဝွေꩻသီးဒေါ့ꩻ၊ “ယောဟန်နဝ်ꩻ တမာꩻနယ်တဝ်း နိမိတ်လက္ခဏာႏ ထာꩻအံႏဖြာႏခရာႏဖုံႏသွူ။ ကွဲႏတွော့ꩻ ဝွေꩻကအဝ်ႏဒေါ့ꩻဒါႏ ပါꩻခိုယိုခရာႏဖုံႏ ကားကအဝ်ႏနဝ်ꩻ မဲဉ်ႏဒျာႏ” နုဲင်းနဝ်ꩻသွူ။ 42နဝ်ꩻမꩻ လိုꩻဖုံႏယွုမ်း ဝွေꩻဗွေႏနဝ်ꩻ အာငါႏသွူ။
ទើបបានជ្រើសរើសហើយ៖
ယောဟန် 10: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.