لوقا 21

1وإطّلع يسوع وشاف الأغنيا عم بحطو مصاري في صندوق التبرعات. 2وشاف كمان مره أرملة وفقيـرة عم بتحط مصاري، حطت شقفتين نحاس زغار، 3فقال: بأكدلكو إنو هاي الأرملة الفقيـرة حطت أكثر من كل اللي تبرعوا 4لأنهن كلهن اعطوا من شو في زيادة عندهن بس هي تبرعت وهي محتاجة وحطت كل مصروف البيت.

5وكان في ناس عم بتقول إنو حجارة الهيكل حلوة ومزينة بتحف من هدايا النذور. فقال يسوع: 6رَح تيجي أيام وينهدم كل اللي شايفينو ومَ يضلش حجر على حجر.

7فسألوه وقالو: يا معلم، إيمتـى رَح يصير هادا الحكي وشو العلامة اللي بتدل إنو قرّب الوقت؟ 8رد يسوع وقال: ديروا بالكو حدا يضحك عليكو لأنو كتار رَح ييجو عاملين حالهن المسيح ويقولو: "أنا هو، وقرّب الوقت" بس تروحوش وراهن. 9ومَ تخافوش لما بتسمعو بالحروب والثورات لأنو لازم هاي الأشياء تصير بالأوّل بس النهاية مش طوالي بعدها. 10وسيعتها قال يسوع: رَح يتحاربو الممالك والشعوب ضد بعض. 11وتصير هزات أرضية قوية، وفي بلاد رَح تصير فيها مجاعات وأوبئة. ورَح ترتعب الناس ورَح يكون في إشارات كبيـرة في السما. 12وقبل كل هاي الأشياء رَح يعتقلوكو ويضطهدوكو ويودوكو على الكُنُس وعلى السجون وبسببي رَح يجروكو قدام الملوك والحكام. 13وهيك رَح يكون عندكو فرصة إنكو تعلنوا إيمانكو. 14وبلاش ينشغل فكركو بكيف إدافعو عن حالكو 15لأنو أنا رَح أعطيكو حكمة في الكلام. وفي مقاومين بس مش رَح يقدر ولا واحد منهن يجادل ضد كلامكو أو يهدم اللي بتحكوه. 16ورَح توقعو بإيدين الحكام لأنو أهلكو وإخوتكو وقرايبكو وصحابكو فسدوا عليكو. ورح ينقتل ناس منكو. 17وبسببي رَح يكرهوكو كل الناس 18بس مش رَح تنأذي شعرة من روسكو 19وبثباتكو بتكسبو حالكو.

20ولما تشوفو أنو الجيش بدي يحوّط أورشليم سيعتها افهموا أنو أجا وقت دمارها. 21وقتها خلي الناس اللي في منطقة اليهودية يهربوا ع الجبال وخلي اللي جوات أورشليم يطلعوا منها واللي في المزارع م يرجعوش. 22لأنو هاي الأيام أيام عقاب رح تتحقق فيها كل الأشياء اللي انكتبت. 23يا ويل الستات الحبالى واللي بِرَضعو في هديك الأيامات. لأنو رَح تيجي مصيبة كبيـرة ع البلد ويحل الغضب ع هادا الشعب. 24ويندبحو بالسيف ويصيروا أسرى بين كل الشعوب وبتضل أورشليم مدعوس عليها من الشعوب لحد مَ يخلص وقتهن.

25ورَح تظهر علامات في الشمس والقمر والنجوم. ورَح تنضغط شعوب الأرض وتحتار من ضجة البحر وقوة الموج. 26والناس رَح تدوخ من الخوف ومن التفكيـر بشو رَح يصير بالعالم لأنو نجوم السما رَح تتـزلزل. 27سيعتها رَح يشوفو ابن الإنسان جاي على الغيم بقوة ومجد عظيم. 28ولما تبدا هاي الأشياء تتحقق وقفو واِرفعوا روسكو لفوق لأنكو قرّبتو تتحررو.

29وقلهن هادا المتَل: إطّلعو ع التينة وع باقي الشجر. 30لما بتشوفو إنو الشجرة صارت مطلعة ورق بتعرفو لحالكو أن قرّب الصيف. 31وكمان إنتو لما بتشوفو هاي العلامات عم بتصير اعرفو إنو مملكة الله صارت قريبة. 32بأكدلكو إنو قبل مَ يموت هادا الجيل رَح تتحقق كل هاي الأشياء. 33ورَح تنتهـي السما والأرض بس كلامي مش ممكن ينتهي.

34اِنتبهوا إنو فكركو مَ ينشغلش بالخمرة والسُّكر وهموم الدنيا وبعدين يفاجئكو هداك اليوم 35لأنو هداك اليوم مثل الفخ اللي رَح يكمش كل سكان الأرض. 36وعشان يكون عندكو القوة إنكو تهربوا من كل الأشياء اللي رَح تيجي وتوقفوا قدام ابن الإنسان اسهروا وصلوا كل الوقت.

37وفي النهار كان يسوع يعلّم في الهيكل وفي الليل كان ينام في جبل الزيتون. 38وكان كل الشعب ييجي الصبح بكير عشان يسمعوه في الهيكل.

ទើបបានជ្រើសរើសហើយ៖

لوقا 21: CGB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល