ယောဟန် 6
6
ဗွေႏယေသျုလွူးလိုꩻငတ်ꩻရေင်ထာꩻအံႏ
(မတဲ ၁၄:၁၃–၂၁။ မာကု ၆:၃၀–၄၄။ လုကာ ၉:၁၀–၁၇)
1ယိုထွူ ဗွေႏယေသျု ဖျတ်ကာႏလွေꩻ ကာလိလဲထီနောင် (မဉ်ႏမွေးတဝ်း နုဲင်းကအဝ်ႏဟဲ့ꩻပါက နောင်တိဗေရိနဝ်ꩻသွူ။) 2ပွိုးတွော့ꩻ ဝွေꩻသီး ထီႏဗာႏလဲဉ်း ဝွေꩻဗွေႏ လုမ်ꩻလာꩻမာꩻဟဝ်ဖေႏ လိုꩻဆာ နိမိတ်လက္ခဏာႏဖုံႏ နဝ်ꩻမꩻ လိုꩻအာတစွိုꩻနဝ်ꩻ အဝ်ႏလွေꩻလွဉ်ꩻ ဝွေꩻဗွေႏဆꩻချာသွူ။ 3ဗွေႏယေသျု ထင်ႏကောင်ပူႏပေႏ လောင်းတဲင် အုံလင်ꩻငီꩻစွဉ်ႏ ဝွေꩻဗွေႏ တပဲ့တောႏဖုံႏနဝ်ꩻသွူ။ 4အချိန်ႏနဝ်ꩻနဝ်ꩻ ထွာ ပွယ်ꩻပတ္တခါ ဗော့ꩻတွိုႏသွူနဝ်ꩻသွူ။ 5ဗွေႏယေသျု ထွားခူတဲင် ထီႏစွဉ်ႏ လိုꩻအာတစွိုꩻ အဝ်ႏလွဉ်ထေ့ ဝွေꩻဗွေႏသွူ။ နဝ်ꩻမꩻ ဝွေꩻဗွေႏရီ ဖိလိပ္ပု၊ “လိုꩻစားယိုဖုံႏ ကားကအဝ်ႏတာႏ နီအီႏလွေꩻဖြေꩻ လုမ်းနွောင်ꩻ ထာꩻအံႏ မုဲင်ꩻကိုဟောင်း။ (6ဝွေꩻဗွေႏ ကဒေါ့ꩻဗာႏ နုဲင်းယိုနဝ်ꩻ စမ်ꩻထွားဒျာႏ ဖိလိပ္ပုသွူ။ အမဲဉ်ႏနဝ်ꩻ ဝွေꩻဗွေႏ အီႏမာꩻဗာႏတမုဲင်ꩻနဝ်ꩻ ဝွေꩻဗွေႏအဝ်ႏသေသွူ။)
7ဖိလိပ္ပုလဝ်းချာ၊ “လိုꩻစွုမ်ႏဖြာꩻ ဖေႏကလꩻ တစိꩻငါမဉ်ႏတဲ့ ထူႏလွိုထဲင်းဗာႏ ရွဉ်ဒင်္ဂါꩻ အဗီႏနီရျာꩻမꩻ အီႏဖြေꩻတခိုးလုမ်း” နုဲင်းနဝ်ꩻသွူ။
8ဝွေꩻဗွေႏ တပဲ့တောႏ အလင်တဖြာꩻ ကထွာ သိမုန်ပေတရု ဖူးခို အန္ဒြေနဝ်ꩻဒေါ့ꩻ၊ 9“ယိုကို ပါꩻပေႏတဖြာꩻထျꩻနဝ်ꩻအဝ်ႏ တခိုးမာꩻတွမ်ႏ ဗာလီဗွူကလာ ငတ်ꩻဖြုံႏစွဉ်ႏ ထပေႏနီဗာႏသွူ။ ကွဲႏတွော့ꩻ လိုꩻစားယိုဖုံႏ ကားကအဝ်ႏတာႏ တခိုးနဝ်ꩻ အီႏတလုမ်းနွောင်ꩻတဝ်း” နုဲင်းနဝ်ꩻသွူ။
10“ဗွေႏယေသျု ဒေါ့ꩻဖေႏဝွေꩻသီး၊ “ထွဉ်ႏလိုꩻဖုံႏ အုံလင်ꩻဟုဲင်း။ (နဝ်ꩻကိုနဝ်ꩻ ထာꩻအီႏဖုံႏ အဝ်ႏအာငါႏသွူ။) နဝ်ꩻမꩻ လိုꩻဖုံႏကားကအဝ်ႏ အုံလင်ꩻစွဉ်ႏသွူ။ နဝ်ꩻကိုနဝ်ꩻ လိုꩻခို အဝ်ႏအဖြာꩻ ၅၀ဝဝရပ်သွူ။ 11ဗွေႏယေသျု ထူႏတခိုး အုပ်ꩻထင်ႏ ဗွေႏဘုရာꩻ ဂွုဏ်ႏတောႏတဲင် တခိုးနဝ်ꩻ ဖန်းဝေႏဖေႏလိုꩻဖုံႏ ကအဝ်ႏအုံလင်ꩻ နဝ်ꩻကိုသွူ။ ထပေႏနဝ်ꩻတဲ့ ဝွေꩻဗွေႏ မာꩻဗွိုန်နုဲင်းနဝ်ꩻတွော့ꩻ ဝွေꩻသီး ကားကအဝ်ႏ ခွိုင်းကား ကမဉ်အံႏနဝ်ꩻ အံႏဗာႏလို့စွဉ်ႏသွူ။ 12ဝွေꩻသီး ထွိုင်ႏအံႏကွို့ꩻထွူလို့နဝ်ꩻ ဝွေꩻဗွေႏဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ “စုသိမ်ꩻချာ တခိုးခဝ်ဖုံႏနဝ်ꩻဟုဲင်း။ တခဝ်ငါတဲ့ ဖေႏနီကမာꩻသွုမ်ꩻ ပျင်ႏကုဲင်ဗာႏမွိုန်း” နုဲင်းနဝ်ꩻသွူ။ 13နဝ်ꩻမꩻ လိုꩻဖုံႏကအံႏဒါႏ တခိုးဗာလီ ငတ်ꩻဖြုံႏတွော့ꩻ ကအဝ်ႏကုဲင်ဒါႏ အခဝ်လွို ကားကအဝ်ႏနဝ်ꩻ ဝွေꩻသီး တွမ်စုသိမ်ꩻ လꩻတဆီနီခြောင်း ဗွေဗွေသွူ။
14ထွိုင်ႏထီႏ ဗွေႏယေသျု မာꩻနယ် ထာꩻအံႏဖြာႏခရာႏ နုဲင်းယိုနဝ်ꩻ လိုꩻဖုံႏ အဝ်ႏနဝ်ꩻကိုသားဒေါ့ꩻ၊ “ယိုနဝ်ꩻထွာမွေး ပရောဖဲစ် ကအီႏကျွꩻလွဉ်ဒါႏ လောကကိုဒျာႏရင်ꩻ” နုဲင်းနဝ်ꩻသွူ။ 15ပွိုင်းဝွို့တွမ်ႏ ဝွေꩻသီး ကလွဉ်ထေ့ဒါႏ အခရာႏနဝ်ꩻ ဆွမ်ꩻထွဉ်ႏနွိုင်ႏ ဝွေꩻဗွေႏ ဖေႏကမာꩻ ခွန်တန်နဝ်ꩻ ဗွေႏယေသျု အဝ်ႏသေဒျာႏသွူ။ နဝ်ꩻမꩻ ဝွေꩻဗွေႏနမ်း တဖြာꩻလွုမ်ꩻ ထန်ႏလွေꩻဖျင် ကောင်ပူႏပေႏလောင်း တလဲင်ႏနဝ်ꩻသွူ။
ဗွေႏယေသျုထောင်လွေꩻထီခိုႏလောင်း
(မတဲ ၁၄:၂၂–၃၃။ မာကု ၆:၄၅–၅၂)
16မွူးထွိုင်ႏဟာလွဉ်ချိန်ႏ ဗွေႏယေသျု တပဲ့တောႏဖုံႏ လင်ꩻထီနောင်၊ 17နွို့သော့ꩻ ဖြီတဆွိုင်ꩻကိုတဲင် အဝ်ႏနောင်တဖဲ့ꩻနဝ်ꩻ ဖျတ်ကာႏ သဲင်ꩻစွို့ꩻစွဉ်ႏ ဝေင်ꩻကပေရနောင်သွူ။ ထာꩻထွိုင်ႏခေ့ꩻလွဉ်နဝ်ꩻ ဗွေႏယေသျု တလꩻလွဉ်တဝ်းဒွိုန်း ဝွေꩻသီးထျꩻသွူ။ 18တွိုႏနဝ်ꩻ တလီꩻဝစ်ꩻသန် မာꩻလွဉ်စွဉ်ႏတဲင် မာꩻထွိုင်ႏစွဉ်ႏ ထီလဲင်ꩻနဝ်ꩻသွူ။ 19တပဲ့တောႏဖုံႏ အဝ်ႏဝါးဖြုဲင်ꩻဖြီ လꩻသွံမဲင်ႏ လစ်ꩻမဲင်ႏရပ်နဝ်ꩻ ဝွေꩻသီးထွိုင်ႏထီႏ ဗွေႏယေသျု အဝ်ႏထောင် ထီခိုႏလောင်း အဝ်ႏလွဉ်ဗော့ꩻ ဖြီထျꩻနဝ်ꩻ ဝွေꩻသီးငမ်းသꩻ တနွော့ꩻမွေးနေးစွဉ်ႏသွူ။ 20ဗွေႏယေသျု ဒေါ့ꩻဖေႏဝွေꩻသီး၊ “တွမ်ႏငမ်းသꩻမွိုန်း၊ ယိုနဝ်ꩻ ထွာခွေဒျာႏ” နုဲင်းနဝ်ꩻသွူ။ 21တွိုႏနဝ်ꩻ ဝွေꩻသီး အဝ်ႏတွမ်ႏ ထာꩻသꩻဟဝ်သꩻရေꩻ ဟဲ့ꩻနွို့သော့ꩻငါ ဝွေꩻဗွေႏ ဖြီကိုတဲင် တဆင်ႏပေႏတွင်ꩻ ဖြီဆွိုက်စွဉ်ႏ ဝွေꩻသီး ကအဝ်ႏလွေꩻဒါႏ ခင်ႏလမ်းနဝ်ꩻသွူ၊၊
လိုꩻဖုံႏထုမ်ႏဗွေႏယေသျု
22ဆုဲင်ꩻတနီꩻ လိုꩻစွိုꩻဖုံႏ ကအဝ်ႏအုံကုဲင် ထီနောင်ဖင်ႏ ခတဖဲ့ꩻသားဖုံႏ နဝ်ꩻကို ဖြီအဝ်ႏကုဲင် တဆွိုင်ꩻလွုမ်ꩻနဝ်ꩻ အဝ်ႏသေသွူ။ ဗွေႏယေသျု တနွို့သော့ꩻငီꩻတဝ်း စွဉ်ႏဝွေꩻဗွေႏ တပဲ့တောႏဖုံႏနဝ်ꩻ ဝွေꩻသီးအဝ်ႏသေ၊ နဝ်ꩻမꩻ ဝွေꩻသီး ကထန်ႏလွေꩻဒါႏချိန်ႏနဝ်ꩻ ဝွေꩻဗွေႏ တပါတဝ်း နဝ်ꩻသွူ။ 23အဝ်ႏတိဗေရီ ကလွဉ်ဒါႏ ဖြီအလင်ဖုံႏနဝ်ꩻ တွိုႏဖျော်လွဉ်ဗော့ꩻစွဉ်ႏ ဗွေႏဘုရာꩻ အုပ်ꩻကေꩻဇူꩻတောႏ ကဖေႏအံႏဒါႏ လိုꩻစွိုꩻအာဖုံႏ ကအဝ်ႏအံႏ တခိုးခင်ႏလမ်း ဖင်ႏထျꩻနဝ်ꩻသွူ။ 24ဗွေႏယေသျု တွမ်ႏဝွေꩻဗွေႏ တပဲ့တောႏဖုံႏ အဲဉ်ထဝ်းဒွုမ် နဝ်ꩻကိုကျောင်ꩻ လိုꩻစွိုꩻဖုံႏထွိုင်ႏသေ ဝွေꩻသီးနွို့သော့ꩻ ဖြီဖုံႏကိုတဲင် လွေꩻထုမ်ႏထွားစွဉ်ႏ ဝွေꩻဗွေႏ ဝေင်ꩻကပေရနောင်သွူ။
ဗွေႏယေသျုထွာအသက်တခိုး
25လိုꩻဖုံႏထွိုင်ႏထီႏ ဗွေႏယေသျု အဝ်ႏထီနောင်ဖင်ႏ ခတဖဲ့ꩻနဝ်ꩻ ဝွေꩻသီးဒေါ့ꩻ ဝွေꩻဗွေႏ၊ “ဆရာႏ၊ နီဗွေႏ ဖျော်လွဉ်ယိုကို အချိန်ႏမုဲင်ꩻဟောင်း” နုဲင်းနဝ်ꩻသွူ။
26ဗွေႏယေသျုလဝ်းချာ၊ “ခွေဒေါ့ꩻဖေႏသီအမဲဉ်ႏ၊ ကွပ်ပွိုး သီအံႏဗာႏ တခိုးတွမ်ႏ သီကမဉ်ꩻလꩻ ကားကအဝ်ႏ နဝ်ꩻအတွက် သီအဝ်ႏထုမ်ႏခွေသွူ။ ပွိုးသီမဉ်သေနာႏ ခွေနိမိတ် လက္ခဏာႏဖုံႏ အဓိပ္ပါယ်ႏ တမွေးတဝ်းသွူ။ 27ထာꩻအံႏ ကသေင်ကုဲင်ဒါႏ အတာႏဖုံႏနဝ်ꩻ တွမ်ႏကျိုꩻစာꩻမာꩻမွိုန်း၊ ခလားကမာꩻ နုဲင်းနဝ်ꩻနဝ်ꩻ မာꩻသွော့ ထာꩻအံႏ ကခံႏည ထာဝရ အသက်တာႏဟုဲင်း။ ထာꩻအံႏယိုနဝ်ꩻ လိုꩻပိုခို အီႏဖေႏသီ၊ ပွိုးတွော့ꩻ ဖါတောႏ ဗွေႏဘုရာꩻနဝ်ꩻ အွဉ်ႏသေꩻခါꩻလဲဉ်း ဝွေꩻဗွေႏ အမုဲင်သက်သေႏ ဝွေꩻပိုခိုအလောင်း” နုဲင်းနဝ်ꩻသွူ။
28နဝ်ꩻမꩻ ဝွေꩻသီးရီ ဝွေꩻဗွေႏ၊ “ဖေႏကမဲဉ်ႏတွမ်ႏ နုဲင်းဗွေႏဘုရာꩻ အလိုႏတောႏနဝ်ꩻ နီအီႏမာꩻဗာႏ တမုဲင်ꩻဟောင်း” နုဲင်းနဝ်ꩻသွူ။
29ဗွေႏယေသျုလဝ်းချာ၊ “ဖေႏကမဲဉ်ႏတွမ်ႏ နုဲင်းဗွေႏဘုရာꩻ အလိုႏတောႏနဝ်ꩻ သီအီႏယွုမ်းဗာႏ ဝွေꩻဗွေႏ ကအွဉ်ႏစွꩻလွဉ် ဗွေႏအပါꩻနဝ်ꩻ သွူ။
30ဝွေꩻသီးဒေါ့ꩻချာ၊ “ဖေႏနေးနီကထီႏတဲင် ကယွုမ်းဗာႏ နီဗွေႏနဝ်ꩻ အီႏမာꩻနယ်နီ နိမိတ်လက္ခဏာႏ တမုဲင်ꩻဟောင်း။ နီဗွေႏအီႏမာꩻနယ် တမုဲင်ꩻဟောင်း” နုဲင်းနဝ်ꩻသွူ။ 31#ထလ ၁၆:၄၊ ၁၅၊ သာ ၇၈:၂၄။ နုဲင်းလိတ်ကျမ်ꩻကရိုꩻဒါႏ၊ ‘ ဖေႏကအံႏဗာႏ တခိုး အဝ်ႏခမ်းထီမို့ꩻလောင်း လွဉ်နဝ်ꩻ ဝွေꩻဗွေႏဖေႏ ဝွေꩻသီး ’ နဝ်ꩻမꩻ နီမွိုးဖြား ဖါဖြားသီးဖုံႏနဝ်ꩻ အံႏဗာႏ မာႏန္နတခိုး အွိုးကန္တာရတခြာကို” နုဲင်းနဝ်ꩻသွူ။
32ဗွေႏယေသျုဒေါ့ꩻ၊ “ခွေဒေါ့ꩻဖေႏသီ အမွေးအမဲဉ်ႏ၊ တခိုး အဝ်ႏခမ်းထီမို့ꩻလောင်း လင်ꩻလွဉ်နဝ်ꩻ မောသျေဖေႏသီ တမွေးတဝ်း၊ ဗွေႏကဖေႏသီတခိုး အစဲစ်အမဲဉ်ႏ အဝ်ႏခမ်းထီ မို့ꩻလောင်း လင်ꩻလွဉ်နဝ်ꩻ ထွာဒျာႏ ခွေဖါတောႏသွူ။ 33ဗွေႏဘုရာꩻ ကဖေႏဒါႏ တခိုးနဝ်ꩻနဝ်ꩻ ဝွေꩻဗွေႏ အဝ်ႏခမ်းထီမို့ꩻလောင်း လင်ꩻလွဉ်တဲင် ဖေႏကမ္ဘာႏ လောကသားဖုံႏ အသက်” နုဲင်းနဝ်ꩻသွူ။
34ဝွေꩻသီးကွီ ဝွေꩻဗွေႏ၊ “ဗွေႏ၊ တခိုးယိုနဝ်ꩻ ဖေႏသေႏသေႏနီမွိုင်” နုဲင်းနဝ်ꩻသွူ။
35ဗွေႏယေသျု ဒေါ့ꩻဖေႏဝွေꩻသီး၊ “ခွေနဝ်ꩻထွာ အသက်တခိုး၊ လိုꩻကလွဉ် ထေ့ခွေထျꩻသားနဝ်ꩻ မုဲင်ꩻခါတဲ့ အီႏတဟို့ꩻခိုး တဝ်းဒွုမ် ထာꩻအံႏသွူ။ လိုꩻကယွုမ်း ခွေသားဖုံႏနဝ်ꩻ မုဲင်ꩻခါတဲ့ အီႏတဟို့ꩻခိုး ဗာႏတဝ်းဒွုမ် ထီသွူ။ 36ယိုခါ ခွေဒေါ့ꩻနယ်သီ၊ သီနဝ်ꩻ ထီႏဗာႏလဲဉ်းခွေ၊ ကွဲႏတွော့ꩻ သီအီႏတယွုမ်းတဝ်းသွူ။ 37ခွေဖါ ကအပ်ဖေႏဒါႏခွေ လိုꩻစွုမ်ႏဖြာꩻဖြာꩻနဝ်ꩻ အီႏလွဉ်ထေ့ ခွေထျꩻသွူ။ လိုꩻကလွဉ်ထေ့ ခွေထျꩻသား စွုမ်ႏဖြာꩻနဝ်ꩻ မုဲင်ꩻခါတဲ့ ခွေအီႏတခွယ်ညာꩻ ထိုꩻတဝ်းသွူ။ 38ပွိုးတွော့ꩻ ခွေကအဝ်ႏ ခမ်းထီမို့ꩻလောင်း လင်ꩻလွဉ်နဝ်ꩻ အီႏမာꩻ ခွေနမ်းအလိုႏ တမွေးတဝ်း အီႏမာꩻဒျာႏ ဗွေႏကအွဉ်ႏစွꩻလွဉ်ခွေ အလိုႏတောႏသွူ။ 39ဗွေႏကအွဉ်ႏစွꩻလွဉ်ခွေ အလိုႏတောႏနဝ်ꩻ ဝွေꩻဗွေႏ ကအပ်ဖေႏလဲဉ်းဒါႏခွေ လိုꩻဖုံႏ ကားကအဝ်ႏနဝ်ꩻ ခွေအီႏမာꩻသွုမ်ꩻ ထိုꩻဗာႏတဝ်း တဖြာꩻဖြာꩻ၊ ကွဲႏတွော့ꩻ အဆုဲင်ꩻသွတ်ꩻ မွူးနီꩻ ဝွေꩻသီး ကားကအဝ်ႏ ဖေႏကလꩻ အသက်နဝ်ꩻ ခွေအီႏမာꩻထွိုင်ႏမွန်ဖေႏ ဝွေꩻသီးသွူ။ 40လိုꩻကထီႏ ပိုခိုတောႏတွော့ꩻ ကယွုမ်း ဝွေꩻဗွေႏသားဖုံႏ ကားကအဝ်ႏနဝ်ꩻ အီႏလꩻ ထာဝရအသက်နဝ်ꩻ ခွေဖါတောႏ အလိုႏတောႏအဝ်ႏ နဝ်ꩻသွူ။ နဝ်ꩻမꩻ အဆုဲင်ꩻသွတ်ꩻ မွူးနီꩻနဝ်ꩻ ခွေအီႏမာꩻ ထွိုင်ႏမွန်ဖေႏ ဝွေꩻသီး အသက်သွူ။
41၊ “ခွေနဝ်ꩻထွာ တခိုး အဝ်ႏခမ်းထီမို့ꩻလောင်း လင်ꩻလွဉ်” ပွိုးတွော့ꩻ ဝွေꩻဗွေႏဒေါ့ꩻ နုဲင်းနဝ်ꩻအတွက် ဝွေꩻဗွေႏခရာႏနဝ်ꩻ လိုꩻဖုံႏ သောင်ခြင်ꩻစစွဉ်ႏ ထာꩻသွူ။ 42နဝ်ꩻမꩻ ဝွေꩻသီးဒေါ့ꩻ၊ “ပါꩻခိုယိုနဝ်ꩻထွာ ယောသပ်ပိုခို ယေသျု တမွေးတဝ်းဟောင်း။ ဝွေꩻဖါတွမ်ႏ ဝွေꩻမွိုးနဝ်ꩻ နီအဝ်ႏသေသွူ။ နဝ်ꩻထွူ ယိုခါ ဝွေꩻရိုꩻဗာႏတွိုႏ ဝွေꩻအဝ်ႏ ခမ်းထီမို့ꩻလောင်း လင်ꩻလွဉ် နုဲင်းမုဲင်ꩻဟောင်း” နုဲင်းနဝ်ꩻသွူ။
43ဗွေႏယေသျု လဝ်းချာ၊ “သီအချင်ꩻချင်ꩻ တွမ်ႏထေင်မွိုန်းဒွုမ် လို့ဝင်ꩻဟုဲင်း။ 44ဖါတောႏ ကအွဉ်ႏစွꩻလွဉ် ခွေယို ပေါႏတထွို့ꩻလွဉ်တဝ်း ဝွေꩻသီး ခွေထျꩻနဝ်ꩻ လိုꩻဖုံႏ တလွဉ်နွောင်ꩻတဝ်း ခွေထျꩻသွူ။ 45#ဟေသျာ ၅၄:၁၃။ ‘လိုꩻစွုမ်ႏဖြာꩻ အီႏသွဉ်ထူႏဗာႏ ဗွေႏဘုရာꩻထျꩻ’ နုဲင်းနဝ်ꩻနဝ်ꩻ ပရောဖဲစ်ဖုံႏ တဲမ်းသေꩻခါꩻလဲဉ်းသွူ။ ပါꩻမုဲင်ꩻဟွိုန် ဖါတောငဝ်းတဲင် ကသွဉ်ထူႏဒါႏ ဝွေꩻဗွေႏထျꩻသားနဝ်ꩻ အီႏလွဉ်ထေ့ခွေသွူ။ 46ထာꩻယိုအဓိပ္ပါယ်ႏနဝ်ꩻ ပါꩻတဖြာꩻဖြာꩻ ထီႏဗာႏဖိုလဲဉ်း ဖါတောႏ အမဉ်ရိုꩻနုဲင်းနဝ်ꩻ တမွေးတဝ်း။ ဝွေꩻဗွေႏတပါꩻလွုမ်ꩻ ကအဝ်ႏဒါႏ ဗွေႏဘုရာꩻထျꩻလွဉ် နဝ်ꩻထွာ ထီႏဗာႏလဲဉ်း ဖါတောႏသွူ။ 47ခွေဒေါ့ꩻဖေႏသီ အမွေးအမဲဉ်ႏ။ ကယွုမ်းဒါႏ ဝွေꩻဗွေႏသားနဝ်ꩻ လꩻထာဝရအသက်သွူ။ 48ခွေနဝ်ꩻထွာ အသက်တခိုးသွူ။ 49သီမွိုးဖြား ဖါဖြားစိုးနဝ်ꩻ အံႏဗာႏလဲဉ်း မန္နတခိုး၊ ကန္တာရ တခြာကို၊ ကွဲႏတွော့ꩻ ဝွေꩻသီး သီထိုꩻလဲဉ်းသွူ။ 50ကွဲႏတွော့ꩻ ပါꩻမုဲင်ꩻအံႏဗာႏ တခိုးအစား ကအဝ်ႏ ခမ်းထီမို့ꩻလောင်း လင်ꩻလွဉ်နဝ်ꩻ အီႏတသီဗာႏတဝ်းသွူ။ 51အဝ်ႏခမ်းထီမို့ꩻလောင်း ကကျွလင်ꩻလွဉ်ဒါႏ အသက်မွန် တခိုးနဝ်ꩻနဝ်ꩻ ထွာဒျာႏခွေသွူ။ သီမဉ်ႏအံႏ တခိုးယိုနဝ်ꩻ သီအသက် အီႏအဝ်ႏမွန် သေႏသေႏသွူ။ ခွေကအီႏဖေႏဒါႏ သီတခိုးနဝ်ꩻထွာ ခွေအယာႏ၊ ယံဖေႏ ကမ္ဘာႏလောကသား အသက်ကမွန်နဝ်ꩻ ခွေအီႏဖေႏနဝ်ꩻသွူ။
52တယ်ႏစစွဉ်ႏငဝ်းယိုနဝ်ꩻ သꩻလျားထာꩻတွော့ꩻ ဝွေꩻသီးကို အချင်ꩻချင်ꩻ ထေင်ငဝ်းအာအီ စွဉ်ႏဝင်ꩻသွူ။ ဝွေꩻသီးရီ၊ “နီအီႏအံႏတာႏ ပါꩻခိုယိုနဝ်ꩻ အီႏဖေႏနွောင်ꩻနီ ဝွေꩻအယာႏ နုဲင်းမုဲင်ꩻဟောင်း” နုဲင်းနဝ်ꩻသွူ။
53ဗွေႏယေသျု ဒေါ့ꩻဖေႏဝွေꩻသီး၊ “ခွေဒေါ့ꩻဖေႏသီ အမွေးအမဲဉ်ႏ။ သီမဉ်ႏတအံႏတဝ်း လိုꩻပိုခိုအယာႏတွော့ꩻ မဉ်ႏတအွꩻတဝ်း ဝွေꩻအသွီႏနဝ်ꩻ သီနမ်း အီႏတလꩻတဝ်း အသက်သွူ။ 54လိုꩻကအံႏ ခွေအယာႏတဲင် ကအွꩻခွေအသွီႏနဝ်ꩻ လꩻထာဝရ အသက်တွော့ꩻ အဆုဲင်ꩻသွတ်ꩻ မွူးနီꩻ ခွေအီႏမာꩻထွိုင်ႏမွန်ဖေႏ ဝွေꩻအသက်သွူ။ 55ပွိုးတွော့ꩻ ခွေအယာႏနဝ်ꩻထွာ ထာꩻအံႏအစဲစ်၊ ခွေသွီႏနဝ်ꩻထွာ အွꩻခရာႏအစဲစ်သွူ။ 56လိုꩻကအံႏ ခွေအယာႏတွော့ꩻ အွꩻခွေအသွီႏနဝ်ꩻ အသက်အဝ်ႏမွန်သော့ꩻ ခွေအကိုတဲင် ခွေအုံငီꩻသော့ꩻ ဝွေꩻသီးအကိုသွူ။ 57အသက်ကအဝ်ႏမွန်ဒါႏ ဖါတောႏနဝ်ꩻ အွဉ်ႏစွꩻလွဉ်ခွေတဲင် ကွပ်ပွိုး ဝွေꩻဗွေႏအတွက် ခွေနဝ်ꩻတဲ့ အသက်အဝ်ႏမွန်သွူ။ ဗွိုန်နုဲင်းနဝ်ꩻနေနေ ပါꩻမုဲင်ꩻအံႏခွေနဝ်ꩻ ကွပ်ပွိုး ခွေတွော့ꩻ အသက်အီႏအဝ်ႏမွန်သွူ။ 58နဝ်ꩻထွူ တခိုးယိုထွာဒျာႏ အဝ်ႏခမ်းထီမို့ꩻလောင်း လင်ꩻလွဉ်သွူ။ တခိုးနဝ်ꩻနဝ်ꩻ တဗွိုန်နုဲင်းတဝ်း သီမွိုးဖြား ဖါဖြားသီး ကအံႏလဲဉ်းဒါႏနဝ်ꩻသွူ။ ဆုဲင်ꩻနဝ်ꩻ အသီထိုꩻဒျာႏ၊ ကွဲႏတွော့ꩻ လိုꩻကအံႏ တခိုးယိုနဝ်ꩻ အသက်အီႏအဝ်ႏမွန် သေႏသေႏ” နုဲင်းနဝ်ꩻသွူ။
59နုဲင်းဝွေꩻဗွေႏ သွဉ်သင်ဖေႏဗာႏဖိုလဲဉ်း ဝေင်ꩻကပေရနောင် တရာꩻစရွပ်ကိုအတွိုင်ꩻ ဗွေႏယေသျု ဒေါ့ꩻနုဲင်းယိုနဝ်ꩻသွူ။
ထာဝရအသက်ငဝ်းဩဝါဒဖုံႏ
60ဝွေꩻဗွေႏ တပဲ့တောႏဖုံႏ ဟွိုန်ဗာႏ ငဝ်းဩဝါဒ နုဲင်းယိုနဝ်ꩻ အာဖြာꩻတန်တဲင်ဒေါ့ꩻ၊ “ထာꩻသွဉ်သင် နုဲင်းယိုနဝ်ꩻ ယပ်ꩻခုဲင်ႏငါႏလွဉ်ꩻသွူ။ ပါꩻမုဲင်ꩻ အီႏလွောက်ꩻနာႏလွဉ်ꩻနွောင်ꩻ ငဝ်းဩဝါဒနဝ်ꩻဟောင်း” နုဲင်းနဝ်ꩻသွူ။
61ပွိုင်းဝွို့တွမ်ႏ ယိုခရာႏ ဝွေꩻသီး အဝ်ႏသောင်ခြင်ꩻ ထာꩻဖုံႏနဝ်ꩻ ပါꩻမုဲင်ꩻတဲ့ တဒေါ့ꩻနယ်တဝ်း စွဉ်ႏတဲ့ ဗွေႏယေသျုအဝ်ႏသေ၊ နဝ်ꩻမꩻ ဝွေꩻဗွေႏ ဒေါ့ꩻဖေႏဝွေꩻသီး၊ “ကွပ်ယိုနဝ်ꩻမ မဉ်မာꩻသꩻကုဲင်ထိုꩻ သီဟောင်း။ 62တွိုႏနဝ်ꩻ သီမဉ်ႏထီႏ လိုꩻပိုခို ထင်ႏသဲင်ꩻချာ ဝွေꩻကအဝ်ႏဒါႏ ခင်ႏလမ်း အရီးခါနဝ်ꩻ သီအီႏထင်း နုဲင်းမုဲင်ꩻဟောင်း။ 63နုဲင်းကဖေႏဒါႏ အသက်နဝ်ꩻထွာဒျာႏ ဗွေႏဘုရာꩻ ဝိညာဉ်ႏတောႏ။ လိုꩻတန်ꩻခိုꩻနဝ်ꩻ တမာꩻနွောင်ꩻတဝ်း တစွိုးစွိုးသွူ။ ငဝ်းဖုံႏ ခွေကဒေါ့ꩻဖေႏလဲဉ်းဒါႏ သီနဝ်ꩻ ဗွေႏဘုရာꩻ အီလွဉ်ဖေႏဒျာႏ အသက်ဝိညာဉ်ႏသွူ။ 64ကွဲႏတွော့ꩻ သီအကို လိုꩻယင်ဟန်ႏနဝ်ꩻ တယွုမ်းတဝ်း” နုဲင်းနဝ်ꩻသွူ။ ( ပါꩻအဖြာꩻ တယွုမ်းတဝ်းတွော့ꩻ သစ္စာႏအီႏဖေါက် ဝွေꩻဗွေႏနဝ်ꩻ ဗွေႏယေသျု အဝ်ႏသေလဲဉ်း အစကာႏသွူ။) 65နဝ်ꩻမꩻ ဝွေꩻဗွေႏဒေါ့ꩻသွုပ်၊ “ပေါ့ꩻဖါတောႏ တဖေႏတဝ်းဝွေꩻသီး အခွင်ꩻနဝ်ꩻ ပါမုဲင်ꩻတဖြာꩻ တလွဉ်ထေ့နွောင်ꩻတဝ်း ခွေထျꩻ ခွေအွဉ်ႏဒေါ့ꩻနယ် ထွူလဲဉ်းသီ” နုဲင်းနဝ်ꩻသွူ။
66ကွပ်ပွိုး ယိုအတွက် လိုꩻအာဖုံႏ ကလွေꩻလွဉ်ꩻဒါႏ ဗွေႏယေသျုနဝ်ꩻ ခွယ်ꩻချာတဲင် လွေꩻလွဉ်ꩻထဲင်းတဝ်းဒွုမ် ဝွေꩻဗွေႏသွူ။ 67နဝ်ꩻမꩻ ဝွေꩻဗွေႏရီ တပဲ့တောႏ တဆီနီဖြာꩻ၊ “သီဖုံႏနဝ်ꩻတဲ့ မဉ်ထန်ႏလွေꩻထိုꩻ နုဲင်းနဝ်ꩻ နေနေနဲ့ဟောင်း” နုဲင်းနဝ်ꩻသွူ။
68 #
မ ၁၆:၁၆၊ မာ ၈:၂၉၊ လု ၉:၂၀။ သိမုန်ပေတရု လဝ်းဖြေႏချာ ဝွေꩻဗွေႏ၊ “ဗွေႏ၊ နီအီႏလွေꩻထိုꩻဗာႏ ပါꩻမုဲင်ꩻထျꩻဟောင်း၊ ငဝ်းဖုံႏကဖေႏဒါႏ ထာဝရအသက်နဝ်ꩻ အဝ်ႏဒျာႏ နီဗွေႏထျꩻလွုမ်ꩻသွူ။ 69နီဗွေႏနဝ်ꩻ အဝ်ႏဗွေႏထာဝရဘုရာꩻထျꩻ ကျွꩻလွဉ် ဗွေႏကြောင်းစင် တပါꩻကျောင်ꩻ ယိုခါ နီယွုမ်းတဲင် သေဗာႏလဲဉ်း” နုဲင်းနဝ်ꩻသွူ။
70ဗွေႏယေသျုလဝ်းချာ၊ “ကလွိုက်ဒါႏသီ တဆီနီဖြာꩻနဝ်ꩻ ခွေဒျာႏ တမွေးတဝ်းဟောင်း၊ ကွဲႏတွော့ꩻ သီအကိုတဖြာꩻနဝ်ꩻ ထွာဒျာႏ လူꩻကုဲင်တန်” နုဲင်းနဝ်ꩻသွူ။ 71ဝွေꩻဗွေႏ ကအဝ်ႏဒေါ့ꩻနဝ်ꩻ ပွိုင်းဝွို့တွမ်ႏ သိမုန် သျာကရုတ် ပိုခို ယုဒခရာႏဒျာႏသွူ။ ပွိုးယုဒနဝ်ꩻ လဲင်ꩻထွာသွူ တပဲ့တောႏဖုံႏ တဆီꩻနီကို တဖြာꩻစွဉ်ႏတဲ့ သစ္စာႏအီႏဖေါက်ဒျာႏ ဝွေꩻဗွေႏ အတွက်သွူ။
ទើបបានជ្រើសរើសហើយ៖
ယောဟန် 6: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.