လုကာ 20
20
ရီပွိုင်းဝွို့တွမ်ႏဗွေႏယေသျုဩဇာႏအာႏဏာႏခရာႏ
(မတဲ ၂၁:၂၃–၂၇။ မာကု ၁၁:၂၇–၃၃)
1တနီꩻသားနဝ်ꩻ ဗွေႏယေသျု အဝ်ႏသွဉ်သင်ဖေႏ လိုꩻဖုံႏတဲင် အဝ်ႏဟော်ꩻဖေႏ သတင်ꩻဟဝ်တရာꩻ၊ ဗိမာန်ႏတောႏ ကျောင်ꩻကိုချိန်ႏ ယဇ်ပရောဟိတ်တန်ဖုံႏ တွမ်ႏကျမ်ꩻဒါႏဆရာႏဖုံႏစုဗူႏ ပါစွဉ်ႏလိုꩻတန်ဖုံႏတွော့ꩻ လွဉ်တဲင်၊ 2ဒေါ့ꩻဖေႏဝွေꩻဗွေႏ၊ “နာꩻမာꩻထာꩻ နုဲင်းယိုဖုံႏနဝ်ꩻ လꩻအခွင်ꩻ မုဲင်ꩻကိုဟောင်း။ ပါꩻမုဲင်ꩻဖေႏနာꩻ အခွင်ꩻစားယိုဟောင်းနဝ်ꩻ ဒေါ့ꩻနယ်နီမွိုင်” နုဲင်းနဝ်ꩻသွူ။
3ဗွေႏယေသျု လဝ်းချာဝွေꩻသီး၊ “ယိုခါ ခွေအီႏရီက သီတစွိုး။ ဒေါ့ꩻနယ်ခွေ။ 4ယောဟန်ကဖေႏဒါႏ ဗတ္တိဇံႏ ထီမင်္ဂလာႏနဝ်ꩻ လꩻလွဉ်အခွင်ꩻ ဗွေႏဘုရာꩻထျꩻနဲ့၊ မဉ်ႏမွေးတဝ်း လိုꩻဖုံႏထျꩻနဲ့ဟောင်း” နုဲင်းနဝ်ꩻသွူ။
5ဝွေꩻသီး အကိုစတဲင် ထေင်ငဝ်းအာချာလို့စွဉ်ႏဝင်ꩻ၊ “နီအီႏရိုꩻဖေႏဗာႏ နုဲင်းမုဲင်ꩻဟောင်း။ နီမဉ်ႏရိုꩻ၊ ‘အဝ်ႏဗွေႏဘုရာꩻထျꩻ’ နုဲင်းနဝ်ꩻနဝ်ꩻ ဝွေꩻအီႏရိုꩻ၊ ‘ပေါ့ꩻနုဲင်းနဝ်ꩻ ပွိုးတမုဲင်ꩻ သီတယွုမ်းတဝ်းတွိုႏ ယောဟန်ဟောင်း’ နုဲင်းနဝ်ꩻသွူ။ 6ကွဲႏတွော့ꩻ နီမဉ်ႏရိုꩻ၊ ‘အဝ်ႏလိုꩻထျꩻလွဉ်’ နုဲင်းနဝ်ꩻနဝ်ꩻ ပွိုးတွော့ꩻ ဝွေꩻသီး အဝ်ႏလက်ခံႏ ယောဟန်နဝ်ꩻထွာ ပရောဖဲစ်တပါꩻ အတွက် လိုꩻစွိုꩻယိုဖုံႏနဝ်ꩻ အီႏနုဲင်ႏနီ တွမ်ႏလုံးတူႏ” နုဲင်းနဝ်ꩻသွူ။ 7နဝ်ꩻမꩻ “လꩻလွဉ် ပါꩻမုဲင်ꩻထျꩻနဝ်ꩻ နီတသေတဝ်း” ဝွေꩻသီးလဝ်းချာ နုဲင်းနဝ်ꩻသွူ။
8နဝ်ꩻမꩻ ဗွေႏယေသျု ဒေါ့ꩻဖေႏဝွေꩻသီး၊ “ပေါ့ꩻနုဲင်းနဝ်ꩻနဝ်ꩻ ခွေကအဝ်ႏမာꩻဒါႏ ထာꩻယိုဖုံႏနဝ်ꩻ ခွေလꩻအခွင်ꩻမုဲင်ꩻကိုနဝ်ꩻ ခွေအီႏတဒေါ့ꩻနယ်တဝ်းသီ” နုဲင်းနဝ်ꩻသွူ။
တဗဲစ်ဥယျာဉ်ႏခြံခတ်ꩻသားဥပမာႏ
(မတဲ ၂၁:၃၃–၄၆။ မာကု ၁၂:၁–၁၂)
9 # ဟေသျာ ၅:၁။ နဝ်ꩻထွူ ဗွေႏယေသျု ဒေါ့ꩻဖေႏလိုꩻဖုံႏ စွဉ်ႏငဝ်းဥပမာႏ နုဲင်းယို။ “တလဲင်ႏသား ပါꩻတဖြာꩻနဝ်ꩻ ဆို့ꩻတဗဲစ်ဥယျာဉ်ႏခြံ တခြံတဲင် ခတ်ထိုꩻဖေႏ ကောခတ်ခြံသား စူကိုထွူ ထန်ႏသဲင်ꩻထိုꩻ အလမ်းနဝ်ꩻ အချိန်ႏညတန်သွူ။ 10ဒဲ့ꩻစုသိမ်ꩻ အရာႏ ထွိုင်ႏဖျော်လွဉ်ချိန်ႏ ဝွေꩻအွဉ်ႏစွꩻလွေꩻ အသွဉ်းတဖြာꩻ ခြံခတ်ꩻသားထျꩻတဲင် ဖေႏကလꩻ ဝွေꩻခြံခတ်ꩻခ တဗဲစ်ရာႏနဝ်ꩻသွူ။ ကွဲႏတွော့ꩻ ခြံခတ်ꩻသားဖုံႏနဝ်ꩻ တွဲႏဆွုမ်ႏအသွဉ်းတဲင် အွဉ်ႏစွꩻသဲင်ꩻခြေင်ချာ ဝွေꩻနဝ်ꩻသွူ။ 11နဝ်ꩻမꩻ ခြံဗွေႏနဝ်ꩻ ဝွေꩻအွဉ်ႏစွꩻလွေꩻဖျင် သွဉ်းအလင်တဖြာꩻသွူ။ ကွဲႏတွော့ꩻ ခြံခတ်ꩻသားဖုံႏနဝ်ꩻ တွဲႏဆွုမ်ႏပါဝွေꩻ၊ မာꩻဝင်ꩻသꩻဝွေꩻတဲင် အွဉ်ႏစွꩻသဲင်ꩻခြေင်ချာဒျာႏသွူ။ 12နဝ်ꩻထွူ ဝွေꩻအွဉ်ႏစွꩻလွေꩻဖျင် သွဉ်းတတိယ တဖြာꩻတဲင် ခြံခတ်ꩻသားဖုံႏ မာꩻဆာကဲင် ဝွေꩻနေနေတဲင် နုဲင်ႏထန်ႏစွဉ်ႏဝွေꩻ ခြံကောင်းထန်ႏဖဲ့ꩻသွူ။ 13တွိုႏနဝ်ꩻ တဗဲစ်ခြံဗွေႏဒေါ့ꩻ၊ ‘ခွေအီႏမာꩻဗာႏ နုဲင်းမုဲင်ꩻဟောင်း။ ခွေအီႏအွဉ်ႏစွꩻလွေꩻ ခွေကရက်ငါႏ ပိုခိုရင်ꩻ။ အမဲဉ်ႏနဝ်ꩻ ဝွေꩻသီး အီႏရိုႏသေႏဗာႏဝွေꩻ’ နုဲင်းနဝ်ꩻသွူ။ 14ကွဲႏတွော့ꩻ ခြံခတ်သားဖုံႏ ထွိုင်ႏထီႏဝွေꩻနဝ်ꩻ ဝွေꩻသီးတဖြာꩻ တွမ်ႏတဖြာꩻ ဒေါ့ꩻဖေႏလို့ဝင်ꩻ၊ ‘ယိုနဝ်ꩻထွာ ဥယျာဉ်ႏခြံဗွေႏ အပိုခိုရင်ꩻ။ အွဉ်ဝင်ꩻ မာꩻသီတွမ် ဝွေꩻတွော့ꩻ ဝွေꩻဥစ္စာႏပစ္စေꩻနဝ်ꩻ အီႏမာꩻထွာတွမ် နီထာꩻခြိုꩻ’ နုဲင်းနဝ်ꩻသွူ။ 15နဝ်ꩻမꩻ ဝွေꩻသီးစွီႏထန်ႏဝွေꩻ တဗဲစ်ဥယျာဉ်ႏ ခြံကောင်းထန်ႏတဲင် မာꩻသီထိုꩻစွဉ်ႏ ဝွေꩻနဝ်ꩻသွူ။
ဗွေႏယေသျုရီ၊ “တွိုႏနဝ်ꩻ တဗဲစ်ခြံဗွေႏ အီႏမာꩻခြံခတ်ꩻသားဖုံႏ နုဲင်းမုဲင်ꩻဟောင်း။ 16“ဝွေꩻအီႏလွဉ်တွော့ꩻ မာꩻသီထိုꩻ လိုꩻစားနဝ်ꩻဖုံႏတဲင် တဗဲစ် ဥယျာဉ်ႏခြံနဝ်ꩻ ခတ်ꩻဖေႏတော ခြံခတ်သားအလင်ဖုံႏ” နုဲင်းနဝ်ꩻသွူ။
လိုꩻဖုံႏထွိုင်ႏဟွိုန် နုဲင်းယို ဝွေꩻသီးဒေါ့ꩻ၊ “ဖေႏကထွာမွေးမွိုန်း နုဲင်းနဝ်ꩻဟုဲင်း” နုဲင်းနဝ်ꩻသွူ။
17 #
သာ ၁၁၈:၂၂။ ဗွေႏယေသျု ထွားဝွေꩻသီးတဲင်ရီ၊ “ပေါ့ꩻနုဲင်းနဝ်ꩻနဝ်ꩻ လိတ်ကျမ်ꩻယို အမဉ်ရိုꩻအဓိပ္ပါယ်ႏ နုဲင်ႏမုဲင်ꩻဟောင်း။
‘ကတယ်ႏသေꩻခါꩻဒါႏလမ်း လုံးတူႏ အသွုံꩻတကျတဝ်း ကပယ်ႏသေꩻခါꩻဒါႏနဝ်ꩻ၊
အီႏသွုံꩻချာအီ အရေꩻတန်သွတ်ꩻ ခင်ႏလမ်း’ နုဲင်းနဝ်ꩻသွူ။
18လိုꩻကထဲ့လူးဒါႏ လုံးတူႏနဝ်ꩻစွုမ်ႏဖြာꩻ အီႏထို့ပဉ်ကွို့ꩻကွို့ꩻတဲင် လုံးတူႏနဝ်ꩻ မဉ်ႏထဲ့လူး ပါꩻတဖြာꩻဖြာꩻလောင်း၊ ပါꩻနဝ်ꩻတဲ့ အီႏပဲစ်ꩻသော့ꩻထိုꩻ ဟံႏဖွန်ႏကို” နုဲင်းနဝ်ꩻသွူ။
ရီပွိုင်းဝွို့တွမ်ႏဖေႏဗာႏဒါႏအခွဉ်ႏခရာႏ
(မတဲ ၂၂:၁၅–၂၂။ မာကု ၁၂:၁၃–၁၇)
19ဝွေꩻဗွေႏ ကဒေါ့ꩻနယ်ဖေႏလဲဉ်း ငဝ်းဥပမာႏယိုနဝ်ꩻ ပွိုးတွော့ꩻ အဝ်ႏဒေါ့ꩻခတ်ꩻ ဝွေꩻသီးကျောင်ꩻ ကျမ်ꩻဒါႏဆရာႏဖုံႏတွမ်ႏ ယဇ်ပရောဟိတ်တန်ဖုံႏ အဝ်ႏသေနဝ်ꩻမꩻ ဝွေꩻသီး ကျံႏဆွမ်ꩻစွော့ꩻ ဗွေႏယေသျုသွူ။ ကွဲႏတွော့ꩻ ဝွေꩻသီး အဝ်ႏငမ်းသꩻဗာႏ လိုꩻဖုံႏသွူ။ 20နဝ်ꩻမꩻ ဝွေꩻသီး အဝ်ႏထုမ်ႏ အဖဲင်ႏရော့ꩻသွူ။ ဝွေꩻဗွေႏနဝ်ꩻ ဖေႏနေး ဝွေꩻသီး ကဆွမ်ꩻအပ်လꩻ လိုꩻအာႏဏာႏသား ကထွာရောမခွန်ခံႏ တန်ꩻခိုꩻအဝ်ႏသားစူကိုနဝ်ꩻ၊ ဝွေꩻသီးနမ်းနဝ်ꩻ ကဉ်းနုဲင်းမာꩻထွာ နုဲင်းလိုꩻဟဝ်ဖုံႏ တဲင် လိုꩻယင်ဟန်ႏနဝ်ꩻ ဝွေꩻသီး ဖေႏနေး ရွဉ်မွဉ်တွော့ꩻ ဖေႏကဒေါင်စွဉ်ႏ ငဝ်းရီဖုံႏနဝ်ꩻ ဝွေꩻသီးအွဉ်ႏစွꩻလွေꩻ လိုꩻစားနဝ်ꩻဖုံႏ ဗွေႏယေသျုထျꩻသွူ။ 21တသျိုယိုဖုံႏနဝ်ꩻ ဒေါ့ꩻဖေႏဗွေႏယေသျု၊ “ဆရာႏ၊ နုဲင်းနီဗွေႏ ကဒေါ့ꩻဒါႏတွမ်ႏ ထာꩻသွဉ်သင်ဖုံႏနဝ်ꩻ ထွာအမဲဉ်ႏဖုံႏကျောင်ꩻ နီအဝ်ႏသေသွူ။ နုဲင်းလိုꩻအရန်းလွုမ်ꩻနဝ်ꩻ နီဗွေႏ တမတ်လောက် တဝ်းကျောင်ꩻ နီအဝ်ႏသေ၊ ကွဲႏတွော့ꩻ လိုꩻဖုံႏတာႏနဝ်ꩻတဲ့ သွဉ်သင်မဲဉ်ႏလွဉ်ꩻစွဉ်ႏ ဗွေႏဘုရာꩻ အလိုႏတောႏနဝ်ꩻသွူ။ 22အခွဉ်ႏကဖေႏဗာႏဒါႏ ရောမ ဧကရာဇ်ခွန်တန်နဝ်ꩻ ဆန်ထိုꩻနေ နီပညတ်တရာꩻ၊ မဉ်ႏမွေးတဝ်း ဆန်ထိုꩻတဝ်းဟောင်း ဒေါ့ꩻနယ်ဖေႏနီ” နုဲင်းနဝ်ꩻသွူ။
23ကွဲႏတွော့ꩻ ဗွေႏယေသျု သေဖြောင်လဲဉ်း ဝွေꩻသီး ထာꩻကျံႏနဝ်ꩻမꩻ ဒေါ့ꩻဖေႏဝွေꩻသီး၊ 24“အွဉ်ႏနယ်ခွေ ရွဉ်ဒင်္ဂါꩻ တဗီႏမွိုင်၊ ယိုအလောင်းနဝ်ꩻ ပါꩻမုဲင်ꩻမဲ့ငါတွမ်ႏ ပါꩻမုဲင်ꩻမဉ်ꩻဟောင်း” နုဲင်းနဝ်ꩻသွူ။
ဝွေꩻသီးလဝ်းချာ၊ “ဧကရာဇ်ခွန်တန် မဲ့ငါစွဉ်ႏ အမဉ်ꩻ” နုဲင်းနဝ်ꩻသွူ။
25နဝ်ꩻမꩻ ဗွေႏယေသျုဒေါ့ꩻ၊ “မွေးလဲဉ်း၊ ပေါ့ꩻနုဲင်းနဝ်ꩻနဝ်ꩻ ဧကရာဇ်ခွန် ထာꩻခြိုꩻနဝ်ꩻ ဖေႏချာသွော့ ဧကရာဇ်ခွန်တန်တဲင် ဗွေႏဘုရာꩻထာꩻခြိုꩻနဝ်ꩻ ဖေႏသွော့ ဗွေႏဘုရာꩻဟုဲင်း” နုဲင်းနဝ်ꩻသွူ။
26လိုꩻဖုံႏဆꩻငါနဝ်ꩻ ဝွေꩻသီး ဆွမ်ꩻအီဝွေꩻဗွေႏ တစွိုးစွိုးငါတဲ့ တလꩻတဝ်း၊ နဝ်ꩻမꩻ ဝွေꩻသီး အံႏဖြာႏငါႏ ဝွေꩻဗွေႏ ငဝ်းဖြေႏနဝ်ꩻမꩻ အုံတေ့ꩻစွဉ်ႏဖုံႏသွူ။
ရီပွိုင်းဝွို့တွမ်ႏအဝ်ႏထာꩻသီထွိုင်ႏမွန်ခရာႏ
(မတဲ ၂၂:၂၃–၃၃။ မာကု ၁၂:၁၈–၂၇)
27 #
တ ၂၃:၈။ နဝ်ꩻထွူ သာဒုကဲဖုံႏ ယင်ဟန်ႏ ကရိုꩻဒါႏ လိုꩻယို အဝ်ႏထာꩻသီကို အီတထွိုင်ႏမွန် လွဉ်ချာတဝ်းသားနဝ်ꩻ လွဉ်ထေ့ ဗွေႏယေသျု ထျꩻတဲင်ဒေါ့ꩻ 28#ဟော်ꩻ ၂၅:၅။ “ဆရာႏ၊ နီတာႏနဝ်ꩻ မောသျေ တဲမ်းသေꩻခါꩻဖေႏ ပညတ်ကျမ်ꩻ နုဲင်းယို၊ ‘ပါꩻခိုတဖြာꩻ အမဉ်ႏသီထိုꩻတဲင် ကအဝ်ႏကုဲင်ဒါႏ အမာနဝ်ꩻ အပိုမဉ်ႏအဲဉ်ထဝ်း၊ ဖေႏနေးဝွေꩻသီး ကလꩻယင်းပိုဖုံႏ အီႏမတ်ဗာႏ ပါꩻခိုကသီထိုꩻလဲဉ်း အပိုဖုံႏနဝ်ꩻ ပါꩻခိုအဖူးခိုနဝ်ꩻ တောႏလမ်း မင်္ဂလာႏဗာႏတွမ်ႏ မဲမုဲင်းမူႏ’ နုဲင်းနဝ်ꩻသွူ။ 29တလဲင်ႏသားနဝ်ꩻ ပါꩻတဖူးဝေး အဝ်ႏဝင်ꩻနွတ်ꩻ၊ အတန်သွတ်ꩻနဝ်ꩻ တောႏလမ်း မင်္ဂလာႏတဲင် အသီထိုꩻ အပိုဖုံႏအဲဉ်ထဝ်း၊ 30နဝ်ꩻထွူ ဒုတိယတဖြာꩻ တောႏလမ်းတွမ်ႏ ပါꩻမူႏတဲင်၊ 31နဝ်ꩻထွူ တတိယတဖြာꩻနဝ်ꩻတဲ့ တောႏလမ်းတွမ်ႏ ပါꩻမူႏနဝ်ꩻ။ ထွာဗွိုန် နုဲင်းနဝ်ꩻနဝ်ꩻ ဝင်ꩻနွတ်ꩻလို့တွော့ꩻ ဝွေꩻသီးနဝ်ꩻ အပိုတအဲဉ်ထဝ်းတဲင် အသီထိုꩻလို့စွဉ်ႏသွူ။ 32အဆုဲင်ꩻသွတ်ꩻ ပါꩻမူႏနဝ်ꩻတဲ့ သီထိုꩻသွူ။ 33ယိုခါ၊ ဝွေꩻသီး ဝင်ꩻနွတ်ꩻလွုမ်းနဝ်ꩻ တောႏလမ်းလဲဉ်း ပါꩻမူႏနဝ်ꩻသွူ၊ အဝ်ႏထာꩻသီ ထွိုင်ႏမွန်လွဉ်ချာ အနီꩻနဝ်ꩻ ပါꩻမူႏယို အီႏထွာ ပါꩻမုဲင်ꩻမာဟောင်း” နုဲင်းနဝ်ꩻသွူ။
34ဗွေႏယေသျု လဝ်းချာဝွေꩻသီး၊ “စိုးယိုနဝ်ꩻ လိုꩻမူႏတွမ်ႏ လိုꩻခို အဝ်ႏတောႏလမ်းဝင်ꩻ စွဉ်ႏတဲ့၊ 35လိုꩻခိုတွမ်ႏလိုꩻမူႏ ကထွိုက်တန်ႏဒါႏ အဝ်ႏထာꩻသီ ကအီႏထွိုင်ႏမွန်လွဉ်ဒါႏ စွိုးငါနဝ်ꩻ ထာꩻတောႏလမ်း အီႏတအဲဉ်ထဝ်းသွူ။ 36ဝွေꩻသီးနဝ်ꩻ အီႏဗွိုန်နုဲင်းဒျာႏ မို့ꩻလောင်းတမန်ဖုံႏတဲင် အီႏတသီနွောင်ꩻတဝ်းသွူ။ ဝွေꩻသီးနဝ်ꩻ ကွပ်ပွိုး အဝ်ႏထာꩻသီ ထွိုင်ႏမွန်လွဉ်လဲဉ်းအတွက် ဝွေꩻသီးနဝ်ꩻ ထွာဒျာႏ ဗွေႏဘုရာꩻ ပိုဖုံႏသွူ။ 37#ထလ ၃:၆။ အဝ်ႏထာꩻသီ ထွိုင်ႏမွန် လွဉ်ချာနဝ်ꩻ မောသျေခံႏနယ် စဲင်းဖေႏသက်သေႏသွူ။ ကျမ်ꩻပိုဒ် မေႏကခိုးဒါႏ ထာꩻပုန်ကို၊ ဝွေꩻကဒေါ့ꩻဒါႏ ဗွေႏဘုရာꩻနဝ်ꩻ ထွာဒျာႏနုဲင်း ‘အဗြာဟံဗွေႏဘုရာꩻ၊ ဣသဲစ်ဗွေႏဘုရာꩻ တွမ်ႏယာကုပ် ဗွေႏဘုရာꩻ’ နုဲင်းနဝ်ꩻသွူ။ 38ဝွေꩻဗွေႏနဝ်ꩻ ထွာဒျာႏ အသက်မွန်ဗွေႏဘုရာꩻ၊ လိုꩻသီဗွေႏဘုရာꩻ တမွေးတဝ်း၊ ပွိုးဝွေꩻဗွေႏထျꩻနဝ်ꩻ ကားကအဝ်ႏ အသက်အဝ်ႏမွန်ဒျာႏ” နုဲင်းနဝ်ꩻသွူ။
39ကျမ်ꩻဒါႏဆရာႏဖုံႏ ယင်ဟန်ႏနဝ်ꩻ ဒေါ့ꩻထန်ႏ၊ “ငဝ်းဖြေႏယံ၊ ဆရာႏဒျာႏ” နုဲင်းနဝ်ꩻသွူ။ 40ပွိုးနဝ်ꩻမꩻ ဝွေꩻသီး ရီထဲင်းဗွိုန်ႏတဝ်းဒွုမ် ဝွေꩻဗွေႏ ငဝ်းရီတစိꩻစိꩻသွူ။
ရီပွိုင်းဝွို့တွမ်ႏမေသျိယခရာႏ
(မတဲ ၂၂:၄၁–၄၆။ မာကု ၁၂:၃၅–၃၇)
41ဗွေႏယေသျု ရီဝွေꩻသီး၊ “မေသျိယနဝ်ꩻ အီႏဒေါ့ꩻနွောင်ꩻ ဒါဝိဒ်ပိုလီꩻစွိုးခွိုꩻ နုဲင်းမုဲင်ꩻဟောင်း။ 42#ထလ ၃:၆။ သာလံ ကျမ်ꩻအုပ်ကိုနဝ်ꩻ ဒါဝိဒ်နမ်းရိုꩻ၊
‘ထာဝရဘုရာꩻ ဒေါ့ꩻဖေႏခွေအဗွေႏ၊
အုံလင်ꩻသွော့ ခွေစူထွေဖဲ့ꩻယိုကို၊
43ဗꩻတွိုႏစွဉ်ႏ ခွေကအွဉ်ႏ နာꩻရန်ႏသူႏဖုံႏ နာꩻခင်ႏဆꩻလဟုဲင်း’ နုဲင်းနဝ်ꩻသွူ။
44ဒါဝိဒ်ဟဲ့ꩻဝွေꩻ၊ ‘ဗွေႏဘုရာꩻ’သွူ။ ပေါ့ꩻနုဲင်းနဝ်ꩻ မေသျိယနဝ်ꩻ ထွာနွောင်ꩻ ဒါဝိဒ်ပိုလီꩻစွိုးခွိုꩻ နုဲင်းမုဲင်ꩻဟောင်း” နုဲင်းနဝ်ꩻသွူ။
ဗွေႏယေသျုဖေႏသတိဆန်ကျမ်ꩻဒါႏဆရာႏဖုံႏ
(မတဲ ၂၃:၁–၃၆။ မာကု ၁၂:၃၈–၄၀)
45နုဲင်းလိုꩻဖုံႏ ကားကအဝ်ႏ ကနာႏဝွေꩻဗွေႏ ငဝ်းတွင်ꩻ ဗွေႏယေသျုဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ 46“သီအွဉ်ႏသတိ ဆန်သွော့ ကျမ်ꩻဒါႏဆရာႏဖုံႏ၊ ဝွေꩻသီးကွဉ်က ခွမ်ꩻလာꩻတန် ယွုံးဆွာꩻတဲင် ထောင်လွေꩻဒါႏ တဖူꩻလောင်းတွော့ꩻ ကျွိုက်နစ်သက်ငါႏ စွဉ်ႏထာꩻရိုႏသေႏ နုတ်ဆက်သော့ꩻ ဆေꩻတန်ꩻခါႏကို။ တရာꩻစရွပ်ကိုစွဉ်ႏ ပွယ်ꩻလမ်ꩻကိုနဝ်ꩻ လွိုက်သေꩻခါꩻဒါႏ ခင်ႏလမ်းဟဝ်သွူ။ 47ထူႏထိုꩻ မဲမုဲင်းမူႏ ထာꩻခြိုꩻဖုံႏတွော့ꩻ ရိမ်ထူႏထိုꩻ ဝွေꩻသီး လမ်းဖုံႏထွူတဲင် ဆုတောင်ꩻ ဆွာꩻနယ်ဒါႏ ဘုရာꩻသွူ။ ဝွေꩻသီး အပဲစ်တံႏနဝ်ꩻ အီႏဟုဲင်းလွိုလဲဉ်းက ဝင်ꩻဖုံႏ ကားကအဝ်ႏ” နုဲင်းနဝ်ꩻသွူ။
ទើបបានជ្រើសរើសហើយ៖
လုကာ 20: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.