لوقا 22

1وقرّب عيد البيسح، وهو العيد اللي ممنوعه فيه خميـرة الخبـز. 2وكانوا رؤسا الكهنة وجماعة الصدوقيين قاعدين بتآمرو وبفكروا كيف يقتلوا يسوع لأنهن كانوا خايفين من الشعب. 3وركب الشيطان يهوذا. وهو واحد من الـ 12 تلميذ وبنادوه الإسخريوطي 4فراح يهوذا يتفق مع رؤسا الكهنة والقادة المسؤولين عن شرطة الهيكل ع الطريقة اللي يسلمهن فيها يسوع. 5فِرحوا واتفقوا يدفعولو مصاري. 6وبعد مَ اتفقوا معه صار يهوذا يدوّر ع الوقت المناسب عشان يسلمهن إياه بدون مَ يكون في ناس حوليه.

7وأجا العيد اللي بِمنعوا فيه خميـرة الخبـز وصار الوقت اللي لازم يدبحوا فيه خروف البيسـح. 8وبعت يسوع بطرس وُيوحنا وقلهن: روحو حضرولنا عشا البيسح عشان نوكل. 9سألوه: وين بدك نحضرو؟ 10قلهن: فتحو عينيكو وإنتو فايتين ع البلد فَ رَح تلاقو زلمة حامل جرة مي. إلحقوه وفوتوا ع البيت اللي بُدخُله. 11وقولو لصاحب البيت: المعلم بسألك: وين غرفة الضيوف اللي رَح يوكل فيها عشا البيسح مع تلاميذو؟ 12وهو رَح يأرجيكو في الطابق التاني غرفة كبيـرة ومفروشة. حضرو العشا هناك. 13فراحو وصار مِتِل مَ حكالهن يسوع وحضرو عشا البيسح.

14ولما أجا وقت عشا البيسح قعد يسوع مع الرسل عشان يوكلو. 15وقلهن: اشتهيت من كل قلبي آكل معكو هادا العشا قبل مَ أتعذب. 16وبقلكو مش رَح آكل مِتِلو كمان مرة لحد مَ يصير البيسح في مملكة الله. 17وحمل كاس وبعدين شكر وقال مرءوُ هاي الكاس وتقسموها بيناتكو 18وبقلكو إنو مش رَح أشرب من الثمر تبع الكرمة من إسه لحد مَ تيجي مملكة الله. 19ومسك شقفة خبـز وشكر وقطّعها وأعطى الشقف للتلاميذ. وقلهن: هادا هو جسدي اللي مقدم ذبيحة عشانكو. اعملوا هيك عشان تتذكروني. 20وكمان بعد العشا مسك الكاس وقال: هاي الكاس هي العهد الجديد بدمي اللي رَح ينسفك عشانكو. 21وهياه الزلمة اللي بخوني قاعد ع الطاولة معي. 22ابن الإنسان رَح يموت مِتِل مَ مكتوبلو بس يا ويل هداك الإنسان اللي بخونو. 23فبديو التلاميذ يتجادلوا بين بعض، مين فيهن اللي رَح يخون يسوع.

24وتجادلوا التلاميذ بين بعض مين المحسوب أعظم واحد فيهن. 25فقلهن يسوع: ملوك الدنيا بدهن يكونوا أسياد ع الناس وأصحاب السُّلطة في الدنيا بدهن اللقب "فاعل خيـر". 26بس إنتو مَ تكونوش هيك. خلي الكبيـر فيكو يكون كإنو الزغيـر والقائد كإنو خدّام. 27وُوقت الأكل مين هو الأعظم؟ المخدوم وِاللا الخَدَّام؟ بتوافقوا معي إنو المخدوم أعظم؟ بس أنا معكو كإني خدَّام. 28إنتو وقفتو معي في الأوقات الصعبة. 29وأنا رَح اعطيكو تملكو مِتِل مَ اعطاني الآب. 30عشان توكلو وتشربوا ع طاولتي في مملكتـي. ورَح تقعدوا على عروش وتحاكموا قبائل إسرائيل ال 12.

31يا سمعان . . . يا سمعان، هياه الشيطان صار طالب إنو يـهز كيانكو مِتِل مَ بهزو القمح في المزارع. 32بس أنا صليت عشانك عشان م تفقدش إيمانك. ولما بتوب ثبت إخوتك في الإيمان. 33فقلو بطرس: يا رب، أنا مستعد أروح معك ع السجن وع الموت. 34فقلو: اسمع يا بطرس، اليوم — قبل م يصيح الديك رَح تنكرني 3 مرات وتقول إنك بتعرفنيش.

35وقال يسوع للتلاميذ: احتجتو إشي لما بعتكو بدون مصاري وبدون شنطة وبدون صنادل؟ فقلولو: ولا إشي. 36قلهن: بس إسه اللي معو جُزدان خليه يوخدو وكمان اللي معو شنطة خليه يوخدها واللي معُش سيف خليه يبيع جاكيتو ويشتري سيف. 37لأنو لازم تتحقق فيّ الآية اللي بتقول: انعّد مع المجرمين. والأشياء المكتوبة عني لازم تصير 38فقالو: يا رب، هياه في هون سيفين، فقلهن: بكفي.

39وطلع يسوع وراح متِل عادتو ع جبل الزيتون. ولحقوه التلاميذ. 40ولما وصلوا هناك قلهن: صلّوا عشان م تفوتوش في تجربة. 41وُبَعدْ عنهن مسافة رمية حجر وركع وصار يصلي 42ويقول: يابا، إذا ممكن إنك تعفينـي من شرب كاس الآلام . . . بس الأولوية لإرادتك مش لإرادتي. 43وظهرلو ملاك من السما عشان يقويه. 44وكان قلبُه مكسور فصار يصلي بإلحاح أكتـر من الأوّل وكان عرقه متِل نقط دم عم تنـزل ع الأرض. 45وقام من الصلا وُراح لعند تلاميذُه فلقاهن نايمين من الحزن. 46سألهن: ليش نايمين؟ قوموا صلوا عشان مَ تفوتوش في تجربة.

47وبعدو يسوع عم بحكي إلا بَيَّنو كتيـر ناس وأوّلهن يهوذا وهو واحد من ال 12 تلميذ. قرّب يهوذا ع يسوع وباسو. 48فقلّو يسوع: يا يهوذا، ببوسة بتخون ابن الإنسان؟ 49فلما شافوا التلاميذ اللي بدو يصير قالو: يا رب، بدك نهجم بالسيوف؟ 50وقام واحد من التلاميذ وضرب خَدَّام رئيس الكهنة وقطعلو دانو اليمين. 51رد يسوع وقال: وقفوا وبلاش هيك. ومسك دان اِلخَدَّامْ وشفاه. 52وقال يسوع لرؤسا الكهنة ولشرطة الهيكل وللشيوخ الجايين يمسكوه: شو أنا قطّاع طرق عشان تهجموا علي بسيوف وعصي؟ 53كل يوم كنت معكو في الهيكل ومَ حداش مد إيدو علي بس إسه إجا وقتكو وُوقت حُكم الظلام.

54وبعد م قبضوا عليه اخدوه وراحو ع بيت رئيس الكهنة. وصار بطرس يلحقهن من بعيد. 55وكانوا مولعين نار في نص الساحة وقاعدين عم بِدَّفو وقعد بطرس معاهن. 56وشافتو واحدة خدّامة قاعد عند ضو النار وبحلقت فيه وقالت: وكمان هادا الزلمة كان مع يسوع. 57أنكر بطرس وقال: يا مره، أنا بعرفُش. 58وبعد شوي اطّلع عليه واحد زلمة وقال: هادا واحد من جماعة يسوع. فقال بطرس: يا زلمة، مش أنا. 59وبعد تقريبا ساعة في واحد تاني أكّد وقال: بكل تأكيد، إنو هادا الزلمة كان مع يسوع لأنو هو كمان جليلي. 60فقال بطرس: يا زلمة، شو ها الحكي الفاضي. وفي نفس اللحظة وبطرس بعدو بِحكي إلا الديك بصيح. 61فلف الرب يسوع راسو واِطّلع ع بطرس فتذكر بطرس شو حكالو الرب: اليوم قبل مَ يصيح الديك رَح تنكرني 3 مرات. 62وطلع بطرس بريت الساحة وبكى وقلبُه مكسور.

63والزلام اللي كانو يُحرسو يسوع صاروا يتهبلو عليه ويضربوه 64وغمضولو عينيه وصاروا يقلُولو: تنبأ، مين ضربك؟ 65وكانو يسبّوا عليه مسبات كتيـرة.

66ولما طلع النهار تجمعوا شيوخ الشعب، رؤسا الكهنة وجماعة الصدوقيين، وجابو يسوع لأعلى محكمة عندهن. 67وقالو: إذا إنت المسيح، احكي وقول. فقلهن: حتـى لو قلتلكو مش رَح تصدقوا. 68وإذا سألتكو مش رَح تجاوبو. 69بس بعد إسه رَح يكون ابن الإنسان قاعد على يمين العظمة عند الله. 70فردوا كلهن وسألو: يعني إنت ابن الله؟ فقلهن: إنتو اللي بتقولو إنو أنا هو. 71فقالو: بعد هالكلام لشو في حاجة لشهود؟ سمعنا بِدِنِينا شو قال.

ទើបបានជ្រើសរើសហើយ៖

لوقا 22: CGB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល