لوقا 23

1وقاموا كُلهن وأخذوا يسوع لعند بيلاطس. 2وصاروا يتهموه ويقولو: اكتشفنا إنو هادا الزلمة عم بخدع شعبنا وبمنع دفع الضرايب للإمبـراطور وبقول عن حالو إنو هو المسيح الملك. 3فسألو بيلاطس: إنت ملك اليهود؟ رد يسوع وقال: إنت اللي بتقول. 4فقال بيلاطس لرؤسا الكهنة وللشعب. مش ملاقي جريمة أحاكم هادا الزلمة عليها. 5فأصرّوا إنو عم بِعلّم وبِحرّض الشعب في كل منطقة اليهودية وإنو بدي في الجليل لحد م وصل لعنا.

6لما سمع بيلاطس هادا الكلام، سأل إذا الزلمة جليلي. 7وبعد م عرف إنو من المنطقة اللي بحكمها هيـرودس بعتو لعند هيـرودس اللي كان موجود في أورشليم في هداك الوقت. 8انبسط هيـرودس كتيـر لما شاف يسوع لأنو كان من زمان بدو يشوفو قد م سمع عنو وكان يتمنـى يشوف منو عجيبة. 9وصار يسألو أسئلة كتيـرة بس يسوع م جاوبش ع ولا سؤال. 10وكانو رؤسا الكهنة وجماعة الكتبة قاعدين يتهموه بكل قوتهن. 11فاستخف فيه هيـرودس وجنوده وصاروا يتهبلو عليه ويلّبسوه أواعي العظمة وبعدين رجّعو هيـرودس لعند بيلاطس. 12ومع إنو بيلاطس وهيرودس كانوا أعداء إلا إنهن صاروا صحاب في هداك اليوم.

13ونادى بيلاطس رؤسا الكهنة والقادة والشعب 14قلهن: جبتولي هادا الزلمة واتهمتوه إنو بحرّض الناس وهياني بعد م حققت معو قدامكو م لاقيتش في هادا البنـي آدم تهمة أحاكمُه عليها. 15ونفس الإشي صار مع هيـرودس. فرجعلنا إياه. والواضح إنو مَ عملش إشي بستحق عليه الإعدام 16فعشان هيك رَح أجلدو بالكرباج وبعدين بفرج عنو. 17‏-18صارت الناس تصيح بصوت واحد وتقول: عَلْقُو وطلِّعلنا باراباس. 19وباراباس انسجن عشان جريمة قتل ومظاهرة بالبلد. 20وحكى معهن بيلاطس كمان مرة لأنو كان بدو يطّلع يسوع 21فصارت الناس تصيّح وتقول: اُصلبو اُصلبو. 22فحكى معهن تالت مرة. شو الشر اللي عملو؟ مش ملاقي جريمة بستحق عليها الإعدام. عشان هيك رح أجلدو بالكرباج وبعدين أفرج عنو. 23فصارت الناس تلح بأصوات عالية وتطلب إنو يصلبو وصياحهن انتصر. 24فقرر بيلاطس إنو يستجيب لطلبهن. 25وبحسب طلبهن طلّع سجين المظاهرة، المحبوس عشان جريمة قتل، ورد عليهن بالنسبة ليسوع.

26ولما اخدوا يسوع عشان يصلبوه، اعتقلو زلمة كان جاي من المزرعة وهو من بلد القيروان واسمُه سمعان. وحمّلوه الصليب ورا يسوع. 27وكان في كتيـر ناس من عامة الشعب وكانوا يمشو ورا يسوع. وكانت الستات بتضرب حالها وبتندب عليه. 28فدار يسوع ناحيتهن وقلهن: يا ستات أورشليم تبكوش علي. ابكوا على حالكو وع ولادكو. 29لأنو جاي الأيام اللي رَح يقولو فيها: نيالهن اللي بحبلوش ونيال البطن اللي بِخَلِّفش والصدر اللي برضعش. 30سيعتها رَح يقولو يا جبال: اوقعي علينا، ويا تلال: غطّينا. 31فإذا عِملوا هيك بالغصن الأخضر شو رح يصير بالغصن الناشف؟ 32وجابو معو 2 مجرمين عشان ينعدمو مع بعض. 33ولما وِصْلوا ع المحل اللي اسمو الجلجثة صلبوا يسوع هناك مع تنين مجرمين. واحد ع يمينُه والتاني ع شمالُه. 34وصلى يسوع: يابا، اغفرلهن لأنهن مش عارفين شو عم بِعملو. وعِملوا الجنود سحبة ع أواعي يسوع وتقاسموها بيناتهن. 35وكان الشعب واقف عم بِطَّلع. وكانوا القادة بستهزئوا فيه وبقولو: خلّص الناس التانيين، طيب خليه يخلص حالو إذا هو مسيح الله المختار. 36وتمسخروا عليه وقربوا الجنود عليه وقدمولو نبيذ رخيص. 37وقالو: إذا إنت عنجد ملك اليهود خلّص حالك. 38وكان في فوقو لافتة مكتوب عليها: هادا هو ملك اليهود. 39وصار واحد من المجرمين المصلوبين يهين فيه ويقول: مش صح إنت المسيح؟ طيب خلّص حالك وخلصنا. 40فرد المجرم التاني وُوقفو عند حدو وقال: بتخفش الله يا زلمة لإنك محكوم عليك بالإعدام مِتلو؟ 41إحنا منستحق هادا الحُكم عَشَنَّا إتحاسبنا ع اللي عملناه بس هادا الزلمة مَ عملش إشي غلط 42وبعدين قال: يا يسوع، تذكرني في مملكتك. 43فقلّو يسوع: بأكدلك، إنك اليوم رَح تكون معي في الفردوس.

44وكانت الدنيا الضُهر وصارت كل البلد عتمة من الساعة 12 لحد الساعة 3. 45واختفت الشمس وتمزّعت بُرداية الهيكل لنُصين. 46وصيّح يسوع بأعلى صوتُه وقال: يابا، بتـرك روحي بين إيديك. وبعدين طلعت روحُه. 47وبعد م شاف القائد الروماني المسؤول عن 100 جندي كل اللي صار، صار يمجّد الله ويقول: عنجد هادا البني آدم كان زلمة منيح. 48وكل الناس اللي تجمعوا هناك وشافوا شو صار روّحو وهنّي يلطموا ع صدورهن. 49وكانوا كل معارف يسوع واقفين من بعيد وُواقفين معهن الستات الجليليات اللي لحقوه. وشافوا كل اللي صار.

50وكان في زلمة من أعضاء مجمع السانهدرين اسمُه يوسف. هو قائد منيح وحقّاني. 51عارض رأي المجلس وتصرفاتهن. وهو من منطقة اليهودية من بلدة الرامة. وكان بستنى ملكوت الله. 52راح يوسف لعند بيلاطس وطلب جثمان يسوع 53ونزّل الجثمان عن الصليب ولفُه بقماش كتان وقبـرو بقبـر محفور في الصخر ولا مرة انقبـر فيه حدا من قبل. 54وكان الوقت وقت الاستعداد للسبت قبل م تغيب الشمس ويفوت السبت. 55والستات اللي لحقو يسوع من الجليل راحوا مع يوسف وشافوا القبـر وكيف انقبـر جثمان يسوع. 56وروّحوا وحضّروا روايح ومواد لجسم الميت. واستراحوا يوم السبت حسب الشريعة.

ទើបបានជ្រើសរើសហើយ៖

لوقا 23: CGB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល