يوحنا 3

1وكان في رئيس يهودي فريسي اسمه نيقوديموس. 2راح نيقوديموس لعند يسوع بالليل وقَلو: رابي، جماعتنا بِعرفوا إنو الله هو اللي عيّنك معلم لأنو فِش حدا بِقدر يعمل هادي الآيات اللي إنت عم تعملها إلا إذا كان الله معو. 3رد عليه يسوع وقَلو: عنجد بقُلَّك فِش حدا بِقدر يشوف ملكوت الله إذا ما انولدش من فوق. 4فقَلو نيقوديموس: كيف بِقدر الواحد ينولد وهو زلمة كبير؟ يعني الواحد بِقدر يرجع ع بطن إمو وينولد كمان مرة؟! 5قَلو يسوع: عنجد بقُلَّك، إذا الإنسان بنولدش من المي والروح بقدرش يدخل ع ملكوت الله. 6المولود من الناس هو بشر والمولود من الروح هو روحاني. 7تتعجبش عشان قلتلك إنو لازم تنولدوا من فوق. 8الروح زي الريح اللي بتتحرك ع خاطرها، بتسمع صوتها بس بتعرفش من وين أجت ولوين رايحة. وهيك كمان حالة كل واحد مولود من الروح. 9رد عليه نيقوديموس وقَلو: كيف يعني؟ 10قَلو يسوع: إنت معلم إسرائيل ومش فاهم هاي الأشياء؟ 11عنجد بقَلّك، حكينالكو إللي منعرفو وشهدنا باللي شفناه بس إنتو مش قابلين تصدقونا. 12إذا مش مصدقين الأشياء الأرضية فكيف بدكو تصدقوني بالأشياء السماوية؟ 13وفش حدا ارتفع للسما إلا ابن الإنسان اللي نزل من السما.

14وزي ما رفع موسى الحية في البرية رح يرتفع ابن الإنسان 15عشان كل واحد بآمن فيه رَح تكون إلو الحياة الأبدية. 16لأنو هاي هي الطريقة اللي حب الله فيها العالم. أعطانا ابنو الوحيد فكل واحد بآمن فيه بُوخذ الحياة الأبدية وبهلكش. 17لأنو الله بعت ابنو للعالم عشان يكون مخلص العالم مش قاضي العالم. 18واللي بآمن بالابن فش عليه دينونة بس الإنسان المش مؤمن صار محكوم عليه لأنو ما آمنش باسم ابن الله الوحيد. 19وهيك طريقة الدينونة: أجا النور عالعالم بس الناس حبو العتمة أكثر من النور لأنو أعمالهن شريرة. 20وكل واحد بِعمل أعمال عاطلة بِكرَه النور وبروحش لعندو عشان مَتنكشفش أعماله. 21بس اللي بِعمل الخير بروح لعند النور عشان تبين إنو أعمالو من الله.

22وبعد فترة راح يسوع وتلاميذه لمنطقة اليهودية وضل يسوع هناك وكان يعمّد. 23وكمان يوحنا كان يعمّد في عين نون. وهو محل قريب من منطقة ساليم ومحل ملان مي. وكانوا الناس يروحو لعند يوحنا عشان يتعمدوا. 24وقتها مكانوش بعدهن حاطين يوحنا في السجن.

25وتجادلو تلاميذ يوحنا مع واحد يهودي ع موضوع الطهارة. 26وفي ناس راحت لعند يوحنا وقالولو: رابي، الشخص اللي شهدتلو واللي كان معك جنب نهر الأردن هياه قاعد بعمّد والكل عم بروح لعندو. 27جاوبهن يوحنا وقَلهن: الإنسان بقدرش يوخذ إلا اللي الله بعطيه إياه. 28أكيد بتشهدوا إني قلت: أنا مش المسيح. أنا المبعوت قبلُه. 29العروس للعريس، والإشبيـن اللي بوقف جنب العريس وبِسمعلو بِفرح كثير بصوت العريس. وعشان هيك أنا فرحان كتير كتير. 30هو لازم يزيد وأنا لازم أقل.

31اللي جاي من فوق هو فوق كل الناس واللي من الأرض هو من أهل الأرض وبِحكي بمواضيع أرضية، اللي جاي من فوق هو فوق الكل. 32وشهد باللي شافه وسمعه بس فش حدا قابل شهادتُه. 33بس اللي بِقبل شهادته ببصم بالعشرة إنو الله صادق. 34واللي بعتو الله بِحكي كلام الله لأنو الله بعْطي الروح بدون حدود. 35الآب بِحب الابن وحط كل إشي تحت إيدو. 36المؤمن بالابن عندو حياة أبدية، واللي بكون متمرد على الابن . . . بدال ما يشوف الحياة رَح يحل عليه غضب الله.

ទើបបានជ្រើសរើសហើយ៖

يوحنا 3: CGB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល