متى 12

1ومره في يوم سبت كان يسوع يمشي بين الحقول. وكانو تلاميذو جوعانين فبديو يلقطوا من سنابل القمح ويوكلو. 2شافوهن الفريسيين فقالو ليسوع: إطّلع ع تلاميذك، عم بيكسروا قوانين السبت! 3جاوبهن يسوع وقال: ما قريتوش شو عمل داود وصحابو لما جاعو، 4وكيف دخلو علهيكل وأكلو الخبز اللي بتقدم لألله واللي ممنوع حدا يوكل منو إلا الكهنة؟ 5وما قريتوش في الشريعة إنو الكهنة في الهيكل بشتغلو وبكسرو قوانين السبت بدون ما يكونوا مذنبين؟ 6وأنا بأكدلكو إنو الموجود هون أهم من الهيكل 7فإفهمو كلمات الله اللي بتقول: "بدي الرحمة مش الذبيحة" وما تدينوش الناس الأبريا 8لأنو ابن الإنسان هو رب السبت.

9وترك يسوع المحل وراح عالكنيس تبعهن 10وكان في هناك إنسان إيدو مشلولة. فسألو يسوع وقالولو: مسموح الواحد يشفي يوم السبت؟ وكان هدفهن يوقعوه. 11قالهن يسوع: مين فيكو عندو خروف واحد، إذا وقع خروفو في جوره يوم السبت بطلعُش منها؟ 12طيب مش قيمة الإنسان أكبر من الخروف؟ عشان هيك مسموح عمل الخير يوم السبت. 13وبعدين قال يسوع للي إيدو مشلولة: مد إيدك فمدها وشفيت إيدو وصارت منيحة زي الإيد التانية. 14فطلعو الفريسيين وتآمروا ضد يسوع وتشاورا كيف يقضو عليه.

15فهم يسوع المؤامرة وترك المكان بس كثير من الناس صارو من أتباعو وشفا كل مرضاهن. 16ووصاهن ما يقولوش للناس عنو 17حتى تتحقق كلمات النبي إشعياء اللي قال: 18هذا هو الشب اللي اخترتو وحبيبي اللي قلبي راضي عليه. بعطيه روحي وبِعْلِن العدل للأمم 19بتغاوشش وبصيحش وبتسمعلُش صوت في الشوارع 20بهجمش على الإنسان المهدود حيلو وبدعسش على الإنسان المطفي وهيك بضل لحد ما العدل ينتصر. 21وهو رجاء الأمم.

22وجابو لعند يسوع إنسان راكبو روح شرير وكان أعمى وأخرس بس يسوع شفاه. فصار هذا الإنسان يحكي ويشوف! 23وكثير من الناس تعجبو وقالو عن يسوع: معقول يكون هو ابن داود؟

24ولما سمعو الفريسيين قالو: هو بُطْرد الشياطين بواسطة بعلزبول، رئيس الشياطين. 25عرف يسوع أفكارهن وقالهن: أي مملكة بتنشق وأهلها بحاربو بعض راح تنهار، وأي مدينة أو عيلة بينقسمو ضد بعض مش راح يقدرو يوقفو عإجريهن. 26فإذا كان الشيطان بُطرُد شيطان تاني انقسموا الشياطين، فكيف راح تثبت مملكتهن؟ 27وإذا كنت أنا بطرد الشياطين بواسطة بعلزبول فكيف بتبرروا إنو أتباعكو بُطردو الشياطين؟ هني راح يحاكموكو. 28بس إذا أنا بطرد الشياطين بواسطة روح الله فمن الواضح أنو ملكوت الله وصل لعندكو. 29وكيف بِقْدَر الواحد يفوت ع بيت واحد قوي ويسيطر ع ممتلكاتو؟ مش لازم بالأول يربط القوي؟ وبعدين بُوخُد ممتلكاتو. 30اللي مش واقف معي هو واقف ضدي واللي بجمعش معي ببعد الناس عن الله. 31عشان هيك بقلكو أنو كل خطية وتهجم على الناس إلو غفران بس التهجم على روح الله فيش إلو غفران. 32وإذا واحد قال إشي ضد ابن الإنسان في إلو غفران بس إذ قال إشي ضد الروح القدس فِش إلو غفران من إسه للأبد. 33الشجرة المنيحة بتثمر ثمر منيح والشجرة المريضة بكون ثمرها معفن ومنعرف صحة الشجرة من ثمرها. 34يا عيلة الحيايا، بتقدرو تقولو كلام منيح وأنتو أشرار؟ لأنو مصدر الكلام هو القلب 35القلب النظيف بِطلِّع كنـز والقلب المريض بِطلِّع شر 36وبَقلكو: كل كلمة عاطلة بحكوها الناس راح يتحاسبو عليها يوم الحساب 37فبحسب كلامك بُصْدُر الحكم بالبراءة أو بالذنب.

38ردوا عليه جماعة من الكتبة والفريسيين وقالولو: أرجينا إثبات أكيد إنو الله معك 39فقلهن يسوع: انتو جيل شرير وكافر بدكو إثبات. فش برهان زي آية يونان النبي. 40فزي ما كان يونان في بطن كائن بحري 3 أيام و3 ليالي راح يكون ابن الإنسان مدفون بالأرض 3 أيام و3 ليالي. 41أهل نينوى راح يقومو في يوم الحساب مع هذا الجيل ويشهدو ضدكو. هني تابو لما سمعو يونان بس أنتو مش عم تسمعو للأعظم من يونان. 42ملكة الجنوب راح تقوم في يوم الحساب مع هذا الجيل وتشهد ضدكو. هي أجت من آخر الدنيا عشان تسمع حكمة سليمان بس أنتو مش عم تسمعو للأعظم من سليمان. 43ولما بِطلَع الروح النجس من إنسان بتمشى في محلات فيهاش مي بدور ع الراحه وبلاقيهاش 44وقتها بقول الروح لحالو خليني أرجع لبيتي اللي طلعت منو. فبروح عليه وبلاقيه فاضي ومكنس ومرتب 45وبروح وبجيب معو سبع أرواح أشر منو وبُسُكنْو هناك. وبصير وضع الإنسان أسوأ من الأول. وهيك راح تسوء حالة الناس في هذا الجيل الشرير.

46وكان يسوع عم بكمل حديثو مع الناس وأجت إمو مع إخوتو. وكانوا واقفين بره وبدهن يحكو معو 47فأجا واحد لعندو وقالو: هيـاهن إمك وإخوتك واقفين بره بدهن يحكو معك 48فجاوبو يسوع وقالو: مين هي إمي ومين إخوتي؟ 49وِأَشَّر يسوع بإيدو الممدودة على تلاميذو وقال: هدول هِني إمي وإخوتي 50لأنو كل واحد بطيع إرادة أبوي السماوي هو أخوي وأختي وأمي.

ទើបបានជ្រើសរើសហើយ៖

متى 12: CGB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល