متى 14
14
1في هداك الوقت سمع هيرودس، حاكم منطقة الجليل، أخبار يسوع 2فقال للشباب اللي عندو: هذا هو يوحنا المعمدان. قام من بين الأموات وعشان هيك عم بيعمل عجايب. 3وهيرودس هو اللي أمر باعتقال يوحنا، وحبسو بالسجن كُرمال عيون هيروديا اللي كانت متجوزه اخوه فيلبس. 4يوحنا مسكتلوش وقالو: بنفعش تتجوز مرة أخوك. 5وكان بدو هيرودس يقتلو بس خاف من الناس لأنهن اعترفو بأنو يوحنا نبي. 6وفي عيد ميلاد هيرودس رقصت بنت هيروديا قدام الـمعازيم وانبسط هيرودس 7فحلف ووعدها يعطيها إيش بدها 8فعبّت إمها راسها عشان تقولو: اعطيني إسه ع صينية راس يوحنا الـمعمدان 9حزن الحاكم بس عشان المعازيم والحلفان أمر أن يعملوا إيش بدها 10فراحو الجنود ع السجن عشان يقطعوا راس يوحنا 11وجابو راسو عَصُنيّة واعطوه للصبية وهي حملتو لعند إمها 12واجو تلاميذ يوحنا وبعد ما حملو الجثة ودفنوها راحو وخبروا يسوع.
13سمع يسوع الخبر فركب القارب وراح عشان يقعد لحالو. ولما عرفو الناس تركو مدنهن ولحقوه مشي 14وعشان هيك لما وصل يسوع ع الشط شاف ناس كثير وشفق عليهن وشفى مرضاهن 15وصارت الدنيا ليل فأجو تلاميذو لعندو وقالولو: الوقت تأخر واحنا في الخلا قول للناس تروّح عشان يلحقو يوصلو على محل ويشتروا أكل 16فقالهن يسوع: فش حاجة يروحّوا. اعزموهن انتو ع الأكل 17فقالولو: كل اللي عنا 5 خبزات وسمكتين 18فقالهن: جيبولي إياهن لهون 19واطلبو من الناس إنهن يقعدو ع الديشه. وحمل ال 5 خبزات والسمكتين وإطلع عالسما وشكر وبعدين قسّم الخبزات ووزعهن ع التلاميذ وهنّي وزعوهن ع الناس. 20والكل أكل وشبع ولـمّو التلاميذ 12 سلة خبز زيادة. كانوا معبيين ع الآخر. 21وعدد اللي أكلو كان تقريبا 5000 زلـمه وزيد عليهن الستات والأولاد.
22وبعدها طوالي شد يسوع ع تلاميذو أنهن يطلعو ع القارب ويُمرْؤوا البحيرة قَبلو، وهو بقي تيروِّح الناس 23روّحهن وبعدين طلع ع الجبل عشان يقعد لحالو ويصلي. ولما صارت الدنيا ليل كان بعدو هناك لحالو 24وفي هذاك الوقت كان القارب بعيد كثير عن الشط والأمواج هايجه والهوا مغلبهن 25وقبل ما يطلع الفجر كان في واحد بيمشي ع المي وجاي ع القارب 26ولما شافوا التلاميذ واحد عم بيمشي على المي ارتعبوا وقالو هذا شبح وصاروا يزعقوا من الخوف 27طوالي حكى معهن الشخص وقالهن: قوّو قلبكو، أنا هو. ما تخافوش. 28فجاوبه بطرس وقالو: يا رب، إن كنت إنت هو، أأمرني آجي لعندك مشي ع المي 29فقالو: تعال. فطلع بطرس من القارب وصار يمشي ع المي وراح لعند يسوع. 30بس لما حس بقوة الهوا خاف وبدي يغرق في المي ويصيّح ويقول: يا رب، خلصني. 31طوالي مسكو يسوع وقالو: يا ضعيف الإيمان. ليش شكيت؟ 32وبعد ما فات معو ع القارب وقفت العاصفة 33والتلاميذ سجدوا في القارب ليسوع وقالولو: انت عنجد ابن الله.
34وُوقف القارب ع شط جنيسارت 35ولما عرفوه أهل البلد نادو كل القرى اللي جنبهن. وجابت الناس كل مرضاهن لعندو 36وصاروا بدهن يلمسو حتى لو دناديش أواعيه. وكل اللي مسكوها شفيو.
ទើបបានជ្រើសរើសហើយ៖
متى 14: CGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Colloquial Galilean Bible © 2025 The Arab Israeli Bible Society
ترجمة الكتاب المقدس باللهجة العامية الجليلية © 2025 دار الكتاب المقدس في الناصرة