متى 16
16
1وأجا لعندو جماعة من الفريسيين والصدوقيين عشان يمسكو عليه ممسك فطلبوا منو يفرجيهن علامة من السماء 2جاوبهن وقلهن: إذا السما بتكون حمره وقت الغروب بتقولو الطقس راح يكون منيح 3وإذا السما بتكون حمره ع سواد وقت الشروق بتقولو راح يكون شتى. بتعرفو تميزوا شكل السما ومش قادرين تميزوا علامات الوقت الإلهي؟ 4جيل شرير وزاني وبُطلُب علامة من الله، فش إلو غير علامة يونان. ودار ظهرو وتركهن.
5وعبرو التلاميذ البحيرة بس نسيو يوخذو خبز 6قلهن يسوع: انتبهو وديرو بالكو من خميرة الفريسيين والصدوقيين 7فصارو يقولو لبعض ع السكت إنهن ما أخذوش معهن خبز 8عرف يسوع وقلهن: يا ضعاف الإيمان، ليش بتفكرو بالخبز اللي نسيتو؟ 9بعدكو مش فاهمين، ومش متذكرين ال 5 خبزات وال 5000 زلمة وأكمّ مِن سلة جمّعتو؟ 10ومش متذكرين ال 7 خبزات وال 4000 زلمة وأكمّ مِن سلة جمّعتو؟ 11ليش مش فاهمين إنو بحكيش معكو ع الخبز؟ بس قاعد بنبهكو من خميرة الفريسيين والصدوقيين. 12وقتها فهمو إنو بحذرهن من تعليم الفريسيين والصدوقيين ومش قاعد بِحْكي عن خميرة الخبز.
13وبعد ما وصل يسوع لمنطقة قيصرية فيلبس سأل تلاميذو: بحسب حكي الناس، مين هو ابن الإنسان؟ 14جاوبوه وقالولو: في ناس بقولو عنو إنو هو يوحنا المعمدان وناس تانيه بقولو إنو هو إيليا وجماعة بتقول أنو إرميا أو واحد من الأنبيا 15ورجع سألهن: وانتو شو بتقولو عني؟ 16فقالو سمعان بطرس: أنت هو المسيح ابن الله الحي. 17رد عليه يسوع وقالو: نيالك يا سمعان ابن يونا لأنو هذا الحكي ما أجاش من لحم ودم. بس كشفلك إياه أبوي اللي في السما. 18وأنا كمان بَقُلَّك: أنت صخرة وعلى هذه الصخرة أنا راح ابني كنيستي وأبواب جهنم مش راح تقدر توقفها. 19أنا راح أعطيك مفاتيح ملكوت السموات وأي إشي بتمنعو في الأرض هو ممنوع في السما وأي إشي بتسمح فيه في الأرض هو مسموح في السما. 20وفي هذاك الوقت وصى التلاميذ أنو ما يحكوش لحدا إنو هو المسيح.
21ومن هداك الوقت بدي يسوع يكشف لتلاميذو إنو لازم يروح عأورشليم عشان يتعذب كثير من شيوخ ورؤساء الكهنة وجماعة الكتبة وبعدين ينقتل بس راح يقوم في اليوم الثالث. 22فأخذو بطرس ع جنب وصار يقولو أوعك تحكي هيك حكي: بعيد الشر عنك يا رب! مستحيل يصير معك هيك إشي. 23إطّلع يسوع ع بطرس وقالو: ابعد عني يا شيطان. بدّك توقّعني لأنو هادا الرأي حسب فكر الناس مش حسب فكر الله. 24وقتها قال يسوع لتلاميذو: إذا أي واحد بدو يكون من أتباعي لازم يحكم ع نفسو بالموت ويحمل صليبو ويتبعني. 25لأنو اللي بدو يكسب حياتو لازم يخسرها واللي بضحي بحياتو عشاني راح يكسبها 26وشو راح يستفيد الإنسان لو كسب كل العالم وخسر نفسو؟ وشو بِقْدر يدفع عشان يفدي نفسو؟ 27وعن قريب راح ييجي ابن الإنسان مع ملايكتو وبعظمة مجد ابوه ووقتها راح يحاسب كل شخص بحسب أعمالو. 28بصراحة بقولكو في ناس موجودين معنا مش راح يموتو قبل ما يشوفو ابن الإنسان جاي في ملكوتو.
ទើបបានជ្រើសរើសហើយ៖
متى 16: CGB
គំនូសចំណាំ
ចែករំលែក
ប្រៀបធៀប
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Colloquial Galilean Bible © 2025 The Arab Israeli Bible Society
ترجمة الكتاب المقدس باللهجة العامية الجليلية © 2025 دار الكتاب المقدس في الناصرة