ଜଅନ୍ 7
7
ଜିସୁଲା ମାରି ମାଇନା ବୁୟାଂଏଁ
1ତିର୍ଗି' ଜିସୁଲା ଗାଲିଲି ମୁନା'ଉଂଗମ୍ବକ୍ ବୁଲ୍ଲ'ସାଲ୍ଲ' ଡୁକୁ । ମାସା'ଡ'ନା ଜିଉଦିରେମଲେନା ମୁନା'ରେମେ ଆମାଇ ଅଗୁଇ'ପୁଲେଇ ସେସ୍ଟା ଡେମ'କୁସା' ଜିଉଦା ମୁନା'ଉଂଗମ୍ବକ୍ ବୁଲ୍ବାର୍ପୁଲେଇ ଆମାଇ ମୁନ୍ ଆରାକ୍ ଡେଂକୁ । 2ମାତର୍ ଜିଉଦିରେମଲେନା କୁଟିରବାସ ଡ'ସେକ୍ ମୁଇ ପରବ୍ ଉନ୍ତୁ' ସୁସାପ୍ଡେଂକୁ । 3ସା' ମାଇନା ବୁୟାଂଏଁ ଆମାଇ ସୁନ' “ନ ଇମ୍ବ'ନ୍ ଇମ୍ବ'ନ୍ କାମ୍ ଡେମ'ତୁନ ଗୁତୁନ୍ ଗୁଲାଇ ନନା ସିସ୍ୟଲେସା ଜୁଲେଇ' । ଡୁ'ତୁନ୍ସା' ଇଂକେକୁରୁଂ ତୁର୍ସେକ୍ ଜିଉଦା ଉଂଗମ୍ବକ୍ ଉୟା । 4ମାସା'ଡ'ନା ରେମଲେ ଆନିଂ ଜୁଲେଇ' ଡ'ସେକ୍ ମୁନ୍ ଡୁକୁନୁଂ ରେମଲେ ଜାଏସା ତିପାକ୍ସେକ୍ ମାଏସା କାମ୍ ଆଡେମ୍ତ । ସା' ନ ଅବୁଦି କାବା ଡିନ୍ଡେମ୍ବାଇ' କାମ୍ ଡେମ'ତୁନ ଡ'ନା ଦେସ୍ଦୁନିଆନା ରେମଲେବକ୍ ଆଗୁଲାଇର ନିଜେ ଅସୁଇ'ୟା” ଡ'ସେକ୍ ସୁନ' । 5ମାସା'ଡ'ନା ମାଇନା ସିୟନ୍ନା ବୁୟାଂଏଁସା ଆମାଇ ବିସ୍ବାସ୍ ଆଡେମ୍ତ ଡେଂକୁ ।
6ସା' ଜିସୁଲା ଆମା'ଏ ସୁନ' “ଆ'ନା ନିଂ ଆତା ଉଇନା ବେଲା ସୁସାପ୍ ଅରଇ' । ମାତର୍ ପେ ଇନ୍ଡଇ'ପାର୍ଲେଇଁ ଉନ୍ତା ଉଇ ଗଂତୁପେ । 7ଦେସ୍ଦୁନିଆନା ରେମଲେ ଆପେ ଆଗୁମୁଇତ । ମାତର୍ ରେମଲେନା କାମ୍ ଗୁଲାଇ ଅଲିରାକ୍ ଡ'ସେକ୍ ନିଂ ସାକି ସୁନ'ତିଂସା' ମା'ଏ ଆନିଂ ଗୁମୁୟ'ତା । 8ପେ କେନ୍ ପରବ୍ବକ୍ ଉଇୟା । ନିଂନା ବେଲା ଆ'ନ୍ପନ୍ତେକ୍ ଡିନ୍ଡେମ୍ ଅରଇ'ସା' ନିଂ ଆ'ନା କେନ୍ ପରବ୍ବକ୍ ଆଉଇତିଂ” ଡ'ସେକ୍ ସୁନ' । 9ଡୁ'ତୁନ୍ ମାଇ ସୁନ'ସେକ୍ ଗାଲିଲିବକ୍ଉ ଡୁକୁଗା' ।
ଜିସୁଲା ମନ୍ଦିର୍ବକ୍ ଆରେମଲେ ଅମାକ୍ଡେନ୍
10ମାତର୍ ମାଇନା ବୁୟାଂଏଁ ପରବ୍ବକ୍ ଉଇଗା'ସା' ତିର୍ଗି' ମାଇସା ଉଇଗା' । ମାତର୍ ଆରେମଲେ ମ'ତୁନା କଲେ ଉଇଗା' । 11ଜିଉଦିରେମଲେ ଆମାଇ ତୁର'ସେକ୍ ମାଇ ପରବ୍ବକ୍ ସା'ଗୁତା କି ଆରାକ୍ ଡ'ସେକ୍ ଆରେମଲେ ଅ'ଗଁସ୍ଲା'ଗା' । 12ରେମଲେନ୍ ବିତ୍ରେ ମାଇନା ବିସୟରେ ମା'ଏ ମା'ଏଉ କଲେକଲେ ଅଇଁୟ' । ଏନ୍ତୁକ୍ର ମାଇ ଅବୁଦି ବଲ୍ବାଇ' ରେମ ଡ'ସେକ୍ ସୁନ' ମାତର୍ ଏନ୍ତୁକ୍ର ଆରାକ୍ ମାଇ ଆରେମଲେ ନାଡାୟ'ସେକ୍ ଅଲିରାକ୍ବାଇ' ଅମାକ୍ରେମ୍ ଡ'ସେକ୍ ସୁନ' । 13ମାତର୍ ଆଜିଉଦିରେମଲେନା ମୁନା'ରେମ୍ ବୁତୁଂସେକ୍ ଜାଏସା ମାଇନା ବିସୟ ଆଗୁଲାଇର ଅ'ଅଂଅଁ'ସେକ୍ ଆସୁନ୍ତ ।
14ମନ୍ଜା ପରବ୍ବକ୍ ଜିସୁଲା ଉଇସେକ୍ ମନ୍ଦିର୍ବକ୍ ଆରେମଲେ ଅମାକ୍ ମୁଲାୟ' । 15ସା' କୁନା ପାଟ୍ ମପଡ୍ବାର୍ ମି ଆଇ'କେନ୍ ମାଗ'ତା ଡ'ସେକ୍ ଜିଉଦିରେମଲେ କାବା ଡିନ୍ଡେଂଆର୍ଉଇଗା' ।
16ଜିସୁଲା ଆମା'ଏ ସୁନ' “ନିଂ ଅମାଗ'କୁନୁଂ ଗୁଲାଇଉ ନିଂନା ନିଜର୍ନା ମୁନ୍କୁରୁଂ ସୁନ' ଆଡୁତିଂ ମାତର୍ ଆନିଂ ଜା ବେନ୍ଟାୟ'ତା ମାଇନ୍କୁରୁଂ ସା'କୁନୁଂ । 17ମାପ୍ରୁନା ମୁନ୍ ମା ଗୁତୁନ୍ ଡିନ୍ଡେମ୍ପୁଲେଇ ଆଜା ମୁନ୍ ଡୁତା ମାଇ ନିଂ ଅମାଗ'କୁନୁଂ ମାପ୍ରୁନ୍କୁରୁଂ ସା'କୁନୁଂ କି ଆରା'ଗେ ନିଂ ନିଜର୍ନାକୁରୁଂ ସୁନ'ତିଂ ଡ'ସେକ୍ ମାକ୍ତ । 18ଜାଜା ନିଜର୍ନାକୁରୁଂ ସୁନ୍ତ ମାଇ ନିଜେ ଆନିଂ ନାଉଲେଇ'#7:18 ନାଉଲେଇ' ମଇମା ବାମେଇ' ଡ'ସେକ୍ ସୁନ୍ତ । ମାତର୍ ଜା ଆମାଇ ବେନ୍ଟାୟ' ଗୁତୁନ୍ ରେମନା ଇମି ନାଉଲେଇ' ଡ'ସେକ୍ ଜା କାମ୍ ଡେମ୍ତ ମାଇ ସତ୍ବାଇ' । ମାଇନ୍ବକ୍ ଇ'କିସା ଅଲିରାକ୍ବାଇ' କାମ୍ ଆଡୁତା । 19ମସାଲା ତ ଆପେ ମାପ୍ରୁନା ନିୟମ୍ ବେଡ'ତା । ମାତର୍ ଗୁତୁନ୍ ନିୟମ୍ ମାନ୍ବାର୍ରେମ୍ ପେନ୍ ବିତ୍ରେ ମୁଇନ୍ଡାସା ଆରାକ୍ । ସତଇସା ପେ ଗୁତୁନ୍ ମାନ୍ବାର୍ରେମ୍ ଡ'ନା ମାସା' ପେ ଆନିଂ ଅଗୁଇ'ପୁଲେଇ ସେସ୍ଟା ଡେମ'ତୁପେ?” ଡ'ସେକ୍ ସୁନ' ।
20ସା' ରେମଲେ ଆମାଇ ସୁନ' “ଆନ ବୁତ୍ ସବ'ତାସା' ଡେ ମାନ୍ଡେ ଡୁ'ତୁନ୍ ସୁନ'ତୁନ । ଆନ ଜା ଅଗୁଇ'ପୁଲେଇ ସେସ୍ଟା ଡେମ'ତାୟାଂ” ଡ'ସେକ୍ ସୁନ' ।
21ସା' ଜିସୁଲା ଆମା'ଏ ସୁନ' “ନିଂ ମୁଇ କାବା ଡିନ୍ଡେମ୍ବାଇ' କାମ୍ ବିସ୍ରାମ୍ଦିନ୍ବକ୍ ଡେମ' ବେଡ'ନିଂସା' ପେ ଗୁଲାଇର କାବା ଡେଂଉଇପେ । 22ମାତର୍ ପେ ମସାଲା ବେଡ'କୁନୁଂ ନିୟମ୍ସୁଗ ଡିନ୍ଡେମ୍ପୁଲେଇ ବିସ୍ରାମ୍ଦିନ୍ବକ୍ସା ନୁରିଂନା ଇସା ଅଗ'ତୁପେ । (ଗୁତୁନ୍ ନିୟମ୍ ସତଇସା ମସାନ୍କୁରୁଂ ମୁଲାୟ' ଆଡୁତା ମାତର୍ ମୁଲର୍ନା ୟା'ତୁତାଲେଉ ମୁଲ୍ ମୁଲାୟ'ତା) । 23#ଜଅନ୍ 5:9ଡୁ'ତୁନ୍ ଡ'ନା ମସାନା ନିୟମ୍ ମପିଟାଇବାର୍ପୁଲେଇ ଡ'ସେକ୍ ମୁଇନ୍ଡା ବିସ୍ରାମ୍ଦିନ୍ବକ୍ ନୁରିଂନା ଇସା ଗ'ତ ଡ'ନା ନିଂ ଆମୁଇନ୍ଡା ରେମ ବିସ୍ରାମ୍ଦିନ୍ବକ୍ ବାନି ଡେମ'ନିଂସା' ପେ ମି ଆନିଂ ଗିସେ'ଗୁତୁପେ? 24ସାର୍ମ'ବକ୍ ତୁନାକୁନୁଂ ବିସୟ ଜୁଲ'ସେକ୍ ବିସାର୍ନା ଆଡେମ' । ମାତର୍ ଇମ୍ବ'ନା ସତ୍ ଗୁତୁନ୍ ଜୁଲ'ସେକ୍ ବିସାର୍ନା ଡେମ୍” ଡ'ସେକ୍ ସୁନ' ।
ଜିସୁଲା ସତଇସା କିରିସ୍ଟ କି ଡ'ସେକ୍ ରେମଲେ ଏତ୍ଗୁତା
25ଜିରୁସାଲମ୍ ମୁନା'ଉଂଗମ୍ନା ରେମଲେ ଏନ୍ତୁକ୍ର ସୁନ' “ମୁନା'ରେମଲେ ଆଜା ଅଗୁଇ'ପୁଲେଇ ସେସ୍ଟା ଡେମ'ତା କୁନାଉ ମାଇ ଡେ ମାଡେ, ଆରାକ୍ କି? 26ମାତର୍ ଜୁ, ମାଇ ଆଗୁଲାଇର ଅ'ତୁନାକ୍ସେକ୍ ସୁଁସୁଡେନ୍ । କୁନାଉ କିରିସ୍ଟ ଡ'ସେକ୍ ମୁନା'ରେମଲେ ସତଇସା ମାଗ'ସା' ଡେ ମାଡେ ମା'ଏ ଆମାଇ ମାସା ଆସୁନ୍ତ । 27ମାତର୍ କିରିସ୍ଟ ସୁସାପ୍ବେଲା ମାଇ ଇମ୍ବ'କୁରୁଂ ସାପ୍ତା ଡ'ସେକ୍ ଜାଏସା ଆମାକ୍ତ । ଜୁ, କୁନା ଇମ୍ବ'କୁରୁଂନା ରେମ ଡ'ସେକ୍ ନେଇ' ମାଗ'ତୁନେଇ'” ଡ'ସେକ୍ ସୁନ' ।
28ସା' ଜିସୁଲା ମନ୍ଦିର୍ବକ୍ ଆରେମଲେ ଅମାକ୍ବେଲା ଅବୁଦି ଡକ୍ତି'ତା କିରକ୍ସେକ୍ ସୁନ', “ଅଁ'ଅଁ, ପେ ଆନିଂ ମାଗ'ତୁପେ ମାରି ନିଂ ଇମ୍ବ'କୁରୁଂ ସା'ଗୁତିଂ ଡ'ସେକ୍ସା ମାଗ'ତୁପେ । ମାତର୍ ନିଂ ନିଜର୍ନା ବପୁବୁରଂ ସାକ୍ ଆଡୁତିଂ । ମାତର୍ ଆନିଂ ଜା ବେନ୍ଟାୟ'ତା ମାଇ ସତ୍ବାଇ' । ମାରି ଆମାଇ ପେ ଆମାକ୍ତୁପେ । 29ମାତର୍ ନିଂ ଆମାଇ ମାଗ'ତିଂ ମାସା'ଡ'ନା ନିଂ ମାଇନ୍କୁରୁଂ ସା'ଗୁତିଂ ମାରି ମାଇଉ ଆନିଂ ବେନ୍ଟାୟ'ତା” ଡ'ସେକ୍ ସୁନ' । 30ସା' ଜିସୁଲା ଡି'କେନ୍ ସୁଁସୁବେଲା ମୁନା'ରେମେ ଆମାଇ ସୁସପ୍ପୁଲେଇ ସେସ୍ଟା ଡେମ' । ମାତର୍ ମାଇନା ବେଲା ସୁସାପ୍ ଅରଇ' ଡେଂକୁସା' ଜାଏସା ଆମାଇ ଆସପ୍ତ ।
31ଆତା ଡୁକୁନୁଂ ରେମଲେନ୍ ବିତ୍ରେ ଏନ୍ତୁକ୍ର ମାଇନ୍ବକ୍ ବିସ୍ବାସ୍ ଡେମ'ସେକ୍ ସୁନ' “କୁନା ଇମ୍ବ'ନ୍ ଗୁଲାଇ କାବାକାବା ଡିନ୍ଡେମ୍ବାଇ' କାମ୍ ଡେମ'ତା ଡୁ'ତୁନା କିରିସ୍ଟଲା ସାକ୍ନା ଗୁତୁନ୍କୁରୁଂ ମାର୍ ମା ଅଦିକ୍ ଡେମ୍ତସା'ବେୟାଂ?” ଡ'ସେକ୍ ସୁନ' ।
32ରେମଲେ ଜିସୁନା ବିସୟ କଲେକଲେ ଅଇଁୟ'କୁନୁଂ ପାରୁସିଦଲ୍ନା ରେମଲେ ଅଂଅଁ' । ସା' ମୁନା'ପୁଜାରିଲେ ମାରି ପାରୁସିଦଲ୍ନା ରେମଲେ ମନ୍ଦିର୍ ଜାଗ୍ଲ'କୁନୁଂ ଆ'ଇରସୁଗବକ୍ ଆଜିସୁଲା ସବ' ଇନ୍ଡ୍ରିଂପୁଲେଇ ଜିସୁନ୍ବକ୍ ବେନ୍ଟାୟ' । 33ମାତର୍ ଜିସୁଲା ସୁନ', “ନିଂ ପେବୁରଂ ଉନା ଦିନ୍ଉ ଡୁତିଂ । ମାରି ଆନିଂ ଜା ବେନ୍ଟାୟ'ତା ମାଇନ୍ବକ୍ ନିଂ ମାରି ଉଇତିଂ । 34ମାରି ପେ ଆନିଂ ତୁର୍ତୁପେ ମାତର୍ ସୁସପ୍ ଆବାମ୍ତୁପେ । ମାରି ନିଂ ଆମ୍ବ' ଡୁତିଂ ଆତା ପେ ଉଇ ଆଗଂତୁପେ” ଡ'ସେକ୍ ସୁନ' ।
35ଜିଉଦିରେମଲେନା ମୁନା'ରେମେ ଗୁତୁନ୍ ଅଂଅଁ'ସେକ୍ ସୁନ' “ମାଇ ଇମ୍ବ'ନ୍ ଜାଗାବକ୍ ଉଇତାସା' ନେଇ' ଆମାଇ ଆଜୁତୁନେଇ'ଲେଇ? ମାଇ ମା ଗିରିକ୍ ରେମଲେନ୍ ବିତ୍ରେ ନେନ୍ ଜିଉଦିରେମଲେ ଡୁକୁନୁଂବକ୍ ଉଇସେକ୍ ଆଗିରିକ୍ ରେମଲେ ଅମାକ୍ତିଂ ଡ'ସେକ୍ ଏତ୍ଗୁତାକି ମି? 36ପେ ଆନିଂ ତୁର୍ତୁପେ ମାତର୍ ସୁସପ୍ ଆବାମ୍ତୁପେ ମାରି ନିଂ ଆମ୍ବ' ଡୁତିଂ ଆତା ପେ ଉଇ ଆଗଂତୁପେ ଡ'ସେକ୍ ମାଇ ମା ଡି'କେନ୍ବାଇ' ସୁନ'ତାବେ ୟାଂ?” ଡ'ସେକ୍ ମା'ଏ ମା'ଏଉ ଅଇଁୟ' ।
37ମା'ଏନା ପରବ୍ନା ଡୁନନ୍ଡମ୍ ଦିନ୍ ଡ'ନା ପରବ୍ନା ମୁନା' ଦିନ୍, ଉନ୍ତା ଜିସୁଲା ତଂସେକ୍ ଆରେମଲେ ଡକ୍ତି'ତା କିରକ୍ସେକ୍ ସୁନ': “ଆଜା ଡାଗ୍ ଇ' ଡୁସୁ'ଗୁତା ଡ'ନା ନିଂବକ୍ ସାକ୍ସେକ୍ ଇଡେଇ' । 38ଜା ନିଂବକ୍ ବିସ୍ବାସ୍ ଡେମ୍ତ ମାଇନା ଜିବନ୍ ବିତ୍ରେକୁରୁଂ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂସୁଗ ଜିବନ୍ ବିବେ'ନା ଡାଗ୍ ଜୁଜର୍ ଡା'ଗେ ଜର୍କୁନୁଂସୁଗ ଇସାଉ ଜର୍ତା ।” 39କେନା ମାଇ ମା ଡ'ସେକ୍ ସୁନ'କୁ ଡ'ନା ଆମାଇ ଜାଜା ବିସ୍ବାସ୍ ଡେମ୍ତ ଆମା'ଏ ତିର୍ଗି' ପବିତ୍ର ଆତ୍ମା ବୁମ୍ବାମ୍ନା ବିସୟ ସୁନ'କୁ । ଆଇ'ତୁନ୍ବେଲା ଜାଏସା ପବିତ୍ର ଆତ୍ମା ବୁମ୍ବାମ୍ ଅରଇ' ଡେଂକୁ; ମାସା'ଡ'ନା ଆଜିସୁଲା ମାପ୍ରୁ ଆଇ'ତୁନ୍ବେଲା ମଇମା ବିବେ' ଅରଇ' ଡେଂକୁ ।
ଜିସୁଲା ଜା ଡ'ସେକ୍ ରେମଲେ ପାଲ୍ପାଲ୍ ସୁଁସୁଡେନ୍
40ମାଇ ସୁନ'କୁନୁଂ ରେମଲେ ଅଂଅଁ'ସେକ୍ ଏନ୍ତୁକ୍ର “ସତଇସା କୁନାଉ ଗୁତୁନ୍ ବାବବାଦିଲା” ଡ'ସେକ୍ ସୁନ' ।
41ମାରି ଏନ୍ତୁକ୍ର ସୁନ' “କୁନା କିରିସ୍ଟ” ମାତର୍ ଏନ୍ତୁକ୍ର ସୁନ' “ମା କିରିସ୍ଟଲା ଗାଲିଲିକୁରୁଂ ସାକ୍ବେ'ତ ଇ? 42କିରିସ୍ଟଲା ଡ'ନା ଦାଉଦ୍ନା କୁଲ୍କୁରୁଂ ମାରି ଦାଉଦ୍ଲା ଡୁକୁନୁଂ ବେତ୍ଲିଇମ୍ ଉଂଗମ୍କୁରୁଂ ସାପ୍ତା ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ' ଆଡୁତାସା' ଇ?” ଡ'ସେକ୍ ସୁନ' । 43ସା' ଡୁ'ତୁନା ରେମଲେ ଜିସୁନା ବିସୟ ସୁନ'ସେକ୍ ପାଲ୍ପାଲ୍ ଡେଂଉଇଗା' । 44ମାରି ମା'ଏନ୍ ବିତ୍ରେ ଏନ୍ତୁକ୍ର ଆମାଇ ସୁସପ୍ପୁଲେଇ ସେସ୍ଟା ଡେମ'କୁ । ମାତର୍ ଜାଏସା ଆମାଇ ଆସପ୍ତ ।
45ତିର୍ଗି' ଗୁତୁନ୍ ମନ୍ଦିର୍ ଜାଗ୍ବାରେ ମୁନା'ପୁଜାରିଲେ ମାରି ପାରୁସିଦଲ୍ନା ରେମଲେନ୍ବକ୍ ଆନ୍ଡେଇଁସେକ୍ ସା'ଗା' । ସା' ମା'ଏ ପେ ଆମାଇ ମାସା' ସବ' ଆରିଂତୁପେ ଡ'ସେକ୍ ଆମା'ଏ ଅ'ଗଁସ୍ଲା'ଗା' ।
46ସା' “ମାଇ ଅଇଁୟ'କୁନୁଂସୁଗ ଜାଏସା ଅଇଁୟ'କୁନୁଂ ନେଇ ଇନ୍ଡଇ'ଏସା ଅଂ ଅରଇ'” ଡ'ସେକ୍ ମନ୍ଦିର୍ ଜାଗ୍ବାରେ ସୁନ' ।
47ସା' ପାରୁସିଦଲ୍ନା ରେମଲେ ସୁନ', “ମାଇ ମା ଆପେସା ନାଡାୟ' ଇ? 48ନେଇ ଜାଏସା ମୁନା'ରେମଲେନ୍ ବିତ୍ରେ ଆରା'ଗେ ପାରୁସିଦଲ୍ନା ରେମଲେନ୍ ବିତ୍ରେ ଆମାଇ ବିସ୍ବାସ୍ ଡେମ'ତୁନେଇ ଇ? ଆରାକ୍ । 49ମାତର୍ କେନ୍ ରେମଲେ ଗୁଲାଇର ଆମାଇ ତେଂଗି' ଉଇଗୁତା । ମସାଲା ବେଡ'କୁନୁଂ ନିୟମ୍ ମା ଡ'ସେକ୍ ମା'ଏ ଆମାକ୍ତ । ସା' ମାପ୍ରୁ ଆମା'ଏ ଆନା ବୁଂତ ।”
50 #
ଜଅନ୍ 3:1,2 ନିକଦିମ ଡ'ସେକ୍ ମୁଇନ୍ଡା ମା'ଏନ୍ ଦଲ୍ ବିତ୍ରେ ଡୁକୁ । ମାଇ ଜିସୁନ୍ବକ୍ ସିଁସେଇଁଉ ଉଇକୁଗା' । ମାଇ ସୁନ', 51“ମୁଇନ୍ଡା ମାମା ଡେମ'ନା ମାଇ ମାପୁଲେଇ ଗୁତୁନ୍ ଡେମ'ତା ଡ'ସେକ୍ ମାଇନା ବିସୟରେ ସିଁସେଇଁଉ ମାଗ୍ମାକ୍ ଡୁତା । ତିର୍ଗି'ଉ ଆମାଇ ବଲ୍ରେମକି ଆରାକ୍ ଡ'ସେକ୍ ବିସାର୍ନା ଡୁତା ଡ'ସେକ୍ ନେଇ'ନା ନିୟମ୍ବକ୍ ଆଡୁତା ଇ?” ଡ'ସେକ୍ ସୁନ' ।
52ସା' ମା'ଏ ଆମାଇ ସୁନ' “ନସା ଗାଲିଲି ଉଂଗମ୍ନା ରେମ ଇ? ମାପ୍ରୁନା ଉଲାକ୍ ବଲ୍ ପଡ୍ ଜୁ । ବାବବାଦିଲା ଗାଲିଲି ଉଂଗମ୍କୁରୁଂ ଇନ୍ଡଇ'ଏସା ଆସାପ୍ତା ଡ'ସେକ୍ ଡୁତା ” ଡ' ସୁନ' ।
53ମାରି ମା'ଏ ଗୁଲାଇର ନିଜର୍ ନିଜର୍ନା ଡିଂଅଁବକ୍ ଇ'ଗା' ।
ទើបបានជ្រើសរើសហើយ៖
ଜଅନ୍ 7: BFW
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
CC BY-NC-ND 4.0