Matay 11
11
tu temakesi na semasuwap i Yohanē zuwa kirepana'uwa kani Yēsu
(Luka 7.18-35)
1tu panadam ni Yēsu kana papulu' zi zazuwa na temakesi na ngay a piya lra marengay, zi muveruk i kazu kana kinazuwan, patrutru mukuwa i dalrep kana zekazekalr panadam za trau zi palenak kana fukuing.
2na semasuwap i Yohanē kazu i imengan kinger lra kana kireeman kanantu kiyakarunan ni Kiristo mu, zi pakarun kanantu temakesi mukuwa kirepana'uwa kani Yēsu, 3kiyumalr kantaw: <<maw u tu niyarengay ni Yohanē na uri zazuwa izu na sasa, nu 'azi mu ngangara mi ziyan za zuma a sasa nay?>>
4temuvang i Yēsu: <<uveruk uruma' i inmu, nanmu kiningeran, nina'uwan, pakalrazami i Yohanē, 5mawna: mena'u na mavutri', kemakawang na matripu', mukirungetr na malripay, kinger na matrule', marevaaw na minatray, na kalramalraman na trau kinger kana fukuing. 6izu na 'azi malrivak kaninku na trau mu kemudakuda kana mika'inavayan a!>>
7a muveruk lra tu temakesi ni Yohanē mu, i Yēsu venavati kana zinekalranan kani Yohanē, marengay: <<a aziyu ziyan mukuwa mu i alalas miya'a kani Yohanē mu, maranger mena'u za eman nay? maw na mena'u kana tu valiyay zi mahuwahu na ka'ilayan ziyamaw? 8kemudakuda zi mupatraran mu kemakuda ziyamaw? maw menana'u kana mikavang za vavulayan na trau ziyamaw? na mikavang kana kemani na trau mu maw na kaazu kana ruma' na yawan i savak. 9nu kemazu mu, mupatraran mu mukuwa mena'uwa za eman ziyamaw? menana'u kana patralritralri ziyamaw? ai, mawmu marengaya ku kanmu, marama'izang ziya kana patralritralri i intaw. 10i intaw maw na nirengayan i Sēsiyo izu na sasa. marengay na Viruwa i itras: <na'uwi a, pakarun ku kananku pakarunan kazu i ngawayan kannu; muramawan pudalan kannu i intaw.> 11penatezelra ku marengay kanmu, na trau i punapunan iniyan lra za maraayawayawan kani Yohanē na semasuwap, mawmu kazu kana kanatal i itras, na maramakitekiteng na sasa mu maraayawayawan ziya kani Yohanē ziyanay! 12kemay kani Yohanē na semasuwap kemirakaz palenak za vati palru harem, kisipure' za salaw pakirev na kanatal i itras#11.12 <<kisipure' za salaw pakirev na kanatal i itras>> karuwa marengay za <<marayas mungawayan semupure' na kanatal i itras>>., na malemu na trau maranger 'emaraw melak kantaw. 13palru kani Yohanē, na valray ziyan na patralritralri zi kuret ni Mosē peniya venavati tu lremak kana kanatal i itras; 14nu muwai mu kituluz kanantu pinutralri marengay na vati nazu mu, i Yohanē mu maw izu na uri zazuwa i Ēliya lra. 15na mitralinga mu, kingeri mapiya a!
16<<kema ta za trau kanini na ziday mu, melaka ku za eman paruwalru awa? nazu penauwa kamawan kana kazu i dadalan kivangavang na lralrak, i savakan kanazu na salepun 'emuy'uy marengay kana zuma na salepun: 17<muramawan mi kanmu zi paruni kana senay na pakaetim, 'azi mu malikasaw! nu semenay mi kana senay na inulid mu, zi 'azi mu trematrangis!> 18zuwa lra i Yohanē, 'azi maekan zi 'azi matrekel, marengay mapiya: <mupalrar i intaw!> 19zuwa lra tu Alrak na trau, kemazu mekan zi tremekel, mawmu marengay mapiya: <maw a parekutra paretrinumu na trau i intaw, mi'ali'an kana kisasata zi na kuwaatrengan na trau!> mawmu, tu sayhuwan na Viruwa i itras maw kemay kana vuwa' kanantu sayhuwan zi muwapanayan kurena'u.>>
'azi pakutatena' na kazekalran
(Luka 10.13-15)
20a azu mu, maselru i Yēsu kana mena'u lra kanantu kinakuda a sazu na karepalripalri na kazekalran, 'alrana kanizu na kinazuwan na trau mu 'azi muwaasalr. 21marengay i intaw: <<Korazin a, uwaelep u lra za kuwatrengan! Bētsayta a, uwaelep u lra za kuwatrengan! ku kinakuda na karepalripalri kanmu i savak anu ku kakudayanay i Taēr zi i Siton mu, na trau i kazu kapiya lra a aidan ziya mitraruv za muwa zi 'emavu, temara nu 'ematelr kana kuwatreng zi muwasalr patezelr lra. 22penatezelra ku marengay kanmu, kazu kana kasayvangan na wari, tu kinisavungan na Taēr zi na Siton mu paraatra'alr ziya kananmu kinisavungan! 23kema ta kannu, Kabēnum a, puwaitras u kannu mukuwa i itras ziyamaw? uwatani u mukuwa i zikok! ku kinakuda kanmu i kazu na karepalripalri anu ku kakudayanay i Sotoma mu, 'azika'azi kazu ziyan muvilin harem i intaw! 24masalra ku marengay kanmu, kazu kana kasayvangan na wari, tu kinisavungan na Sotoma mu paraatra'alr ziya kananmu kinisavungan!>>
alamu kaninku i kani
(Luka 10.21-22)
25a azu mu, marengay i Yēsu: <<Ama i itras a, Luzu i itras zi i dare', lrayuwan ku kannu; 'alrana kana 'elrepat zi mitinakesiyan na trau nannu vinulri na lremak, mawmu nu panadamaw kana 'azi mitinakesiyan na trau. 26ai, Ama i itras a, na kinuwani ziya mu maw kemay kanannu nirangeran na 'inava!
27<<i Amalri tu verayanay lra na eman ziya kaninku. pakazuma kani Amalri mu, iniyan za trau za kalrazam kana Alrak; pakazuma kana Alrak zi na Alrak muwai panadam na trau mu, kuwaazu iniyan za trau malrazam kani Ama.
28<<alamu a, na maulep ziya, penazek za aluzun na trau mu alamu mapiya kaninku i kani! kanmuwa patalaulepaw. 29sangalru ku papazek, iturus kaninku menadanadam, 'alrana apelr zi kemaira ku anger. nu kemani mu, karuwa mu kiveray za talaulepan. 30kalre'ayan ku papazek; atra'alr ku kaza.>>
ទើបបានជ្រើសរើសហើយ៖
Matay 11: TPN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society in Taiwan, 2023