متى 13

1وفي نفس اليوم طلع يسوع من البيت وراح يعلم عند بحيرة طبريا 2وتجمعو ناس كثير حوليه فطلع وقعد في قارب عشان يعلّم وكانت الناس واقفة ع الشط 3وعلمهن كثير أشياء بالأمثال فقالهن: مرة طلع الـمزارع عشان يزرع الحبوب 4فلما كان يزِت الحبوب وقع شوي منها على الطريق وأجت الطيور وبلعتها 5ووقعت حبوب على حجار عليها شوية تراب وشرشت بسرعة بس فش تراب كفاية 6فلما طلعت الشمس انحرقت النبتة وذبلت لأنو شروشها مش غميقه 7وفي حبوب وقعت على أرض الشوك فلما طلع الشوك خنقها 8بس في حبوب وقعت على الأرض المنيحة واثمرت إشي 30 وإشي 60 وإشي 100 ضعف. 9اسمعو منيح وانتبهو لشو بقولكو.

10فقربوا عليه التلاميذ وسألوه: ليش بتحكي مع الناس بالأمثال؟ 11جاوبهن يسوع وقالهن: بتنكشفلكو أسرار ملكوت السموات بس بتنكشفش لإلهن. 12واللي بيفهم شوي راح يفهم أكثر بكثير واللي مش فاهم راح يبطل فاهم ع الآخر 13أنا بحكي بالأمثال عشان اللي مش فاهم بتطلع بعينيه بس بشوفش بقلبو وبيسمع بدنيه بس بستوعبش ولا بيفهم 14وهيك بتتحقق كلمات النبي إشعيا اللي قال: "راح تسمعو كتير وما تفهموش وتطلعو كتير وماتشفوش 15هذا الشعب انعمى قلبو وخرب سمعو وبطل عندو نظر لأنو غمض عينيه وسكّر دنيه وقلبو فمش راح يتوب عشان أشفيه". 16بس إنتو نيال عيونكو لأنها عم بتشوف ودنيكو لأنها عم تسمع 17عنجد بقولكو أنو كتير من الأنبيا وناس الله-ويه اشتهو يشوفو اللي أنتو شايفينو ويسمعو اللي أنتو سامعينو بس ما قدروش لا يشوفو ولا يسمعو.

18اسمعو اسه معنى مثل الـمُزارع 19اللي بِسمع إنجيل الـملكوت وبفهمش بيجي الشيطان وبُسرق الكلمة اللي انزرعت في قلبو. هو المزروع ع الطريق 20والمزروع ع الأحجار هو اللي بِسمع الإنجيل وطوالي بيقبلو وبيفرح فيه 21وبتأثر لفترة زغيره بدون ما يكون ثابت ولما الإنجيل بجيبلو ضغط واضطهاد طوالي بتخلى عنو. 22والمزروع عند الشوك هو اللي بيسمع بس انشغالات الدنيا وأوهام الغنى بيخنقوا تأثير الإنجيل وبتصير حياتو بدون ثمر 23بس اللي مزروع في الأرض المنيحة هو اللي سمع وفهم الإنجيل وهو اللي عنجد بيثمر إشي 30 وإشي 60 وإشي 100 ضعف.

24وحكى يسوع للناس كمان مثل فقالهن: ملكوت السموات بشبه واحد مزارع زرع حبوب منيحه في أرضو 25وفي ليله من الليالي لما نامت الناس أجا عدوه ع الأرض وزرع جنب حبوب القمح حبوب نبته مؤذيه، حبوب الزوان، وبعدين هرب 26وما ميزوا الزوان لحد ما كبرت النباتات وبدي الثمر يطلع 27وقتها راحو العبيد لصاحب الأرض وقالولو يا سيدنا: أكيد أنت زرعت حبوب منيحه في الأرض؟ بس من وين أجا الزوان؟ 28فقالهن: هاي عملة واحد عدو. فقالولو: بدك نروح ونقبع الزوان؟ 29فقالهن أوعوكو لأنو وإنتو تقبعوا الزوان ممكن تقبعوا كمان القمح. 30اتركوهن يكبروا مع بعض لوقت الحصاد ووقتها بوصي الشغيلة وبقولهن: لِـمُّو بالأول الزوان واربطوه أكوام للحرق وبعدين اجمعو القمح وحطوه في مخزني.

31وحكالهن كمان مثل وقالهن: ملكوت السموات بشبه زلمه أخذ حبة خردل وزرعها في أرضو 32مع إنو حبة الخردل أزغر نوع من الحبوب بس لـما بتكبر بتصير أكبر نبته في حاكورة البيت. وبتصير شجرة تهبط عليها طيور السما وبتعشش ع أغصانها.

33وحكالهن كمان مثل وقالهن: ملكوت السموات بشبه الخميرة. في وحده مره أخذتها وحطتها جوات عجينة كبيرة كثير فخمرت كل العجينة.

34وكل هذا الحكي مع الناس كان بالأمثال وما استعملش معاهن غير الأمثال 35وهيك تحققت الكلمات اللي قالها النبي: "راح افتح تمي بالأمثال وبدي أعلن المخبى من وقت تأسيس العالم".

36ووقتها ترك يسوع الناس وراح عل البيت ولحقوه التلاميذ وقالولو: إشرحلنا مثل الزوان المزروع في الأرض 37جاوبهن وقالهن: المزارع اللي زرع الحبوب المنيحة هو ابن الإنسان 38وأرضو هي العالم والحبوب المنيحة هي شعب الملكوت ونباتات الزوان هي أتباع الشرير 39والعدو اللي زرع الزوان هو إبليس والحصاد هو نهاية الدنيا وشغيلة الحصاد هني الملايكة 40وزي مبجمعو الزوان للحرق بالنار هيك راح يكون في نهاية الدنيا 41راح يبعت ابن الإنسان خدامه الملايكه وراح يقلعو من مملكتو كل المؤامرات والناس المشغولين بعمل الشر 42وراح يرموهن بفرن النار. هناك راح يكون العياط وطقطقة الأسنان. 43وقتها نور المناح في ملكوت ابوهن بصير زي الشمس. اسمعو منيح وافهمو شو بقولكو.

44ملكوت السموات بشبه كنز مخبى تحت الأرض. لـما اكتشفو واحد زلمه رجع غطّاه، ومن فرحتو راح يبيع كل اللي عندو عشان يشتري هديك الأرض. 45وكمان ملكوت السموات بشبه واحد تاجر بدوّر على لآلئ منيحه 46فلما لاقى لؤلؤة غاليه كثير راح وباع كل اللي عندو واشتراها. 47وكمان ملكوت السموات بشبه شبكة صيد رموها عل مية البحر فصادت كل أنواع السمك 48ولـما تعبّت الشبكة سحبوها للشط وقعدو يجمعو السمك المنيح في السلة والسمك المش نافع زتّو بره 49هيك راح يكون في نهاية الدنيا. راح ييجو الملايكه ويصنفو الناس ويفصلو الأشرار عن المناح 50وبعدين يرمو الأشرار في فرن النار. هناك راح يكون العياط وطقطقة الأسنان.

51فاهمين شو بقولكو؟ قالولو: نعم. 52فقالهن: كل معلم للكتاب المقدس إتلمذ في ملكوت السموات بشبه المسؤول عن العيله اللي بطلّع من عندو كنز قديم وكنز جديد.

53ولما خلص يسوع حكيو عن هاي الأمثال ترك المحل 54وراح لبلدو وصار يعلم الناس في الكنيس فانبهرو منو وتساءلو: من وينلو ها الحكمة وهاي القدرة على صنع المعجزات؟ 55مش هذا ابن النجار؟ مش إمو اسمها مريم وإخوتو يعقوب ويوسف وسمعان ويهوذا؟ 56مش خياتو كلهن ساكنات في البلد؟ طيب من وينلو الحكمة والقدرة على صنع المعجزات؟ 57فرفضوه فقالهن يسوع: النبي بنهانش إلا في بلدو وبين أهلو. 58ومعملش هناك معجزات كثيرة لأنو فش عندهن إيمان.

ទើបបានជ្រើសរើសហើយ៖

متى 13: CGB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល